يتلي حالة كآبة -- منوا عيالها كانوا بخاص وراحوا حكومة ؟

[( مي )]

قوة بنات










بنتي اليوم داومت اسم الله عليها 3 ابتدائي / حكومة
ومن قبل كانت بالخاص ( حضانة وروضة انقلش بلاي قروب - 1 +2 ابتدائي بالرؤية )
احنا اصلا من البداية ناوين لي الروضة خاص ومن اولى ابتدائي حكومة حالها حال باجي الناس ،، على قولة زوجي احنا عيال الحكومة شنو ضرنا لووووول كبرنا وتزوجنا وتوظفنا ومافينا الا العافية :ch12:

الحين اللي صار نقلناها على 3 ابتدائي ،، استلمت الكتب ،، انصدمت من الإنقليزي
عقب ما كانت تدرس العلوم ( الأرض والبحر والنبات والنجوم والطقس وتكرمون الحيوانات ووايد أشياء ) بالإنقليزي
وكتب الأنقليزي طبعا قوية والقصص الإنقليزية بشكل يومي ،، والبريزينتيشن واللوية كلها بالإنقليزي

اشوف كتابها اليوم ( mum - Dad - nine - one - city ......... )
مستوى حده نازل
حسيت اللي تعلمته بالخاص كله بتبخر
قمة الأحباط ،، ومن اولها اشتغلت الهانم ابلة الإنقليزي عليهم زف ،، بسم الله من اول يوم عشان تكرهم عدل فيها وبالمادة

بنات منو كانوا عيالها بخاص وانتقلوا حكومة ؟
وشلون صار وضعهم بالإنقليزي ؟؟؟؟ وشلون حافظتوا على المستوى اللي كانوا دارسينه بالخاص او رفعتوه ؟​

 

[ام عفاف الكويت]

بنتي بالحضانه والحين بالروضه همن نفس بنتج بلاي قروب
وهذا اللى مخوفني الابتدائي لو كبرت شسوي
الله يعين

 

[( مي )]

مشكورة أم عفاف
انا بنتي كانت بخاص من الحضانة لي نهاية 2 ابتدائي
الحين احس الحكومة انقليزيهم مال الروضة صراحة !!
تحبطت حدي ،، البنت بترجع قري بتتعلم المستوى الأول

 

[( مي )]

محد نقل من خاص لحكومة @@

 

[الفنانه79]

رد : يتلي حالة كآبة -- منوا عيالها كانوا بخاص وراحوا حكومة ؟

انا اعيالي هالسنه اولى ابتدائي كانوا بالكويت الانجليزيه

والحمدلله لحد الحين ماياني هالاحباط يمكن لان المدرسه زينه والصفوف اتهبل ماادري يمكن؟؟؟

لاتحاتين راح تتأقلمين مع الوضع الله يوفقها يارب

 

[حلم الطفولة]

الله يسهل عليهم ويسخر لهم أبلاتهم ، بالنسبه للانجليزي دخليها أنديه ماراح يضرها النقل مي لا تحاتين

 

[ام الدرر]

ياقلبي بالعكس من صالحها بتصير متفوقة بالانجلش
انا عيالي تاسيس امريكا ولدي كملته خاص والحين بتاسع اسم الله عليه
بس بنتي كملتها حكومه عقب الحضانه والروضة على طول
كنت نفسج اقول ياحسرتي بتنسى اللي تعلمته كله بامريكا حسافة
بس والله كانت على طول علامات كاملة والحين بالمتوسط يشركونها ببرامج الاذاعة بالانجلش ومدرسات المادة كلهم يشرقون فيها وهي ماشاءالله للحين تحب اي شي فيه انجليزي
لا تحاتين ياقلبي تعليم الخاص ما ينسي مو مثل الحكومه يدش من اذن ويطلع من الثانيه
عسى الله يوفق عيالج ويبلغج فيهم​

 

[ReeMaN]

انتى لاتخلينها بعد على طول اشتري لها قصص انجليزيه ومجلات يهال واشرطه افلام وباباي انجليزي انشالله ماتنسى لان فعلا حرام تنسى اللي تعلمته بالخاص

 

[ريوومة 1982]

والله انا ناقله ولدي الحين من خاص و يروح ثانيه

بس الصراحه احس اني خذيت فلوسي و حذفتهم بالشارع هباءا منثورا ما شفت و لا 1% فائده بدون مبالغه من الخاص

بالعكس ولدي ما استفاد من الانجليزي ما ادري العيب من ولدي او من المدرسه بس اتوقع ان ولدي مو شاطر اي بس المدارس الخاصه يبون واحد نابغه و فطين و هادي

و هالصفات مو في ولدي

بس اذا انتي بنتج ماشيه ليش تقلتيها حسافه على الانجليزي

و على فكرة ترا المناهج مو بذاك السوء كلها يديده و حلوه و قويه مو سهله لا تحاتين بالعكس حلوه

 

[( مي )]

الفنانة
انتي استانستي من شكل الصفوف ،، انا انقمت قلبي من وحده من الأبلات بالغصب اتكلم على قولة زوجي مو شبعانة نوم أبلتهم ،، اقوله وين أبلات الخاص كشرتهم من هني لي هني يفتحون النفس مع اليهال

حلم الطفولة
والله ودي ،، يبيلها بالصيف دورات وأندية المدارس الخاصة ،، بس راسها يابس تقولي بالعطلة ابي انام واستانس بالبيت لووول

أم الدرر
كلامج درر ورفع معنوياتي ،، اهو صح من صالحها وتكون متفوقة انشالله ،، بس انا ما افكر انها تكون اشطر وحده بصفها كثر ما اني افكر ان المنهج سهل ماراح تطلع بفايدة لان المستوى اللي ادرسته اقوى بوايد ،، ولج مثل هالدعوة حبيبتي

ريمان
اي والله صح ،، اليوم اقولها عقب من انصدمت من كتابها ،، قلت لها شوفي ماما ،، ترى كل ويك اند بعطيج قصة بالأنقليزي تقرينها مثل ما كنا نسوي بمدارسج القديمة ،، طبعا مدت البوز لوووول

ريومة
انا نقلتها لأن الخطة ان عيالي ادخلهم خاص من الحضانة لي نهاية الروضة ومن اولى ابتدائي انقلهم حكومة ،، بس انا مصختها عجبني الوضع وكل سنة اقول لزوجي هذي آخر سنة بالخاص لووول


مشكوريييين بنات كلكم
الله يوفقك عيالكم يارب

 

[ريوومة 1982]

بالعكس ما ادري عن مدرستكم انا اليوم وديت ولدي مدرسه الاحمديه بالمنصوريه وايد كان استقبال الابلات حلو

و راقي حتى ولدي ماكش منهم بالعكس يقول الابلات ماما ما يصرخون حيل مثل مدرسة ....... اللي قبل

و استغرب من كون الابلات كويتيات كان عنده عجبه

و ما ادري انا مدرسه بعد و مو كل الابلات نفس اللي شفتهيها على حظج انا اشوف المدرسات خصوصا الكويتيات يعاملون اليهال مثل عيالهم حتى الياهل يرتاح اما الخاص يعاملونه مثل الاله بس يبونه يحفظ يحفظ

يزهقونه بس اتوقع ان الرؤيه وايد شديدن الله يعن بنتج يقولون 8 حصص و الانجليزي صعب صدقيني بنتج راح تحس بالراحه مو مثل الخاص

انا عندي الخاص حرب نفسي الحمد الله الله يعز الكويت

عمااااااااااااااااااااااااااااااااااااااااااااااااااااااار يا كويت

 

[( مي )]

ريومة
تدرىن الرؤية ما كنت اسميها مدرسة ،، كنت اسميها المعتقل لووول ،، لا امتحاناتهم تخلص ولا البريزينتيشن يخلص ولا الحفظ يخلص ولا الأبحاث تخلص ولا توزيعهم للأوراق والطلبات يخلص ولا الواجبات تخلص ،، شي مو طبيعي ،، بس للأمانة ماشالله يدرسونهم من قلب ترد البيت محفظينها كل مادة وكل درس بس ضغط ضغط ضغط مو طبيعي وبعد المريح عندهم شغلة جان زين يمشون عليها بالحكومة ،، جدول اسبوعي يتوزع عليهم بكل الواجبات اللي عندهم بكل مادة طول الاسبوع ،، عالأقل نضمن ترد البيت مو ناسية شنو واجباتها ،، ويا معودة ريحتيني بمعاملة الابلات ،، وانا ما خفت الا من اللي اسمعه ،، دوم يقولون لي ترد البيت مو فاهمة شي لان التدريس أي كلام من تجربة الناس

وانشالله كلامهم ما يكون معمم
والله يعطيج العافية

 

[أم جوري]

رد : يتلي حالة كآبة -- منوا عيالها كانوا بخاص وراحوا حكومة ؟

عاد نفس الشي عيالي كانوا بخاص ونقلتهم للحكومة
اول يوم لولدي بمدرسة ملا صالح اللي بالفنطاس يلوعون الجبد من اولها صراخ هههه
اما مدرسة فاطمة الحقان احسها مرتبة وان شاء الله ربي بيسخر لبنتي معلمات بنات حلال ان شاء الله ..
اما الثالثة فثانية روضة ..
بس الله يعين ما لنا غير نعي لهم ونهتم فيهم ونشجعهم عالقراءة والاطلاع .. ونتابعهم اول بأول

 

[Gipsy Queen]

alah y3eeeeen

 

[للصبر اخر]

رد : يتلي حالة كآبة -- منوا عيالها كانوا بخاص وراحوا حكومة ؟

مي لازم يكون مستوى اولى جذيه لانه عيالنا كانوا بالروضه مايعطونهم انغلش فصعبه يبلشون معاهم قصص
وقواعد وهالسوالف وصدقيني اذا بنتج عارفه وفاهمه الانجلش ماراح تنسى وانتي
على اشتري لها قصص وكتب تعلميه

 

[meen_ana]

حبووبه دخلي معهد البريطاني وايد زين ويمدحوونه خليها العصر تروح ورة حل الواجبات يراجعون لها ويطرون من مستواها

 

[وحش الريم]

..........شوفي قلبي انا نقلت ولدي العود من الغانم بخامس وديته النجاة الحين اهو بسابع مثل ما قالت وحده من الخوات
متفوق وبالانجليزي ممتاز وكله فل ماركس.......بس بالرياضيات متعبني
الحين وهذه اللي الله يستر منها هالسنه بنتي اللي برابع وولدي باولي هم وديتهم حكومه.............ومن اول يوم تتحلطم
ومو عاجبها شي طبعا انا ما دشيت ما شفت مدرستها من داخل ولا مدرساتها......الله يستر ويحفظ عيالنا بحفظه
لاتحاتين اللي عنده ام مثلج ماعليه الا العافيه..........الله يصلحهم ويبارك لنا فيهم

 

[كويتية صغيرة]

رد : يتلي حالة كآبة -- منوا عيالها كانوا بخاص وراحوا حكومة ؟

ترى مدارس الحكومة مو كلها نفس الشي ..... حسب الإدارة
في مدارس الإدارة تهبل و المدرسات وايد حليوين ...
انا بس اقول الله يعينا على المناهج الصعبة .....كلها غيروها و صارت مشابهة للمدارس الخاصة بس باللغة العربية

ألحين كل المراحل غيرو المناهج و صارت وايد صعبة و يبيلها دراسة خصوصا العلوم و الرياضيات
و انا سمعت ان بالمستقبل راح يتغير منهج الانجليزي بعد ...لكن هذي المرحلة بعد مايتطبق تدريس المواد الأساسية بالروضة
انتى لاتقارنين بمدرسة الرؤية ....هذه المدرسة معروفة شديدة و تضغط على الياهل و كثرة واجبات حتى الياهل مايعيش عمره ...
ألحين الحمدلله بنتك تأسست صح و انتى تابعيها بمعهد انجليزي العصر علشان ماتنسى اللغة بس
بس باقي المواد .... انتى نطري لما تروح رابعة حكومة و شوفي المناهج الصعبة و لما يصير في نجاح و سقوط و التعاريف و المصطلحات ....راح تطقين على راسك .... و يمكن كلامك هذا كله تغيرين رايك فيه

 

[قمر ضاوي33]

انا بنتي كانت بالخاص اولى وثانية روضة

ونقلتها الحين الحكومة

مدرستها وايد زينة ومدرساتها زينين بس اهي لحد الحين مو متقبلة الوضع بعد
ضايعة بالطوشة

وبالنسبة لمنهج الإنجليزي الحكومة مستواها كلش مو ذاك الزود

 

[أم عبووووود]

هلا حبيبتي

انا عيالي كانوا بالخاص ونقلتهم الى الحكومة وكان ولدي كبر بنتج واسم الله عليهم وربي يحفظهم ما اثر عليهم بالعكس الانجليزي تم عندهم قوي بس طولي بالج ولا تحاتين وصدقيني منهج الحكومة قوي بس يعتمد عالابلات وعليج بالبيت ان شالله اكون فدتج واي سؤال انا بالخدمة

ربي يوفق عيالي وعيالج