وحدة / حزن / فراق أحبه / عُزلة وانطواء ! .. ساعدوني وأسعدوني !

[لحظآتَ]

السلام عليكم ... مساكم الله بالخير حبيباتي

,

هذا أول موضوع لي بالقسم .. وبجتهد كثر ما أقدر إني أصيغه لكم بشكل سلس ومَرن عشان يوصل لقلوبكم بدون حواجز ... بإذن الله ... :eh_s(7):

/


كثرانة بالآونة الأخيرة هالجُمل .. وين ما نروح نسمعها أو نقرأها هني بعالم النت !

- أنا أحبه .. ووعدني بالزواج بس مايقدر أهله زوجوه قريبته وبموت لإنه تركني !!!

- أنا متعلقه فيه وضميري مأنبني وخايفه وبالوقت نفسه مو قادره أهده !!!

- أنا أحس بالوحدة والخَواء .. ومحد فاهمني .. والناس من حولي كل واحد لاهي بنفسه !!!

- حاسة بالاكتئاب .. الناس تغيرت والحياة بكبرها تغيرت .. وودي الماضي يرجع ماقدر استمر بوضعي الحالي !


:


وإلى آخر هالجُمل السلبيـة .. والمشاعر الكئيبة !!




حبيباتي .. أنا اللي أكلمكم الحين .. إنسانة وحيدة تقريباً .. رغم ان أهلي حولي !
واحبهم ويحبوني ولله الحمد .. بس هم أحس بوحدة ! مدري شنو مصدرها !!
رغم إني كنت بيوم من الأيام انسانة اجتماعية لأقصى حد .. وعلاقاتي كثيرة وأحب الناس !!
بس فجأة اعتفس حالي وصرت مُتطرفة .. وأفكر بسوداوية ليما تلاشت كل هالصداقات !
وبسبب إرادتي انا !!! أو خنقول بسبب قرادتي انا !!




لكن حاولت كثر ما اقدر .. ما استسلم لليأس .. ولا أخلي شعوري بالوحدة يمتص رحيق أيامي !
انا توني شابه وبأحلى سنوات العمر ليش اضيعها عشاني [ فشلت اجتماعياً .. ] !!
ليش أدور سعادتي عند فلانة وعلانه .!! وأنا محد يعرف يسعدني غيري !
محد يعرف مفاتيح قلبي غيري !

[ صحيح ان جنة بدون ناس ما تنداس ] .. بس من وين أجيب الناس اللي يناسبون ميولي؟
أنحرم من الجنة عشان ما فيها ناس؟!
طيب أعيش فيها واستمتع فيها ليما يجون الناس ولكل حادث حديث !
صح ولالا ؟

بمعنى :- أخلي فشلي الاجتماعي شمّاعة أعلق عليها كل أخطائي وسلوكياتي ومشاعري السيئة !!




**


اللي بوصله لكم جميعاً .. إن السعادة شيء نسبي .. أسبابها تختلف من شخص للآخر !
بهذي أتفق وياكم و تتفقون وياي إن شاء الله !
لكن أكبر غلط ان نخلي سعادتنا مقترنة بشخص ولا بحدث مُعين !
وتنتهي بمجرد انتهاء الحدث و رحيل الشخص !

:


يقولكم .. انظروا دائماً للجزء المملوء من الكوب ...
يعني لاصار قدامج كوب نصه فيه ماي ونصه فاضي ..
لا تركزين عالجزء الفارغ ركزي عالجزء المُمتلئ !


ايضاً بحياتنا الواقعيه .. لو نركز عالجزء المملوء مستحيل نقرأ مواضيع بالهبل هني بالمنتدى!

عن الوحدة والانطواء والاكتئاب .. والحزن !

الفراق .. التعاسة .. عدم وجود من يفهم أو يتفهّم !!



^^^^^^


عمر الحلول ماراح نلقاها بيد الغير !
مثل ما السعادة ما هي بيد الغير !
سعادتج وحلول كل مشاكلج .. بيدج انتي
دوري عليها بداخل نفسج .. و لابد تلقين ثغرات كثييييييييرة تقودج للسعادة ..


/


أخبر نقطة حبيت أتكلم فيها هي [ الماضي ]
دائم الإنسان بفطرته يحن للماضي بشكل كبير وبعض الشخصيات الحساسة تحن له بشكل مفرط ومبالغ فيه !
الماضي دائم بنظرنا أحلى وأجمل وأمتع من الحاضر !
عشان جذيه أغلبنا يحس بحزن لو قارن حاضره بماضيه ويحس انه وحيد وسعادته خافتة !

هذا يرجع لمنظور الإحباط اللي ننظر للأشياء من خلاله !
حنا بالماضي كانت لحظاتنا عاديه وأغلبنا عايشين بملل وفتور وما كان يخطر ع بالنا ان بنشتاق لهذيك اللحظات ونبجي عليها ! صح؟؟
مثل ايام الدراسه .. وايام الطفولة .. وايام الملجة وأول العرس ..
[ وبدايات أي حياة جديده .. دايم نشتاق لهااا ] رغم ان بوقتها كانت شيء عصيب أو عادي ومُمل !

لكن لما مر الوقت قمنا نشتاق لها باستماتة !! ونبجي عليهااا !

نفس الشيء .. خلونا نتفاءَل شوي بحاضرنا / لإنا بالمستقبل راح نشتاق لأيامنا هذي
وراح نحن لها حييييييييل حيل !
فليش نترسها كآآبه وحزن وتعاسة !
شاللي بنشتاق له لو أيامنا كلها حزن وهم ؟
خل نترس أيامنا وناسة وبهجة .. حتى لو من نفسج لـ نفسج !
مو ضروري تصنعين ماضيج مع الآخرين !!! عشان تحنّين له !!

أتمنى وصّلكم اللي بوصله لكم ..

واسمحولي حيل طولت عليكم بس ما أنا اأعاني من عجز كبير بمسألة الاختصار ..

:eh_s(7):


​

 

[::blackrose::]

مشكوووره على الموضووع

فعلا انا اشوف انه الانسان اسير افكاره

بمعنى اذا فكر بسلبيه
كل المشاعر السلبيه من الاحباط والاكتئاب والحزن والضيقه والهم بتسيطر عليه والناس بتحس فيه وتبتعد عنه لانه طاقته سلبيه

لكن لو فكر بايجابيه راح يكون مثل المغناطيس يجذب له الناس

يعطيييج العافيه مره ثانيه

 

[لحظآتَ]

بالضبط
هذا اللي أقصده ياقلبي

الله يعافيج ويسلمج يارب ..
حياج الله نورتي ^^

 

[قلبي وينك]

اهم شئ أنه يكون هناك ناس تهمهم مشاعرنا ومصلحتنا علشان يشجعونا وينبهونا ويشدون من عزمنا على التعايش والتكيف
الانسان لوحده ما يقدر يغير قاعدة افكاره او انه يتقدم بمشاعره وظروفه خطوه افضل لكن احبذ انه يكون هناك ناس حولينا نلمهم ونشجعهم على عيشتهم وظروفهم لانه الانسان سريع التـأثير بأفكار غيره

 

[سفييره الكويت]

الانسان عباره عن ماضي وحاضر ومستقبل تسجل الذاكره كل ما مضى وتستعرضه باوقات نختلي فيها مع انفسنا وتسبب لنا

الاحساس بالحزن..

اعتقد الانسان يحتاج ان يكون صديق نفسه لانه لا احد سيحبك اكثر من نفسك للاسف هذا الواقع ..!

 

[Ruwaishdawya]

كلامج صح
يعطيج العآفييـه :eh_s(17):

 

[فلنتينو]

اهم شي الصحه والعافيه

 

[LiL LiLeY]

اي والله

حياتي يعطيج العافية

كلامج حيل عجبني

 

[عضوا]

يعطيج العافيه على الكلام اللي يريح
بس ساعات الواحد من كثر ما هو قاعد في البيت
يمل
ودة يسوي شي
يطفش
هذي حالتي
عل العموم مشكوورة عل الموضوع

 

[راقية بذوقها]

موضوووع جدا رائع تشكرااااات خيتوووووووو ماقصرتي

 

[Tom ♥ Jerry]

.

لي بآك :eh_s(22):

-مثُبَت- لـ "آسبوع"

 

[حنان الحربيه]

كلامك حلو
بس الواقع غير
احنا بشر لنا احساس لنا مشاعر
نبي نحس ان احنا عايشين في الحياه
اجل ليش ندرس ونتعلم ونتعب
واخرتها اقابل الشهادات بين اربع جدران
الكل لاهي في حياته من وظيفه وعائله
بس اذا ماعندك مسوؤليه اي شي
بتحسين بكتئاب بملل بضيقة صدر
لان بتحسين انك عايش صفر على الشمال
مهما حاولتي تغير فكرك للاجابي مافيه شي يشجعك على الاستمرار
حاولت اكثر من مره بس ماقدرت
انا اعشق القراءه قبل فتره رحت للمكتبه واخذت كل الكتب للي في خاطري
فتحت اول صفحه من الكتاب وسكرته عارفه ليش لان اللي كانوا يشاركوني مناقشة الكتب للي نقراها
مشغولين بحياتهم كرهت حتى اني امسك كتاب


على لعموم و مشكوره على كلامك

الله يعطيك العافيه

 

[لحظآتَ]

قلبي وينك ..


أنا أتفق وياج أكيد بدليل إني سبق وكتبت [ جنة بدون ناس ما تنداس ]
بس على افتراض ما حصلنا هالناس اللي يوقفون وياانا !!
ما لقينا ناس تشد على ايدنا بوقت الشدة !!
وتفرح معانا بوقت الرخاء !!
شنسوي؟ نقعد نلطم ؟؟
مو كل شخص محظوظ بحياته وقادر على ايجاد ناس صادقه وسويّة يتعامل وياها !
فيه ناس فاشلة اجتماعياً .. ومو قادرة تتكيف مع البشر وكل فترة تخسر من اعز ناسها !
هني دورج انتي تساعدين نفسج بنفسج !!
يعني لقيتي ناس زينه وفيه صادقه مخلصه خير وبركه
مالقيتي .. هم خير وبركة ما اخلي حياتي توقف !!!
هذا بس اللي بوصله ..
والله يسعدج يارب وحياج الله ..........

/




سفيرة الكويت


بالضبط هذا اللي قصدته !
استعراض الماضي هو اللي يتسبب بنوبات حزن ومقارنة بين الوضع الراهن وما مضى !!
عشان جذيه تلقين أسير االماضي دايم حزين ومهموم!
ويتغنى بماضيه ومتجاهل مستقبله وحاضره !!
وأتفق معاج حيييل
الإنسان اذا مالقى اللي يعينه ..
يصادق نفسه هالشيء أريح
حياج الله حبيبتي ...

/




رويشداوية ... ^_^
الله يعافيج ياقلبي هلا بج ..





:

فلنتينوووو ...

بكل تأكيد اهم شيء الصحه والعافيه
عسى ربي يمتعج بصحتج وعافيتج يارب



:

LiL

حياتي والله اهم شيء ان كلامي وصل وعجبج
تسلمين والله يعافيج يارب
:



عضوا ..


شيء أكيد !
هني الإنسان مو عارف حق نفسه !!!
فيه واجد ناس وهالشيء واقعي وربي مو مجرد كلام!!
تسعد نفسها بنفسها !!!
تشغل وقتها بأشياء كثيرة
لكن الشخص الكسول اللي كل شيء مو عاجبه وماوده يسوي ويفعل !!
شيء طبيعي بيحس بملل وطفش !
لإن روتينه واحد .. ونمط حياته واحد !
كل إنسان يعرف شلون يسعد نفسه بس حنا بحاجة نفهم أنفسنا اكثر !!
والعفو ياقلبي عسى ربي يسعدج ويبعد عنج الضيق والملل

/

 

[لحظآتَ]

راقية بذوقهااا ..


العفو ياقلبي تسلمين والله ياذوق
:





Tom & Jerry ..



حي الله الإنسانة الحكيمة اللي انا شخصياً مُعجبة بأسلوبها حيل
حبيبتني تنورين بأي وقت ..
وأشكرج عالتثبيت .. ما قصرتي ... ^^

:





حنان الحربية ....]




أنا أتفق وياج كُليّا بمسألة ان الواقع شوي أصعب
ويبيله صبر أثناء التطبيق .. ويبيله قوّة !!
والإنسان لو ما حس انه مُثمر وفعّال !
أكيد راح يحس بإحباط وضيقة صدر .. لإن الشيطان بيدخله من مداخل كثير
أولها بيحسسه انه غير منتج ووجوده مثل عدمه ..
لكن هل كل انسان يشتغل وعنده مسؤوليات سعيد بحياته ؟؟
حبيبتي الإنسان كائن طماع .. وما يعجبه العجب ..
لإنه دايم ينظر للأشياء اللي تنقصه مستحيل ينظر للأشياء المتوافرة له ..
بمعنى انتي وجودج بالبيت بدون وظيفه سبب لج هم وضيقه صدر
غيرج .. يحسدج ويتمنى يقعد بدون وظيفه ومسؤوليات ..
لإن ببساطة هذا طبع بني آدم ..
وهالشيء ناتج من كون الاغلبيه مو فاهمين هم شنو يبون بالضبط !!
:

نجي لمسأله القراءة ..
قلتي ما ابي اقرأ لان اللي كنت اناقشهم راحوا !!!
شفتي؟
انتي علقتي اسباب استمتاعج بالقراءة بناس مُعينه راحت ! ورحلت !!
ليش هل انتي تقرين عشان تناقشين هالناس بس؟؟
اولاً القراءة لها اكثر من فايده
المعرفه .. شغل وقت الفراغ ... مناقشة الآخرين
كاهي مواقع النت .. اقصاها بالمنتدى هني
نادي الكتاب البنات مو مقصرين بمواضيع المناقشات !
غير بقية المواقع المختصة بمناقشة الكُتب !!!
بإمكانج تستبدلين شيء بشيء .. لما تتأقلمين عالوضع !
بس انتي تتذكرين ماضيج بالناس اللي فيه ..
وتتولّد عندج نظرة تشاؤم لحاضرج !!
أتمنى من عُمق قلبي يا اختي حنان ..
تفكرين بكلامي بعمق .. والله والله سعادتج بداخلج ..
موب شهايد ولا وظايف ولا ناس نناقشهم ونقضي وقت فراغنا وياهم !!!!

:

الله يسعدج يارب ويعافيج ويسلمج

 

[اسيل الصمت]

يعطيج العافيه حبيبتي
كلامج رووعه

 

[Sweet Angle]

اي والله ياقلبي كلامج مثل البلسم ماشاء الله عليج

شكثر بجينا وراح نبجي هاذي الحياة يوم ضحكة ويوم حزن ويوم فرحة وجذي .. وتستمر حياتنا وايامنا
وكل يوم فيها , اهو من حساب عمرنا وصحتنا و الوقت اللي باقيلنا فالدنيا

علشان جذي ما تستاهل نبجي على انسان خذلنا , و لا انسانة ظلمتنا , ولا حتى ماضي , لان ايامنا هاذي راح تكون يوم من الايام هم بعد ماضي ,,

مو معناته انه قلوبنا قاسية اكيد بيي يوم بنحن ونبجي بس مو معناته نرافج الحزن

عن تجربة كانت اوضاعي صعبة صعبة , تدرين شلون مثل لما تمشين ب دايرة مغلقة , اللي يصير اليوم يصير باجر , و هم اليوم هو هم باجر ,

بس صج اللي يتقرب من الله عمره عمره عمره مابيضيع , واللي بيقرر التغير ويبي ايتغير راح ايتغير ,

شكثر ذكريات حزينة و موشي وصعبة عند كل انسان فينا , بس اسمها ذكرى , مو حرام نعيش كل ايامنا الياية في وهم هالذكرى ؟


لو فاشلة اجتماعياً جربي مرة ومرتين وثلاث .. ومليون ,, وراح اتصيرين اجتماعية
ولو فاشلة في اي شي فالدنيا , قرري انج تغيرين هالفشل لنجاح و الدمعة لإبتسامة , وراح تقدرين

اهم شي تقوى الله , من اتقى الله جعل الله له من كل هم مخرجا

طولت عليج بالحجي بس موضوعج فتح اورآق جديمة

قواج الله حياتي و كلامج درر وروعة ,, ان شاء الله بميزان حسناتج يارب ,,

والله يقوينا ع التغيير و يبعد كل لحزن وهم و ضيج عن قلوبنا و قلوب المسلمين يارب

 

[لحظآتَ]

اي والله ياقلبي كلامج مثل البلسم ماشاء الله عليج

شكثر بجينا وراح نبجي هاذي الحياة يوم ضحكة ويوم حزن ويوم فرحة وجذي .. وتستمر حياتنا وايامنا

وكل يوم فيها , اهو من حساب عمرنا وصحتنا و الوقت اللي باقيلنا فالدنيا​

علشان جذي ما تستاهل نبجي على انسان خذلنا , و لا انسانة ظلمتنا , ولا حتى ماضي , لان ايامنا هاذي راح تكون يوم من الايام هم بعد ماضي ,,​

مو معناته انه قلوبنا قاسية اكيد بيي يوم بنحن ونبجي بس مو معناته نرافج الحزن​

عن تجربة كانت اوضاعي صعبة صعبة , تدرين شلون مثل لما تمشين ب دايرة مغلقة , اللي يصير اليوم يصير باجر , و هم اليوم هو هم باجر ,​

بس صج اللي يتقرب من الله عمره عمره عمره مابيضيع , واللي بيقرر التغير ويبي ايتغير راح ايتغير ,​

شكثر ذكريات حزينة و موشي وصعبة عند كل انسان فينا , بس اسمها ذكرى , مو حرام نعيش كل ايامنا الياية في وهم هالذكرى ؟​

لو فاشلة اجتماعياً جربي مرة ومرتين وثلاث .. ومليون ,, وراح اتصيرين اجتماعية
ولو فاشلة في اي شي فالدنيا , قرري انج تغيرين هالفشل لنجاح و الدمعة لإبتسامة , وراح تقدرين​

اهم شي تقوى الله , من اتقى الله جعل الله له من كل هم مخرجا​

طولت عليج بالحجي بس موضوعج فتح اورآق جديمة​

قواج الله حياتي و كلامج درر وروعة ,, ان شاء الله بميزان حسناتج يارب ,,​

والله يقوينا ع التغيير و يبعد كل لحزن وهم و ضيج عن قلوبنا و قلوب المسلمين يارب ​

أسيل الصمت .. حياج الله حياتي منوره الموضوع

/​

سويت آنجل ... :eh_s(22):​

بعد عمري بالعكس ردج حييييييييل لامسني وحاسه بكل كلمة تقولينها​

شعور حيل مؤذي إنج تمشين بدائره مفرغه .. يومج مثل أمسج مثل باجر !​

وعلى هالموال ..​

لكن صدقتي التقرب من ربي هو اللي يحلي نكهة ايامنا .. ويخلي لها معنى ..​

حتى سبحان الله نصير نشوفها بطريقة حلوه وفرايحيه تختلف عن الطريقة السوداويه السابقه​

الله يحمينا من شر أنفسنا ومن وساااوس الشيطان الرجيم ...​

كل المعاناة والفراغ والملل والمشاعر السلبيه هي محاولات شيطانية ...​

تقودنا بالنهاية للشعور بالاكتئاب .. لكن علاجها معروف ويبيله دوام وثبات وصبر​

الله يغمرنا بالراحه والسكينه​

ويدوم عليج هالسعادة والرضا ياقلبي​

نورتيني وحياج الله :eh_s(22):​

 

[Tom ♥ Jerry]

.



Back :eh_s(22):

يعني مادري شقول اكثر من الي كتبتيه بالموضوع ماشالله عليج
و هم ردود البنات كفت و وفت ..

السعاده مثل ما قلتي بايد الشخص نفسه
اهوة بايده يخلي نفسه سعيد او انه يعيش بتعاسه مدى الحياه ..
طبعا السعاده ما تكمل الا بالقرب من الله عزوجل اولا !

يعني واحد ما يعرف وين القبله هاذي اكيد سعادته بتكون مؤقته بس !! :eh_s(15):
بس الي يعرف ربه و مؤمن بانه السعاده بايد الله وحده ..
سـ يعيش سعيد مدى العمر :rerrerek:

حتى لو محد يمه أو ما عنده اصدقاء مقربين منه !
و حتى لو عنده بعض المشاكل الي تواجهه في حياته ..

كلنا لنا مشاكل بس الشاطر الي يعرف شلون يصغر من حجم المشكله ما يكبرها !
و يعرف يفكر بالمشكله صح ، و يحاول بشتى الطرق انه يحل هالمشكله
بكل هدوء و راحه بال .. دون عصبيه و انفعال
لانه العصبيه بتييب الامراض على الفاضي ،

الانسان يقدر يغير مجرى حياته و يقلب حياته 180 درجه
بس بعقل و ذوق ، و هم يقدر يعيش سعيد !
بعقل و ذوق

كل شي كل شي بايدج انتي مو بايد احد ثاني
لا تربطين سعادتج بـ شخص معين
حبيبج خلاج ؟ ريلج طلقج ؟ رفيجتج ظلمتج و راحت ؟ .. آلخ
ترا كل شي يصير خيره و الله كاتبلج اياه :eh_s(22):
انتي بس قولي الحمد لله على كل حال و الدنيا عمرها ما توقف على شخص واحد
ياما و ياما انصدمنا بناس وايد للاسف و الحياه مستمره !
باجر الله يعوضج بلي احسن و احلى و افضل منهم مليون مره ..

 

[دلوعة أبوهآ]

هآلموضوع من أول يوم نزل !! وآنا نآويه أرد وآعلّق ..
لآنه يستآهل آلرد ومفيد ..!
بس كل مره آدخل بآلوقت آلضآيع ومآمداني أرد ..




,

لحظآت

تسلم يمينك
لي بآك بإذن آلله ... *

 

[^^roma^^]

كلااام قوووي وجمييل..
الشخص لما يقرى سطروج يشعر بالرآحه ..
قوآج الله حبيبتي ​