نفسيتي تعبانه( حلمي راح يضيع )

[أم تروكـ]

رد : نفسيتي تعبانه( حلمي راح يضيع )

لاحبيبتي لاتستكتين .. الحين وبهالزمن محد يعيش غير اللي عنده شهاده

انتي ماتدرين شراح يصير بعدين ولا شنو بتكون الظروووف خلي شهادتج سلاح لج

ماراح ينفعج بعدين لاقعدتي وانتي عندج الثانويه ( الحين الثانويه صارت صعبه من ناحية التوظيف)

انتي قوليله اوكي انا ماراح اشتغل بس باخذ الشهااده واقعد واذا مافاد معاه خلي احد يكلمه بس ديربالج تسكتين

والله يكتب اللي فيه الخير ان شاءالله ..

 

[الاسطورة]

ممكن سؤال
حبوبه انتي ريلج شنو شهادته
لان في رياييل ما يحبون ان المره تتفوق عليهم بالدراسه
يعني اذا اهو امخلص ثانويه ما يبيج اتصير جامعيه


لا تقومون علي بنات انا قلت بعض مو كل



المهم حبيبتي قوليله انا بس ابي ادرس وما ابي اشتغل
ومني لي 4 سنوات يمكن يكون تغير ويخليج تشتغلين


والله يسهل امورج

 

[هيبة ملك]

تتعبين وتتوظفين وفي الناية يناشبج عالمعاش

ويقط كل شئ براسج

يبه خليج على بيتج وعيالج والله يسخر لج

 

[وتلومني فيك يوم اغليك]

والله بهذ1 الزمن مااتنفعج غيرج وظيفتج اهي اللي ترزج رز

اقنعييييييييييه جيبيه من راسه لين ماااااايقتننننع

انا رافض اكمل الثاانويه بس تخيلي رابعه بس اكملهااا واقنعته فيهاا واللحين يقول التجاري ماافيه قلت بدخله بطييييييب ولا بالغصب هذذ مستقبلي اهوا اللي بينفعنا بعدين وانت اللي بتشكرني عليه لاكبروا العيال وكثرت مصااريفهم

والله يوفقج وياه يارب

 

[املى كبير]

انا زوجى طلعنى من الكليه

وانا اول سنه فيها

وحاولت قبل كلللش موموافق بجيت صحت

زعلت كلش موموافق

وانا شريت رااااحتى وقعدت فى بيتى وخليته يكد على هو يتحمل

والله انى مرتاحه كيفه هو يتحمل هو يبى يتحمل كل شئ

الحمدالله مرتااحه عند عيالى ولامحاتاة ولاشئ

والمصرف الحمدالله اقتصدى حبيبتى

وصدقينى زوجج لو موشايف ان حالكم ميسور جان هو قالج روحى توظفى

فاقولى الحمدالله وخليه هو يكد على عيالج ويتحمل مسئوليتهم

باجر لاتوظفتى كل شئ علييييييييج تصيرين انتى الرجال

فارضى بنصيبج واحمدى ربج

والله يهديه لج

 

[الصعيريه]

رد : نفسيتي تعبانه( حلمي راح يضيع )

لاتهدمين حياتج بسبة دراسه دامه مومقصر معاكم ولاتخليين الدراسه أكبر همج أبدى ماعليج زوجج وعيالج

انا كنت ادرس ولما تزوجت قعدني ونفس الشي بدوون أسباب

والحمدالله عمري ماتهاوشت ولا حاولت اخرب حياتي على شان الدراسه


وانا قبل كان طموحي اصير مدرسه بس الحين طموحي اكون ام وزوجه مثاليه...


والله يووفقج ويكتبلج الخير

 

[ام يوسف الكويت]

انا ريلي راضي اني اكمل بالكويت
ولمن ييت قتله بكمل بمصر رفض وقعدت اساحل فيه شهور وابوسه واهمزه واتنهوص واتبجبج ليمن رضى ههههههههه
بلاخير لمن رضى انا تكيسلت وهونت لوول
يعني اذا زوجج عنيد نفس زوجي مالج الا المساحل
قوليله طلب العلم عباده والحياه صارت غااااليه وانا ابي اساعدك بالمصاريف وابي اكشخ واصرف على نفسي حالي حال الحريم ومن هالجي بمساااااااااااحل طبعا
واذا مارضى اخذي موقف صااارم منه لان الشهاده بالنسبه لي اهم من الزوج .. الشهاده عزوه وسند لج اما الزوج مو دايم باجر لي الوحده زوجها مات او انفصلت عنه منو بينفعها وهي ما عندها شهاده ولا معاااااش ؟؟؟؟؟

 

[بتبوتااا]

حياتي حاولي تفتحين معاه الموضوع بهدوء وجو مناسب قوليله ما ابيك ترد الحين فكر عدل وبعدين رد احنا ورانا عيال ومصاريف ومن هالكلام وان شاء الله يقتنع ويوافق ترى كل شي بالمسايس يصير ان شاء الله ..

 

[....q8....]

بالعكس اقنعي زوجج بالهداوه .. والله معاي بالكليه مو بناات ..حرريم كبار ويكملوندراستهم فانتي اذا عيالج صغار يكون احسن واحسن ..

شوفي انا اعرف وحده معاي بالكليه تقريبا بعمرج بالعشرينات وعندها عيال .. قالت انا بس باخذ الشهاده وما راح اشتغل!! انا انصدمت قلت لها تكرفين وتدرسين واخر شي ما تشتغلين .. جان تقولي لا حبيبتي الشهاده سند ..

و انتي ما تدرين شنو راح يصير بالمستقبل ..

وهم يمكن عدم دارستج خيره لج .. الخيره فيما اختاره الله

وانتي استخيري وشوفي ؟

 

[الغاليه نونو]

شوفي يمه اذا دراستج مشروطه بعقد الزواج اهني لازم يوافق ويخليج تكملين بس اذا مو مشروطه الواجب انج تطيعين ريلج بوعيالج وطاعته عباده والله سبحانه امر الحرمه بطاعة ريلها حبوبه اذا ريلج مقتدر ومومقصر عليج ماله داعي تكملين وتسوين مشكله من ولا شي لا حقه مرده بيوافق بس الايام اهي اللي بتغيره مو بيوم وليله واذا حالته علي قده وتشوفين ان معاشه مو مكفيكم ترا الجود من الماجود يمه وربي ما أمر بالتبذير ياما ناس ياكلون الغدا ومحرومين من العشا وكاهم ربي موفقهم وشحليلهم بالقناعه والرضا باللي ربي كاتبه لهم

اللي بوصله لج يمه لوتدرسين وتصيرين وزيره بالكونغرس مردج بيتج وعيالج وريلج بس اشعقبه عقب مايشيب راسج ومالج خلق هذيج الساعه تطاولين الريال قلاص الماي
دامه مستانس فيج ومقتنع قوليله انته بكالريوسي ودكتوراتي ومادري شنو شهادات العليا ههههههههههههه والله ماكو احسن من مجابل البيت والريل يااااااازين مقابل خشته زيناااااااااااااااه وياحلاته لي صار باجر شايب وقال لج يامره لا تذيدين الثكر بالثاي ترا الثكر عندي مرتفع اثوي



هونيها وتهووووووووووووووووووووووووووووووون وبلاش الكلام ده تاني يابنتي

 

[احلى سماء]

غلطانين اهلج

ليش ما اشرطوا بالعقد
انج تكملين دراسه وتوظفين؟

 

[قلبي سلومي]

الخيرة فيما اختاره الله
وعسى ان تكرهوا شيئا وهو خير لكم
استخيري يمكن رفضه فيه خيرة وانا اختج

 

[أنا Top أنا]

رد : نفسيتي تعبانه( حلمي راح يضيع )

والله انا اقولج اش لج بعوار الراس دراسه وكل يوم قاعده الصبح ..

تحاتين عيالج والا تحاتين رجلج والا دراستج ؟؟؟

خليج جذي احسن وحمدي ربج انه رجلج متحمل مسؤوليتج انتي وعيالج

والا رجال هالايام ما ياخذون الا متوظفه لانهم مو قد المسؤوليه !

هذا انا كنت موظفه وطلعت والحين الحمدلله قاعده بالبيت وقايمه بواجبي لرجلي وعيالي وبيتي ..

واهواللي يتحمل الصرف والمسؤوليه !

 

[tolay]

شخباري اللي مايبي مرته تشتغل :/

انتي قنعيه بسياستج وقوليله بطريقه حلوه مو حنه وحاولي لما يرضى

اذا مارضه كلش شتسوين بعد ريلج اهم من الدراسه

 

[(ضحاوي)]

رد : رد: نفسيتي تعبانه( حلمي راح يضيع )

كلش ولا الدراسه
كملي حبيبتي محد يندج غير دراستج
ترا الزوج يروووح فكري لي ابعيد
دراستج دراستج

إن شاء الله بحاول مشكوره حبيبتي

حاولي تقنعينه على الاقل تاخذين دبلوم سنتين ولا بكالوريوس 4 سنين

اهم شي الشهاده او اقنعيه تدريس بكليه التربيه وتصيرين مدرسه

المشكله مو راضي بأي شي لا كليه و لا وظيفه
مشكوره يا قلبي

استخيري
الله سبحانه يدبر الامور
وراح يختاارلج اللي يرضيج اذا استخرتي ان شاء الله

مشكوره يا قلبي و إن شاء الله بستخير

 

[(ضحاوي)]

رد : نفسيتي تعبانه( حلمي راح يضيع )

صراحة الشهادة عز وظمان وقوليله مو لازم اشتغل بس اظمنها ماتدري شنو ظروفنا وشنو حالنا

مشكوره حبيبتي

نفس ماقالواا البنات اخذله بالمسايس ولا تعاندين..ومثل مايقول المثل ..كثر الدق يفج اللحااااام

مشكوره يا قلبي

اذا يجبج صج بيرضى

بس كل شي شوي شوي مو بالغصب

قوليله بس بدرس ماني مشتغله وبعدين يصير خير

ما يمشي عليه هالكلام
مشكوره

اختي الغاليه ماعليه راح اتكلم وان شاء الله تتقبلين كلامي بصدر رحب


اذا زوجج قالج خلاص لي هني ووقفي وقفي ليش تعاندين وتبنين حياتج كلها مشاكل في مشاكل

الحمدلله دراسه ودرستي وتعرفين تقرين وتكتبين اهم ماعليج والله زوجج وعيالج


انا اختي ريلها يحن عليها يقول لها كملي دراستج او ادخلي معهد واهيا مو راضيه تقول له ويني وين الدراسه مع العلم انه اهيا يوم تزوجت كانت بالكليه وطلعت منها لانه ماقدرت توفق بين زوجهاا ودراستها


وصدقيني والله لو انه زوجج مو موافق وحتى لو وافق من ورا قلبه ماراح ترتاحين وراح يعل قلبج وما يخليج على كيفج

فانا اقول لج انتي كلميه شوي شوي قولي له انا ماابي الشهاده اتفاخر فيها انا ابيها للزمن لعيالي لك

وانت شنو تشوفه اذا موافق اني اكمل دراستي كملتها بس اهم شي عندي رضاك

واذا مو موافق يسلم راسك

والله من تقولين هالشي هذاا وان شاء الله ربي يخليه يوافق ويطخ


واعذريني على كلامي بس انا اقول بالاول والاخير الزوج اهم من الدراسه

جزاك الله خير يا قلبي
و مشكوره على النصيحه

 

[(ضحاوي)]

رد : نفسيتي تعبانه( حلمي راح يضيع )

مشكورين بنات على الردود
و الله الحين أنا حاولت مع زوجي و إن شاء الله بحاول أقدم على الكورس الثاني هذا إذا وافق
و صراحه بنات إحنا مصاريفنا كثرت و إهو قام يقصر معانا بأشياء وايد و هذا اللي خلاني أفكر بالوظيفه
و إهو كل ما قلنا نبي شي لو إهو ضروري يقعد يهاوشني و يزفني و أنا صراحه تعبت من المشاكل بسبب أشياء تافهه
و جزاكم الله خير و الله يوفق الجميع

 

[ياشوقي للجوري]

رد : نفسيتي تعبانه( حلمي راح يضيع )

اذا ماخذيت الشهادة من الاول ليش الدورينها الحين
انت بالأول فضلتي الزواج على الدراسة مع ان كان بيدج
وفاضية لا مسؤولية ولا عيال
الحين زوجج مو موافق اتركيها راحت البال اهم
لا مشاكل ولا عوار الراس
ادري كلامي ما راح يعجبج
بس هذا رايي​

 

[DooLy88]

الله يهديه

 

[(ضحاوي)]

رد : نفسيتي تعبانه( حلمي راح يضيع )

اذا ماخذيت الشهادة من الاول ليش الدورينها الحين
انت بالأول فضلتي الزواج على الدراسة مع ان كان بيدج
وفاضية لا مسؤولية ولا عيال
الحين زوجج مو موافق اتركيها راحت البال اهم
لا مشاكل ولا عوار الراس
ادري كلامي ما راح يعجبج
بس هذا رايي​

مشكوره على الرد
بس حبيبتي أنا تزوجت عمري 16 سنه مادري وين الله قاطني و على طول حملت و كل هالفتره كنت قاعده أحن على زوجي يخليني أدرس بس ماكو فايده بس لما شفت الياهال كثروا و المصاريف كثرت و معامله زوجي اللي أنا صابره عليها قلت خلني أنفع نفسي و عيالي أبرك .