من وزن 45 ليما 73 دشو ضروري

[diamond doll]

السلام عليكم ورحمة الله وبركاته



قررت انزل هالموضوع عشان تستفيدون من تجربتي



انا كنت اغلب حياتي متينه بس مره من المرات شفت حلقه ببرنامج دكتور اوز عن شحوم البطن



قارن بين شحوم واحد طبيعي و واحد متين


فالمتين شحومه كانت لونها سوده والطبيعي بيضه


وتكلم عن خطورته

حزتها وزني كان 68 كيلو


فقررت ان اغير نظام حياتي كله وقطعت اي شي من اكل البيت والحلويات وقمت بس اكل فواكه وخضار واشياء طبيعيه لمدة 6 شهور


نزل وزني ماشاء الله ليما 45 كيلو


بعدين شافوني بنات انا من زمان مو شايفتهم .. بققو عيونهم مو مصدقين وماقالو لي ماشاء الله


من يومها

ما ادري شنو صارلي


قمت بس اكل اكل اكل وكله خرابيط واختربت صحتي وقمت اخربط 24 ساعه حتى لو مو مشتهيه الاكل



ردتلي كل العادات السيئه



وقام وزني باليوم يزيد كيلو وكل ملابسي اليديده صارو صغاااار علي


ومشكلتي ان اغلب السمنه في منطقه البطن


يعني تعذييب حتى بالارداف والزند بس البطن اكثر شي


وانا ماكنت مسوية رجيم عشان الشكل لا عشان الصحه يعني ماكان بالنسبه لي شي مؤقت


بس هم الحمدلله على كل حال


والله ماتهنيت الا جم اسبوع استانست بوزني المثالي وعقبها رديته كله اكثر من اول


ادعولي اضعف بصحه وعافيه وان شاء الله تستفيدون من قصتي وماتمرون بالي شفته

 

[Zoozie]

ان شاء الله تضعفين يارب
واذا تبين سجلي معانا بحملة رشيقات 2013 عشان تتشجعين
ودايما اقرى على نفسج

 

[fatma A]

انا كنت مثلج بس كان وزني 110 وضعفت وصارلي 4 سنوات ضعفانه وصلت 58 وبعدين يوم طلعت حق الناس كل واحد بقق عيونه والحين زدت كل شي صرت اكل وارادتي ضعيفه وايد وما قمت العب رياضه مثل اول كل شي تغير

 

[نيرفان]

اعوذ بالله من عيون الناس ماترحم ارقوا ع انفسكم خواتي


الله الحامي

 

[Madrideya ~]

الله يحفظنا من عيون الناس .. وان شاء الله ترجعين مثل اول واحسن ؛)))

 

[متجر جنات عدن]

مووووووفقه

 

[Shining Star]

diamond doll انا مثل مشكلتك تماما كنت ٨٠ او ٨٢ و خلال سنة صرت ٤٢ طبعا مثل ما قلتي اتبعت نظام صحي من راسي ما اكل حلويات و دهون. ومن بعدها صرت اكل بطريقة غير منتظمة لما وصلت يوم زواجي ٥٨ يعني فرق جدا عن يوم خطبتي و صرت ازيد الى ٦٨ و الحمل و الولادة،،،،، المهم الان انا ٦٠ و بحاااااول ارجع مثل ما كنت ان شااااء الله

 

[memo_ikarus]

العيوووون وما ادراك ما العيون
مي 2 ضعفت 20 كيلو كل ما ادخل
دوامي ضعفانه وضعفانه انا لاعت
جبدي 24 ساعه شنو تاكلين
حبوب مو حبوب مو صج الناس

انشاءالله يا رب تضعفين بصحة
وسلامه وانا بعد وياااج

 

[عويتقة]

اذا ضعفتي العيون لاحقتك واذا سمنتي كمان العيون لاحقتك ما تستنين منهم يقولون ماشاء الله ترى مافي احد بيحب الخير للتاني انتي ياروحي اقري على نفسك قبل الخروج وقبل لقاء احد دااائما خليها عادة عندك

 

[Mrs_Efron]

امين و الله صكوج عين قطيعه يارب تردين مثل اول و اضعف

 

[برونزية رشيقة]

قصتج نفس قصتي بالضبط


أنزين وين رابط الحملة مالت رشيقات المستقبل .. خل أسجل معاكم ؟؟؟؟؟