منو تأيد الخطبة ومنو ضدها !؟

[live your life]

بسم الله الرحمن الرحييم
انتو ملاحظين ان في الفترة الاخيرة كثرت سالفة الخطبة وهم في بعض الناس ضد فكرة الخطبة !
في ناس تقول ان الخطبة اهي الوسيلة الصح اللي ممكن تعرف المخطوبين ابعض من خلال مكالمات التلفون
وفي ناس تقول احنا كمجتمع خليجي لنا عاداتنا وتقاليدنا وان هذا المجتمع محافظ ماكو شي اسمه خطبه وان البنت اذا ياه نصيبها واهلها سألو عنه خوش ولد خلاص تتوكل على الله وتاخذه
شنو رايكم الصح والافضل وليش ​

 

[gazl~q8]

مافهمت عليج يعني قصدج التعارف بوقت الخطبه او شنو؟!

اذا تعارف انا ايد بشكل بسيط يعني تيلفونات او اذا يبي يزورها مثلا..

بس اما في ناس صراحه بفتره الخطبه روحات وجيات ويقعد معاها بالغرفه عادي >>شنو خليتوا حق بعد

الزواج!!



يعني كل شي بحدود المعقول وبحدود عاداتنا..

 

[qomerq8]

أنا أييد إذا كان بعلم الأهل وجدامهم يعني ما يطلعون ويردون بروحهم وتبين الصج يمكن يخفف من نسبة الطلاق خصوصا اذا المره ما تعرف الريال على الأقل تعرف شوي من طبعه وتاخذ عليه شوي

 

[بنت الدلال]

انا أيـدها انها تـطول لان يتعرفون على بعض اكثر ويعرفون اطباع بعض


خصوصا اذا كانت ماتعرفه من قبل

 

[ورد الصبا]

انا اشوف الخطبة ضرورية للغاية تدرين ليش على الاقل البنت اشويه تاخذ على الريال مو سيده ملجه وبعدين يطلع الريال مو شي او العكس على الأقل بالخطبة اهمه توهم على البر بس لما تملج مو حلو تتطلق وتعالي سمعي الحجي وحتى لو يتقدم لها واحد ثاني مرة ثانيه اسمها راح يكون اسمها مطلقه
وترا الخطبة حتى لو الريال يسوي روحه ملااااااااااااااااك وابو السنع لابد زلة لسان تفضح اطباعه
وانا افضل الخطبه اللي على سنع يعني مافي طلعات بس يمرها البيت بوجود اهلها ويسولف معاها بالتليفون
وانا عيبت علي خالتي ام ريلي وماانسى لما قالت لي واهي تتطنز علي ان انا طلبت ان يكلمني زوجي لما كان خطيبي قلت لها احسن من يملج علي ويطلع مو خوش ريال
وفعلا هذا اللي صار مع بنتها سيده ملجه ولما اطلعت معاه حماتي انصدمت فيه صدمة حياتها اول تمشيه لها معاه وداها صوب المقابر وقال لها كلام يسد النفس ، وقال لها مافي دراسه لانها كانت بالمعهد وفعلا توهقت معاه ولما قالت لأهلها خلاص عووووووووووووووووع مابيه قالوا لها خلاص احنا جهزنا للحفله وشرينا وعزمنا الناس والبنت الفقيره عاشت معاه المر وطلقها مرتين واللحين معلقها وعندها منه عيال
وهذي وحده من الحالات اللي اعرفهم بسبب التسرع في الملجه بدون ماتعرف البنت اطباع الريال
وشاكرة لك اختي على هذا الاستطلاع

 

[اموره وحلوه]

صوت لا اؤيد

 

[live your life]

مافهمت عليج يعني قصدج التعارف بوقت الخطبه او شنو؟!

ااي تعارف وقت الخطبة يعني شافها عجبته بس يبي يعرف عنها اكثر

 

[Anastasia]

نشوف الدين شيقول اول قبل لا نبدي الآراء ..
.
حرام ..

لايختلي اثنان الا كان الشيطان ثالثهما ..
.
الضابط الشرعي :
الا اذا كان معاها محرم يعني واهيا اتحاجيه وماكو روحات وييات ... أأيد .. !!

 

[live your life]

ووووووي بعد عمري مسكينة والله يرحم بحال اللي مثلها مو هذي المشكلة ان الحين وقتنا تغير ولازم لما البنت تتخذ قرار الزواج تعرف اللي جدامها عدل

 

[خليج***]

انا مع الخطبة اللي قبل الملجة,,بس تكون محدودة,,
ومع الملجة ابضا,,وتكون بشكل اوسع واهوا بالملجة خلاص يعتبر زوجها وحلال انها تكلمه وتطلع معاه لانها مرحلة مهمة ليتم التعارف,,فليش نمنع هالشي؟؟!!

وانا ضد ان البنت ماتشوف ريلها الا بالليلة عرسها,,
وضد ان تمنع البنت انها تكلم ريلها بفترة الملجة,,يعني مو شايفة فيها مشكلة اذا تكلمه؟!
واتمنى القضاء على تلك العادات,,

 

[live your life]

اي صح انا معاج في عادات لابد ان ما نتخلى عنها واللي اهي مواكبة عصرنا اللي الحين وفي عادات لابد ان خلاص نتخلص منها لان مهما كان هذي عادات ممكن يكون فيها شي صح وممكن يكون فيها شي غلط بس في بعض الناس ما يستوعبون هالشي

 

[شهووده]

مع الخطبه وبقووه ..

بشرط إنها تكون تحت مرأى ومسمع الأهل ..

يعني يزورهم بالبيت ويقعد معاها بوجود أهلها بس طبعًا يهيئون لهم الجو علساس ياخذون راحتهم بالكلام ..

وماله داعي يطلعون مع بعض طبعًا .. هالشي لا من عاداتنا ولاتقاليدنا ..

والمكالمات التلفوونيه مهمه بعد .. لأن الغرض الأساسي منها التعارف بقصد الزواج .. يعني موقاعده تكلم أي واحد ..

هالشي أشووفه وايد مهم لأن اللي حاصل عندنا إن الواحد ايي يخطب وحده وبظرف أسبوع أسبوعين يملجوون ..

يعني ماايمديهم يتعرفون على بعض ويدرسون أخلاق بعض عدل .. فتصير فترة الملجه إهي فترة التعارف اللي تشبه الخطبه ..

واذا لاسمح الله اكتشفوا خلالها إنهم مايصلحون لبعض يكون الحل أهو الانفصال وكل واحد يحصل على لقب مطلق !!

عالعكس من الخطبه .. لو شافوا إنهم مايصلحون فلوا الخطبه والسلام .. وكل واحد راح في حال سبيله بدون لايلحقه لقب منفصل ..

 

[live your life]

اي والله صاجة وفي ناس بس مخطوبين لبعض من غير ماتكلمه ولا يكلمها على ابو ان يبون يوم الملجة نفسه يوم الحفلة

 

[إنسانه بكل حالاتي]

مع انها ماتصير عندنا بس أؤيدها

 

[مـعـجـبـة]

أكيد إيييييييي

عيل آخذ واحد ماعرفه !

 

[الاسم مجهول]

أأيد حدي أأيد لأني تخيلو قبل انخطبت حق ولد عمي ولو مو عارفته اكثر بالخطبه جان آنا الحين مطلقه!!! بس الحمدلله والله بنات التعارف بالخطبه اهم شي و مافيها شي اذا انخطبت و اهلي يدرون واتعرف عالريال اكثر حتى لو يصيرلي !! الريال مع اهله شي و مع المرا شي ثاني عالاقل لازم يتفقون بالاول

 

[UK_Girl]

مع الخطبه تحت اشراف ومظلة الاهل اهم شي المظله

 

[live your life]

صاجة والله صاجة انا نفس الشي هم مريت بهل تجربة وفي وايد ناس ما يأيدوني يقولون ان الخطبة مو من عوايدنا

 

[فلالي]

الرسول وصى اصلا بان الرجل يشوف المرأة وقت الخطه ويكلمها لكن بوجوج محرم....الدين اولى من العادات الخطأ اللي تسبب زعزعة ومشاكل بالنهاية

 

[Flower20]

نشوف الدين شيقول اول قبل لا نبدي الآراء ..
.
حرام ..

لايختلي اثنان الا كان الشيطان ثالثهما ..
.
الضابط الشرعي :
الا اذا كان معاها محرم يعني واهيا اتحاجيه وماكو روحات وييات ... أأيد .. !!

بالضبط