مشكلتي ..

[Special eve ~]

حبيبتي .. الحل الوحيد انج تروحين بيت هلج واذا جا خل ابوج او حد من اخوانج يكلمه
خلهم يكلمونه ويوقفون كل شي عند حده ويفهمونه اللي انتي تبينه اذا عجبه حياه الله واذا رديتي له ابدا لا تسكتين عن شي
اكبر غلط الوحده تسويه انها تسكت وتتغاضى ترى الرياييل ماينعطون ويه المفروض من البدايه تناقشينه عن اي شي مايعجبج مب تسكتين وذا ماعجبه الباب يوسع جمل وانتي صغيره حرام تضيعين حياتج وماشاء الله مبين انج وحده عندها طموح وهالريل مابيغنيج عن طموحج
ادعي ربج وهالله هالله بالاستغفار وعسى ربي يبعد عنج المشاكل والهموم :*

 

[منـيـرّه]

رفعي عليه قضيه خلع ولتهي عيشته بالمحاكم
طلعي عيونه وقصبن عليه بيطلقج مينونه ترجعين له
شخص مريض ماعنده شخصية كلمة توديه وكلمه ترجعه
تغدي فيه قبل لا يتعشى فيج وانتي الي اشتكي عليه
وشرحي لهم عيشتج معاه وبتصير حظانة بنتج عندج انتي!!!

 

[بكيزة هانم]

الله المستعان

 

[اذوب بكلامه]

استخيري وتوكلي على الله وبيعيه مثل ما باعك
اهم شي بالزواج الاحترااااام ثم الاحترام ثم الاحترام

 

[الزيـــــ^^ـــــن]

حياتي والله عورتي قلبي
سوي مثل ماقالتلج كلي دلع وان شاء الله ربي يفرجهااااا عليج يارب

 

[البروآز]

مشكورين ياقلبي كلكم ،،
طبعا انا من كتبت الموضوع وانا هذي مشكلتي
انا مارديت عليه وطنشت كثر ما اقدر
وصراحه كنت تعبانه نفسيا وبنتي احسها فاقده ابوها
اخر مره الي قلت لكم ابوي طلعني غلطانه وردني له وسواها صلحه
عشان كان عرس بناتهم اثنين ( حمواتي )
والحريم الكبار قامو يعاتبوني حيل ان الناس راح تستغرب انج مو حاضره
سكتنا ويت امه وابوه رضاوه
ورديت على كلام امه ان كل الي تبيه بيصير
رديت وهم ماكو شي صار ؟!
والي يضحك اني ذبحت نفسي عشان حمواتي بعرسهم
ويبت لهم هدايا بالغالي
ونص اغراضهم مني لان ماعندهم ماديه
وهذا والله العظيم الصج مو قاعده استعرض
ومر العرس وصارو شحلوهم معاي
والله مو مصدقه قلت اكيد حلم
وهو يازينه معاي والله حتا مايقعدني من النوم
وكله قاعد عندي وبس يسولف ويضحك
ونفسيا مستانس
وكلمه مايقول لي يحط الف حساب
واذا قال شي ..
ع طول يعتذر ويراضيني
بعد اسابيع يت لنا العروس تتشكا من ريلها
تخيلوا ،؟
كل كلمه والثانيه تقول هنيالج بريلج
وريلي مايسوي لي ومادري شنو ..
وترد تقول ومو عاجبج بعد والله ياحلاته طيب ..
ياليت ريلي مثله ،
بعد ايام امه وخواته نفس الكلام يتحجون
الكل يتحسر ليش ريلها مو زين وريلي مدلعني < مادري وين مدلعني ؟!!!
المهم ،،
كلها ايام ردينا ياطير يالي !
اخر شي تتوقعونه خواته يدشون غرفتي يسبون ويغلطون
والله حتا ماطقت الباب ع طول دشت ويايبه الي اصغر منها
ع فكره هذيل وحده مراهقه ووحده بالجامعه !
وكلامهم واسلوبهم وسخ لابعد درجه !
حاولت اني اتمالك اعصابي مع انهم اصغر مني
واني ما امد ايدي احترام لابوي وامي وريلي ،
دزيتهم من غرفتي غصب ،،
وقفلت الغرفه يوم قلت له .....
( ماتدخل ) !
ولا جنه صار شي
ويضحك مع خواته ويسولف وانا قاعده ابجي منقهره ..
انا اهني توجهت لابوي ،
ابوي ردة فعله عكس جدا
وقف معاي وعصب
وقال له ثلاث شروط ( محد يدش شقتج - تطلعين شقه - ولا ماعندنا له زوجه وبنت ) ،
ووكل اخوي الكبير يتكلم عنه لانه حتا مايبي يشوف رقعة ويه ،،
يوم قال له اخوي هالحجي ..
يقول لاخوي انا شنو ذنبي ؟
قال له اخوي لو انك من البدايه مسوي لها الي تبيه جان ما صار هالشي .. بنتنا مو من الشارع بنتنا خذيتها من رجال صونها لانها امانه .. ترا محد يرضا حريم بيته تنهان .. وهي حشمتك وحشمة بيتكم وامك وابوك ولا حتا غلطت عليهم ..،
انا طبعا مالي اتصال فيه
بعد اسبوعين رد كلم امي وامي قالت له نفس الشي
والله ناقص بس يبجي ابي مرتي ابيها ترد هي وبنتي
والله من الصبح من عرفت انها مداومه طالع من دوامي وواقف جدام باب الكليه عشان يمكن تطلع واشوفها ..
وبالفعل شافني ولحقني لبيتنا وحاجى امي
امي طبعا رفضت
قالت شروط ابوها واضحه والله مابيدي شي
خلاص شقتها موجوده ليش ماتتسكر وتنتهي المشكله ،؟!
جنه مو راضي قال بكلم عمي واتفاهم معاه
قالت امي كيفك ان حصلته ،
طبعا انا ( كسر خاطري )
وحيييل
بس مابيدي شي
وكل يوم يكلم اخوي ويقول ابيها ترد ويترجاه
اخوي يقول كسر ظهري صرت اتحاشى اكلمه من الاحراج ، < لان مابيد اخوي شي الموضوع بيد ابوي
بناااااااااااات
هو مايبي يحط لي شقه
بس يبي يردني
شنو الحل ؟؟؟؟؟

 

[البروآز]

ع فكره ابوي مسافر كندا الحين
يعني مطوووول يالله يرد
وهو مو قادر يصبر
ساعدوني ربي يعطيكم ماتتمنون
والله اني محتاره
خايفه ،

 

[نبض السعاده]

واي في ناس جذي تذكرت الغزوو العراقيين وصدام

استخيري روحي حق اهلج اذا يبيج يحطلج بيت

 

[لوولوو_88]

لا خلج ابيت اهلج لا تثقين لانه سواها فيج من قبل و هم بعد عرس خواته هم رد و قلب نصيحه لا نطري لين ابوووج ارد و معقوله انتي مسويه كل هذا عشان يسكنج بروحج و ترتاحين معاه و اخرتها تستسلمين.. و خل يستوعب انه اهله اهما الي دمرو حياته منهم و من مشاكلهم و تدخلهم خلو يخسرج .. خلي يحاسب نفسه يا بنت الحلال .. ديري بالج و فكري بعقلج و خلي قلبج على صوب لانه العوي ما يصحى الا بطراق قوي او عمره ما يتصلح .. خل يفقدكم عشان يحس بقيمتكم انتي و بنتج و يحس انه النعمه زواله .. و يحمد ربه على الي رزقه مره مثلج و باخلاقج .. صبري لا تخربين على نفسج نصيحه .. و اذا يبيج بينفذ و بردج و بيعوضج انشالله باللي يسعدج انتي و بنتج ..

 

[mnoooll]

الله يعينك ووييسر أمورك

أختي نصيحه مني اددددددعي بصلاتك واتجهي لله وحده وهو بيحلها


واكثري من الاستغفار وقيام الليل

 

[اذوب بكلامه]

يا قلبي نصيحه لا تضعفين مره ثانيه اذا رحتي المره هذي من غير ماينفذ شروطك ويحط حد لأهله صدقيني ماراح يتغير عليك شي وبترجعين لطير يلي وتحلمين انه يتعدل معاك لأنه خلاص عرف انك مهما زعلتي بترجعين له

 

[BubbLe87]

يعني يطقج يسبج داس على راسج اهله مبهدلين عيشتج اربع و عشرين ساعة بويهج و فوق راسج ما تاخذين راحتج بولا شي
اهانات اهانات اهانات
و فوق كل هذا انتي مو حازمة
و شخصيتج جدا جدا ضعيفة
لو وحدة ثانية جان ورته الشغل السنع من اول شي يتمادى فيه اهو و اهله و طوايفهم
بس انتي مواقفج على مر الردود كلش مالج موقف محدد
ادري ردي قاسي نوعا ما بس هذا الصج
يعني مسوي فيج كل هالبلاوي و تحرين نفسج و تحرينا معاج عشان تكتبين بالاخير كسر خاطري!!!
مادري شقولج غير الله يعينج على نفسج و عليه و على اهله و السبب الاول في اللي صار هو ضعف شخصيتج و استهانتج بنفسج و عدم تقديرج لذاتج انتي اللي تفرضين على غيرج يحترمونج مو العكس لو من البداية شاف اه و اهله موقف حازم منج و من اهلج جان ما تمادى و الدليل على صحة كلامي انه ذلج زيادة و داس على كرامتج
كان المفروض تسمعين كلام كلي دلع كلله مو نصه
ارد و اعيد
الله يعينج