ماجستير ودكتوراه ياسلام !

[الشامريه]

الجامعه قالي عنها دكتور كان يدرسني بالجامعه <<<<<<<< جامعة الكويت


طبعا اهي نظامها عالمي والغالب انه النظام يكون انتساب الي يبي انتظام يروح ماليزيا او اندونسيا او تايلند


هالدكتور الحين صار مدير العلاقات الخارجيه بجامعة المدينه العالميه


رسووومها حدها رخييييييييييييييييييييييصه

انا سألت عن الماستر الكورس من 200 الى 300 دينار



ولها فروع في اغلب الدول العربيه واغلب دول الخليج


مثل مااااااقلت لكم بالنسبه للاعتراف ماااااااااااااااااااااادري عنه شي

 

[الشامريه]

نسيت اقولكم انه مكتبهم

حولي مجمع البلازا

 

[سنـــابل]

روعه البراءه
اول شي اذا تبين على حساب الدوله لازم 3 سنوات خبره بالتدريس

اخذي بعثات جامعه الكويت او التطبيقي اضمن لج .اذا قبلوج يوظفونج عندهم وتقدمين استقالتج من التربيه وعقبها يدزونج ولمه ترجعين تصيرين دكتوره بالجامعه او التطبيقي

تبين تسالين عن جامعه الكويت
روحي الجامعه بالخالديه ودشي من الباب اللي يم البنك الاهلي دشي المبنى وصعدي فوق الدور الثالث قسم العلاقات الثقافيه والبعثات وهم يعطونج كل اللي تبينه

التطبيقي روحي التطبيقي مبنى 3 الدور الاول وسالي عن اللي بخاطرج

مووووووفقه

 

[أكاديميــة]

السلام عليكم
























وانا قاعدة طرت على بالي هالفكرة وقلت بنفسي ليش لأ موقاصرني شي ولله الحمد ودي اكمل ماجستير بس بالكويت موبرا
بس المشكلة ان صارلي بس كورس من تعينت ولا ادري شلون ابدا ووين اروح ؟؟
والله ودي اكمل الماجستير والدكتوراه بعد اذا الله وفقني ويصير اكمل بس مو على تخصصي يعني تخصصي عربي ابي اكمل اجتماعيات عادي اولا ؟؟
وشسوي بالضبط
وشلون عالمعاش وكم سنه يبيله الماجستير وشيصير اذا ماتوفقت ارجع للتدريس عادي ؟
وبعدين شنو اقدر اصير غير معلمة ؟؟
ابي كل شي تعرفونه الله يجزاكم خير وهالشي صعب او سهل
لا تطنشوني:eh_s(2):

ما أدري عن شروط وزارة التربية
بس بالنسبة لديوان الخدمة ما عندهم أي مشكلة وعن طريق الديوان تاخذين اجازة 45 يوم في
السنة تقدرين تقسمينها 25+20يوم
أول شيء أحصلي على قبول من الجامعة اللي ناوية تدرسين فيها
بعدين وقت الإختبارات لازم تجيبين جدول الاختبارات والجدول الدراسي وتقدمينها لقسم المنح في ديوان الخدمة
مع اني ما أنصح بإجازة الـ45 يوم لأنها تخصم نصف المعاش تقريبا

بالنسبة لوضعك كمدرسة وطالبة دراسات عليا تحتاجين لجهد مضاعف في عملية التنسيق بين الجهتين

بالنسبة للتكمله على تخصص ثاني : صعبة من تخصص لغة عربية إلى اجتماعيات
لكن فيه تخصصات ممكن تدرسينها على تخصصج مثل إدارة تربوية / إرشاد نفسي / تكنولوجيا التعليم / صعوبات تعلم
لكن من تخصص إلى تخصص آخر صعبة ..
والأفضل منها كلها أنج تتخصصين في مجالك الدقيق وهو ماجستير اللغة العربية : مثلا في البلاغة أو النحو والصرف أو الأدب الجاهلي أو غيرها من تخصصات اللغة العربية الدقيقة ..

المعاش إذا قعدتي معلمة راح تجيج زيادة 75 دينار ..
أما إذا انتقلتي للتدريس في الهيئة العامة للتعليم التطبيقي أو الجامعة راح يزيد المعاش إلى الـ 2000 تقريبا
والقبول في هالأماكن صعب جدا لأسباب :
1- لازم تكونين مبتعثة عن طريقهم للدراسات العليا حتى يتم تثبيتج بعد ما ترجعين
2- النسبة المطلوبة لقبول الطالب للإبتعاث تكون عالية.
3- شروط الإبتعاث صعبة. وتقدرين ترجعين لها من خلال موقع الجامعة والتطبيقي.



بالنسبة للصعوبة :
ما فيه شيء صعب بالدنيا إن شاء الله
وبنفس الوقت ما فيه شيء بدون مقابل ، يعني تأكدي أنه الدراسة راح تاخذ من وقتك وجهدك الكثير
وكل هذا على حساب علاقاتج الأسرية والإجتماعية.. هذا بحث علمي متفرع .. مو مذاكره لأمتحان وخلاص..

نصيحة لا تستعجلين في الدراسة قبل ما تسألين من تثقين فيه جيدا
خطوة مثل هذي تحتاج الواحد يسأل ويكون على بينة من جدواها 100% ..


الله يوفقج لما فيه الخير ..​

 

[بحر الرمال]

اكاديميه
مشكوره عالمعلومات الوافيه اللي زودتينا فيها
بس بعرف اذا وحده ماخذه ماجستير من جامعه الكويت (بعثه من وزاره التربيه) يصير تكمل دكتوراه و جهه الابتعاث تكون جامعه الكويت؟ و تتعين كعضو هيئه تدريس بالجامعه؟

 

[روعة البراءة]

مشكووووووووورين كل الي ردوا
واكاديمية كفيتي ووفيتي


والله ما ادري اعقد االعزم واتوكل على الله او اقعد مكاني
يارب الله يوفقنا لما فيه الخير

 

[أدووويا]

up up

 

[zargona99]

الموضوووع واااايد صعب

ودي اكمل دراستي وبنفس الوقت اشتغل

بس المشكله التدريس يبيله جهد بالبيت والمدرسه يعني كلش ما في مجال اني اكمل الا اذا طلبت تفرغ دراسي والهشي هم صعب يعني لو كنت اشتغل بمكان ثاني غير التدريس جان هانت شوي


انزين اذا كنت اشتغل وبنفس الوقت كملت وحسيت اني ما مشيت بالدراسه اقدر اسحب اوراقي واظل مثل قبل ولا هالشي صعب؟؟؟


وانا معدلي اقل من 3 نقاط شلوووون ماقدر اكمل بجامعه الكويت؟؟؟

 

[قـہۈه فـرنسيـہ™]

شي حلووو أنا ان شاء الله بدرس براا الكويييييييييييت ...لأن الماستر والدكتووراه هني ما منهم فووووود وشدعوه أصلاا متوفره عندنا ...جامعة الكويت ما عندهم الا أصول تربيه وطرق تدريس(يعني بنحااش من التربيه أطيح فيها مره ثانيه )
والجامعات الخاصه كلهم إدارة أعمال ومحاسبه ...

ان شاء الله بقدم استقالتي وبششششششششلع ....

حتى رحت لدكتورتي كانت تدرسني بالكليه وقعدت معاها نسوولف عن الدراسات العليااا ...انصحتني ما أكمل هني ... وتقووول مصر وغيره من شهاادات الانتساب أقول لج من الحييييييييييييييييييييين لا تتعبين نفسج وتدرسين انتساب ... لأن الهيئه ما يقبلووون هالشهادات لأزم يكون فيه انتظام بالدراسه ....

واللي تبي تفرغ .... يعطونها بعد 3 سنوات خبره ... بس ينخصم نص الراتب >>طبعا ماراح أنطر ... ومالهم شغل بالمعدل ..

القبول في جامعة الكويت عشان تكملين دراسات عليا ...>>> لازم يكون المعدل في شهادة البكالريوووس 2,67 وأكثر ...

أما البعثه ...من وزارة التربيه أو جامعة الكويت ... لازم تكونين ماخذه امتيارزات بكل شي ...

يعني اذا بعثه من جهة العمل >>يبتعثونج إلى جهه معينه تكملين في تخصص معين هم في حاجته وبشرط تكون 3 سنوات أو آخر سنتين امتياز
والخبره ماادري جم ..>>> جنهم يقولون لحد يقدم ...


أما البعثه من جامعة الكويت ...لازم تكونين ماخذه في شهادة البكالريوووس امتياز 3,60 وأكثر


وطبعا أي جهه تبتعثج تكووون متكفله بكافة مصاريفج لابتوب تذاكر ........الخ ودراسة عيالج هناك

 

[سنـــابل]

قهوه فرنسيه بالنسبه لبعثه جامعه الكويت
لا مو شرط يكون 3,60 لانهم يبون 3 وفوق والشروط ملوت البعثه لي الحين موجوده والتقديم لي الحين مفتوح

 

[بحر الرمال]

شي حلووو أنا ان شاء الله بدرس براا الكويييييييييييت ...لأن الماستر والدكتووراه هني ما منهم فووووود وشدعوه أصلاا متوفره عندنا ...جامعة الكويت ما عندهم الا أصول تربيه وطرق تدريس(يعني بنحااش من التربيه أطيح فيها مره ثانيه )
والجامعات الخاصه كلهم إدارة أعمال ومحاسبه ...

ان شاء الله بقدم استقالتي وبششششششششلع ....

حتى رحت لدكتورتي كانت تدرسني بالكليه وقعدت معاها نسوولف عن الدراسات العليااا ...انصحتني ما أكمل هني ... وتقووول مصر وغيره من شهاادات الانتساب أقول لج من الحييييييييييييييييييييين لا تتعبين نفسج وتدرسين انتساب ... لأن الهيئه ما يقبلووون هالشهادات لأزم يكون فيه انتظام بالدراسه ....

واللي تبي تفرغ .... يعطونها بعد 3 سنوات خبره ... بس ينخصم نص الراتب >>طبعا ماراح أنطر ... ومالهم شغل بالمعدل ..

القبول في جامعة الكويت عشان تكملين دراسات عليا ...>>> لازم يكون المعدل في شهادة البكالريوووس 2,67 وأكثر ...

أما البعثه ...من وزارة التربيه أو جامعة الكويت ... لازم تكونين ماخذه امتيارزات بكل شي ...

يعني اذا بعثه من جهة العمل >>يبتعثونج إلى جهه معينه تكملين في تخصص معين هم في حاجته وبشرط تكون 3 سنوات أو آخر سنتين امتياز
والخبره ماادري جم ..>>> جنهم يقولون لحد يقدم ...


أما البعثه من جامعة الكويت ...لازم تكونين ماخذه في شهادة البكالريوووس امتياز 3,60 وأكثر


وطبعا أي جهه تبتعثج تكووون متكفله بكافة مصاريفج لابتوب تذاكر ........الخ ودراسة عيالج هناك

قوه
حبيبتي منو قال جامعه الكويت مامنها فود؟ اصلا تدرين القبول بجامعات بريطانيا او امريكا اسهل من جامعه الكويت؟ التوفل اللي الجامعه تطلبه حق اغلب التخصصات (500) مثل التوفل اللي تطلبه جامعات بره! و انا بنفسي راسلت جم جامعه ببريطاينا و قالولي ان ماستر جامعه الكويت معترف فيه recognized

 

[أكاديميــة]

اكاديميه
مشكوره عالمعلومات الوافيه اللي زودتينا فيها
بس بعرف اذا وحده ماخذه ماجستير من جامعه الكويت (بعثه من وزاره التربيه) يصير تكمل دكتوراه و جهه الابتعاث تكون جامعه الكويت؟ و تتعين كعضو هيئه تدريس بالجامعه؟

العفـــــو ..

وبالنسبة لسؤالج .. نعم يصير تبعثج جامعة الكويت في هالحاله ..
فيه طالبة جابت الماستر الكورس الماضي من جامعة سعودية وقدمت أوراقها على
طلبات ابتعاث جامعة الكويت لإستكمال الدكتوراه والحمد لله قبل أسبوعين تقريبا تم قبول طلبها
فـ إن شاء الله راح تروح بعثة على حساب الجامعة وأول ماترجع
تكون (عضو هيئة تدريس) في الجامعة

عسى الله يوفقها يا رب
وأعتقد أنها نفس الحالة اللي تسألين عنها بالضبط ..

وفيه شيء مهم عن القبول لازم تعرفينه
أن القبول على حسب حاجة القسم العلمي لطاقم جديد يخفف ضغط الشعب المغلقة في الجامعة أو الهيئة

يعني مثلا في إحدى الكليات قبل سنة كانوا محتاجين عضو هيئة تدريس واحد لأحد الأقسام
والمتقدمين تجاوزوا المئة طالب وطالبة

وفي أحد الأقسام الأخرى طلبوا ثلاثة طلبة والمتقدمين سبعة فقط ..
فـ لاحظوا الفرق الكبير في فرص المتقدمين للحصول على بعثة ..

وكل شيء بأمر الله ..
عسى الله يوفقنا وإياكم لما يحب ويرضى ..

​

 

[أم أحلى البنات.]

أكاديميه لو تكرمتي ,,

تخرجت بتخصص لغه انجليزيه من جامعة الكويت كلية التربيه ..
وبعد 6 سنين ونص من العمل كمعلمه نقلت وزارة الاوقاف .. وبخاطري أكمل الماستر بس يكون في مجال الشريعه عشان يناسب مسماي كمترجم .. المشكله ان معدل التخرج مايسمح أكمل بجامعة الكويت , قالولي في مجال انك تدرسين كورس أول بأي جامعه معترف فيها وتجيبين المعدل المطلوب للتحويل لجامعة الكويت .. الكلام هذا صحيح والا لا ؟؟؟
واذا لا شلون ووين أككمل؟؟ وبغيت بعد شنو تخصصات الماجستير اللي أقدر اكمل فيها على تخصصي ؟؟

جزاك الله خير وعسى الله يوفقك ..

 

[سنـــابل]

اكاديميه
ما تدرين متى موعد المقابلات الشخصيه ؟

 

[الشامريه]

سؤال : صج الي تبتعث على حساااااب وزارتها كل مصاريفها على الوزراه؟؟؟؟؟؟؟؟؟؟؟؟؟؟؟؟؟؟؟؟

وبالنسبه للزوج شلون؟؟؟؟؟؟؟؟؟؟؟؟؟؟؟؟؟؟؟؟



سؤال : ام احلى البنات انتي المترجمه الي اعرفها :blueSmCLR:​

 

[قـوت القـلوب]

رد : رد: ماجستير ودكتوراه ياسلام !

انا رحت اسأل هم كان ودي اكمل ماستر بتخصص غير تخصصي بس عموما اغلب الجامعات اللي رحتلها خاصه كان من ضمن شروطها ان لازم اكون كملت 3 سنين بوظيفتي
منهم جامعه جست / ماسترخت / الامريكيه


كلهم نفس الشروط تقريباً

 

[أكاديميــة]

أكاديميه لو تكرمتي ,,

تخرجت بتخصص لغه انجليزيه من جامعة الكويت كلية التربيه ..
وبعد 6 سنين ونص من العمل كمعلمه نقلت وزارة الاوقاف .. وبخاطري أكمل الماستر بس يكون في مجال الشريعه عشان يناسب مسماي كمترجم .. المشكله ان معدل التخرج مايسمح أكمل بجامعة الكويت , قالولي في مجال انك تدرسين كورس أول بأي جامعه معترف فيها وتجيبين المعدل المطلوب للتحويل لجامعة الكويت .. الكلام هذا صحيح والا لا ؟؟؟
واذا لا شلون ووين أككمل؟؟ وبغيت بعد شنو تخصصات الماجستير اللي أقدر اكمل فيها على تخصصي ؟؟

جزاك الله خير وعسى الله يوفقك ..

أول شيء عسى الله يوفقك إن شاء الله ..

بعدين بالنسبة لشرط القبول في الماستر بجامعة الكويت أن يكون المعدل العام 2.67 من 4 نقاط
لاحظي أن هذا في المعدل العام ، أما معدل التخصص المطلوب فهو 3 نقاط من 4
فـ تأكدي إحتمال أنتي راح بالج مع التخصص على أنه العام !!

ثاني شيء فيه جمله ما فهمتها : (في مجال الشريعه عشان يناسب مسماي كمترجم ) !!
ما أعتقد فيه تخصص في الشريعة يناسب مسمى (مترجم) .. أو شنو ممكن تكون العلاقة بينها ؟

أختي أنتي قدامج ثلاث مجالات :
أولاً : ماجستير لغة إنجليزية : تخصص : أدب إنجليزي - لغويات تطبيقية - الترجمة واللغويات
أو غيرها من التخصصات الدقيقة اللي تناسبج في مجال اللغة الإنجليزية.
طبعا الترجمة مجالها واسع وممكن ياخذج بعيد عن التدريس إذا أنتي حابه تبعدين عنه.
آداب انجليزي حلو بس صعب نوعاً ما ، وقريب من الجو التربوي.
ثانياً : ماجستير إدارة الأعمال : ومن ضمن تخصصاته فيه تخصص (ادارة اعمال) عام ، هذا ممكن
يفيد أي موظف يحب يطور نفسه في مجال عمله ، وهذا التخصص ممكن أي طالب يسجل فيه مهما
كان تخصصه الجامعي.
ثالثاً : بما إنج خريجة كلية التربية معناته أن تخصصات ماجستير التربية جميعها متاه لج :
القيادة والإدارة التربوية - تكنولوجيا المعلومات - الإرشاد النفسي - صعوبات التعلم - المناهج وطرق التدريس
ولو أخذتي صعوبات التعلم راح يفيدج خصوصاً أنه تخصصج ترجمه ، أو القيادة والإدارة التربوية لأنه أشمل .

فيه نقطه مهمه :
إذا هدفج من الشهادة تعزيز مكانج وظيفياً في مقر العمل والحصول على درجة إشرافيه وأولوية في الترقية
فأنا أنصحج بالتخصصات الإدارية (إدارة أعمال) أو (القيادة والإدارة التربوية) أو تخصص يساعدج وظيفياً ..
أما إذا الهدف أكاديمي.. يعني ناوية تستفيدين منها في مجال التدريس في المعاهد أو الجامعات
فأنا أنصحج تكملين الماستر في التخصصات الدقيقه في اللغة الإنجليزية (لأن الكليات والمعاهد يحتاجون أستاذ
متخصص في مجال عمله ، وحسب علمي أن ما فيه جامعة تقبل أستاذ يقوم بالتدريس في كلياتها وهو تخصصه في
البكالريوس شيء وفي الماستر والدكتوراه شيء ثاني)!!

بالنسبة للتحويل لجامعة الكويت : النظام هذا مطبق على البكالريوس
أما الماستر فما عندي علم وأعتقد مو مطبق..
وإذا ما انقبلتي في جامعة الكويت في جامعات خاصة في الكويت
وبرا الكويت كثيره بس أنتي شوفي شنو تستقرين عليه..


وهذي شروط القبول في كلية الدراسات العليا بجامعة الكويت :
http://www.graduate.edu.kw/arabic/topics/current/index.php?cat_id=3

وآسفه جدا على الإطاله ..
خذيت راحتي شوي ..:aha:

​

 

[أكاديميــة]

اكاديميه
ما تدرين متى موعد المقابلات الشخصيه ؟

للأسف ما أدري واللــه ..:aha:

​

 

[أكاديميــة]

رد: رد : رد: ماجستير ودكتوراه ياسلام !

انا رحت اسأل هم كان ودي اكمل ماستر بتخصص غير تخصصي بس عموما اغلب الجامعات اللي رحتلها خاصه كان من ضمن شروطها ان لازم اكون كملت 3 سنين بوظيفتي
منهم جامعه جست / ماسترخت / الامريكيه


كلهم نفس الشروط تقريباً

حتى جامعة الكويت ..
يشترطون 3 سنوات خبره للتربية ..
​

 

[kingq8q8]

شنو الشروط اذا بغيت اكمل دراستي على حساب الوزاره اللي اداوم فيها