لا لا لاتضحكون عليها.......

[فطوم 84]

السلام. عليكم شخباركم خواتي انا حابه اتكلم بموضوع حيل حاز بخاطري اولا قبل لا اتكلم كل التقدير لقبيلة مطير العريقه والله انه هالقبيله مايتجرا احد يمسها لانه من القبايل الاصيله والعريقه ادش بموضوعي اكون قاعده بمكان تجي وحده تناديج تبين تضحكين تعالي نشوف جديد سلوي منو انا اسال المرشحه والمبتكره سلوي المطيري ويفتحون المقطع ويضحكون انا مااحب اضحك اواتمسخر علي اي انسان بس اشوف بعيوني وباماكن وايد يشغلون مقاطعها وضحك زين سوال انتوا تدرون شنو ظروف المراه اللي خلتها جذي ماتخافون الله يبتليكم مثل مااهي مبتليه انا مابي اعرف قصة سلوي كامله ولااحب اذكرها لانه يمكن سبحان الله تكون تقرا كلامي بس ابي اوصل رساله اذا في وحده تتواصل وياها او من جماعتها او. لها معرفه فيها تكفه اقولها لج تكفين نصيحه لوجه الله انصيحها خل ترتاح ببيتها خل تجابل نفسها وصلاتها والله محد نافعها الناس بس تبي تشمت وتضحك وتتمسخر حرام اللي قاعده تسوين بنفسج والله حرام انا اتضايق اذا شفت مقطع لها اذا كنتي غير واعيه ومدركه ياجماعه خل تتحرك اي وحده تعرفها وتنصحها لوجه الله اونسوي حمله نخليها توقف اللي تسويه من مقاطع استهبال وكلام بذي تكفون ترا تظل اخت لنا مبتليه يمكن ماتدرك اللي قاعده تسويه ))نبي نوصل صوتنا انه مانشوف مقاطع اسمها سلوي المطيري وناس تضحك هالشي مايجوز بدال ماتضحكون وصلوا صوتكم انصحوها دلوها لطريج الصح اعتبروها اختكم انا قلت هالكلام لاي وحده تعرفها امانه هاذي انك توصلين لها هالكلام حتي لونضطر نسوي حمله بتويتر انه هالانسانه تقعد بالبيت لانه اخت لنا مانرضي يضحكون عليها واتمني الكل يكون معاي وماييد كلامي اللي معاي تقول انا مااحب السخريه والاستهزا بالاخرين والله وحركني هالشي اني اكتب هالكلام

 

[PuPa^^SWeeT]

السلام عليكم


اي والله اختي صااجة



اتعور قلبي من اشووف فيديواتها والله




ويحرني لما اشووف وحدة تضحك علييها ولا تطنز عليها


الله يهدييها انشالله و يهدي الجمييع

 

[* ليــــدي *]

آكرهـ اي احد يتطنز عليها .. حيل استحقرهـ ..
الله يشفيهآ يآرب ..
و جزآج الله خير ع الموضوع

 

[شادن33]

فطوووووم حياااتي
والله نفس احساسي ازعل عليها ماادري ليش
احسها انسانه شفافه ووايد على نياتها
الله يستر عليها

 

[ليه الجفآ]

معاج حق ..

لازم احــد ينصحها .. يمكن صاكين عليها ناس مستغلينها ..

الله يهديها






..​

 

[لحظآتَ]

الله يرحمها برحمته

اكيد المره متعرضة لظروف وصلتها لهالحال

مافيه شخص طبيعي يسوي هالسواة .. واللي يضحكون ترى ببساطه مُعرضين للابتلاءات

مادري عبالهم مُنزهين عن كل عيب وذنب !!

الله يهديها يارب ويهدينا أجمعين

 

[بنت الأجوااد]

مافيها بلاء ولا شي

هذا تفكيرها وهذى اعتقاداتها

انا ما اضحك عليها بس مستغربه وين اهلها وين عيال عمها عنها ليش مايوقفونها عند حدها ويحطون حق خبالها حد

هذى وحده سفيها الله لايبلانا

كافي انها تبي تخترع السحاب المطر وتبي تجيب لرجال جوارى تكفيهم عن الزنى وباقي خبالها واخر شي مرشحه نفسها

استغفر الله

 

[ترانيم القصيم]

يا زينك يا فطوووومة وربي إنك عسل ,,

جزاك الله خير حبيبة قلبي ,,

حسيت نصيحتك طالعة من قلب صادق و يحب الخير ,, الله مير يكثر من أمثالك حبيبة قلبي أنتِ ^^

و يا ليت يتم نصحها أو تسوون حملة ,, و تكون النصيحة ( بالتي هي أحسن ) مهوب بالتي هي أسوء

رجااااءًا بنات ,, النصيحة تكون بأسلوب ذرب و راقي ,, حسسوها إنكم مشفقين عليها و إن حاز بخاطركن آللي تسويــه ,,

الله يهدي الكل و الجميع ,,

احترامي و تقديري

ترانيم القصيم

 

[منو انت]

والله معاج حق


عسى الله يهديها يارب

 

[نـــوارا]

ورب الكعبة الشريفة من قريت العنوان عرفت انج تقصدينها
انا هالمره ماحب اسمع بطاريها الصراحة لانها فضحت فينا احنا بنات الكويت بشكل عام يعني الخليجيين والعرب لما يشوفون ويسمعون خرابيطها بينقدون علينا ويظنون اننا موصاحيات وبعدين انا اتوقع ان في أحد وراها مو معقولة وحدة مبتلية مثلها المجال مفتوح جدامها لي هالدرجة تخربط والكل يعرف ان قناة سكوب اوول من صفق لها وعطاها المجال .. ومازالوا يعني بالذمة وحدة الحمدلله والشكر افكارها ناقصة وماتعرف حتى تتحجى شنو الغرض من استضافتها ... صج رزق الهبل على المجانين
والله العظيم ماحب اتمصخر على احد هم احنا عندنا عيال ونخاف عليهم بس الموضوع صج .. صج يحرررر وما ينسكت عنه واذا في حملة ضد اللي قاعدة تسوي انا اول وحدة انضم لها .

 

[' #sǎrǎh . . ']

الله يهدي الكل
جزاك الله خير فطوم على الموضوع المميز
​

 

[RAHAF Q8]

انزين لي متى ما نضحك ؟؟ لازم أحد يوقف هالسلوى عند حدها

مادري ليش تنتقدون الناس ماتنتقدونها المفروض العنوان > لاتضحكيين الناااس عليج يا سلوى <

لأن اهيا اللي هانت روحها على اليوتيوب قاعده تضحك العالم ابسوالفها السخيفه وتعبر عن اعجابها بالشيوخ وممثليين

أشكره تتغزل فيهم على بالها بيتزوجونها وتقول لو معاها مليون بتعرض ع ممثل يتزوجها لفتره وتروح معا فيينا وصلت لمرحله تخطب رياييل

أحس تسوي روحها غبيه عشان محد يشره علييها

 

[قمر بيت أبوها]

ياناس هالبنت مبليه وأكيد فيه ناس واقفين معاها لاغراض قبليه وهي معروف قصتها ولاأحد يجهلها وقبل لا تشتهر وتطلع وكل قبيلة مطير عارفين سلوى
مسكينه لا أخت ولا أم والأخوان كلهم راحوا الله يفك عنها تخنقني العبره لا تذكرت تفاصيل تفاصيل حياتها
واللي تقول تعطي فكره سيئه عن الكويت انا مااشوفها ترقص وتشعوذ ولا فلكيه بسكوب
البنت تطلع سوالف اختراعات وتبي منصب مو اكثر يعني احلامها بريئه مثلها
ويكفي يوم تقول باجيب ولد والبسه هالللبس والله هالحلقه قطعت قلبي قطع قطع
ياربي لو كنت بالكويت والله مااقصر عنها لاروح لها واصير اختها واداريها لين الله يفك عنها ماابتلاها فيه
يارب انك تنصرها من عندك وترده لصوابها وتحفظها من شماتت الناس
يابنات الكويت يابنات ديرتها البنت مو محتاجه غير احد يداريها ويابخت من كسب خوتها بالاجر والمحبه والدعاوي

 

[زَهر تِشرينْ]

.. }


​

​

أنا سمعت عن قصتها وكل الاحداث الي مَرت عليها
بصراحة احداث مُفجعة ومُؤلمة حيل الله يصبرها ويعينها على مابلاها
ويهديها للطريق الصحيح ويبعد عنهاشياطين الانس الي يدفعونها انها
تسوي اشياء خاطئة والناس تضحك وتطنز عليها ,,
..
دعواتنا لها ولكل خواتنا المسلمات بالهداية وان الله ينير
بصيرتهم ,,
..
مشكورة قلبي ع الموضوع
كل تقديري .,
​

​

​

​

{ :eh_s(17):​

​

 

[Pink.Barbie]

مشكلتنا مجتمعنا العربي مريض و يعتبر الدكتور النفسي عيب و عار

ولا برى اعقل العقلاء و اذكى الاذكياء يزور مختصين نفسين حتى لو من باب الفضفضة

مافيها شي لو انها حصلت على استشارة نفسية

الله يهديها و يرفع عنها و يرحمها يارب

 

[عادت ذكرياتي]

الله يرحمنا برحمته ...

صج هالشي يعور القلب ...

 

[تذكر خافقي رمحك]

اهي الي يايبة الحجي حق روحها
بس استغرب ماوراها رياييل يوقفونها عند حدها

 

[فطوم 84]

مشكوره ترانيم القصيم حبيبتي علي كلامج الحلو وكل البنات ماقصرتوا وانشالله اي وحده تقرا الكلام وتكون تعرفها توصل صوتنا لها وانها اخت لنا نبي مصلحتها ونبيها تقعد ببيتها مستوره محد يضحك عليها وماقلنا هالكلام الا من حرصنا عليها وانها بنت فيها خيرر بس مبتليه والله يهديها انشالله وتبعد عن هالسوالف والامور اللي تخلي الناس تضحك وتستهزا فيها

 

[manoooram]

الله يرحم حالها صراحه تكسر الخاطر
لابد ان أحد نصحها بس ربي لا تبلانا خلاص اهي تبي جذي

 

[سوسو حبيبتى]

اكيد فى وايد ناس نصحوها

وبعدين دخلت اليوتيوب كل العالم معلقين على فيديوهاتها وكلهم عاملين ديس لايك

يعني مو معقول مش شايفه كل الحاجات دي ؟؟؟

الله يهديها