كـل بــنات الكويت دشـو

[يارب تفرج همي]

السـلآم علــيـكم ورحمه الله وبركــاته


شـــلــونكم يا الغالـيات ...


انا حبــيــت أشــاركم مشــكلتي انا عــارفه حلـــول الدنيــا ماتحــل مشكــلـتي غيــر ربي ســبحانه وتعــالي هو أملـي الوحيـد بهذي الدنيـــا...


مشـــكلـــتي يا الغالياات ...

اول شي بعرفكم بنفسيـ انا بنت مو متــزوجه عمري 25 سنه ... الحمدلله مارااح اقووول انا مزيونه والكل يشــهد لي مثل بعض البنات لا الحمدلله انا مقـــبوووله ومملوحه يعني في فووقي وتحتي بالزين ....

بس الله عطاني أشياء كثـيره بنات واجد يتمنوونها والحمدلله...


المشكــله انا ماعـــندي خــوات أو اخــوان... انا وحيــده ( أمــي ) واكيد كل ام تبي تشــوف بنتها متزوجه ,,, والحمدلله
أنــا ياكثــر الناس اللي تخطــبــني من الجماعه ومن قــبايــل ثــانيه ... وحتى ناس حضر مو بدووو اخطبووني يعني من كل فج جاني شخص ويالله لك الحمد... بس عندي مشكــله ... بحــــيــاتي انا اي شخص يتقدم لي ما اكفر فيه ولاا ابيه ولاا ابي اتزوج ..

انا تعبت امي تبكي عندي وانقهرت انا ودي اتزوج بس ما أقــدر

السبـــب:
يمكن كثـيـر ما يأدني ويعاتبني ويمكن كثير منكم تحس بلي احسه ويمكن تقوولوون امج حرام بس افهمو الموضووع وحسوو بشعوري...


انا يا الغاليات .. لما كان عمري 16 سنه تعرفت على واحد هو اكبر مني بسنه وكنا صغار وجهال ومانفهم شي ..

المهم كبرنا مع بعض حبينا بعض عرفني على اخته ... حسسني انه يبيني مشت الايااام وتروح وتجي الايام ... الولد شاريني ويبيني ....

المهم امه كل يووم تجيب له مره هذا مدرسه هذا مادري شنووووو وهذا تشتغل وهذي وهذي ... الولد يرفض يرفض
هو اكبر عياالهااا يعني فرحتها...
المهم قال لاخته كلمي امي قولي لها انا لقيت لاخوي مره وشوفي شنو تقوول قالت لامها قالت لها الله انتي تخطبين لاخوج شعرفج جاهل ماتعرفين شي...

المهم سكت .. انا تعبت قلت له خلاص انا اهلي بدوو يضغطووون تكفى ... راح كلم امه قال اانا مره شفت خويت اختي ولحقتها وراقبتها وانا البنت ابيها ... قالت لاا قال شنووو ليش لا قالت ماعرفها ومادري شنو ..

قال طيب انشدي عنهاا روحي بيتهم اذا ماعجبووج ما اخذهاااا قالت لا
وسكت وقعد يحن على اخته .. اخته راحت كلمت خالتها وقالت اخوي يبي وحده وامي رافضه .. حاولت الخاله تقنع اختها اشفيج خل نســال عنها نشووف البنت ...

المهم دشت عليه غرفته انه : عطني اسمها واسم امها وابووها استااااااااااااااااانس طار من الفرحه والله العظيم ذاك اليوم مانمنى قاعدين من الوناسه ..سبحان الله
راحت أســالت مني مني محد ذم كل النااااس تمدح وتشكر باهلي وبخوالي وبامي..
المهم هو شاف طولت 4 ايام ماردت خبر قال هاه يمه شصار..

قالت لالالالالا ماتزوجها امها عووووبه ؟؟؟؟؟؟؟ امي انا عـوبه الله اكبــر ... والله يابنات مو عشان امي لا قسم بالله لو الكل يعرف امي يتسغرب امي طيبه حيل حيل انا بعض المرات طيبتها تقهرني ..
المهم : دق علي قال امي تقوول امج عوبه وقعد يضحك تخيلوو بنات هوو يعرف امي وطبعها يعني 10 سنين يعرفني عدل ويعرف اهلي شخص شخص.
قلت من جدك قال اي والله قعدت ابكي هو قال اصبري والله معانا .. صبرت ردت بعدها بفتره كلمها ... قالت لا مابيها .. انا ســألت عنها كلن مدح بس انا مابيها شنوو اول مره اشوف واحد يخطب لنفسه؟ قال يمه انا جيت قلت انتي اخطبي لي مارحت خطبت ...
قالت لا تبيها روح مع ابوك اخطبها .. ووشووف عرسك ماراح احضره ولاني راضيه عليك...
قال يمه قالت خلالالاص انا ادري انها ساحرتك بوديك لمطوع يكشف سحرها ههههههههههههههههههههههههههههه

صرت ساحره ياابنات يارب سترك ...

معــقــوله ام ماتبـين تفـرحين بولدج الكبـيــر ليشش هذا ولدج ..
انا أشووف الحريم لا صار ولدها ابو 20 قعدت تحن عليه تبي تزوجه وهذا يبيها تزوجه رافض ..
اما تاخذ اللي انا اختار او لا
قال يمه انا اللي بعيش معها مو انتووو

المهم: بعدها بفتره جا كلمها مره بعد قالت انا قلت لابوك مو موافق رافض يقووول ما تاخذ من القبيله الفلانيه ليشششش اشفينا الحمدلله .. قبيلتنا تشرف كل القبااايل..
قالت لاا ياا تاخذ من اي فلان ولاا الاا فلان ... اللي هم قبيله ابوه او قبيل امه
قال يمه انتي مو من قبيله ابوي وخذاج شلووون هذووول حنا وياهم شي واحد قبيلتنا قالت روح كلم ابووك
هي عارفه انه ابوووووه شايب وعصبي يعني ماعنده سوالف ابي وما ابي ..
سكت الولد ومقهوووووووور .. تخيلوو بنات يكلمني يقوول انا اموت ربعي وعيال عمي كلهم جهال ابو 20 متزوج وعندهم عيال

وانا ابو 27 مو متزوج .. ليش .
المهم : قامو بنات عمي يحنوووون علي ترى هذا رجال بكره يخليج ويتزوج ومادري شنووو يقص عليج ومن هالسوالف اصلن هذا يبي يزهقج عشان تجي منج مو منه ..

حطو وسواس براسي:
قلت يالله خل ادق على اخته واساالها والله يابنات احس وجهي منقص بس شسوووي للظروره احكام..

دقيت شلووونج فللانه شخبارج وشلوون عيالج بخير الحمدلله ومن هالسوالف .. قلت لها تكفين احلفج بالله وبراس عياالج تجاوبين بكل صــراحه .. قالت ابشري... قلت اخوج كلمكم عني .. قالت اي اوالله العظيم وصار كذا وكذا قالت لي كل السوالف اللي هو يقوولها لي... وقالت تبين الصدق ســالنا عنكم كلن مدح فيكم امي كانت تحاول تدور عذروب مالقت قلت تكفين لاتقوولين له اني سـالت انتي تدري حنا بنات ... وانتي عندج خواتي وعندي من خواتج يعني ماترضين اضيع عمري كذا قالت لاا والله انتي اختي وعزيزه وغاليه.

وصكرت التيلفوون .... وبعدها حسيت براحه اللحين شنوو يقولوون بنات عمي مايهمني لاني واثقه انه شاااريني حيل حيل مو شووي
انا اللي ابيه...


يمكن اهني بالمنتدى يوم من الايام تدش امه اخته خالته بنت خالته ..... تكفـــون يلــي تقــرون موضووعــي ..

اذا عندكم اخووو او ولد يبي بنت لاا توقفوون بطريــقــهم .... انا والله انه نفسيتي حيل حيل تعبانه ...
انا ابيه وهو يبيني بس شنــو الحـــل؟ رافضه امه ... ولا في سبب مقنع ....

اللهم اجرني في مصيبتي واخلفني خيراا منهااا

تكفـون بنات اللي عندها حل تقوول او تدعون لي والله انا تعبت لما اشووف امي تشوووف بنات عمي وبنات خلاتي كل وحده مع ولدها والمشكله اصغر مني ... اشووف الحسره بعينها ... امووووووت والله اموووت ... ودي احقق لها هذا الحلم ... بس انا مو قادره ​

 

[هاناا]

عليج بالصلاة و الدعاء

و اذا ما صار نصيب امشي بنصيبج

 

[spanish-girl]

الزواج قسمة ونصيب كثري من الدعاء وانشاءالله ربي يفرجها لج

 

[يارب تفرج همي]

انشااء الله والله قاعده ادعي واصلي...

بس تكفين ما تخيل حياتي بدون هالانسان والله العظيم.... بس شعور اتخيل احس بموت

انسان تكبرين معاه هو اخوي اللي فاقدته وهو ابوي اللي فاقدته وهو الصديق وهو كل شي الله العالم

 

[sweet dashttya]

كثري من الاستغفار الله يعينج حياتي

 

[يارب تفرج همي]

تسلموون انشااء الله ياااااااارب يارب والله العظيم والله والله انه الله فرج همي وكتب لي زواج راح يكوووون دعوه لكم حضووور زواجي يارب

 

[غير كل الناس]

لازم يحاول ويستذبح بعد وان ماقدر خلاص قدر الله وماشاء فعل وشوفي نصيبك يابنت الناس مني ناقصه اصل قبيليه وبنت ناس والف واحد يتمناك

 

[noorq8]

ليس للعاشقين الا الزواج.
حبيبتي بعلمج دعاء وكرريه وان كان نصيبج بتاخذينه.
اللهم ان كان يرضيك زواجي من فلان فاجمعني به.

 

[يارب تفرج همي]

ادري بس هو يبيني وانا ابيه ... مو قـادره ولله ماقدر اعيش بدونه ... ترى انا عشت طفوولتي ومراهقتي وشبابي ونضوجي معاه يعني والله والله ... ماقدر تعرفين لما يكووون ابوج تقدرين تعيشين بدونه اخوج ... ماقدر هو اكبر من كلــمه اني ابيه زوج

 

[الأmـاكن]

شوفي حبيبتي الناس لاشافوا أي 2 يحبون بعض سواء ازواج ولا لأ قالوا ( فلانه ساحرته ) ..
زين ماقالوا "نور ساحره مهند"
بالنسبه لكلام الناس خذ وخل ..
كثري استغفار وادعي ربك واللي كاتبه ربي بيصير غصب عن الكل ..

موفقه حبي

 

[اميرة-الاحجار]

يمكن الله مو كاتبلج هالادمي يكون من نصيبج
شلون يعني ؟
وركزي ترى الله اللي مو كاتبلج هالشي وامه مجرد سبب وسبحان الله رافضه بدون سبب
يعني مو نصيب
لاتضيعين عمرج ترى البنت كل ماكبرت قلت فرصها بالزواج
اذا اهو من نصيبج بتصير معجزه وبتاخذينه واذا مو نصيبج ماراح تاخذينه لو تنطرين الف سنه

 

[يارب تفرج همي]

ادري بس ياااااااااارب انه نصيبي ... والله يابنات انا اقوم الليل اصلي وبدعي ربي .... ياااارب يارب يكتبنا لبعض يااارب والله يجزااااكم خيــر يابنات .... وماقصــرتووو والله عارفه كلامكم صــح وحاســه فيه ..بس الشكــوى لله

 

[منطوق الغلا]

كل تاخيره فيها خير الغلا



الغاليه كثيري من الاستغفار وصلاة الليل ادعي




والصدقه




الله يسعدج ويوفقج ويحقق لج امانيج يارب


ان شاء الله باجر بتين وتكتبين خبر حلو شراتج موفقه الغاليه

 

[om_3kash]

حبيبتي الشيوخ محللين يتزوج من غير موافقه امه بالبنت الي يحبها لانه لو بيتزوج وحده ثانيه بيظلمها معاه
خل يتحدى اهله و ياخذج ميخالف اول شي راح تزعل بس بعدها بترضا غصبا عليها خصوصا اذا يبتي عيال

والله يكتبه من نصيبج يارب

 

[يارب تفرج همي]

الله يجزاج خير ياااااااااااارب ويسعدج ماتقصرين

 

[يارب تفرج همي]

مايصــيـر اخذه بدون اهله مو سالفه شــيـوخ .. انا اهلي ماراح يرضووون بيقوولوون وين امه وين ابوووه .... تعرفين عادات وتقاليد وامي مستحيل تقطني على ناس جاي ولدهم يخطب وامي تعرف اني صديقتي اخته؟؟ يعني لوو بيجي يخطب بتقوول امي موو اخوي رفيجتج وين امه وين اهله ؟؟؟ فهمتي صعــبـه حيــل

 

[دنيتى زوجي M]

اذا يبيج وشاريج يحاول مره واثنين وثلاث

ليما الله يهدي امه ومثل ماقالو البنات عليج

بالاستغفار والصدقه والله يوفقج ان شائالله

 

[يارب تفرج همي]

اي والله قاعد يحاااااول معاها حيل مو شوووي .. بس هو مشكلته عصبي شوووي يعني يتنرفز بسرعه وهي ماتعطي مجال للنقاش .. بس انشاااااااااء الله يارب تهديها يااااااااااااارب يارب ويسخرها لي يارب ويساعدني ويفك همي ومشكووره يااقلبي

 

[** باربي **]

يابعد عمري والله حاسه فيج

حسبي الله على كل ام تحرم ولدها من الي يبيها وتحرم حبيبين من بعض

خل يقولها يمه انتي تفرقين بين اثنين متعلقين ابعض

باجر تدور الدنيا وبسرعه هالايام الحوبه تبين الله يحرمج من شي غالي وتحبينه

من ابوي مني انا من اخواني خواتي بسبب يجي هادم اللذات الموت وياخذ من عينج من تحبين

ويحرمج مثل ما حرمتي قلبين مايقدرون يفترقون عن بعض

خل يقولها لو انتي امي وتبين سعادتي وهناي تخليني اخذ الي بنفسي وبخاطري

وتفرحين لفرحي انا ما يبت وحده من الشارع او وحده من برة الديرة او وحده اكبر مني

عشان يكون عذر فرضا

خل يقول انا وياها عشره عمر وحب 10 سنين يايمه رحميني ولا تخلينها تروح من ايدي وباجر اعيش بحسرتي

لا تستهينين فيني وتقولين حب مراهقه وتنسى لا يمه لا تضلميني ما بنت غيرها لاني ماقددر اعيش مع غيرها ما اتقبل

وبيكون الطلاق سريع وبقولها ماراح اقرب يمج لاني مجبور عليج واحب غيرج بس امي خطبتج وتدري

او خل يقول ماراح اتزوج طول حياتي لو طبقت السما عالارض الا هالمركب ولا ماركب هل يبين لها شكثر متعلق قلبه فيج

يعني اذا الواحد حب ووفى يصير مسحور واذا لعب ببنت الناس وجذب عليها وعاش خبيث يصير ريال!! مالت على عقول الناس الزباله

شوفي باصراره عليج راح يرضخون كثر الدق يفج اللحام ياقلبي ولا تيأسيين واهم شي قبل لا ترفضين دقي عليه وقوليله انا قاعد يخطبوني
وامي تبي تزوجني بس انا موراضيه ما اخون عشرتنا والعشرة ما تهون الا على ولد الحرام والي حسيته انه ما يفرقنا الا الموت
يا ولد الناس انا بنت ولي عمر معين للزواج وانا سمعه وشرف اذا انت صج تبيني وشاريني وبتاخذني مهما صار وبتحدى كل العالم

وتروض اكبر راس انا وعطني ياها كلمه رجال وبشرفك وانا والله مستعده اتحدى الدنيا عشانك وما اخليك بس اول شي تعطيني وعد رجال
..واذا حاس انك مو قد الشي وامك اهي الي تمشي حياتك وتختار زوجتك وانته راضي وراضخ قولي يا ولد الناس عشان لا تعلقني اكثر انته عندك خوات واهل وعرض وما ترضى احد يبور فيهم ويعشمهم وتالي يعطيهم ضهره ترى الدنيا دواره ياحبيبي وربك ما يرضى بالظلم


قوليله هالكلام وقبلها كوني قاريه سورة البقرة وانويها حق موضوعج وياه ودايمن قولي يا مؤلف القلوب وراد يوسف ليعقوب األف بين قلبي وقلب فلان واقر عيني به كما قريت عين يعقوب بيوسف ويا جامع الناس ليوم لا ريب فيه اجمع بيني وبين فلان بالحلال وارزقني ياه ولا يكون نصيبي غيره بحق قولك انك على كل شيئ قدير يامن بالاجابه جدير وبحق السماء الي رفعتها بغير عند وبحق الم ...
وادعي وادعي وتقربي من ربج وكثري استغفار ودايمن رددي الودود الودود لجلب المحبه هذا من اسماء الله الحسنى

وقبل لا تكلمينه اقري الم نشرح لك صدرك لها مفعول بالتحبيب وشوفي شيرد عليج حبوبه لانه قطار الزواج سريع ما تلقين جك بوم الا صكيتي ال30 وفرصه الزواج ابهالعمر مو مثل العشرينات واهوا ريال ما يعيبه شي وياخذ اصغر بنت
واذا في مجال خلي يخلي شيخ دين ولا داعيه تكلمها بالتلفون تقنعها وتيي لها من باب الدين يمكن تخاف انها جذي تحرض عالفاحشه

سوي الي قتلج عليه حبيبتي ورديلنا خبر وشنو رده وانشالله يارب توافق ويحنن قلبها عليج وتصير مثل المعجزة ونشوفج بقسم العروس آمين

 

[*بسبوسه*]

كثر الدق يفج اللحام
خليه يحن ويحن عليهم
دام اخته معاكم وخالته خليهم يحنون وهو بعد يحن اكثر
حتى لو امه قالت انا ماني راضيه وروح تزوج خليه يخطبج مع الايام الام قلبها ماراح يطاوعها على ولدها
بعدين هو ماسوى شي حرام وغلط عشان امه تغطب عليه حرام عليها
شنو عذرها عشان من قبيله ثانيه مو عذر شرعي ابدا

يعني خليهم يدشون لها من ناحية الدين والشريعه
وربي يفرح قلبج وتفرحينا معاج ما تطوف هالسنه والا وانتم املجين

وان مالله كتب لج نصيب معاه تراها خيره يا قلبي