عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[orangeya]

شنو يعنى صرناي ؟!!!!

عاشت عاشت كوكو :ggdw: عدل المرواس مثل ماقلتي سألنالج تخصص موسيقى بعد مو اي شي

وصرناي حسب الافاده اللي افادوني فيها آله نفخ موسيقيه... عاد انا مابغيت لا الشكل ولا الشرح لول

ماحب الموسايق (جمع موسيقى) :dddds: لوووووووووووووووول :dddds:

 

[orangeya]

بنااااااااات .........

شرايكم نخلي يمعتنا كل احد ؟
نخليها المسيّات ... من المغرب لي اخر الليل؟

يعني تقريبا من 5 المغرب لي 12 بليل
(سندريلا مو كويتيه) لووول

عشان ننام تدرون بعد احنا ناس عندنا التزامات
وقعده من صباح الله خير


يلا الموافقين يرفعون ايدهم


:eh_s(8): هذي انا اول وحده لول منو ترفع ايدها معاي؟

 

[CuTiE PiE]

ياهلا بالطش والرش وماي الورد بالغرش منورين حبايبى.........خخخخ الجمله هذى متعوب عليها جلست ربع ساعه على ماذكرتها
المهم الموعد الى قلتى عليه يااورنجيه حلو خلاص ان شاء الله كل يوم احد من الساعه 5 الى 12 نتلاقا..........

اى مس يوووووووو جويهه سووووووو متش ...................

 

[orangeya]

هلاااا فييييييج يالغاليه

تو ما نور الموضوع ,,,

شخبارج حبيبتي كيوتي؟

جويهه ماتنلام خنت حيلي حالتها كسيفه مع اللابتوب واظنتي مشغوله هالايام
الله يعطيها الصحه والعافيه ويبارك لها بعمرها وكل اعمالها

وهذي فرصه عشان اشكرج يا احلى جويهه على هالموضوع الحلو اللي تعرفت فيه على ناس مثلكم وشرواكم

انا+كيوتي صرنا ثنتين اوكي ان شا الله
من بتشبك معانا بعد بيمعتنا الاسبوعيه ؟

 

[coffee]

q8 qt هلا وغلا:eh_s(7): ههههه بعطيج امتياز اسم الله عليج شرح كافي ووافي ويا حلو حس (= صوت) المراويس

اورنجية حياتي تسلمين على الدعوه ولج مثلها واكثر :eh_s(7): صرتو ثلاثة انا بعد وياكم

 

[Q8_QT]

وآنا بعد وياكم :eh_s(9): صرنا أربعة
اورنجيا حبيبتي شلوووونج عساج بخير ما شاء الله عليج وإجابتج صح وتستاهلين :ggdw:وأزيد علي كلامج إن يستخدونه في الهبان

كوفي حبيبتي مشكوووووورة عالتشجيع الحلووو مو غريبة عليج والله سعيدة إني تعرفت عليكم وأضم صوتي حق اورنجيا الحلوة ومشكووووورة جويهه على الموضوع الأكثر من رائع واللي عرفنا علي هل بنات الحلوات تحية كبييييييرة لج :eh_s(9)::eh_s(9)::eh_s(9)::eh_s(9):

 

[جاي الضحى]

طحت عليكم ...شتسوون؟ ههه

شلونكم بنيات ؟ ولهت عليكم كلكم!

وانا معاكم...صرت الخامسه...أورانجيا هالله هالله بالقنفات...ههه.....

شمشتهين أييب معاي أكل حق يمعت يوم الأحد...قروضات وخفايف ولا تبون عشى عشى؟ تدرون شلون بييب الأثنين...وانتو عليكم الطيران...دامكم تسلفون عن أدوات موسيقى وغناوي...شرايكم نقلبها قعدت سامري....ههه....أورنجيا...لا تنسين مكرفونج ...:eh_s(6):


يوم قلت طحت عليكم...طرت علي كلمة خامرين....أمي يوم الزوارة من تسمع اليهال طاخين مالهم حس قاعدين بدار ثانية...تطرش أحد تقول رحو طلو على اليهال...علامهم خامرين....:gr4uu:...روحو شفو جود فيهم شي ولا قاعدين يدوبرون شي ...ما يتأمن منهم....ههه...عيالنا نزق...خمارهم فيه إن....هيهيهي....عاد بالهحزه مديم تلقينهم يدوبرون شلون يقنعون أهلهم انهم ينامون بيت فلان ولا فلان..ههه...ما ينقدرون اليهال...خطط ومؤامرات...._03BA:...ههه....


أنا عن نفسي قاعده أتذكر واستفيد وايد منكم... قواكم الله.

أشوفكم على خير إن شاء الله وسامحوني على القصور...فيكم البركه.

:hjy5jewf:

​

 

[Betty]

مساااااااالخييييير حبيبتي
سويتلج بحث على معنى سليمة ولقيت لها أكثر من معنى ويقولون إنها من الكلمات العربية الفصحى
طلعت اللي شفته أقرب للمعنى عاد انتي نقي واحد منهم :
سليمة : دعوة و أصلها يعود لامرأة مجنونة اسمها ( سليمة ) و قيل ( سلمى ) كانت تسير في الشوارع و تضرب المارة فيقال : ( سليمة تصكك ) اي تضربك
وسمعت بعد إن معناها غيمة وناس قالوا إن معناها الدنيا والصكة تعني موت الأم أو الأبو"الله يكافينا الشر "
وســـلامـــتـــج وتـــــعـــيـــشـــيــن

وي طلع معناها كلش مو هين مشكوره حبوبه

 

[Betty]

يا هلااااااااااااااااااااااااا ها نحنو عدنا حسافه طافني التجمع خيــــــانه هههه

Q8 QT اللي اعرفه متكتك يعني فيه عرض ومتروس .. يعني عرضه بنسب متقاربه من طوله مثل مدحدح مدربح

Betty على خبري سليمه تصكج يعني مرض يصيبج مثل اصخونه شي جذي بس مو متاكده

زين شنو اهو المرواس ؟

يعني لمن نقول سليمه تصكج يعني يبعتلك حمى تصدقين اول مره اسمع ان معناها جذي مشكوره coffee يا قلبي

 

[Betty]

بنات ممكن اصير السادسه ؟ و اييب الطيران معاي

 

[coffee]

اهلااااااااااااااااا شكله بيصير جاي ضحى ما صار ولا استوى ههههه

دام السالفه فيها طيران عيل ملزوم كل وحده تحط مقطع من الاغاني العتيجه بكل رساله

Betty الساعه المباركه يا عسل ههههه (انا ارد بدال جايوو دامها مو اهني )

 

[local]

بنات جنكم غيرتوا الموضوع الأصلي..
نرد حق غطاوي وحزاوي وغناوي أول..

أول اليهال الصغار لما يركبور الدوارف (المراجيح) واللي يدزهم يغني لهم:
"هذي الزيادة " .. ويردون اليهال ((كذاب))
"عبدالسادة" .. ويردون اليهال ((كذاب))
"طلق مرته" .. ويردون اليهال ((كذاب))
"عاف عياله" .. ويردون اليهال ((كذاب))
"هذي البنية" .. ويردون اليهال ((كذاب))
"اسمها رقية" .. ويردون اليهال ((كذاب))
"عضها قرب" .. ويردون اليهال ((كذاب))
"وماتت البنية" .. ويردون اليهال ((كذاب))

 

[كوكو شانييل]

السلام وعليكم ورحمة الله وبركاته :



او ل امي تغني حق بنتي وتقول صباحج الصباح والورد والتفاح .

 

[a7la tooota]

اورانجيوووو هني واخيرا صدتج

 

[CuTiE PiE]

يااااااااااااااااه ياكوكو ذكرتينى بالغنيه عجيبه اذكر قبل الام عندنا اذا صحا وليدها من النوم تقول له..........
صباحك صباحين ...صباح الكحل للعين
صباح يقول يا يمه ..كليت اليوم قرصين
صباحك الصباح ...الورد و التفاح
صباحك صباحين ..صباح الكحل في العين
صباح يطرد الفقر....صباح يوفي الدين
صباح يقول يا يمه...قريت اليوم جزوين

 

[CuTiE PiE]

اذكر بعد ايام اول الحريم كانو دايما يقولون نشيده الحرمه الضعيفه والحرمه المتينه .....خخخخخ
هذى الله يسلمكم قصه الانشوده هذى عجيبه :dddds:............

يقوللكم ياطويلين العمر في رجال عنده حرمتين وحدة متينة ووحدة ضعيفة :ggdw:
الرجال اذا راح للمتينة يقول لها:
يا سمينة يا متينة يا دكاكين المدينة
خششيني دسيني عن عصاقل لا تجيني :tomato2:
و اذا راح للضعيفة يقول لها
يا عصاقل يا مصاقل حبكم في القلب صاقل
خششيني دسيني عن دبادب لا تجيني :krkrkr:

هاااااااااااااااا شرايكم تضحك صح لووووووووووووووووووول :dddds:

 

[CuTiE PiE]

جايوووووووووووووووووه حبيبتى نور المكان بوجودك والدنيا صارت عم تشتى خخخخخخخخخخخ

 

[orangeya]

شلونكم حبايب قلبي؟

عسا ما صيّفت عليكم ؟
(بطيت عليكم = تأخرت عليكم)

يايتكم على سعه (على مهلي)

ياحلوكم والله ,,,



عاشاو عاشاو :ggdw:

ايييييييه جذييييييه تبردون الجبد ...

ليلحين صرنا 5 (اللهم زيد وبارك) :gathering:

 

[orangeya]

أورانجيا هالله هالله بالقنفات...ههه.....

لا توصين حريص ياوخيتي
افا عليج ماعليج الا انج تيين بس
بتلقين كل شي زاهب
وعلى سنقة 10 بعد :dddds:





شمشتهين أييب معاي أكل حق يمعت يوم الأحد...قروضات وخفايف ولا تبون عشى عشى؟ تدرون شلون بييب الأثنين...وانتو عليكم الطيران...دامكم تسلفون عن أدوات موسيقى وغناوي...شرايكم نقلبها قعدت سامري....ههه....أورنجيا...لا تنسين مكرفونج ...:eh_s(6):

لووول
من قلب ماراح انساه ان شا الله

​

بنيات على طاري الطيران وعدة الموسيقى

في مثل كويتي " من طق طبله قال أنا قبله"


نبي وحده حلوة تقولنا متى ينقال؟

 

[orangeya]

بنات جنكم غيرتوا الموضوع الأصلي..
نرد حق غطاوي وحزاوي وغناوي أول..

أول اليهال الصغار لما يركبور الدوارف (المراجيح) واللي يدزهم يغني لهم:
"هذي الزيادة " .. ويردون اليهال ((كذاب))
"عبدالسادة" .. ويردون اليهال ((كذاب))
"طلق مرته" .. ويردون اليهال ((كذاب))
"عاف عياله" .. ويردون اليهال ((كذاب))
"هذي البنية" .. ويردون اليهال ((كذاب))
"اسمها رقية" .. ويردون اليهال ((كذاب))
"عضها قرب" .. ويردون اليهال ((كذاب))
"وماتت البنية" .. ويردون اليهال ((كذاب))

:ggdw::ggdw::ggdw:

ذكرتيني بمسرحيه ليلى والذيب...

اظنتي في مقطع لما كانت تلعب بالغابه غنت نفس الكلمات تقريبا"

ماني ذاكره الكلمات.. وعيزانه اشغل الشريط وادور المقطع لوووووول