طفله تصبح انطوائه وترفض الذهاب للمدرسه بسبب معلمه كويتيه

[سلاسل ذهبيه]

هذا ماحدث باحدى مدارس الابتدائيه.وطبعا هذا التصرف يحدث ويتكرر
من بعض المدرسات الله يهديهن
تطلب البنت من المعلمه الذهاب للحمام وترفض المعلمه
وتكرر البنت الطلب وتصرخ في وجهها الابله وتقول لها اجلسي مكانج
وبالاخير البنت المسكينه تتبول على نفسها
وشنهي النتيجه؟؟؟=عقد نفسيه+كراهيه للمدرسه+تأخر في التحصيل الدراسي
تصبح انطوائيه لانها قدتعرض لسخريه من بنات صفها تعرفون صغار اول او ثاني ابتدائي
وكل هذا بسبب ان المدرسه منعتها من الذهاب للحمام
والمعلمه تبرر فعلها هذا بحرصها على وجود الطالبه اثناء الشرح وحتى لايطوفها شي من الحصه
نقول لها يااختي ترضين على بنتج انها تنحط في هذا الموقف؟؟
ترضين بنتج تصاب بعقد نفسيه؟

 

[ورود خذلتها العاصفه]

مالت على المدرساااات اللي من هالنوعيه اذا انتي يالمدرسه مالج خلق شحقه راايحه درسين

والله في مدرسااات ينحطووون عالجرح يبرا

 

[ميوسه]

الله يعين الطفل على معلمته

 

[ظبي البوادي]

الله يغربلهم

 

[سلاسل ذهبيه]

مشكورين خواتي على تفاعلكم مع الموضوع بس مانصير ندعي عليهم
الله يهديهم الواجب علينا انا ننصحهم ونبين لهم خطر تصرفهم على نفسية الطفل
امس بمدرسة بنتي كانت الناظره حاضره حصه الاحدى المعلمات بصف بنتي جان بنيه تستأذن
من المعلمه بتروح الحمام ومارضت المعلمه ولما سوتها البنت على نفسها طاح وجه هالمعلمه جدام الناظره
والبنيه مسكينه مو عارفه وش تسوي ظلت تبجي
وهذا ثاني مره تكرر هالسالفه بمدرسة بناتي خلال اسبوع,

 

[رضاهم جنه]

انا مدرسه ودايما الجهال يبون الحمام يعني بس يبون يطلعون وبس بس الله يهداها عالمعلمه ترى مبين اذا الواحد يبي الحمام والا بس دلع

 

[ام عفاف الكويت]

عاااد حرااام الطفل مايتحمل

 

[كرز حالي.]

الله يهديهم

 

[3w!Shni]

حبيبتي الحمام لازم ماتحرمين الطالب منه

خليه او خليها تروح .. و بس ترجع تروح الثانية..

انا جي اسوي .. و اذا عندج اولى ابتدائي تخاف تروح بروحها مثلا..

تخلين وحده تحسينها فاهمه و هادية تروح وياها..

اما الماي فتقدر تنطر لي اخر الحصة ..

وفي طالبات تعرفينهم البنات نفسهم لما يسعونها تقول بروح الحمام تقولج ابلة هذي نوعها تروح تلعب ..

 

[درة أهل الطولات]

حياتي مسكينة

 

[هجووورة]

ومنا الى وزارة التربية

 

[يا قائم آل محمد]

الابتدائي بالنسبة للحمام انا احس ان حالتهم خاصة لانهم صغار ممكن ما يقدرون يتحكمون زيادة

لكن بالنسبة للمتوسط و الثانوي من دون الحالات الخاصة
ممكن يتحكمون و ينطرون لما تخلص الحصة او بالفرصة

 

[معلمه متميزه]

انا ابله ابتدائي مثل ما قالو الابلات الي فوق اليهال من تبدي الحصه لين تخلص وهم بس يبون يطلعون باي طريقه ماي حمام حمام ماي وعندنا اوامر ما نطلعهم الا في حالتين الطالب يكون مريض ( حالة خاصه ويحتاج يروح الحمام على طول ) او صف اولى ابتدائي هذيل صغار ولازم نطلعه اذا طلب يروح اما باقي المراحل ما نطلعهم الا اللي مبين عليه انه فعلا حصران مو يتعيير وصدقوني المدرسات يعرفون الطالب الي من صجه والطالب اللي يتعيير لانهم صغار ما يعرفون يمثلون عدل فيبين عليهم على طول ..

والمدرسة الي ما طلعت البنت اكيد مانتبهت لملامح البنت او ما كانت مهتمه هاللي ما طلعتها ..

بالنهاية المدرسات بشر ويغلطون حالهم حال باجي الناس .. وتسلمون

 

[Programmer.Girl]

صراحة اللي تسوي جذي ما تستاهل تكون مربية اجيال

اهيه تسوي بعيالها جذي؟ ترضى احد يسوي بعيالها جذي؟

مو بس اليهال .. حتى الكبار

يمكن وحده مريضه او شي .. وتقولها قعدي ماكو روحه

 

[سلاسل ذهبيه]

يعطيكم العافيه بنات وابلات . تراي ماكتبت هالموضوع الا لما شفت هالموضوع يتكرر السنه اللي طافت كانت لي قريبه تدرس اولى ابتدائي
هم مارضت تطلع بنت للحمام والبنت سوتها تقول كنت اظنها تبي تطلع وبس ماتوقعتها صجيه
ولما جا ثاني يوم جاء ولي امر البنت وشرشح الابله تقول تحسفت امية مره اني ماطلعت البنت ان شاءالله رايحه تلعب طول الحصه
ولا يجي ابوها

 

[فجوره]

للأسف ما تصلح انها تكون مدرسه وجذي تعاملها مع الأطفال

حسبي الله ونعم الوكيل


​

 

[+بسبوسة+]

اول شي لازم تشتكي على المعلمة عشان ماتكررها مع غيرها


ثاني شي ترى اليهال اذكى مني ومنج
انا كانت عندي بنت وايد وايد مشاغبة وكل شوي تطلع ابي حمام
ولما اقولها لها تتبوسم وتقولي ترى اسويها بالصف..ههههههههههههه تهددني!

 

[ام خالد 78]

لاحول ولا قوه الا بالله

 

[(كويتيه عسل)]

وين المصدر ؟

 

[سلاسل ذهبيه]

وين المصدر ؟

اللي على راسه بطحا!!