شسوي

[anwaarsandrilla]

بنات انا امي تعاملني معامله سيئه وايد ذاك اليوم يت عمتي عندنا مع بنتها بنتها عمرها 11 و انا 13 عمتي ماشاء الله شلون تعامل بنتها كنت بحسدها بس انا مؤدبة
يعني امي لو قلتلها نعم تقولي شنو و بعديها تدعي علي
و اعي ما تفتح النت الا عشان العاب يعني ما تشوف شلون تتعامل معي و انا و كل وحده ندري شنو الدوره و هذي الاشياء و انا للحين امي ماقالتلي شي
و امي حيل بخيلة علي
و بعد عندي شوارب نفس الريال و ما تقلي خليني اشيلج ابد ابد و اي شي
ضايج خلقي
افففففف
امي احبها بس اهي ما تحبني
و بنت عمتي لو قالت لامها ماما عمتي تقوللها نعم يا روحي
و انا اذا قلتلها يما مريضة تعبانة تقولي موتي عشان ارتاح منج
و اهي تخلي اخواني اللي بالعشرينات اعمارهم يطقوني بس ابوي و اخوي الصغيرون يحبوووني وايد و لو احد طقني يموتونه
و امي لو ابي افضفضلها كلش ما تسمعني و تطنشي
ساعدوني
شسوي ؟؟؟؟؟؟؟؟؟
باي اسفة على اطالتي بالكلام عليكم
الله يخليكم ردوا كل مره توصل 400 مشاهده و ولا رد

 

[منيره آل ثاني]

سبحان الله ما تلاحظين شي

امج وشوي من خوانج يظلمونج بي بالمقابل ربي جعل اخوج الصغير وأبوج يحبونج
كلمي أبوج انه يكلم امج ويقولها الي تبينه وادعي في صلاتج قولي اللهم حنن قلب امي وإخواني علي لان مالي غيرهم بهالدنيا

في حفظ الرحمن ورعايته

 

[كنوشة 2009]

يا حياتي انت مثل قالت اللي قبلي قولي حق ابوج يكلم امج ليش تعاملج جذي
بس انا اتوقع انها تغار منج لان ابوج وايد يحبج

 

[anwaarsandrilla]

انشاء الله شكرا على الرد

 

[سكرة،]

حبيبتي حاولي ترضين أمج بأنج ما تسوين شي يزعلها وماتتذمرين من كل شي اكيد في شي مزعل امج منج وبعدين انتي صغيره توج لاحقه على الصالون واللويه وترى الأم نعمه ومهما سوت قلبها حنون ولا تقولين أمي ما تحبني هالكلام مؤ صحيح بالعكس مع التكرار راح تصدقين هالأفكار السيئه تعوذي من الشيطان ولا تفكرين في يوم من الأيام ان امج ماتحبج امج تحبج اكثر من اي شخص اخر

 

[anwaarsandrilla]

شكرا حبيبتي انشاء الله

 

[Dream2013]

بسيطه
صارحيها ،، قوليلها ماما انا اتضايق من اسلوبج معاي
و قوليلها الاشياء اللي تضايقج، و المواقف اللي مرت و
حزت بخاطرج،، يمكن امج تتصرف بعفويه و مو حاسه
بغلطها معاج ،، انتي مراهقه و حساسه ،، احيانا مواقف
عاديه بس انتي تتاثرين وايد بحكم عمرج الحرج،،
صدقيني المصارحه احسن شي،، و لا تقارنين امج بعمتج
لان الناس يختلفون عن بعض ،، امج يمكن من النوع اللي
مايحب يعبر عن مشاعره،، بعكس عمتج،، وصدقيني
مافيني ام تكره ظناها

 

[*الهنوف*]

الله يهدي بعض الامهات
المفروض تعز وترز بنتها
حتي لو نفرض انج فيج شغلات موزينه باخلاقج وامج تعبت منج المفروض هم مايطلع منها هالكلام

انتي شلون معاملتج لامج؟؟يعني لو تعاملينها باحترام هم تعاملج بقسوه؟؟
اذا جذي كلمي ابوج يكلمها
او بطيها مره وحده بويه امج وقولي لها ليش ماتحبيني انا بنتج وابجي عندها وقولي انا يمه اغار اذا شفت بنت عمتي وعمتي شلون يتكلمون
يمكن تحس

 

[قيروان الزمان]

السلام عليكم ورحمة الله وبركاته
حبيبتي عليج بالدعاء وبري أمج وأحسني إليها كثر ما تقدرين وأكثر
ولا تقارنين نفسج بغيرج عشان ما تتعبين قولي الحمدلله
والله يحنن قلب اميمتج عليج يارب