رودي للاستشارات الهندسية

[nono78]

هل العامل اللي ركب السيراميك حسب ارتفاع المطبخ اللي ابيتركب علشان تصير النقشه بالنص بالضبط؟

اتوقع الخط الابيض اللي فوق و تحت النقشه بيغطيهم كبت المطبخ لان النقشه عريضه بتترس المسافه اللي بين الكبتات

كيكه اييي حسبنا كل شي

وبحط انا العتبه (الدجه) حق المطبخ يعني بركب المطبخ عليه مو على الارض احسن حق التنظيف

 

[ديرتي الغاليه]

لا أستقباااااال ......

 

[أسولة]

خواتي الحلوين نونو والكيكه وأم وهابي وباقي العضوات عندي حمام كرمكم الله هذا للحين ما غيرته من شريت البيت لأن أهل البيت اسكنوا في بيتهم بس سنه واحنا شريناه منهم ، بالبدايه أنا غيرت كل الحمامات ما عدا حمام الضيوف والمغاسل لأنهم كانوا ما يستخدمونه كله مقفول وإن شاء الله لي نيه أغيره قريب وبالنسبه لحمام صالة المعيشه جم مره أشوف يطلع منه زهيويه من جرجوب الباب مادري ليش يمكن لأن الحمام بابه خشب والله من النوع الزين نفس بيبان الغرف متين ومحفور . السؤال هل المشكله من الباب الخشب أو في شي بالتمديدات ؟ وبقيت أقولكم أنا ما خليت مبيد حشري ما حطيته بهالباب حتى العجينه السامه بس نفس المشكله يختفون الزهيويه لمدة جم يوم ويردون مره ثانيه وأنا عندي مشكله جنبي بيت يعني لزيق بيتنا مبني بس مافيه لا بيبان ولا درايش وصاحبه مخليه من جم سنه بناه ولبسه مزايك وصار عنده ظروف وما خلصه مخليه بس كل جم شهر يمر يشوفه تعتقدين من البيت المهجور يطلع لي زهيويه ، الكيكه أنا قلت لج عندي سوالف وايد:tek:

ملاحظه : جني لوعة جبدكم :cxxxp: آسفه بنات سامحوني

 

[الكيكة]

ديرتي الغاليه اخذي قنفات منفصله اكشخ و اخذي درجات البني و البيج أرقى شي... و القماش يكون يبر و معاه مخامل ( لا تاخذين القماش اللي يتلامع )
انا انصحج تاخذين فره عالمحلات الراقيه علشان يكون عندج فكره شنو الزين و اللي مو متكود بالضجيج

شوفي رومانتك و ايثن الن و دومين .. شوفي شنو عندهم بس اخذي فكره عن الاقمشه و الالوان حتى لو ما شريتي منهم.

أسولة دقي على شركة ترش بيتج كله ( و المفروض تسوين هالشي قبل لا تركبين السيراميك بالبيت ) و يرشون دوا بعد بالبواليع الخارجيه للبيت ( بالحوش ) و يرشون الحمامات و المطبخ ... بيعطونج كفاله انج ما تشوفين نمله تمشي لمده عالاقل سنه

المبيدات اللي تشترينهم ن الجمعيه مايسوون شي

 

[الكيكة]

ديرتي الغاليه اشتري أثاث أمريكي جاهز لا تفصلين
لأنه أقوى

 

[أسولة]

إختي الكيكه أنا فكرت إني اغير الباب يمكن علشان الباب خشب وكل يوم ينكب ماي عليه يطلع فيه الحشرات قلت يمكن اسوي باب المنيوم شكله مثل الخشب ولونه مهونغي يعني نفس باقي البيبان الخشب إلي جنبه الحمام وأنا بعدي ما غيرت السيراميك نفس القديم مال أصحاب البيت القديم بس قلت بغير السيراميك والباب أخليه المنيوم خشبي اشرايك؟

 

[الكيكة]

لا اسوله لا تسوينه المنيوم و خصوصا انه حمام استقبال ... مو حلو

سوي مثل ما قلت لج .. دقي على شركه يرشون البيت كله دوا و حتى داخل بوايع الحوش ( انا رشوا بيتي كله 3 أدوار من داخل و برا حتى البواليع اب 15 دينار )

و الباب اذا متقشر شويه .. يبيلج صباغ يصبغه لج ورنيش ( مادري اذا اسمه ورنيش اذا ماني غلطانه ) اهو مو صبغ اهو مثل الدهن او الباليش مال السيارات ... و اهو مخصص للابواب الخشب والله يرد الباب يديد و قولي الكيكه ما قالت .

أنا لما شريت بيتي كنت ناويه اغير كل ابواب الغرف .. شكلهم قديم و الناس الليقبلنا ملزقين عليهم ستيكرات و لوعه

بس الصباغ قالي لي لا تغيرينهم حرام بس اصبغهم لج ورنيش و يردون يدد ... و صج والله .... ياب لي مسطرة الالوان فيها درجات الوان الابواب و اخترت اللون و يا بلاش الباب اب 5 دنانير و رد يديييييييييييد

ماني متأكده اذا اسمه ورنيش ولا شنو بالضبط ناسيه خليني اسأل و ارد لج

 

[ام وهابي]

حبيبتي اسوله انا في بيتي ركبنا شراشيب باب الحماما ت الارضي كله خشب وبعد ما ركبنا السيراميك كل اللي بنوا قبلنا وجماعتنا اللي شافوا بيتنا انصحوا زوجي انا يشيل شراشيب الباب ويركب المنيوم يقولون الابوب الخشب فيحمامات الدور الاول ماتصلح كله تعشش فيها الزهيويه وما ينفع فيها لامبيدات ولا شي من تجربه في شقتي اللي ساكنه فيها ما خليت ولا شركه تنظيف ولا مبيدات بالجمعيه ما حطيتها ما نفع يروحون شهر او اكثر ويردون
احسن شي وهذا انا مسويته الحين في بيتي الجديد انك مثل ما قلتي اتركبين باب المنيوم لون خشبي صج الخشب اكشخ بس انتي مجبوره بالنسبه للاكرلك اللي يصبغون فيه الباب الي اذكرته اختي الكيكه انا سالت عنه الصباغ اللي قاعد االحين يصبغ بيبانا يكون افضل نوع ما يصمد سنتين وبعدين يتقشر ولازم تعيدين الصبغ مره ثانيه
وبعدين فيه طريقه سوتها عمتي للتخلص من الزهيويه وانا ذاكرتها في قشم تبادل الخبرات انك تصبين ديزل باللليل على كل البواليع عندك والصبح تغسلسن بديتول وطابون عادي بس ترى الريحه شوي قويه

 

[rudy]

مرحبا اسوله عندي كم صوره للمطبخ بس مافيهم الون البني

انشاء الله تستفيدين منهم

يمكن الون الثاني مبين من فوق الخزاين ​

 

[الكيكة]

ام وهابي الديزل مادري الجاز طريقه بدائيه و ما يصبونه داخل البيت ... تبين بيتهم يقب؟
كنت اشوف يدتي الله يرحمها كل جم شهر تكت جاز ابالوعات الحوش و الصبح نشوف الزهيويه طالعين من البالوعات و ميتين بالحوش.


مادري كيفكم ... بس طول عمرنا ابواب حماماتنا خشب لا تقشر ولا شفنا زهيويه

عاد ام وهابي كلا عكسي ولكن اختلاف الراي لا يفسد للود قضيه
و لو اتفقت الاذواق لبارت السلع

 

[أسولة]

مشكورين الكيكه وأم وهابي ورودي على الردوده السريعه والله لا يحرمني منكم والله استفدت منكم وايد والصراحه مجهودكم يشكر عليه وطاري وهابي مرت أخوي اولدت من يومي توأم سمة الكبير وهابي والصغير عزيز اسم الله حافظهم ايهبلون وإختي الكيكه البيبان ما تقشرو بس الجرجوب تغير لونه وبقيت رقم صباغ البيبان إذا عندج لأن الصباغ يقولي الباب 15 دينار يصبغه ودي اصبغ كل بيبان البيت وبالنسبه لباب الحمام بشوف بالنسبه للألمنيوم لأن لاعت جبدي من الزهيويه والمطبخ أنا ودي مطبخ كبير الصراحه اشكثر عندي مواعين وجدور غير إلي بكراتينهم ليلحين ما استخدمتهم مشكورين حبيايبي

 

[ام وهابي]

للتوضيح الديزل غير الكاز
حبيبتي اسوله هذيلا اسامي عيالي بس مو توم الله يحفظهم لكم ويخليهم بس ترى كل واحد اسمه عبد العزيز يطلع عنيد وراسه يابس والعكس وهابي يطلع هادي وماله شغل بالعالم

 

[nono78]

رودي هذا مطبخج ؟؟؟

ماشاء الله يننن



وعلى سالفة الي زهيويه

بيبان تكرمون الحمامات عندي كلا خشب صارلي 6 سنين ساكنه بشقتي ماشفت زهيويه

 

[Love \ Hate]

شلونكم بنات شخباركم ؟؟ انا شقتي فاضيه !! مو معلقه ولا شي .. عطوني افكاركم .. احس الطوف فاضية

 

[rudy]

مرحبا Love \ Hate

بناسبة الحوائط الافكار مالها حدود ويعتمد على الذوق او الاستخدام تقدرين تزينين الطوفة اما بورق حائط او لوحات بحجام مختلفة ترتبينهم يم بعض او مرايا....
ياريت تحددين لنا بضبط شنو الي تبينه يعني لغرف النوم او الصاله او غرف الاولاد واحنا نحاول انيب لك افكار بالنسبة انا احب احط في غرفة المعيشة اليومية صور العايله من يوم احنا صغار وحتى كبرنا وصور الابيض والاسود القديمه حب صالتي تكون مثل المتحف وكل فترة غيري بالصور وشيلي وضيفي غيرها.
وخلينا نبدي وياك غرفه غرفه.

 

[rudy]

مرحبا اسوله
انا اضم صوتي لكيكه طول عمرنا بيبان خشب ومالها علاقه بالزهيوية

انا في بيت القديم كان مطبخي المنيوم مو خشب المنيوم ويننوني الزهيوية الصغار ما ارتحت الا لما يبت شركه ياو البيت وحطولي عجينه في كل كبت وكل زاوية وورا الثلاجه وخاصة بالمطبخ الخارجي وعينك ما تشوف الا النور كل يوم نقعد الصبح الأرض متروسه منهم طبعا ميتين قمنا نطلب الغدا من برا لما نظف المطبخ .
ومصيبه تدرين وين ينخشون حتى في غلاية الماي اي والله لوعه بس عقب العجينه لله الحمد ماكو ولا واحد والشركة اخذت 30 د.ك بس ارتحت الرش ما فادني كلش العجينه احسن تقولين فيها سحر.

 

[ديرتي الغاليه]

واللي يعافيكم بغيت افصل ستاير بس ياليت تنصحوني بالاقمشه لاني ابيها لصالة الاستقبال؟

 

[rudy]

مرحبا ديرتي الغالي

بالنسبة لغرف الاستقبال حلات القماش يكون سادة او بالكثير مقلم اوجاكار واحلى نوعين هم المخمل او التفته احبهم يعطون فخامه بس الي نتمناه مو دايما نلقاه
مرات يكون في بالك شي ولما تروحين السوق اتغير الخطط 180 درجه وتلقين اشياء مو على البال
وانا لما الحين ما فرشت استقبالي وفي بالي احط تفته واذا تبين الذوق بعد روح محلات الأقمشه الكشخه مو شرط تشترين بس اخذي فكرة عن آخر الموديلات وبعدها قرري.

 

[الكيكة]

اهلين ديرتي الغاليه

أنا سويت استقبالي مخمل ( المخمل الثقيل مال التنجيد مو اللماعي ) ... دقيت على راعي الستاير ياني البيت و معاه مسطرة الألوان ... اخترت لونين نفس أثاثي بالضبط ( زيتي و عنابي ) و فصلت هالموديل طبعا عطيته الصورة و فصل مثلها

بس الشيفون اللي تحت مو مثل الصورة

اخترت الشيفون المطرز منه و فيه ... لونه بيج على ذهبي .. و موديله ساده بدون الحركات اللي بالصوره


درايشي كبر الطوفه على جهتين يم بعض .. فصاروا الستاير على جهتن تارسين الطوفه و خليته يفصلهم طوال و يسحبون بالارض ( جنها بدلة سهرة ) ....واااايد فخمين و حلوين و الموديل بعد غريب و الالوان يايه رايت مع الاثاث

انا عندي الستاير من فوق مخفية بالديكور .

 

[ديرتي الغاليه]

بس مو جنه المخمل ثقيل واغلى ......