السَلام عَليكُم بنات
اشكركم عَ المتابعة :eh_s(17):
رجعت بفصل جديد ان شاء الله يعجبكُم :eh_s(22):
الفصِل العاشِر
الجِزء الأول
في بيت بوقصب ،
بعد الفطور خولة وطيبة مع البنات راحوا قعدوا بالصآلة ..
اما عيسى فـ استئذن منهم انه بيطلع مع ربعه ..
وخذه ناصر معاه .. وكان ماخذ ناصر عمدا ً ..
عشان يكلمه بموضوع هوشته مع سالم ..
وبنفس الوقت يطلعه من مود الانطوائية اللي اهو محاوط نفسه فيه ..
ويخليه يختلط مع الرياييل ويعيش جو الرجولة ..
،
جاندرا يابت صينية الجاي .. وحطتها عالطاولة اللي مجابلة الغنفة اللي قاعدة عليها خولة وطيبة ..
خولة خذت وحدة من الاستكانات وتفحصتها عدل ..
خولة: جاااندرااا .. تعاالي ... تعالي !
جاندرا رجعت مرة ثانية حق خولة
جاندرا: شنوو فيه ماما ؟
خولة: هااج شيلي الصينية اَهوو .. و هالاستكانات كلهم سبعيهم عدل .. شوفي هالبياله شلون وصخه ..شوفيها !!
جاندرا تحلطمت بالهندي و خذت الصينية واهي تتافف ..
طيبة: خولة شوي شوي على هالخدم الله يهداج والله صاروا يخرعون
خولة ضحكت : وانتي الصَاجه .. بس لا تحاتين جاندرا معانا من عمر وهذا حدها تحلطم ولسان بسس ولا قلبها رهيف تموت عليننا
سهيلة: يمه حتى ابليلْ كان معانا من عمر وشفتي شسوه
خولة : قطيعة لا تيبوون طاريه يعورني راسي ... بس جاندرا اخذوها مِني .. حالة استثنائية ههههه
كلهم ضحكوا: هههههههههههههههههههه
خولة : بس تصدقين ياختج هالخدم على شرهم ... ما لنا غنى عنهم .. قال شحادك يالمسمار
نوال بـ كل عفوية : قال المطرقة
ايمان : ههههههه نوول الظاهر توها متعلمة هالمثل
وكلهم قعدوا يضحكون على نوال .. واهي مستحية وتبتسم ..
جاندرا دشت مرة ثانية بس هالمَرة كانت يايبة صينية فيها صحون صغار مع قفاش و طبق الحلو اللي مسويته طيبة ...
حطته على الطاولة وردت المطبخ تلحق على غوري الجَاي عَ الجولة..
طيبة خذت صحن من الصحون وحطت فيه قطعة من حلوهآ
طيبة: هذا عاد طبقي اللي اتميز فيه .. كل رفيجاتي يموتون عليه
نوال: خالتي شنو هذا حلو المانجا؟
طيبة: ايي علييج نووور .. بس من ايدي غير طبعآ
نوال: ههههههه اكييد
وقعدت طيبة تحط حقهم كلهم .. وحطت لهآ ..
قعدوآ يسولفون ويضحكون .. ويتذكرون ذكريآتهم ايام اول ..
وطيبة وخولة كل وحدة تقول سوالفهم لما كانوا صغار .. والبنات يضحكون عليهم ..
رجعت جاندرا من المطبخ بـ صينية الجاي والقهوة ..
وحطتها على الطاولة واهي منفسة وراحت ..
خولة: ايماان يمه صبي لنا جاي..
ايمان: ان شاء الله
وقامت صبت حق خالتها طيبة اول شي ..
طيبة واهي تاخذ بيالة الجاي من ايد ايمان: تسلم ايدج اموونه ...... الحين نواله اسم الله عليها باي صف؟
نوال توها بترد . . بس سهيلة ردت عنها.!
سهيلة: برابعة ثانوي وان شاء الله هالسنة اتخرج
نوال : اييي بتخرج وبدخل التربية الاساسية بعد
( وخزت سهيلة .. لانه ما عجبها انها ردت بدالها .. دايما ً يحسسونها انها توها صغيرة وما تعرف تسولف مع الحريم.! )
طيبة: مااشاء الله ... عسى ربي يوفقج حبيبتي .. ( وتلتفت على خولة واهي مبتسمة) .. مو جنه كبروا العيال؟
خولة: ايي والله .. كبروني وانا توني شباب .. بس لا يغرج ليه طلعت وياهم كِله يحسبون اني اختهُم العودة
كلهم ضحكوا: هههههههههههههههه
//
عيسى وناصر كانوا توهم صافطين وداشين الافنيوز ..
عيسى دق على رفيجه عادل ..
عيسى: هاا وينكم؟ ... اوكي كانا يايين .. ايي ايي معاي ناصر .. يالله باي
وصكر التلفون ..
ومشوا صوب ستار بكس ..
كان الافنيوز زحمــــــــــــــــــة ..
http://www.youtube.com/watch?v=YtFv0OimA5s
عادل وحمد وطلال وسعود ..
كانوا قآعدين على غنقة من الغنفات اللي حاطينها ستار بكس برة ...
اول ما وصلوا عيسى وناصر .. كلهم قاموا وسلموا على بعض ..
وقعدوا ...
عادل: شلوونك بو بدير شخبارك؟
ناصر رَد واهو منحرج شوي منهم : تماام الحمد الله
عيسى: والله خوش مكان
طلال: افا عليك .. نقوتي وحياتك
عيسى: ههههههههههه شلونك بوطلي .. شخبارك حبيبي
طلال: ابد بخير .. وينك يا خوك غااط عنا ما تبين
عيسى: والله انشغلت شوي ... عدول يايب زقايرك
عادل طلع باكيت الزقاير ..
وبنفس الوقت اللي قاعد يعطيه زقارة سمعوا فجاة صيحة ولَجة صَايرة !..
التفتوا ولا مجموعة بَنات ملتمة عند زاوية المحل اللي مجابل ستار بكس ..
عيسى حَط الزقارَة بين شفايفه: شالسالفة ؟
حمد: الظاهر مغنية او ممثلة
عيسى ولع زِقارته : الحِمدالله .. مو صَاحيين
عادل : امشوا نروح نتطَمشش
عيسى: ههههههههه توك ملتِزم ياخي .. اقعد اقعد يباا شتبي بهالسوالف
عادل: رووح زيين ايي مِلتزم .. الصَلاة والحِمدالله الله هدانا بس البَاجي لا والله اعتِرف ما شبعت ! ..
عيسى: ههههههههه لاحول ماكو فايدة فيك .. طول عمرك بتظل صايع
عادل سحب طلال وياه عشان يروحون يشوفون منو اللي البنات متجمعين عليها ..
لما وصلوا هناك وقعدوا يطلون .. شافوها ..
كانت منى بو ريشة ..
عادل يدري عن علاقة عيسى بـ منى ..
فاول ما شافها مسك تلفونه ودق على عيسى ..
عيسى واهو يضحك ويغمز حق حمد وناصر: هاا منو طلعت ؟
عادل بـ تردد وبصوت واطي عشان ما يسمعه طلال: عويس ترى منى هني
عيسى : وييين هني!؟
عادل: اهي اللي متيمعين عليها هالامة
عيسى: ممممم زين اوكي
عادل: شنو ماراح تيي؟
عيسى: وانا شكوو .. يالله تعالوا بلا مصخرة وخرابيط
وصكر الخط بويهه
عادل استغرب من ردة فعل عيسى ..
وردو اهو وطلال حق الطاولة .. وقعد عادل يطالع عيسى بنظرات انه " شالسالفة؟! " ..
وعيسى كان يتحاشى نظراته ويحاول ييبين انه مو منزعج من اللي صار .. بس كان
مبين عليه انه متضايق .. وكل ساع يطالع صوب الناس المتيمعة على منى ..
//
منى كانت مع عمتها سارة وبنتهَا ريم ..
يايين الافنيوز عشان يشوفون لهم جم بدلة حق العيــــــد ..
معنه منى كان لبسها بسيط ومو ملفت .. بس فيه مجموعة بَنات عرفوها وتيمعوا عليهآ
منى كانت لابسة جينز boot cut فاااااتح .. قميص ابيض مخصر ..وكعب لونه بيج فاتح .. ماشي مع لون جنطتها البربري ...
لامَة شعرها بطريقة ذيل الحصَان .. ماكانت حاطة ولا نقطة مكياج عشان محد يلاحظها ومع هذا ما نجحت خطتها
بعد ما خلصوا البنات وخذوا توقيعها وجم صورة معاها ..
استئذنت منهم واستسمحتهم انها مشغولة ولازم تمشي لان معاها اهلها ..
//
عيسى كان يطالع من تحت ليه تحت صوب ماكانت مُنى .لما شاف انهَا صارت بس مع اهلها ..
عدل من نفسه و قام من عَلى كرسييه ..
عيسى: عن اذنكم شباب .. انا بس بروح شوي .. المحل اللي هناك .. بشوف جم شغله وراجع ان شاء الله
عادل بـ خباثة: اييي معاك؟
عيسى : لاااااه اقعد ما راح اطول .. ناصر خلك هني مع الشباب .. شوي وراجع اوكي
ناصر هز راسه وابتسم .. طول ما اهو قاعد معاهم ما تكلم
كان منحرج حييل منهم .. وبس يسمعهم يسولفون .. كان ملاحظ عيسى وكلامه وحواره
وشلون ربعه يحبونه ... حس شوي بالغيرة ...
عيسى كان مو مستحمل يصبر اكثر عن منى ..
اللي صار اليوم خلاه يحاتيها ويبي يعرف حالتها عقب المستوصف ..
راح صوب ما راحت منى وسارة وريم ... قعد يمشي وراهم ..
كان منقهر من نظرات بعض الشباب حق منى .. وتعليقاتهم كل ما مرت يمهم ..
//
منى مع سارة وريم .. كانوا رايحين قسم الماركات بالافنيوز ..
يبون يشوفون جنطة منى حاطتها في بآلها .. شايفتها عَ النَت ..
وقفت ريم عند فترينه محل من المحلات ..
ريم: يمه الله شوفي هالجوتي مو لايق مع النفنوف اللي توه شريناه
سارة واهي تعدل شيلتها: لااا مو حلو .. وبعدين مو على سنج
ريم: يمااه بلييز بس اقاايسه
منى كانت يمهم .. مبتسمة .. وتطالع الفترينه واللي فيها .. بس فجاة ! ... انصدمت ! .. شافت انعكاس عيسى على الجام ،
تسمرت بـ مكانها !
ولفت شوي شوي وشافته واقف على بعد مترين عنها ويطالعهم ..
اول ما شافها تطالعه .. نزل راسه ولف وجهه بعيد ..
منى عصبت " لا مو من صجه ! " ... تنرفزت لدرجة كانت بتروح له !
سارة كانت قاعدة تناديها : منى .. منى ..
منى استوعبت والتفتت على عمتها واهي
واهي لي الحين بالها مع عيسى: هلا هلا .. عميمة
سارة: شفيج اسم الله عليج .. تعالي بندش هني
منى : ان شاء الله كاني ياية ..
وراحت مع عمتها واهي بالها مو وياها ..
سرحانة بـ عيسى .. وتفكر شيايبه وراها ..
" معقولة لاحقني ؟!" " لا لا اهو ما يحبني " " شيبي مني الحين ؟! " : يارب سترك ! "
عيسى شاف منى دخلت المحل ..
راح صوب المحل وقعد يحوس عنده ..
ينطرها تطلع .. كانت منى كل دقيقة تطالعه من ورا جام المحل ..
ولما طلعوا هم سوه نفسه مو معاهم واول ما يعطونه ظهرهم .. يلحقهم .!
ظل عيسى وراهم .. كل ما طلعوا من محل يلحقهم وكل ما دشوا .. ينطر برة.
كان حاس انه منى مجننته ..
ومربطته فيها .. مو قادر يبتعد عنها ..
كان بين فترة وفترة يوقف ويفكر ان اللي يسويه سوالف مراهقة !
و يقرر انه يرجع لربعه .. بس من يشوفها وتتلاقى عينه بعينها يغير رايه ويكمل ! .. كانت سَاحرته !
ريم كانت قاعدة تسحب ريولها وشايله ثلاث اجياس بيدها ..
ريم: يماااه بلييز خنروح كافيه بلان .. حدي يوعانة
منى: ايي والله عميمة خنقعد شوي تعبنا
سارة: وااي منكم هذا وانتوا توكم بنات انهد حيلكم جذي .. شخليتوا حق العيايز اللي مثلي
ريم ومنى: هههههههههههههه
ومشوا صوب نوافير الافنيوز .. ناحية المطعم اللبناني " كآفيه بلان " ..
استقبلهم الجرسون وعرف منى ..رحب فيها وهلل .. ونقى لهم احلى طآولة بالمطعم ..
قعدوا منى وسارة وريم وحطوا جياستهم على كرسيين من الكراسي الموجودة ..
كانت اغراضهم وايد ..
وخلصوا تقريبا كل اشغالهم ..
الجرسون عطاهم المنيوو ..
منى: وااي ميتة يوع
ريم: عاد مشآويهم مو صج
سارة: ذبحيها على المشاوي
منى وريم ضحكوا ...
منى واهي تتصفح المنيو: ما ندق على امولة نقولها .. اخاف تزعل
سارة: لااا خليها بالبيت .. قلت لها تعالي معانا ما رضت . . خليها معلقة بهالدار
ريم: يمه شنو راح تطلبين ؟
سارة : بعد لبناني لازم الحمص والمتبل والتبولة .. شي اساسي
عيسى شافهم قعدوا بالمطعم وتوهق ..
ما يقدر يوقف هناك .. لانه شكله راح يكون غلط واهو مجابلهم ..
رن تلفونه ،
عيسى: الووه ..
عادل: انت وين اختفيت !!
عيسى ( واهو يمشي حوالين النوافير ويطالع منى .. واهي متجاهلته .. ) : ههههه كاني
عادل: ترى الطلعة معاانا مو مع م.ب ( ميم باء )
عيسى: اقول اقضب لسانك عدول
عادل: هههههههههه زين ترى احنا بنمشي .. وناصر بنوديه عند المفقودات .. استلمه هناك
عيسى ضحك : ايا النذل
عادل: يا ابن الحلال اتغشمر وياك
عيسى: زين انتوا شباعه ولا ودكم بعشا محترم؟
عادل : وين على ايدك
عيسى : بطيني ماكو فايدة
عادل: ههههههه ترى مو بس انا البطيني .. ناصر ما خله ولا بقه.... شطب على ستار بكس
ناصر سمع شنو قال عادل واهو منحرج .. معنه ما اكل شي ..
ويدري انه عادل كان يتغشمر ..بس سكت وابتسم ..
عيسى: هههههههههههه .. زين اسمع .. تدل كافيه بلان ؟
عادل : اووووه احلى مشاوي عندهم
عيسى: عيل تعالوا هناك .. انا عازمكم
عادل: اوووه .. ! ما كنت ادري انه المعاشات تنزل اول الشهر
عيسى ضحك : يالله عاد لا يكثر .. ناطركم .. باي ..
//
عيسى راح عند الجرسون .. وطلب منه انه يحجز له الطاولة اللي مجابلة طاولة البنات
( منى وسارة وريم .. )
كان فيهآ ناس .. بس على وشك يخلصون ..
الجرسون ابتسم له و قاله له ثواني وينظفها بعد ما يخلصون ويقعد عليها اهو واللي معاه ..
لما وصلوا عادل وحمد وطلال مع ناصر ..
عيسى كان قاعد على وحده من الغنفات ملوت المطعم .. بيده زقارته و يدخن ..
اشر لهم وراحوا له
حمد: هاا وين .. هني بنقعد ؟
عيسى واهو ينفخ الدخان: لا لا .. ( وياشر على الطاولة اللي يبيها )
هناك بس على ما ينظفون الطاولة ويضبطوونها ..
عادل لاحظ انه منى بالطاولة اللي مجابلتهم ..
وابتسم ابتسامة " جانبية" ..
قعد يم عيسى وحط ايده على فخذه : والله خووش طاولة .. موقعها .. استراتيجي!
عيسى قعد يكح ويطالع عادل واهو متنرفز لان يدري عن شنو يلمِح ...
عادل قام يغني: ياا ليل يا عييني يااا بو العييس ( جَك ْ .. وصفق صفقة وحدة .. )
منى جذبها الصوت .. التفتت صوبهم وردت لفت وجهها مرة ثانية ..
ما عجبها الوضع ..
كانت تفكر بـ عيسى انه انتهازي وقليل ادب وما احترم مشاعرها ..
وانه يايب ربعه عشان يطمشون عليها.!
سارة : منى شفيج ما تاكلين.. برد اكلج !
منى : هاا كااني عميمة والله قاعدة اكل
ريم: يمه عطيني التبولة ..
الجرسون نظف الطاولة ورتبها .. وحط علي عليها الصحون القفاش ،
السجاجين، الشوك .. والقلاصات
وراح طلب من عيسى والشباب انهم يتفضلون على طاولتهم ..
عيسى مر يم طاولتهم بس ما التفت عليهم
منى سوت عُمرها مو ملاحظته .. وكملت اكلها ..
ريم بصوت واطي ..: تدرون هذا من مساع ورانا والحين بعد هني يبي يجابلنا ..صج ما يستحي
!
منى ارتبكت وما قالت شي ..
خذت عصير الليمون بِ النعناع اللي قبالها وشربته واهي متوترة
سارة ردت باستغراب: لا اله الا الله عليكم كل شي تنتبهون له ! .. خاصة حق هالسوالف ..
يمه منكم ..انتي ريموو من اتخرجين من الثانوية بزووجج
ريم: يماااه شنووو ( واستحت)
منى: ههههههههه حرام عليج عميمة ..
خليها تدش الجامعة وتستانس .. لاحقة على المسؤولية وعوار الراس
//
قرب من طاولة منى .. واحد من الشباب المعجبين فيهآ .. وقعد يتغزل ! ..
المعجب: الافنيوز اليوم منور بوجودج ... والله اني اكثر واحد معجب فيج
منى واهي مبتسمة : هههه تسلم اخوي من ذوقك
المعجب: تدرين انتي فتنة على هالارض .. كيكة .. كراميل .. لا لا .. جيز كيك ( وقعد يسبل لها بعيونه .. )
منى انحرجت من كلامه وانحرجت من عمتها ( اللي كانت مبققة عيونها على جراته وما قالت كِلمة من الصدمة) و من ريم ومن الناس اللي قاعدين يطالعون ..
عيسى كان قاعد يشوف اللي حاصِل عند طاولة منى واهو مفور ومعصب ..
وحتى الشباب اللي معاه وناصر كانوا ملاحظين الوضع !
مسحت منى ابتسامتها
وطالعته بنظرة حادة: لو سمحت .. مشكور .. واعذرني الحين انا مثل ما انت شـ ..
المعجب قاطعهآ : ممكن اقعد معاج بس شوي .. صدقيني ماراح اطول ..
وشال الجياس اللي على واحد من الكراسي .. عشان يقعد!
فجاة .. ايد مسكت ذراع هالمعجب بقوة وسحبته ليه ورا ..
وبصوت قوي : هييي !! لوو سمحت !!
التعديل الأخير:
