رفيجات والقدر واحد

[readflawer]

حلوه قصتج

متابعه وباتظارج

 

[um-aljod]

البارت الخامس والعشرون:




بدريه: والنعم فيها عسوووله ودمها خفيف وحليييوه .. بس ليش تسألين

خديجه: والله بنخطبها حق اخوي

بدريه: هووو اشفيج فاطمه مخطوبه من ايام اللي كنا بالكليه ويمكن املجت الحين

خديجه: شلون مخطوبه





بدريه: امبلا ايام الكليه كانت مخطوبه حق واحد بالجيش بعد اذكر كانت تكلمه و قالت خطيبي ويمكن املجت

خديجه: انتي متأكده

بدريه: ايي اشفيييج خدوج احنا كنا نقعد مع بعض بالكافتيريا كل يوم ونسووولف واسمعها تسولف معاه بالتليفون

خديجه: امممم عالعموم مشكوووره !!

خديجه ما صدق شلون مخطوبه واخوها يكلمها وغير جذي راحو اهم بيتهم لو مخطوبه صج جان رفضو!!









ام جاسم: ها اشقالت اسمعج تقولين مخطوبه

خديجه: والله مادري يايمه تقول اهي مخطوبه حق واحد بالجيش والبنت متاكده من هالمعلووومه !

جاسم: اشلون جذي

اليده: انا قتلكم انا من دشيت بيتهم انقبض قلبي ومارتحت .. شكلها البنت فيها بلا .. فيها شي ودبسووك فيها .. البنت مو مضبوووطه

ام جاسم: جويسم اشقلت شنسوي

جاسم: خلاص خلوها تروح بنصيبها .. دام هذا اولها

ام جاسم: خلاص انا يومين وادق عليهم ماني داقه الحين









فاطمه تدق على جاسم ومايرد من طلعو اهله لي بللليل واهو مايرد

قامت تحاتي دقت على مريم





فاطمه: انا كنت متاكده انه بيصير مثل علي

مريم: صلي عالنبي توهم اليوم يايين نطري لي باجر يمكن قاعد مع اهله يمكن في شي يتناقشون فيه .. عطيه فرصه شوي يفكر

فاطمه: بشنو يفكر المفروض اهو متخذ القرار وخالص .. انزين يرد علي باي كلمه أي شي ..

مريم: انا ادري انج بحوووسه والوضع مو مطمن .. دزيله مسج .. او ثقلي عليه شوووي لا تقطين روحج

فاطمه: ما اقدر اثقل بدزله مسج

مريم: كيفج بس لا تبينين له انج قاطه روحج عليه

فاطمه: أي اوكي يلا باي خل ادز مسج

مريم: اوكي باي





فاطمه دزت مسج" مساء الخير.. ادق عليك ماترد عسى المانع خير .. قمت احاتيك .. عساك بس بخير .. طمني عنك "



مارد



انطرت بعد ومارد



ردت دزت" اليوم كانت امك واختك ويدتك عندنا بالبيت ويا حلات قعدتهم .. بس ما قتلي شنو قالولك عنا انشا الله خير"





هني جاسم قرر يدق عليها





فاطمه كانت متضايقه وتحاتي شافت رقمه استانست

فاطمه: هلا جاسم

جاسم: فاطمه مادري شقولج

فاطمه انصدمت من اسلوبه والكلمه اللي قالها وتوقعت الباجي شنو بيقول: ادري قووول ماكو نصيب

جاسم: لا قوليلي انتي مخطوبه حق واحد بالجيش !!!!!

فاطمه انصدمت اكثر شلون درا عن علي : لا شلون مخطوبه واقولك تعال اخطبني

جاسم: مادري بس هالحجي من ناس يعرفونج

فاطمه: منو ؟

جاسم: مو لازم تعرفين بس خدوج تعرف بنات كانو معاج بالكليه وقالو

فاطمه: وانت على طول صدقت !! لو مخطوبه شلون بقولك واخليك تييب اهلك عشان يخطبوني .. بس الظاهر هذي حجه رفض .. انا اقول الله يسهل عليك باي

جاسم: لحظه فاطمه





سكرت التليفون واقعدت تبجي وجاسم يدق واهي ماترد







ثاني يوم الصبح فاطمه دقت على مريم





مريم: صباحوو شمقعدج من الصبح

فاطمه: انا نمت عشان اقعد

مريم: افا اشفيج

فاطمه: جاسم امس دق وقالي انهم سامعين اني مخطوبه حق واحد بالجيش بط جبدي .. اشدراه عن علي !! وغير جذي لو مخطوبه شلون اقولهم تعالو خطبوني

مريم: فطوم هدي اشوي .. دام قالج جذي هذا شكله خيخي نفس عليوي خليه يولي وقعدي ببيت ابوج معززه مكرمه لين ايي نصيبج تركيه عنج شنو يعني لعب عيال !! مخطوبه واخلي ناس يخطبوني !! سخيف ترا بط جبدي .. بعدين هذي غلطتج كل وحده قعدتي معاها سولفتي عن علي جدامها ..

فاطمه: مادري اهو حاول يكلمني اكثر بس انا سكرته بويهه وماعطيته مجال حتى دق اشكثر مارديت

مريم: عفيه خلج جذي ولا تردين ولا تكلمينه نهائي واذا يبيج يدل بيتكم اييي يعلن موافقته

فاطمه: أي هذا اللي بيصير .. انتي وين بالدوام

مريم: أي والله

فاطمه: ضايق خلقي ماتقدرين تطلعين ؟؟ ودي اقعد معاج متضايقه

مريم: لا فطوم ما اقدر بس اوعدج بللليل انتعشى وعلى حسابي بعد وبجليز عشان تنسين الهم

فاطمه: ههههههههه .. جيليز مكانا الدائم لتفريغ الهم

مريم: اييي والله .. يبيييله








رتاج رايحه تاخذ هديه من حسين طبعا بالمكان المعتاد داخل الصندوق



هدايا حسين كلها كانت عاديه .. يعني رسايل حب .. خاتم ( اكسسوار ) – لعبه على شكل ام علي.. لانه اسمه حسين ويبي مرته تكون ام علي- جيس حلاو- يعني الهدايا كلها كانت اشياء عاديه

رتاج: حسين اانا وصلت

حسين: اوكي الحين اطلعلج

رتاج: شنو انت تبي تطلعلي

حسين: أي مو تحنين تبين تشوفيني

رتاج: لا خلاص هونت مابي اشوفك

حسين: ههههههههه شفتي شلون انا اخرع بس في بشاره

رتاج: شنو

حسين: راح تشوفيني .. بالهديه روحي اخذيها وتعرفين j

رتاج: اوكي ..





سكرت وراحت تاخذ الهديه كان ظرف



فتحته ولا تشوف صوره مقصوصه مو كامله الصوره كانت من تصوير كاميرا عاديه

بالصوره واحد قاعد عالارض وياكل كيك .. ابيض شعره اسود وخدوده مليانه





حسين دق عليها





حسين: ها حبيبتي اشرايج فيني وانا اكل كيك !!

رتاج: واااي اتينن

حسين: أي هذي صورتي بامريكا

رتاج: ارتاحت لانه حسين مو قاعد يجذب







صار المغرب دقت خالت مريم عليها

مريم: هلا خاله شلونج

خالتها: هلا مريم الحمدلله انتي شلونج

مريم: بخير

خالتها: قبل شوي دقت علي وحده اسمها ام احمد



مريم ابتسمت



خالتها: تقول اهم من بيت ........ وولدها شايفج بدوره وتقول انها بتيي تشوفج وتتعرف عليج .. يا حلوها ذربه وايد .. تقول حتى لو ما صار نصيب المهم كسبنا شوفتكم ومعرفتكم .. بصراحه عجبني اسلوووبها غير عن اللي كل مره يدقون





مريم: خير ان شالله انزين شنو قالت بعد تفاصيل عن الولد؟

خالتها: ما قالت شي بس انا قتلها تعالو باجر البيت العود بيت اليد عقب صلاه المغرب

مريم: ان شالله





سكرته ودقت على احمد





مريم: احمد امك دقت

احمد: أي ادري

مريم: باجر بتيي

احمد: واااي قلبي بيوقف خايف اكثر منج

مريم: هههه ليش تخاف

احمد: اعرف ذوق امي

مريم: اشتقصد

احمد: امي تبيلي وحده بيضه عيونها ملونه و..

مريم: كلش ماحبيت هالحجي منك يا احمد.. يعني انا اشناقصني لاني حنطاويه وعيوني سووود ..

احمد: حبيبي والله مو قصدي بس لاني ابيييج ومابي غيرج وبندر ما ابيه الا منج انتي ام بندر

مريم: ان شالله اييبلك بندر .. انزين حبيبي انا بطلع اتعشى مع فطيم ورتوج

احمد: اوكي لوزتي ديري بالج

مريم: اوكي بو بندري بااااي

احمد: فديتها اللوزه الحلوه ام بندر .. عسى الله يقدرني واسعدج

مريم: ان شالله باي







طلعو مع بعض وبالسياره فاطمه بقلبها غصه على سالفت جاسم اللي جنه نسى السالفه ومادق

ورتاج ناطره يوصلون المطعم عشان توريهم صورت حسين

اوصلو قعدو عالطاوله





مريم: باجر بتيي امه النسره

رتاج: وليش نسره عاد

مريم: بلاج ماعرفتيها اذا ولدها خايف منها ودايم يسولفلي اشياء مو زينه عنها وانها عسره ومايعجبها شي

فاطمه: الله يوفقج ونفرح فيج

مريم: ان شالله انتي قبلي

فاطمه: والله مايندرى

رتاج: خلونا من هالسيره بوريكم صوره حسين

فاطمه: صج شلون صورتيه

رتاج: يا هبله ما صورته اهو عطاني اياها بالبريد .. صندوق حبنا ههههه

مريم: اشووووف





شافو الصوره





مريم: بطبوط شوووي

فاطمه: لا بس حلووو

رتاج: يقول صوره واهو ياكل كيك بامريكا

مريم: اشووووف امبي رتاج مو من صجج صدقتي أي امريكا أي بطيخ .. شوفي الزوليه اشكره بيت بالكويت وشوفي الاثاث



رتاج: شنو يعني امريكا مافيها زوالي واثاث

مريم: لا .. صج انا مو رايحه ولا مره بس نشوف بالافلام .. كله ارضيات خشب واثاثهم مو جذي .. جذاب هذا

رتاج (عصبت حبيبها ماترضى عليه): لا شمصلحته يجذب

مريم: مادري تشيحط زايد يمكن

فاطمه: واي بسكم لا تهاوشووون

مريم: يبط جبدي وايد يتشيحط خو اللي عنده خير يبين عليه بدون لا يتكلم .. يعني هالحسين عايلته عاديه مو من العوايل الكبيره بلكويت وغير جذي سوالفه كله .. عندي فراري وبسافر امريكا وبتسوق بفرنسا وعندي ساعه شوبارد...و ........و .......جنه محد عنده غيره ويع ماحب جذي

رتاج: بس عاد حدج اهو قاعد يعرفني على نفسه

مريم: انزين خليه يعرفج لي بعد 10 سنين بشوف اخرتها متى بيشرف بيتكم



هني رن تليفون فاطمه والمتصل ........



امها





ام فاطمه: هلا يمه متى تردين البيت

فاطمه: تونا واصلين المطعم

ام فاطمه: يا قليله الادب ردي البيت بسرعه

 

[بنوتة فيلجا]

هااي
الصراحه انا كنت اقرى قصدتج بس بصمت
والحين حبيت اكسر هالصمت وارد على قصدج اسلووبج وااايد واايد حلووو وتسلمين على البارتات الطويله
ومشكووره
اماا بخصوص الشخصيات
مريم شخصيتها حلوه ومبين عليها انها فاهمه وعاقله
وفاطمه شوي متسرعه
ورتاج ما ادري شقول عنها والله يعينها على جاسم لان شخصيته كانت تخرع وما تطمن

 

[أم@الحلوين]

وي وي وي الله يستر شفيها أم فاطمه@@@@@@@@@@@

 

[DALLY]

فاطمه هي اللي خربت على نفسها لانها لو ساتره على عمرها الله بيستر عليها

رتاج عقلها حده صغير تصدق شي مايتصدق اشدعوه عليها


ام فاطمه من كلمتها ياقليلة الادب معناتها اكوا شي مايبشر بالخير

ناطرين اخر بارت منج شوقتينا

يعطيج العافيه

 

[The purple]

ويييييييييييي

شكلها ام فاطمه وصلها الحجي من ام جويسم !! :eh_s(20):

جت الحزينه تفرح مالقتلهاش مطرح /=

يالله نشوف النهايه )=

الظاهر ولا وحده فيهم بتكمل


بس مريم عاجبتني

وفطمطم اتعاطف معاها لأني سميتها

 

[أميرة العود]

ناطرينج حبوبه

 

[so_what]

ناااطرينج

 

[bato0osha2008]

نااطرييين

 

[DALLY]

ناطرينج حبوبه واخر بارت

 

[البارونه*_^رونه]

يسلموو على الباااارت ناايس


ناااطرينج قلبو

 

[um-aljod]

مشكووورين يا بنات

الحين بنزل البارت الاخير


وانشالله تكون القصه اعجبتكم


بس حبيت اقول انها قصه حقيقيه ولو انه في تغيير بالاحداااث بسيط جدا


والله يعين



لا تبخلون علي برايكم بالقصه وبكل الشخصيات وشنو اللي عجبكم بكل شخصيه

وشكرا

 

[um-aljod]

البارت السادس والعشرون:





رن تليفون فاطمه والمتصل ........

امها



ام فاطمه: هلا يمه متى تردين البيت

فاطمه: تونا واصلين المطعم

ام فاطمه: يا قليله الادب ردي البيت بسرعه

فاطمه: يما ما طلبنا اكل للحين اكل وارد ماني مطوله





طبعا ام فاطمه مسبتها حق بناتها يا قليله الادب لوووووووول مو تخترعون.. عشان جذي فاطمه ما اهتمت حق كلام امها تعرف اسلوبها



فاطمه تكلم البنات: هذي امي تزفني تبيني ارد

مريم: يالله علي نرد

فاطمه: لا عادي ماعليج اهي جذي عااادي ههههههههه

رتاج: كيفج امج وكيفج

فاطمه: لا والمشكله قتلها بتعشى معاكم .. بس اهي مادري اشفيها

طلبو وكلو وخلصو وردو البيت







مريم تنطر باجر عشان تشوف ام احمد

و رتاج نامت على صوره وصوت حسين

وفاطمه ادخلت البيت





ام فاطمه: فطمو ويهد توج راده

فاطمه: خير يمه اشصاير .. توها الساعه 9

ام فاطمه: ترا اهل جاسم دقو

فاطمه: شنو

ام فاطمه: أي دقو ويسالون عن راينا

فاطمه: وانتي اشقلتيلهم ؟؟

ام فاطمه: قتلهم بو فاطمه للحين ما عطاني رد و اول ما يخبرني ادق عليج

فاطمه: خير ان شالله

ام فاطمه: فاطمه يمه ليش احسج مو مرتاحه ؟ اذا ماتبينه قولي

فاطمه: لا يمه بس خايفه تدرين حياة يديده

ام قاطمه: اذا جذي لا تطمني باين عليهم اجااويد

فاطمه: ان شالله يالله يمه بروح داري





فاطمه اصعدت دارها مو مصدقه انهم دقو موافقين





راحت مسكت التليفون ودزت مسج حق جاسم " مساء الخير .. "



دق جاسم: الو فاطمه

فاطمه: هلا جاسم شلونك

جاسم: بخير .. شدعوه مطولين السالفه ليش ماوافقتو للحين

فاطمه (قررت تسترد كرامتها): اييي لازم نسأل عنكم وابوي قاعد يسأل اشعبالك مو عشان كلمتك واتفقنا يعني وافقنا

جاسم: أي من حقكم تسألون..





وظلو يسولفون لين نامت فاطمه







صار اليوم الثاني ومريم مختبصه راحت بيت يدها لابسه قميص طويل ابيض وعليه فراشات ملونه ناعم حيل وتحته بنطرون ابيض





صارت الساعه 8 وللحين مابينت ام احمد





دقت مريم عليه: احمد

احمد: هلا باللوز

مريم: امك للحين مايت

احمد: صج عاد اهي من زمان طالعه مادري يمكن مضيعه

مريم: اشدعوه بيت يدي ما يضيع عالشارع

احمد: مادري تبيني ادق عليهم

مريم: لا لا خلاص بنطر





شوي جان يدق جرس الباب





مريم: الظاهر اوصلو يالله باي

احمد: باي





دشت ام احمد مع اخت احمد فتون ..





ام احمد لابسه عبايه ولفه وفتون لابسه بدله عاديه .. فتون طويله بيضه .. ويها فيه حبوب وشكلها يايه ماتدري شالسالفه !!



اقعدت سولفو شوي



اهل مريم ناس بسطاء حيل ماعندهم التكلف الزايد .. قدمو عصير ونادو مريم



مريم ادخلت سلمت على فتون وام احمد



واقعدت



ام احمد: مريم انتي من وين متخرجه

مريم: انا من كليه الهندسه

ام احمد: وشكثر صارلج تشتغلين

مريم: يعني تقريبا 3 شهور





وظلو يسولفون شوي جان تستأذن ام احمد





ام احمد: يالله نشوفكم على خير وانشالله لي اتصال معاكم

خالت مريم: حياكم الله

ام احمد: وحتى لو ماصار نصيب كسبنا معرفتكم



خالت مريم ودعتهم لي الباب وردت تقول حق مريم: شكلها ماتبيج !!









مريم راحت تكلم احمد

مريم: احمد امك توها طالعه

احمد: صج الله يستر الله يستر !!

مريم: ليش

احمد: مادري يالله باي خليني اشوف

مريم: أي احمد تكفه قلبي مو متطمن







جاسم واهله حددو يوم الخطبه الرسميه وبنفس اليوم بيبون الدزه والمهر



وفاطمه بدت تستعد ودقت على مريم



فاطمه: الو مريوم زهبي روحج عشان نتسوووق محتاجه جم شي قبل الملجه



مريم: ان شالله

فاطمه: اشفيج مرايم صوتج موعاجبني

مريم: فطووووم ام احمد كانت عندنا و .. و..

فاطمه: و شنو

مريم: مادري احس مو عاجبتها

فاطمه: من صجج شنو مو عاجبتها انتي الكل يشوفج ينبهر بطلتج وابتسامتج .. لج اسلوب مميز ليش انشالله ماتعجبينها

مريم: لانه احمد قال اهي ذوقها شقر بيض وعيون ملونه تبي وحده من اهلها حق احمد

فاطمه: وييي حاصلها عاد صج انتي حنطاويه بس الصج ينقال جميييله وجسمج سكسي وغمازاتج حلوه وشعرج ناعم حلووو

مريم: ههههههههه اهي ماشافت كل هذا اهي عيونها بعيوني شافتهم سود هونت هههههههههه

فاطمه: لا تسبقين الاحداث .. احمد اشقال

مريم: احمد ناطر امه ترد البيت يسألها .. المهم متى بتروحين السوق

فاطمه: باجر لانه عقب باجر بيوون رسمي

مريم: خلاص صار





واهم يسولفون دق احمد





مريم: فطيم هذا احمد ادعيلي باي







كلمته



احمد: مريم خلاص روحي بنصيبج الظاهر مافيه نصيب

مريم: شنو شنو

احمد: امي مو راضيه

مريم: ليش

احمد: طلعت فيج عيوب

مريم: شني اهي

احمد: ماني قايلج

مريم: ليش

احمد وصوته فيه البجي: خلاص مريم روووحي خليني بروحي

مريم: لا ماني سادته لين اعرف اشقالت

احمد : قالت متينه و سمره وعمرها 25 وتوها تشتغل يعني فاشله !!

مريم: اوكي يالله باي





مريم مابجت ولا شي بالعكس تقبلت الوضع عااااااادي .. يمكن مو الصدمه مابجت او انها ارتاحت من الهم اللي فيه











صارت خطبت جاسم وفاطمه وحددو يوم الملجه بعد اسبوع واملجت وكانت ملجه بسيطه حييييل وكان مهرها 4 الاف وتزوجت عقب شهر ماطولو كلش





احمد ماتخلى عن مريم كل يوم يدق ويقولها ابيج واهي اللي قسى قلبها وماعاد يهمها لانه حسته مو قادر يسوي شي





مريم: احمد شووف انا عندي قناعه تامه انه الريال اذا يبي بنت ياخذها غصبن على الكل .. وانت مو قاعد تتحرك بشي خلاص انساني

احمد: لا مريومتي انا ابيج والله لو تاخذين غيري اذبحه واذبحج انتي ام بندر .. انتي حبيبتي عيالي مابيهم الا منج .. ابيج مريووم والله ابيج

مريم: واااي احمد تكفه شبعت حجي

احمد: مريم دبريني ماني عارف افكر .. شرايج نتزوج ونحطهم جدام الامر الواقع

مريم: احمد سوووري بس انا مابي اضر اهلي لانهم كانو موافقين انت اهلك اللي ماكانو يبوني هذي مشكلت مو مشكلتي .. ياخي حلها تصرف

احمد: انزين شسوي

مريم: ابوك ماله كلمه

احمد: لا ابوي جدام امي ديايه كلمته امس يقولي اللي تشوفه امك

مريم: خلاص شوف امك

احمد: مريم عفيه ابيج والله اموت اذا خليتج

مريم: مو مشكلتي قول لامك هالحجي

احمد: قتلها .. قالت اذا كلمتني مره ثانيه عنها بروح افضحها جدام اهلها

مريم: هههههههههه يا حليلها امك ظريفه

احمد: مريوم مو وقت طنازه شسوي .. المشكله انا لو ايي بروحي وقلت لاهلج اني ابيها واهلي مو راضين شبيكون موقفهم

مريم: مادري جرب

احمد: بس انا مااقدر اتزوج بدونهم ابيهم يساعدوني انتي تدرين انه ما معاي شهاده ومعاشي 350 مايكفي لا ايجار ولا مصاريف عرس ولا شي ..ابي ابوي يساعدني بالمهر وابيه يعطيني الشقه اللي بالبيت

مريم: مادري احمد ما اقدر افكر بالنيابه عنك ....ولا تدري شلون عندي فكره

احمد: شنو

مريم: روح اتفق مع أي وحده من الشارع .. ودخلها بيتكم قولهم ماخليتوني اتزوج مريم كا هذي مرتي الحين رفضتو بنت الاوادم لانها مو حلوه .. كا يبتلكم وحده حلوه بس من الشارع

احمد: لا شنو هالخطه ابوي راح يطردني من البيت ولا راح يسوي شي غير جذي

مريم: كيفك عيل حل مشكلتك بروحك انا لو ريال جان مسويه الهوايل عشان حبيبتي...

تبي اقولك سالفه

مره ولد عمي حب وحده وامه جذي عاندت ماتزوجه .. بغى يذبح عمره خذا حبوب ونموه بالمستشفى عشان حبيبته بالاخير امه لمن شافت ولدها بيضيع من جيسها زوجته حبيبته .. بس وين انت مو مثله

احمد: أي انا مو مثله انا ابيج بس بالعقل مو بالينون

مريم: هههههههه شفايدت العقل .. اقول خله يفيدك...اقول احمد امك اللي سوته صدقني انا شايلته لها .. وماراح تشوف طيب واختك فتون بيتكرر معاها نفس اللي سوته امك فييني .. بيون ناس يخطبونها واختك تبيه بس بيردونكم عشان سبب تافهه عشان امك مو كويتيه .. بعدين تعال اخاف اختك ملكت جمال صج بيضه بس عاديه وويها متروس حبوب

احمد: هههه و من قالج ما صار اختي وايد ارفضوها عشان امي مو كويتيه

مريم: ياشين الاجانب لي خذو الجنسيه تفلسف عالفاضي مادري اهي شنو كانت .. اقول احمد دبر عمرك ولا تدق علي الا اذا امك وافقت واذا ما وافقت .. هذا اخر اتصال بيني وبينك

احمد: مريم بليييز مو لازم نتزوج بس لا تهديني انا مستعد اظل عمريي كله عزوبي بس تكونين معاي

مريم: ههههههههه انتو الشباب كلكم جذي .. ما راح تدور سنه الا انت متزوج ومرتك حامل وتقول بظل معاج ومستعد اظل عزوووبي ضحكتني والله .. احمد خلاص دبر روووحك

باي





احمد (صوته بدا يتغير فيه بجيه): مريومه والله ماني خابرج بهالقسوه ... ليش جذي صرتي

مريم: وتسألني بعد ليش جذي صرت قاسيه .. احمد البجي وفره حق بعدين .. لانك بتبجي وايد علي

احمد(يبجي): مريم راح اموووت راح اموووت

مريم: هههههههه

احمد: مريم حرام عليج

مريم: حرام عليك انته مو انا .. انا اشبيدي اسوي

احمد: خلج معاي وانطريني لين ..

مريم: ليش شنو لين يطلع براسي نخل .. اقول احمد احنا بالواقع مو بالخيال وقصص الحب... يعني الواقع اللي احنا عايشينه لازم نهايه الحب زواج

احمد: وان شالله نهايتنا زواج

مريم: متى بعد جم سنه ؟

احمد: اشدراج يمكن ابوي يموت اهو وامي واخواني كلهم مره وحده بحادث واهم رايحين عند عمامنا بالسعوديه

مريم: تتمنى لهلك هالشي

احمد: لا تقولين اهلي .. انتي اهلي.. .انتي امي وابوي انا معاج عرفت الحياه ولا هذول اهل بس بالاسم لا عمرها امي اهتمت فيني ولا سألت عني

مريم: عيل اشفيها شاده حيلها الحين

احمد: مادري مريم

مريم: اقول احمد باي والله تعبت مالي خلق

احمد: وانا اكثر منج

مريم: لي لقيتلك حل كلمني باااي















رتاج عقب ما شافت فاطمه تزوجت ومريم قالتلهم سالفتها مع احمد صحصحت ووعت

وشافت حسين مطووول ومو راضي اييها

تهاوشت معاه واصرت تشوفه بالصج

واصرت انها تعرف كل شي عنه ..



رتاج: يا اشوفك الحين ولا بتكون اخر مره تسمع صوتي



حسين: رتوج اشفيج انا وريتج صورتي

رتاج: مو كافي .. ابي اشوفك بالصج

حسين: اللي تبينه يصير بس بشرط

رتاج: شنو الشرط؟

حسين: توعديني ما تخليني اذا شفتيني صج

رتاج: ليش اشفيك يعني ؟ ومنو اللي بصوره كان عيل

حسين: ماعليج بس اوعديني

رتاج: انا بعد عندي شرط

حسين: شنو ؟

رتاج: لي شفتك بشوف بطاقتك المدنيه وبشوف بيتكم

حسين: ليش كل هذا والله يا رتاج انا احبج من كل قلبي وابيج بس

رتاج: بس شنو؟









للاسف حسين طلع طالب بالثانويه وتوه متخرج يعني اول ماكلمها كان توه اول ثانوي وكل اللي يقوله لها كان جذب واحلاااام من نسج خياله بس الشي الوحيد انه كان يحبها وزين انها صحت بعد 4 سنوات حب !!













رتاج انخطبت .. من واحد كان مع مريم بالجامعه ..



مريم: رتوووج الف الف مبروووك خوش ولد تراه سيييده ماعنده كيري ميري

رتاج: اييي انا قلت لازم اشوف رايج بعدين اوافق

مريم: مبروووك



رتاج تزوجت واحد خريج علوم ويشتغل بالبترول وضعه الاجتماعي متوسط









عقبهم بجم شهرانخطبت مريم لدكتور بالجامعه وضعه الاجتماعي ممتاز .. وقبل ملجتها بيومين



دق تليفونها



مريم ترددت تشيله ولا ماترد لانه صارله فتره من هذيك السالفه مادق ولا شي !!



مريم : خليني ارد عشان لا يدق مره ثانيه وانا مع ريلي



ردت



مريم: الو

احمد: مريم اشلونج

مريم: بخير

احمد: مريم انتي للحين تبيني؟؟

مريم: لا

احمد( انصدم): شنو

مريم: اللي سمعته.. لا

احمد: انا وضعي تعدل وكنت داق بشوفج للحين تبيني عشان اتصرف

مريم: الله يوفقك .. انا تزوجت( طبعا ما قالتله انها مخطوبه وملجتها بعد يومين)

احمد: شنو بهالسرعه

مريم: اي احنا عصر السرعه هههه لو سمحت انا مابي اخون ريلي لا تدق كلللش ولا تدري شلون بغير رقمي

احمد: اوكي الله يوفقج باي





احمد ظل بداره يبجي وقلبه متقطع مثل الياهل الصغير







تزوجت مريم.. سكنها بشقه كبيره وسافرت معاه امريكا





المهم انهم ثلاثتهم حبو بس ماتزوجو عن حب وثلاثتهم مستانسين وناسين الماضي ..



فاطمه ريلها جم مره خانها بالتليفون مع بنت كان يعرفها قبل ومعتمد على فاطمه بكل المصاريف لانه معاشها قووي واهو معاشه ضعيف وعليه قروض.. بس تسنع الحين .. وصار مايشوف غيرها وصار عندهم 3 اعيال..



رتاج ريلها ماله كلمه عليها .. هي اللي متحكمه فيه ومشيته على هواها واللي تبيه يسويه وصار عندها شخصيه عليه عقب ماكانت عفويه وطفوليه مع حسين .. ووايد قاعده ترفع نفسها عن اهله لانهم اقل من مستواها .. بس حياتهم ماشيه اهم شي انها مستانسه جذي وصار عندها ولدين



مريم خلافات وايد ببدايه الحياه لانه ريلها اكبر منها ب 15 سنه واختلاف عمر .. بس عقب ما صار عندهم عيال صارو متفاهمين اكثر والحب زاد والتفاهم زاد .. وصار عندهم بنت وولد



الاحداث تقريبا صارلها 6 سنوات وشفتو شلون كانو حييييييل مع بعض و اكثر من خوات .. الحين محد فيهم يدري عن الثاني لهو بالحياه الزوجيه وكل وحده ومشاكلها .. والمشاكل بينهم بدت من تزوجت مريم ..







:bye22:

 

[البارونه*_^رونه]

واوووو ناايس القصه

اكثر شخصيييه اعجبتني مريوووووووووووووووووووووووم فديتهااا رزينه حدهاااا


والشخصيه اللي ماعجبتني رتااج


وفطوووم على نياااتهااااااا طيووبه


واحمد وووع

وعلي ووعييين

والله يوفقهم كلهممم يااارب

يعططيييج العاافيه يااارب

 

[readflawer]

الله نهايه حلوه

يعطيج العافيه حبوبه

وننتظر روايه ثانيه

 

[The purple]

وليش احساسي يقول إنج وحده منهم ؟

عموماً مادري مريم ضيعت فرصتها

يعني صبرت وهيك بس على الآخر خربتها شوي

يالله الله يوفقهم جميعاً

بس جاسم صدمني شلون اعتمد عليها

وحسين ويييييه !!
آنا قايله ولد فقر لو عنده خير ماتكلم ما يحتاي يقول عندي وعندي يا مال الضعفا يا حسينو

يعطيج العافيه على القصه

والله يوفقهم جميعاً وشكراً ~

 

[DALLY]

جاسم زين اللي اقتنع بفاطمه وتمسك بس ليش الخيانه
المهم مايرد للي سواه ف حقها

احمد نو كومنت بس زين سووت مريم شخصيتها بيرفكت

حسين حده بدعه لووووول ياهل ماينلام اللوم على رتاج بس الحمدلله متزوجه الحين باللي احسن

الله يوفقهم كلهم
الشي اللي مااحبه لما الصديقات يتزوجون وينسون بعض


تسلمين حبوبه عالطرح الحلو ناطرينج ف قصه واقعيه ثانيه اذا لج خلقنا............

 

[أميرة العود]

القصة وايد حلوة
يعطيج العافية

 

[أم@الحلوين]

اول شي مشكووووووووره عالقصه رووووووعه واسلوبج الاروع
ويعطيج ألف عااافيه

مو شرط اللي يحب ياخذ اللي يحبه كل شي بهالدنيا نصيب واللي الله كاتبه اهو اللي يصير

ليس كل ما يتمناه المرء يدركه .. تجري الرياح بما لا تشتهي السفن

وبإنتظار يديدج يالغاليه ..

 

[MeeMeeYoo_2]

مريم ما احس شخصيتها قويه !!
شخصيتها في نوع من التسلط ! ومادري شلون
يعني لو شصير كنتي تحبين احمد وتسمعينه يبجي وتسوين فيه جذي تقولين له لا مابيك !
بصراحه ما اعتبرها قوه ! احسها ماكو قلب !!


عالعموم الله يوفقهم

واسلوبج وايد وايد حلوو

وناطرين يديدج