رابطة "دودات الكتب " .. حياكم

[ماغنوليا]

لتوله.. الله يشافيلكم الوالدة انشالله ويطول بعمرها ويخليها لكم..آآآآمين​

 

[ماغنوليا]

لكل من سأل عن كتاب ( قصة الديانات)
تأليف.. سليمان مظهر الناشر مكتبة مدبولي ط2 -2002
القسم الأول: عقائد مصر والشرق القديم
ديانة مصر القديمة عقائد مابين النهرين

القسم الثاني: عقائد الهند
عقيدة الهندوس البوذية الجانتية المصلحون الدينيون

القسم الثالث: عقائد الصين واليابان
الكونفوشيوسية الداوية الشنتو

القسم الرابع: عقائد الاله الواحد
الزرادشتية اليهودية المسيحية الاصلاح الديني الاسلام​

 

[camilia]

لكل من سأل عن كتاب ( قصة الديانات)
تأليف.. سليمان مظهر الناشر مكتبة مدبولي ط2 -2002
القسم الأول: عقائد مصر والشرق القديم
ديانة مصر القديمة عقائد مابين النهرين

القسم الثاني: عقائد الهند
عقيدة الهندوس البوذية الجانتية المصلحون الدينيون

القسم الثالث: عقائد الصين واليابان
الكونفوشيوسية الداوية الشنتو

القسم الرابع: عقائد الاله الواحد
الزرادشتية اليهودية المسيحية الاصلاح الديني الاسلام​

ثاانكيو
سجلت اسمه لي رديت الديرة ادوره .

 

[sindrella]

السلام عليكم

عجبتني الرابطه ودي أنضم لها


شلوون ؟؟؟

 

[rawona]

السلام عليكم..

شلونكم..

وطالباتنا موفقين يارب..

ماغنوليا مشكوره ..





هلا رونه..

انا حسبالي نكج روان عقب شفتهم ينادونج رونه بس ترا بالنطق غير انتي دلع روان مو ؟؟ انا لا

خخ خوش عاد وناسه اروح اكمل باال100 الف مالت الوزاره

قريت لج تعليق انه اللي يحب القراءه يحب السفر..

توه طرى ع بالي انا احس انه القراءه بحد ذاتها سفر لديره او وقت مختلف

>>بركات فانتازيا خخخ..

انا النك نيم مالي دلع روان انتي شنو؟؟؟


وياعيني على الفانتازيا بس ترى صج كلامج القراءه بحد ذاتها سفر الى عوالم وديار غريبه وعجيبه :s141:​

 

[sindrella]

محد رد علي !!

 

[.]

السلام عليكم..

شلونكم..

سندريلا حياج الله ..

واذا تحبين ضيفي شعار الرابطه بتوقعيج..

وعطينا نبذه عن قراءتج اذا ماعليج امر..

هلا رورو..

لا انا الراء مو مدوده ونكي بدلية رفيجتي ايام الثانوي

 

[Little_Queen]

سندريلا. . حياج الله حبيبتي

يا بنية طبي حياج

ماكو اي شييييي لازم تسوينه حطي شعارنا بتوقيعج .. و شاركينا


---------

اممممممممم .... ماغنوليا .. من وين يبتيه ؟؟

بصراحة شدني موضوع الزرادشتيه مادري شفيني يا وخيتي مهتمة هاليومين بمواضيع تحفه !!

ذاك اليوم معلقه عالرقص الصوفي !

و صارلي جم شهر اصلا معلقه عالصوفية بكبرها بعرف شسالفتهم !

و الحين مادري ليش شادني موضوع الزرادشتيه

وايد المذاهب و الديانات صايره شاغله مخي هاليومين !! على فلسفة ... على انثروبولوجيا !!


مادري شساااالفة يا وخياتي اهتماماتي قلبت مره وحده !!!!!!!!!!

-------

امين معلوف بصراحة ما قريتله بس رفيجتي تمدح رواية سمرقند واااايد .. و انا اثق بقراءاتها بصراحة و ناطرتها تخلص منها عشان اخذها اقراها

...


مشتهية باستا مالت كفتيريا الهندسه !!!!! " ياووووو يا اليوووع " !! .. بس لان اذكر رفيجتي تدرس بهندسه و كنت زايرتها بالكلية و كلينا بالكفتيريا باستا !

 

[][ الميـــــــار ][]

السلااام عليكم بنات مشتاقه لكم
مشالله قارءات يدد معنا حياكم الله
يالله مداني اقرى الصفحات اللي مو قاريتهم عشان ما يطوفني شي ;p


لتوول حبيبتي ما شوف شر الوالدة ألف لاباس عليها انشاءالله



وااي يالله ابي اخلص الامتحانات وابلش قراية من زمان مو قارية شي يديد :\

حده عجبني موصوع كتاب ( قصة الديانات) من وين القاه شكله حلوووو ؟!

 

[ماغنوليا]

كل من سأل عن كتاب قصة الديانات من وين ماخذته؟؟؟
أخذته من عرض الكتاب،، اذا تبين كتب تتكلم عن مواضيع تحسينها يديدة ومو بالعادة تطلعين عليها فلا تكتفين بصالة دور النشر الكويتية لازم تمرين الدور العربية باختصار فري الصالات كلها بتلقين شغلات غريبة .. صج المعرض ماعاد نفس قبل بس شنسوي العوض ولا القطيعة ​

بغيت احط التوقيع بس غميضة ماظبط معاي:eh_s(11):​

 

[Little_Queen]

الله يسلمج يا مغنوليا انا بصراحة قاعه دور النشر الكويتية أدشها آخر شي :> لما فلوسي تكون شبه مخلصه

عشان اشتري بس الكتاب الي فعلا له قيمة لأنه للأسف دور النشر عندنا يمسكون الطبلة و يطقونها حق كل من مسك قلم و شخبط شخابيط لخبط لخابيط مسك الالوان و رسم عالحيط >>>>>>>>> شفيها اندمجت هذي ؟!؟؟!؟!


اهو معرض الكتاب بصراحة يبيلج تفرينه كل يوم ! اذا فعلا تبين كتب سنعه .. يبيلج مبلغ و قدره محطوط بالبوك ، و تاخذين معاج عربانه او جنطة سحاب .. لأنه نظام اتم شايله اكياس و الاكياس ثقيله و اتعب

و تروحي جوتي رياضه و انتو بكرامه و انطلقي !

و لا تروحين بالزحمه

احسن شي تحاولين الصبح

و مو يوم واحد

روحي كذا يوم و افتري على روااااق !


مع انه اكو مليونين الف كتاب ممنوع .. و انا بصراحة شديدة ضد تماما منع الكتب !

يعني يا جماعه الحلال بين و الحرام بين

و الناس كبار و عاقلين و يفهمون " عالاقل الناس الي يحبون القراءة و رح يشترون كتاب يتكلم عن العقائد و المذاهب مارح يكونون ناس مخهم سوري طابوق يعني عشان يسوون سوالف "

و انا اقدر اميز الصح من الخطأ !

اوكي انا ضد الكتب الي فيها صور اباحيه مثلا ولا صور مفاصيخ او حجي ماصخ ماله داعي ...

بس سوالف العقائد و الديانات و الفلسفه و الفكر ... آراء ...

جهود ناس انت بأي حق تمحيها و تمسحها من وجودك ؟؟ انتا ما تبي تقراهم لا تقراهم .. غيرك كيفه !!

مادري يمكن البعض رح يتعارض معاي بس انا بصراحة مع حرية القراءة ! خل كل واحد يقرا الي يبيه


يعني احنا مو بزمن الي خلاص بتمنعون هالكتاب عني مارح اقدر اقراه ! بدش بالنت اطق اسمه بقووقل و اقراه كلللللله عالنت و ببلاش بعد !!!

عبالكم صايدين الحركة يعني

المراد .. المعلومة و الافكار بتوصل بتوصل شئت ام ابيت يا رقيب ...
بس حرام انك تضيع جهد و تعب الكاتب و تمنعه من انه يوصل حق الناس !


في المقابل ما نشوف رقابه لمنع السخافه مثلا !! كتب سخيييييييييييفة والله سخيفه .. ناس ماكو اي ثقافه اي مخ اي لغه مسك قلم و كتب و طلع كتب و روايات و قصص !!


قلبي عوووووووووووورني ! والله قلبي عورني يوم شريت اصداراته لقيتها سخافه !

يعني هالكاتب اولا محتاج وايد انه يشتغل على نفسه قبل لا يفكر اصلا ينشر حتى في جريدة !

حتى في مدونه عالنت !


قواعد لغه عربيه ماكو ! اخطاء املائية و نحوية و مطبعيه ! فكرة سخيفه ! الفاظ مزخرفه بزيااااادة و كل مشهد يسويلي اياه مشهد رومانسي خيالي مع انه الموضوع ما يبي جذي كلللللش و تحسون انه حاشكم حارج من كثر الحجي المنمق !!

و الناس في الرواية كلهم مؤدبين .. حلوين .. و اكو انسان شرير يتربص بالابرياء التعسااااء ! نياهاهاهاها


يعني ملينا بصراحة من هالافكار

مليناااااااااااااااااا من الاستهلاك و البوق و السخافة و التفاهه


اقرااا .. اقراااااا ابوس ايد ريولك اقرا قبل لا تكتب

نور مخك يا اخي !

المشكلة انه كانو مسوين فيها احتفاليه لا صارت ولا استوت . و معجبين و معجبات !

بتقولون محتره و منقهره ؟ اي محتره و منقهره !

بتقولون من الواهي الي فيني ؟ اي والله من الواهي الي فيني

لاني شايفه و عارفه ناس شباب و بنات صغار بعمرنا و كتاباتهم من اروع ما يكون ... والله يستحقون فعلا لقب الكاتب الفلاني أو الكاتبه الفلانية

بس وعليا طايح حظهم هني الناس يستضيفونهم و يطلبونهم بالاسم في محاضرات و ندوات بالبحرين و مصر و قطر و الجزائر


و هني ... محد يوطوط عندهم يشتري اصدارهم !

الدنيا حظووووووووظ


بس يلا هانت

ما بقى شي .. انشالله جم شهر و اطلع اصداري !!!

الي بيطيح بجبدي انشالله مسبقا انا ادري

لانه ما رح اخليكم تشترون منه رح اعطيكم ياه اهداء طبعا

و اهداء حق امي و اهل امي .. و ابوي و اهل ابوي ..

و اكيد اهداءات حق رفيجاتي

و حق زملائي بالجريدة ...

و اتشيحط فيه جدام دكاترتي بالجامعة و اعطيهم نسخ اهداء !


شبقى من الاصدار عشان أبيعه ؟؟؟؟

نسختين ؟؟ يلا زين ابيع النسختين وحده انا اشتريها حق نفسي و الثانيه اخلي خدامتنا تشتريها تراوي اهلها بالهند



شفيني انفجرت عليكم انا ؟؟؟؟؟؟؟؟ وي وي وي وي يا حااااااافظ امبيييييه سمالله علي !! شصاااار ؟؟

 

[Kumar and Clark]

ليتل كوين مرة ثانية لا شكر على واجب

و اي صج بيكون عندج اصدار و الا تتغشمرين ؟؟ و اذا صج قوليلنا شنو طبيعته ؟؟

اي توني قارية كتاب حديث الصباح و المساء حق نجيب محفوظ .. انا شايفة المسلسل من زمان و القصة وايد وايد حلوة... بس الصراحة طريقة كتابة أستاذ نجيب للرواية اصابني بشيء من الملل و الconfusion !!
معلومة للي مو قارية الكتاب : هو مو كاتبها على شكل رواية لأ .. كاتب القصة بطريقة غريبة يعني مرتب اسامي الشخصيات ابجديا و كاتب عن كل شخصية بروح عن حياتها فتخربطت خصوصا ان الشخصيات كثيرة و داخلة في بعض و عايشة بازمنة مختلفة و مهمة من تاريخ مصر .. يعني لو كان مصنف الشخصيات على حسب العايلة بدال الترتيب الابجدي كان وايد اسهل و لو كان كاتبها على هيئة قصة جان صار احلى و احلى .. بس هذا ما يمنع ان المضمون كان وايد حلو

افكر اقرا ثلاثيته خصوصا اني مو شايفتهم بالتلفزيون من قبل ف راح تكون قرايتهم ممتعة اكثر

و بالنسبة لكتب الاديان.. مع ان انا وايد احب اقرا عن الاديان و الثقافات الاخرى لكن ما احب اقراها بالعربي((( احسها))) مغلوطة و الكلام اللي فيها غير دقيق و ممكن يكون خاطئ و بقعد اشك فيه .. لأن مع الاسف الشديد عدد من الكتاب العرب ما عنده مصدر بحث موثوق فيه يعني انا مر علي كتاب لكاتبة معروفة و كتابها معروف و للأسف القصة اللي ذاكرتها في كتابها غلط في غلط و مصدر بحثها للقصة كان مع الاسف الانترنت!! و بعض الكتاب اللي يكتبون عن الاديان و المذاهب الثانية ممكن يشوهلك الدين او المذهب الثاني علشان بس يبينلك ان دينه هو الصح !! فثقتي بالكتاب العرب تقدرون تقولون انمسحت يعني اذا قريت شي من كتاب عربي لازم اروح اتأكد منه عقبها

و بالنهاية طبعا هذا رأيي الشخصي اللي يحتمل الصواب و الخطأ و بالتوفيق بنات

 

[Little_Queen]

كومار .. لا بالعكس لج كل الشكر مره ثانية و ثالثه و الف و مليون بعد ..


اي انشالله انا الحين قاعده ايمع شغلي و اراجعه و اعدل فيه و رح اشتغل بالصيف على دار النشر و الطباعه و جذي اتمنى اتمنى بإذن الله ان الله اراد على معرض الكتاب الياي يكون نازل

و رح يكون اذا الله اراد مجموعه قصصية ان شاء الله


و بالنسبة لكتب الاديان ..

اممممممممممم يمكن اتفق معاج جزئيا كومار ... بس ....

اقري امهات الكتب .. الشغلات القديمة حيييييييييييل الي ايام الناس كانو محترمين فيها يعني و يقولج المعلومة صج مو جذب !

بس عموما لا ضير من انج تاخذين فكره عامه عن الموضوع و تبدأين انتي تدققين في كل صحة كل معلومة على حده


بالعكس احس هني يصير تحدي احسن حق القاريء .. انت عطيتني معلومات فيها الصحيح و فيها المغلوط ...

حلو اني اكمل هالشي بقراءات اخرى و ابحاث اخرى عشان اتبين الخطأ من الصواب

لانه في احيان كثيرة يا كومار الكتب الاجنبية ما تكون مترجمة .. و ان قريتيها بالانجليزي تفوتين على نفسج متعه اللغة بصراحة و مهما كان ما رح يوصلج نفس الاحساس لما يكون الكتاب بالعربي ..


مادري انا هذا الي احس فيه شخصيا

يعني الحين قاعده احاول اني اخلص رواية Loving che ... احس اني ساعات غاصه ببعض الكلمات اضطر ادور معناها و ساعات تكون يايه بمعنى مجازي مو مباشر ..

صححححح الرواية وايد حلوة و للأسف مالها ترجمه كلش ملش .. و انا مستانسه اني تعلمت وايد كلمات يديده منها و اساليب و حلو اصلا الاطلاع على الاداب من اللغات الثانية


بس انا شخصيا متحيزة للغة العربيه اكثر و احبهاااا و لا أرضى لها بديلا أبدا جني قلبت السالفه الى صراع لغات ؟؟؟؟؟


كومار ... قوليلنا منو الكاتبه المعروفة و كتابها المعروف عشان نستفيد احنا بعد

 

[Little_Queen]

بالنسبة ل"حديث الصباح و المساء " ...

شريتها

قريت اول جم صفحة منها و شفت طريقتها اخترعت !!!!!!!!!!!!


حاشني ملل و ملاقه و احباط و هبوط و اكتئاب و انتحار و كل شي !! لاعت جبدي باختصار


قريتها مره و فرت مخي ...

عاد كنت حاضرة ندوة من ندوات مجلة العربي السنوية .. كانو مستضيفين ناقد من مصر نسيت اسمه بس اهو ناقد معروف جدا و حتى اذكر كتبت عن الندوة بالجريدة و حطيت بحث هالناقد الي مو طاري اسمه ببالي الحين


تكلم من ضمن البحث الي كان مسويه عن حديث الصباح و المساء

انه اغلب القراء قرو ربع او نص الرواية و ملو و قطوها لانه الاسلوب و طريقة العرض جدااااااااااا غريبة !

و اهو شخصيا حس نفس الاحساس .. و استغرب .. لأنه مو عادة نجيب محفوظ يكتب شي ممل لهذه الدرجه !!

يقول لكن لما اعدت قراءة الرواية مره ثانية .... و انا مسترخي اكثر و متعود عالطريقة ..


وجدت نفسي اغووووووص في عالم الرواية و الشخصيااااااااااات


و اكتشفت انه الطريقة رائعه فعلا لمن يريد التعايش مع الشخصيات

و تنم عن ذكاء حاد و امكانية عاليه جدااااااااااا من الكاتب !! مو من شوية ماخذ نوبل نجيب محفوووووظ والله مو من شوية !

لانه صعب جدا انه الواحد يمسك بخيوط الرواية كلها بهالطريقة و يعرض كل خيط على حده .. مع المحافظة على العقده الي تربط كل الخيوط مع بعض في النهاية !


.... عاد قررت اقراها مره ثانية ... بس ما قريتها !!!! ان شاء الله بالصيف ...

اخخخخ يا هالصيف الياي شنو بسوي ولا بسوي فيك .. الله يعطينا عمر و نسوي كل الي نبيه فيك !

 

[rawona]

Little Queen


اتمنى لج التوفيق باصدارج القادم وان شاءالله يصدر مثل ما تبين ويحقق نجاح كبير باذن الله .. وانا بعد قاعده اشتغل على كتابين لوووووول << يعني مو مكفيها كتاب واحد ..


واحد منهم اتمنى .. اتمنى .. اتمنى ... ان شاءالله ينزل ويكون في معرض الكتاب القادم اذا الله كتب ..لانه صج حابه يكون مفتاح لي ويقدمني بصوره حلوه قبل لا انزل كتابي "الصجي" لووول


والله يوفق الجميع دعواتكم :tek:

​

 

[Kumar and Clark]

ليتل كوين


اولا بخصوص كتب الاديان .. امهات الكتب ترجعين لها كمصدر و ليس تقريتها ككتاب لأن الصراحة راح تتمليلين خصوصا انها كتب كبيرة وايد .. و مع الاسف الشديد انا قعد اسمع ان في بعض الجماعات حتى امهات الكتب قعد يحرفون فيها و يشيلون منهاالاشياء اللي ما تناسب اهوائهم في الطبعات الجديدة .. يعني لو تقارنين بين النسخ القديمة و النسخ الجديدة راح تلقين اشياء مو موجودة ..

و انا افضل لما اقرا عن موضوع ما اعرف فيه اول شي اقرا من اماكن موثوقة و محايدة لأن انا ما عندي اي خلفية في الموضوع فشلون بعرف الصح من الغلط ؟؟ بس لما اتمكن من الموضوع ذيك الحزة ممكن اني اقرا حق الكتاب اللي مشكوك فيهم لأني حزتها راح اميز الصح و الحجي المشكوك فيه ..

و بالنسبة للقراءة باللغة العربية .. بشكل عام انا افضل اقرا لكل كاتب بلغته يعني مثلا ما اقرا حق نجيب محفوظ بالانجليزي .. اقرا له بالعربي طبعا لأن هو قدم فكره بالعربي و لا اقرا حق ويلكي كزلنز بالعربي لأن قدم فكره بالانجليزي .. لكن لما يكون الكاتب فرنسي او ياباني او كولومبي او اي شي ثاني لأ افضل اقرا له بالانجليزي طبعا .. لأن الانجليزي يترجم لج النص مثل ما هو لكن المترجم العربي ممكن من باب المحافظة على حياء او عادات القارئ العربي يغير لج بالنص و جذي تحسين انت ما تقرين الكاتب الاصلي شنو كاتب بالضبط و تحسين ان انت ما قريتي القصة مثل ما الكاتب كان يبيج تقرينها .. انت قريتها مثل ما المترجم يبيج تقرينها ..

لكن هذا مو معناته ان انا ما احب اقرا بالعربي بالعكس . بس اذا بقرا عن الادب العالمي افضل اقراه بالانجليزي.. بس شوفي ساعات الواحد لما يكون مو متمكن من اللغة ممكن يتملل و هو يقرا بغير اللغة العربية يعني كل شوي بيبطل القاموس راح يتملل

و بالنسبة للكاتبة فهي : سلوى العضيدان في كتاب هكذا هزموا اليأس .. باختصار شديد الاستاذة كاتبة قصة ان ابو السير الكسندر فليمنج مكتشف البنسلين انقذ ونستون تشرشل و هو صغير فأبو ونستون تشرشل تكفل بمصاريف دراسة الكسندر و بعدين لما كبروا الكسندر انقذ حياة ونستون عن طريق البنسلين اللي اكتشفه .. القصة غلط في غلط حتى الاسلوب غلط . و لو سويتي بحث بقوقل بالانجليزي راح تكتشفين ان اغلب المواقع الرسمية تكذب االقصة و تقول انها وهم حتى موقع ونستون تشرشل الرسمي.. فشلون الاستاذة كاتبة كتاب عن العظماء من غير ما تكلف على نفسها و تقرا سيرتهم الذاتية ؟ مجرد قص و لزق من النت !

و بالاخير ان شاء الله موفقة يا رب في كتابج الجديد و اتطلع اني اقراه

 

[Kumar and Clark]

راونا

ما شاء الله صار عندنا كاتبات بشكل رسمي بالمنتدى

قوليلنا شنو طبيعة الكتابين اللي بتنشرينهم ؟؟؟

و الله يوفقج ان شاء الله يا رب و نتطلع نقرا لج

اي صج متى معرض الكتاب؟؟

 

[rawona]

راونا

ما شاء الله صار عندنا كاتبات بشكل رسمي بالمنتدى

قوليلنا شنو طبيعة الكتابين اللي بتنشرينهم ؟؟؟

و الله يوفقج ان شاء الله يا رب و نتطلع نقرا لج

اي صج متى معرض الكتاب؟؟

كومار اول شي حابه اعلق على رايج اللي قبل شوي وانا اتفق معاج 100% ..

انا احس اشوي الكاتب العربي اذا ترجم عمل عالمي ما يقدمة بصوره صحيحه او مثل ما قلتي ممكن يحرف في بعض الشغلات ويلغي اشياء ثانيه من باب الرقابه .. وهذا شي صحيح الا فيما ندر طبعا..


انا جذي كنت ما اواطن اقرا للكاتبه أغاثا كريست شي!! لانه اغلب الكتب المترجمه والمطبوعه مو صحيحه! ومو مترجمه بشكل رسمي.. فلما ترجمت دال الاجيال كتبها وذكرت انها ماخذه الموافقه من المسؤولين عن كتب اغاثا كريستي نفسها قريت لها و لما ييت وقريت بعض الروايات باللغه الانجليزيه لقيتها هم تختلف اشوي عن الكتب المترجمه! فضعت!


وانا ودي ومتشوقه حيل اقرا لداون براون وشكسبير وفيكتور هيوغو بس اخاف ! احس اخاف اقرا شي مو صحيح او مغيرين فيه وايد بسبب الترجمه الغير دقيقه وافضل اقراها باللغة الانجليزيه وهذا اللي سويته مع كتب اغاثا كريستي الحين احب اقرا قصصها باللغه الانجليزيه امتع بوايد ..

وان شاءالله اذا حصلت كتب شكسبير وفيكتور هيوغو وباولو كويلو وتشارلز ديكنز وغيرهم باللغه الانجليزيه راح اشتريهم على طول



بالنسبه لمعرض الكتاب اتوقع على شهر 10 او 11 ..


انا اكتب القصص والروايات .. بس عندي مشروع كتابة "كتاب" ما اقدر اتكلم عنه للحين لاني ما كلمت الناشر ولا اتفقت معاه واحتما انشره على حسابي الخاص للحين ما يندرى بس اول ما اتأكد من الوضع راح اقولج :eh_s(6): << عايشه الدور لووول


​

 

[BaTTy]

ونااسه والله
موفقين ان شالله كومار و ليتل و عطونا خبر شيصير معاكم :>
و انا اوافقج برايج يا كومار بخصوص كتب الاديان و ازيد عليهم انه المراهقين فيهم شي و يعتبر طبيعي بالنسبة حق هالمرحلة العمريه
انهم يبحثون في حقيقه الدين و الانتماء و هالسوالف
فا اكثر مرحلة ممكن تتأثر اهما و خاصه انه مثل ما قلتي بعض الكتاب مو غرضها التعريف عن هالدين لا غرضها اظهار انه الدين الصح و يكلمج بطريقة الاقناع , اوكي صح في نت تنزلين منه و تقرين بس هذا اذا انتي عارفه الكتاب و ناويه تقرينه غير عن لمن تدشين مكتبه او معرض و تلقينه مرتز جدامج يغريج

 

[.]

السلام عليكم..

ولكم باك باتي و لتول و الميار..

وماشاءالله نقاش قوي مااقدر اخوض فيه لاني ماجربت اقرا شي لاديان الاخرى..

بس مادري ليش طرى ع بالي كتاب السجينه..

وهم من ناحية الدين اخاف اقرا لاي احد خصوصا بالكتابات عن دين الاسلام لانه في بعضهم يضيفون احاديث ضعيف وفتاوي تتناسب وتلائم اهوائهم الله يهديهم يارب..

سالفة انه بتكتبون حلو ماشاءالله تدرون لما قريت مشاريعكم الله يتمم عليكم يارب ويرزقكم اكثر من اللي تتمنون فكرة بدرس نقد

عاد انا ام هبه بس صج خاطري اصير ناقده ..

المهم شنو قالتوا بعد؟؟

وي نسيت اقولكم شلونكم؟؟

ودي اقرا واقرا واقرا بس بشتريلي جهاز (دي -جي 2) وناسه