ديوانية --<-@ {{ One Day We Will Be Slim}}

[Queen of Sadnes]

قوه بنات شلونكم عساكم عالقوه ان شاء الله
لولر حبيبتي ماعليج من هالناس يبطوووووون الجبد قطع احقريهم شوفيني انا اخر الدنيا وهم مومرتاحه من حجيهم وتدخلاتهم مادري وين اروح بعد يمكن اروح المريخ لووووووووول
زيون صيام مقبول ان شاء الله ويالله شدي حيلج وخليج قدها
نونه الله يخلي لج ولدج ويحفظه ان شاء الله
معصعصه لووووووول خوش نك نيم ها شلونج حبيبتي اكلي شغلات تحرق اكثر ولا اقولج سوي مثل ماقالت كتونه سوي ٣ ايام بروتين صافي وشوفي بيتحرك الوزن
بيشو ماشاء الله يومج حلو وبس خلاص وقفي اكل لليوم لووووول عليح بالعافيه

بالنسبه لي بنات امس واليوم سويت جريمه لاتغتفر ماخليت كاكاو ماكليته وامس تعشيت ٣ سلايزات بيتزا ووووو ماابي اقول بس والله ماادري شفيني صارلي يومين ابلع بشمل موطبيعي ومو قادره اسوي كنترول بس ترا الصج نفسيتي حيل تعبانه وعيوني وارمه من البجي احس نفسي بروحي مالي احد جد مليت والريل موهامه اذا شافني ماله ولاتعبانه هو ينفس زياده عالاقل هو احسن مني عنده ربع يروح ويجي معاهم وانا بس مليت من الروتين كل يوم نفساللي قبله وحتى اذا طلعتاليهال اخس الطلعه لهم مو لي جد تعبت
سوري بنات بس قصدي افضفض والله والمشكله حطيت الحره بالاكل مع اني مالي نفس بس صايره ابلع بهالكاكاو استغفر الله العظيم

 

[Melazlaza]

لول لولو عاد ولدي من غير شي شغال عض لو عضيتيه بيستانس حسباله لعب
سوي تمارين معدة وخصر مايبيلهم جهاز ولا شي
واذا تبين انا اشرحلج عشتاو يعني انا الي اعرف

 

[Melazlaza]

بعد عمري كوكو لا تضايقين نفسج الزم ماعليج راحتج وتفائلي في ناس غيرج يتمنون يكونون مكانج انا بس اتخيل هالشي ارتاح ونفسيتي تتحسن
الرياييل يتأثرون بسرعة خلج مرحة وراح يصير مرح وبيحس فيج بس بالحجي المتطقي مو بالنكد والتحلطم
دامج بره استانسي والله فكة من مجتمعاتنا المعقدة الكل يراقبج
عيشي يومج وفرحي وونسي عيالج خلي الطلعة لج ولهم يعني طلعيهم العاب وهالاماكن ولي تعبوا حطيهم بعرباناتهم وعالسوق حزتها اهما تعبانين الله يحفظهم مايأذونج وانتي تتطمشين عالاسوقة
الله يهدي بالج ويزرع الفرح بقلبج

 

[om l3yal]

كوكو حبيبتي والله صج حاسة فيج الله يعينج ان شاالله
والله محد مرتاح في هالدنيا
اول شي عليج بالعافية انا بعد احس نفسي نفسي مفتوحة علا الاكل واذا ما قزرتها بالسوايل راح تصير عندي السالفة لما تفك ما حتسك بس لا تخلين نفسيتج تاثر عليج
والله الريل عمره ماحس علا قولتج ان تكلمتي وشكيتي نفس عليج وهج من البيت وان سكتي هم ماراح تتحملين كوكو ماعندج ضديقات تطلعون مع بعض ميخالف مع اليهال بس علا الاقل تقعدون مع بعض وتسولفون شوي تنسين وتلهين لان صج النفس تبي النفوس
ربي يردج بالسلامة ويوفق ريلج وها عاد لي رجعتي من غير شر نبي جمعة معتبرة زين

 

[Zain_ALZain]

منا ومنكم فديتكم

اليوم بس اذن جان اشرب قلاص ماي وبعده شربت طاستين شوربة خضار انا مسويتها

المكونات : ملفوف وحبة طماط و3 حبات كوسا وحبة جزر وحبة فلفل رومي وشوية عدس

كانت عجييييبه بعدها رحت صليت ولما رجعت كليت 3 قفاش سلطه وشوية دياي مشوي وبس الحمدلله

ان شاء الله بخلي السحور رقي خاطري فيه من زمان

 

[نونة حبيبها]

لولو الله بخليهم لنا يارب
كوين استهدي بالله حبيلتي واشغلي نفسك باي شي
الله يوفق زوجك ويسهل اموركم يارب

 

[Queen of Sadnes]

بالعافيه زيون وتقبل الله
حبايبي عطوفه ولولو فديتكم والله احاول كثر مااقدر اكون مرحه بس احيانا خلاص تقفل معاي واتعب جد والله خصوصا اذا احتجت اسولف مع احد وماالقى
بالنسبه للريفجات لا هني ماعندي بس احيانا اشوف بنات عرب نسولف سوالف عاديه وبعدها باي وعاد وين اشوفه مره ثانيه وهني الناس مشغولين محد فاضي لاحد عالعمو هي ضيقه وتعدي الله كريم وان شاء الله لولو بس ارجع باذن الله اشوفكم تدرون الحين شنو ودي ودي اروح السوق وشكلي بعد شوي بروح ادري بنفسي ماارتاح الا اذا شريت مومهم شنو اشتري المهم اشتري شي حاله مرضيه مزمنه لووووووووول الله يبعدها عنكم

 

[Queen of Sadnes]

تسلمين نونه ان شاء الله

 

[Melazlaza]

حبيبتي كوكو روحي واستانسي كافي التمشي يخلي المود احسن

لولو شسالفة فتح الشهية حتى انا بس قمت اشرب ماي وايد واكل فواكه المصيبة التشهي اهوا الي يبط الجبد
زيون تقبل الله وبالعافية

 

[Zain_ALZain]

الله يعافيكم حبيباتي أنا تسحرت شريحة رقي وتوست فيه جبن سلايس ومرتديلا
وماراح أصوم لا بأجر ولا إلي عقبه لأنه عندي مشاوير الصبح فا بخليهم سوائل بإذن الله

تصبحوون.على خير

 

[الحراير]

مرحبا يومياتي ليوم السبت فطوري حمسة بيض مع خبزاسمر خفيف وغدا ماتغدي سناكي نسكافيه و١بسكوت دايجستيف عاد علي عشا خربطت طلبوا هارديز وشتهيت صمونتهم وطلبة وجبه مع دايت بس البطاط مااكلت الا يمكن ٥حبات وباجر سوائل

 

[BiiShOoO]

السلام عليكم

لولومالج شغل فيهم حريهم و لا تحترين

كوكو ما عليه ان شاء الله فترة و تردين بالسلامة و حاولي تاخذين عيالج و تتمشين فيهم بالسوق

زيون حرور و نونه و باجي البنات بالعافية بالعافية

 

[BiiShOoO]

ريوقي نسكافيه و بسكووتين

شربت قهوة عربية و قهوة و فرنسية و بس

و لي الحين مادري شنو اتغدا

 

[نونة حبيبها]

مراحب حلوات
اليوم طلعت من الدوام ورحت مع اختي نفطر برا
احس طلعة الصبح غير كلها روقااااااااااااااااااااااااان
ماخربطت بفطوري الحمدلله بس كان منوع
مريت دايت سنتر خذيت كم شغلة..وسلطات
رجعت نمت وسحبتها نومة للمغرب
اللحين مالي خلق اكل على اساس انه سوائل بس ماني عارفة شنو اكل
سويت لي كافيه لاتيه
جوعانة بس مو عارفة شنو الي المفروض اكله احس مالي خلق

 

[BiiShOoO]

اهليين نوونه شخبارج

اي و الله صاجه حلوه طلعه الريوق

 

[BiiShOoO]

تغدييت كرواسان جبن و جاي حليب

نمت و تاوني قعدت و الحين قاعده اكل تفاحه خضرا

 

[نونة حبيبها]

هلا وغلا بيشو
انا بخير الحمدلله اخبارك انتي؟؟
اما طلعة الصبح من جد روقان ومع صوت اليسا عالم ثاني لووووووووووووول
انا لو كنت نايمة كان كملت هياتة بس كنت مرة تعبانة
بس اخلص عرس خالتي الاربعاء الجاي ان شاء الله بطلع من الصبح

 

[BiiShOoO]

انا تمااام

ايييي صاجه و لا اغاني فيروز بعد

هههههههههههههههههههههههههههههههههههههه

 

[om l3yal]

شلونكم بنات
انا منقهرة
اكلي اليوم
بطل ماي على الريج
شابورتين بالالياف فيهم ثنتينهم 35 سعرة وحدة مع مسحة جبنة فيلاديلفيا لايت والثانية مع مع جبن كرافت قلاص
شربت بطل ماي
الغدا مع سناك العصر كان ست حبات سمبوسة شغلي بيتي شي بالحلوم وشي بالخضار وشي باللبنة وشي بيتزا بس ما قليتها حطيتها بالفرن واكلتها من الغدا لين صلاة المغرب كل شوي اكل شوي
بعد الصلاة شربت سكم لاتيه
رحت ختمة قرآن واللي اكلته قطعة كاكاوة كبر عقلة الاصبع وفنجان قهوة ونص حبة بيتزا قيصر وقطعة زعتر كبر الاربع اصابع رجعت البيت يايتني نقصة من اختي محشي من زمان مشتهيته وكنت احن عليها اكلت وحدة محشي ملفوف ووحدة بصل وبس بطني انترس
والحمد لله على ما انعم وتفضل

 

[om l3yal]

بنات عوافي عليكم ما اكلتوا