دمج جميع المواضيع (الاستفسارات عن ماليزيا)

[هـاجـر]

انا عندي استفسار بسيط ... اللي يروح ماليزيا لازم يعرف انجليزي ؟ و الا يقدر يتفاهم بالعربي والا شلون !

 

[ms.dlw3h]

والله مادري بس سمعت ان في ناس يتكلمون عربي

ان شاءالله البنات متيقصرون معج

 

[نووووونا]

هلا هاجر

عادى يتكلمون انجليزى مبسط وايللى ما يعرف اهما يعرفون شويه عربى وممكن تدبر الامور بالاشاره

لا تحاتين هالسالفه بماليزيا لانهم بسيطين ومتعاونين

موفقه

 

[نووووونا]

بنات ايللى يسالون عن جو ماليزيا

جوهم استوائى على مدار السنه يعنى فيه شويه رطوبه مع فرص للامطار يعنى صيفى على شويه مطر

الا بالاماكن العاليه الجبليه مثل كاميرون وجنتنغ ,,,اما لانكاوى وبينانغ وكوالا الجو معتدل الى رطب طول السنه

 

[سميه البدر]

بنات وش رااايكم بهالجدوووول
انا بجلس بس بكوالالمبور طيب
سيلانجور واللي عرفته انو تبعد عن كوالالمبور 45 دقيقه
وابي اروح ل ماينز وندر لاند
وابي اروح ل صن واي لانغووون وبيراميد
بنات بسال نقسمهم يومين او كلهم يكفون ليوم واحد
وفي كوالا لمبور ابي ازور
برج المناره (الاتصالات ) تاون تاور ومجمع سوريه
شارع العرب
المتحف الاسلامي
حديقه الحيوان
ميغامول
جينتنغ هاي لاند
برجيا تايم سكوير
بكيت بنتانغ بلازا

وش رايكم وش اكنسل وش ازيد

 

[هدوء العالم]

هلا أختي سميه البدر

أنا مثلج أول مره بروحلها وبالصيف

بس من خلال جمعي معلومات عنها عرفت ماينز وندرلاند ينصحون إن تكنسلينها لأنها مسكرة للصيانة وسنة كاملة ولا تستاهل والقوارب إلي فيها يقلون ممكن تسير ومرات ما يسمحون

في منتدى العرب المسافرون في وحدة سألت شنو رايكم في ماينز كلهم قالوا لا

 

[أم عبد الله]

حبيباتي جم وصل سعر التذكرة على الخطوط الإماراتية ومتى العروض لأنه ألحين الأسعار نار فرق عن العام الماضي سافرن على القطرية وطلعت للشخص 148 دينار فلي تعرف إذا كان في عروض مثل العام الماضي لا تخبل علينا والله ماراح يبخل عليها بالأجر إن شاءالله

 

[مروشة]

الله يوفق الجميع بس ابي قروب حلو

 

[ذهبيه مرصعه بألماس]

بنات شنو احسن شقق فندقيه جربتوها ب كوالالمبور ؟

ابي بوسط المعمعه لووووول ابي انزل و اتمشى بالمجمعات ...

 

[don-3]

بنات عفيه ابي فندق مايتعدا ال15 دينار

 

[Lemon Juice]

قوه بنات

اذا ناوين نروح ماليزيا لمدة 10 أيام .. جم يبيلنا ميزانيه ؟

نبي التمشي والوناسه والمناظر الحلوه أما السوق مو مهتمين له واذا بنشتري بنشري شغلات بسيطه مو مكلفه

والفنادق هم بعد مو مشكله أهم شي مكان نظيف مو ضروري كشخه

عاد اللي راحت ماليزيا وعندها خبره يا ليت تفيدني وتتوقع جم تكلفة الشخص الواحد لمدة 10 أيام مع التذكره والسكن والمواصلات ؟

قواكم الله

 

[خفوق الشمال]

ليش الماينز مايمدحونها

عاد انا حاطتها بجدولي !!!!!!!!

 

[fay fay]

البنات اللي يسألون عن حالة الطقس بماليزيا في اي شهر من شهور السنه

ماليزيا جوها طوااااااااااااااااااااال السنه واحد معتدل مايل اكثر للحر .. درجات الحرارة تتراوح من 20 الي 32 لا اقل ولا اكثر تقريباً ..
جوها رطب .. تحسين بالحر بس مو مثل حرنا .. حرهم خفيف على القلب مقارنة ببلادنا الخليجيه
المطر تقريباً متواجد يومياً..
ولكن هناك مواسم تكثر فيها الامطار عن غيرها .. مثل شهر مارس وابريل وجون الامطار خياليه في هالكم شهر .. وعن تجربه سافرت لها 4 مرات وكانت احلى وحده من ناحيه كثرة الامطار والجو الرايق هي اللي بشهر 3 و4


ونستثني من هالكلام المناطق الجبيله المرتفعه مثل جنتنق بيكون بارد الجو شويييه يعني بلايز كم طويل تفي بالغرض

 

[fay fay]

مرحبا بناات

ابي احسن فندق بكولالمبور يكون نظيف وقريب من السوق

كوالالمبور كلها فنادق تهبل
وعليج الاختيار
ان كنتي تبين الهدوء والاماكن الرايقه ( اغلب اللي يطلبون هالشي يكونون شهر عسل ) فبتلاقين مطلوبك على الاغلب بمنطقه البرجين
اما اذا كنتي من ربعي وودك بالاسواق والونايس وبنفس الوقت سكن نظيف راقي ومريح فعليك بــ :
فندق الوستن .. الماريوت .. الريتز.. الجراند ميلينيوم .. وفيه عندك فندق اقتصادي ومكانه عددددددددددددل بوسط كل الاسواق .. لان اللي ذكرتهم بالاول هذيلا مكانهم بطرف شارع العرب يعني اقرب شي لهم هو ستار هيل والبافليون
اما فندق بيكلو http://www.asiatravel.com/malaysia/piccolo/accom.html فهذا بالضبط عند بي بي بلازا يعني بوسط الشارع بالضبط

الخيار الثاني ارخص .. لكني افضل الوستن بينهم جميعاً .. رااااااقي مريح وايد

 

[fay fay]

بنات وش رااايكم بهالجدوووول
انا بجلس بس بكوالالمبور طيب
سيلانجور واللي عرفته انو تبعد عن كوالالمبور 45 دقيقه
وابي اروح ل ماينز وندر لاند
وابي اروح ل صن واي لانغووون وبيراميد

الصن واي لاقون وبيراميد كلهم واحد وهم موجودين في منطقة سلانجور
مكان حلو روحي له ولو يمديك نباتين فيهم باتي لانه مكان ممتع
جنتنغ لاتخلينها تهبل براد ووساعة صدر بس يكفيك من الصبح لين المغرب
والماينز شيليها من بالك ماحلاها ربي .. رحت لها وتحسفت والله ماغير باعوض وحرررررررررر ورطوبه وماتسوا العنوه واذا على سوقها فخلج على شارع العرب ابرك لك

بنات بسال نقسمهم يومين او كلهم يكفون ليوم واحد

مره انا رحت لجنتنغ بالنهار وصن واي لاقون بالمغرب .. بس هلكت وحسيت ماعطيت كل مكان حقه .. فالافضل لج تخلين كل وحده بيوم

وفي كوالا لمبور ابي ازور
برج المناره (الاتصالات ) تاون تاور ومجمع سوريه
شارع العرب
المتحف الاسلامي
حديقه الحيوان
ميغامول
جينتنغ هاي لاند
برجيا تايم سكوير
بكيت بنتانغ بلازا

وش رايكم وش اكنسل وش ازيد

روحي المناره والبرجين والمجمع وشارع العرب لازم بتروحين له لان اغلب المجمعات فيه .. حديقة الحيوانات اذا معاك يهال بيستانسون .. ميغا مول اوكي واوتاما ون .. تايم سكوير بعد يسوى .. بكيت بانتنغ بلازا هو نفسه بي بي بلازا ويعجبني وايد .. المتحف انا مب راعيه هالامور .. روحي الاكواريا تحت فندق تريدرز... وروحي السوق الصيني وكبعا اذا تبين حدايق الفراش والطيور والزهور وروحي مصنع الشوكليت بس لايلعبون عليج ويغصبونك تشترين تذوقي كل شي وقرري براحتك .. فيه منطقه قريبه من كوالا اسمه تمبلر بارك .. هذي شلالات اتينن حدها لاتفوتينها ..عندك القريه الفرنسيه او بوكيت بعد حلوه وباررده

 

[fay fay]

بنات شنو احسن شقق فندقيه جربتوها ب كوالالمبور ؟

ابي بوسط المعمعه لووووول ابي انزل و اتمشى بالمجمعات ...

مافيه شقق في وسط السوق .. كلها فنادق

 

[fay fay]

بنات عفيه ابي فندق مايتعدا ال15 دينار

اختي دشي هالموقع بتلقين الاسعار والمناطق وعدد نجوم الفنادق واذا كان الفطور او النت او اي شي اخر مشمول بالسعر

هالموقع موثوق به وانا دايم احجز منه وبيعجبك لان اسعاره تهبل حتى بوكنج مايعطيك اياها ..

http://www.asiatravel.com/

 

[fay fay]

Lemon Juice

اختي اذا قلنا ان تذكره ماليزيا تتراوح من الـ 1400 ريال الي 2300 ريال بحسب الخطوط

والفنادق غرفه لشخصين لمده عشره ايام اسعارها مختلفه لكن اذا شي مو مكلف ممكن تقولين سعر الليله 300 في عشره بتصير 3000 الاف ريال

لحد الحين صاروا تقريبا 5 الاف

الاكل كلش رخيييييييييييييييييييييص يعني ماراح تصرفين وايد عليه .. والتاكاسي بعد مب زود غلا بس خلنا نقول 2000 اكل وتكاسي
تذاكر دخول الاماكن السياحيه برخص التراب يعني بعض الاماكن تدخلينا برنقت واحد بسسسسس فماله داعي نحسبها بحساب خاص

عاد انا عطيتك الاسعار بالريال وانتي عليك تحويلها للكويتي

اجابتي مبنيه على اربع سفرات متتاليه على اربع سنين ورا بعض اخرها 2009 والله يهنيك

يعني انا وزوجي نحجز الطيران ونسكن ارووووووع وافخم الفنادق ومانقصر على نفسنا بشي لا سوق ولا مطاعم ولا اي شي ومانتعدا ال 200 دينار كويتي

 

[أم فــرح]

تسلمين عالموضوع كنت محتاجه موضوع مثل هذا
بصراحه اكثر ما شدني بالموضوع الصوره : )
تسلمين يا زوزو

 

[لوازم العائلة]

رد : دمج جميع المواضيع (الاستفسارات عن ماليزيا)

يعطيكم العافيه