حلول لطلاقي.... بليز بنات

[A&B&N]

السلام عليكم

بنات بدش بالموضوع على طول
انا صارلي متزوجه 3 سنوات و عندي ولد عمره سنه و 10 شهور و حامل بالشهر السابع ....

من اول زواجي كله مشاكل و المشاكل تافهه بس وصلنا لحد ملينا من المشاكل هذي ...

قبل اسبوعين اتفقنا ننفصل و فعلا طلقني و الحين بيني و بينه مسجات لان مو قادرين بس نبي نرد بحل مو رده و بس

فكرتي ان نروح عند اخصائي نفسي متخصص بالعلاقه الزوجيه

بليز بنات الله يعافيكم ما اعرف منو الزين و المجرب
الي تعرف تقولي و يفضل حكومي مو بفلوس :yaaaaaarb:

 

[ام اريج 22]

اب اب

 

[كويتيه مذهله 87]

حبيبتي مايصير مليتوا لازم في حل
كل زوجين يمرون بمشاكل حرام بينكم طفلين لازم تتفاهمون قبل لا تطلقون
لا تقولين ما ابي ارد
دوسي علي نفسج وتقاضي علي مشاكل وايد تصبري الطلاق موووللللللعبه
فيه بنات اعرفهم يعلموني يقولون 5 الي 10 سنين يالله هدا الوضع بينهم عادي كل بيت فيه مشاكل وانتي قلتيها تافهه اكيد عصبيين ماتتحملون شي
المرا مو كل يوم لها ريال والعكس صحيح وحرام اليهال شنو ذنبهم يعني

 

[رانس]

يعني انتي عارفه انها مشاكل تافهه وتبين تطلقين
وتشتتين عيالج تحملي عشانهم هالتفاهات اهم شي
عيالج الله يهديكم ويصلحكم بس

 

[PuPa^^SWeeT]

ردوو



و روحو اصلاح ذات البين


ويا بعض

 

[زوجة عزيز]

انتو عارفين سبب هالمشاكل تفاهمو واذا عندج شروط تقدرين تكتبينها بالعقد اذا بتردون لبعض ومو على كل شي تطلبين الطلاق انتي قلتي مشاكل تافهه يعني لها حل تصبري ونصيحه اذا بتردين له لازم اتكونين اكثر صبر من قبل جربتي الطلاق مو سهل واذا اهو في قلبه شي عليج خليه يصارحج عشان كل واحد منكم يعرف اشفيه وشلي يرضيه الله يوفقج

 

[Vous jamais]

الله يسخركم لبعض

و بالفعل محتاجين لاستشارة اخصائين علاقات زوجية

ما اعرف احد لكن سوي سيرج بغوغل

و الله يصلح بينكم

 

[مناير ...!]

عليكم السلام
اول شي الله يهون عليج
ثاني شي طلاقج باطل
الحامل بالدين مايصير تتطلق

والله يسخركم لبعضكم

 

[A&B&N]

مشكورين الي ردو علي

 

[الأميرة الجميله]

الله يصلح مابينكم

 

[sverige]

عليكم السلام
اول شي الله يهون عليج
ثاني شي طلاقج باطل
الحامل بالدين مايصير تتطلق

والله يسخركم لبعضكم

للاسف كلامج هو الي باطل! ماكو اي دليل شرعي عن الي تكوليه
النص للي يخص الطلاق بسوره البقره وابدا مبهث الحامل
الحامل مثلها مثل اي وحده تتطلق طييعي
واذا عندج دليل شرعي اكتبيه

 

[sverige]

للاسف مااعرف اخصائي علاقات زوجيه لو جنت اغرف جنت رحت اول وحده ههه
تعرفين حاسه بيج كلش وافهم شنو مشاكل تافهه بس تكبرررر وهوايه كل يوم ومرات اكثر من مره باليوم وماكو اسباب فيصير التفكير بالطلاق هو الحل
هذا كله من الشيطان
ًوالصراحه ٧٠٪ من المشاكل سببها الزوج لانو ميشوف نفسه يغلط هذا راي

 

[mrs_ntfa]

جبيبني انا معاج في قروب الحوامل
ترا كلنتا تنخانق وماكو اتفه من مشاكلي والله مرات نتخانق و احنا نتصالح نرد نتخانق
ترا هاذي الحباه مثل دقات القلب مره فوق ومره تحت و انتي حامل و تحسسين من كلشي
قلريتي في قروبنا جم وحده كل شوي تتخانق مع ريلها ؟
عادي لازم اطوفين والله السالفه ما تسوه و انتي عندج بيبي حرام والله على اشياء تافها تطلقين

 

[" ذوق "]

شلون يطلقج وانتي حامل طلاقج باطل في شرع مايجوز

 

[A&B&N]

بصراحه بنات انا كاتبه موضوعي مو عشان
شلون و ليش و ما يصير ...

ابي اخصائي او استشاري مختص بالعلاقات الزوجيه بليييييز الي تعرف ترد

 

[كات إيز]

يقع الطلاق اذا وضعت مولودها هذا حد علمي والله اعلم
اما بالنسبه للمشاكل فكل بيت مليااااان مشاكل وفي علم النفس معروف اول خمس سنوات يكون فيه اضطرابات في الحياة الزوجيه واذا تجاوزها الزوجين تبدأ هنا حياتهم بالاستقرار والمشاكل العاديه
اما بالنسبه للاخصائيه فأنا أمنية حياتي اقابل الدكتوره ناعمه الهاشمي
وقبل كل شي اللجوء لله جل في علاه قبل اللجو۽ لعبيده
الله يصلح فيما بينكم
ادعو لي فـ أنا قريبه من مشكلتها الله المستعان

 

[++MesK++]

روحو حق اصلاح ذات البين انتي مع ريلج راح ينصحونكم و يحاولون يحلون مشاكلكم

 

[امـ خــزامـى]

حبيبتي الله يكون بعونك ويهونها عليك ويسخرلكم

انت تقولين تبين من غير فلوووس

مالكم غير اصلاح ذات البين

اما اذا تبين واحد معروف وبفلوووس مافي غير فوزيه الدريع
هذا اللي مشهوره خليجيا واقدر اساعدك فيه


وبالنسبه للبنات والحكم

حبيباتي الحائض هي اللي مايقع عليها الطلاق الا بعد انتهائها من الحيض والتأكد من عدم الحمل


اما الحامل يقع الطلاق وتنتهي عدتها بولادتها
يعني طلقها باخر التاسع وولدت بيومين تنتهي عدتها خلااص وممكن تتزوج بعد النفاس

للفاااائده ^^^

 

[دلوعة الحلوين]

حمود القشعان
سعاد البشر
بفلوس
عندج بعد اصلاح ذات البين
وفي بعد بالسره همن جهه حكوميه نسيت اسمه تتبع مجلس الوزراء
كلهم بو بلاش وناس ثقه

 

[كويتيه فرنسيه]

ليش المستشار النفسي؟؟

انتي اقعدي وياه قعدة مصارحه وحاولو تحلون الاشكاليات اتفقو انه تكبرون عقلكم عن توافه الامور عشان عيالكم حاولي تقولين له سلبياته وتطلبين منه يغيريها واهو خليه يصارحج بسلبياتج وغيريها عشانه وعشان عيالكم