حبيبي تزوج وانا بموت

[جرحو قلبي]

السلام عليكم

بنات انا كتبت الموضوع وانا نفسيتي منهارة وابجي صارلي اسبوع على هالحالة

كنت احب واحد ويحبني من 3 سنوات وعشنا مع بعض اهم تغيرات اللي تصير بالشخص الدراسة وفترة التخرج والتوظيف

هو موظف ، بس انا لا

بنات مو قادرة استوعب شلون بيكون لغيري

هو خطبني واهلي رفضوه وسولي مشاكل شحقى تتزوجين غريب وليش وامور تغث

بنات والله هو النفس اللي اتنسفه وهالاسبوع كله مخنوقة لدرجة كل يوم مستشفى ابر ودرب واتم بالملاحظة ولوية

بنات هو قال خل اتقدم لج مرة ثانية فأنا ماعطيته امل لانه وضعي حيل صعب

تخيلو شكثر كنت متعذبة الشخص الوحيد بهالدنيا اللي فاهمني حرموني منه ليش

صج في عيوب مثلنا ، كل شخص له عيوبه بس حتى عيوبه احبها واعرف كل تفاصيل حياته

اللي مستحيل امه او ابوه يعرفونها


هو تعذب يالله اهله رضو ومرت علينا ايام بغيت اموت لانه كانو ضايقونه لدرجة ايام ماياكل

هو قوا الوازع الديني عندي صج اني كنت اصلي كل فرض بس فتح عيوني على وايد اشياء بالدين


بنات والله اكتب وانا ابجي تخيلو انام بأبرة اشوفه بالحلم كل ما نمت حلمت فيه ومرته

هو الحين ملج وزواجه مو بعيد

بنات بالملجة نهارت نفسيتي بعرسه شيصير فيني ؟

احيانا اقول بدق على مرته خل توخر عنه بس ماكو طريقة اوصل لها ماعندها لا تلفون ولا شي

ومرة اقول استغفر الله بنت الناس مالها ذنب وهو ملج عليها عشان يبي ينساني هو قال جذي

بس دام يحبني ومو قادر ينساني ليش تزوج بهالسرعه ليش مانطرني طول العمر صج اني قلت له ماكو امل بس شسوي اموت فيه


بنات امس كلمته وبجيت وبجيت وبجيت اصلا صارلي اسبوع كله ابجي لدرجة الحين صارت غشاوة على عيوني غير العذاب النفسي اللي عايشة فيه

وقعت يهديني ونعاتب بعض بس لما هديت انا شوي ، هو قام يبجي ورديت ابجي معاه

مرات اقول يارب سالفتهم ماتضبط بس عقب دقايق استغفر ربي واقول هذا نصيبي الله يعوضني

بس كرهت كل الرياييل ماحب غيره محد يفهمني غيره عمري ماكلمت ولا بكلم غيره

شلون يصير حلال غيري ليش مو انا

استغفر الله

وانخطبت قبل يومين ورفضت لانه نفسيتي خرا وهالمرحلة نفسيتي تعبانه وهالقرار مهم بحياتي

اقول لا بنطر يمكن تخرب سالفتهم ونتزوج ومرات اقول انا غبية هو تزوج وعاش وانا اعنس عشانه


بنات والله ادري انه لازم اصلي واقرا قران كل هذا اسويه

وحتى اصلي اخر الليل واول دعوة ادعي لهم الله يوفقهم ويسعدهم تالي ادعي الله يصبرني

البنية مالها ذنب

بنات منو فيكم عاشت مثل حالتي وقدرت تنساه ومتى نسته

من الحين قلبي يحترق اذا ماعرفت اخباره

كنا قبل نتهاوش على الصبغ والشقة وكل شي والحين صار هالمكان لغيري

حتى كنت مزهبة بدلة لخطبتي عليه قبل مدة وشلون كنت خايفة واحاتي وكنت مستانسة

كل هذا راح ، اهلي سبب تعاستي

لا تقولين طلعي او شغلي نفسج وبتنسينه

وانا اعرف ناس من قرايبهم فأخباره توصلني

بنات تكفون شسوي :eh_s(11):

 

[pink Barbie]

مسألة وقت واكيد اكيد راح تنسين
بس يبييله وقت شوي شوي راح تتعودين وتتأقلمين حتى را ح تنسين ملامحه
دام تبين تنسينه مسحي كللللل شي يخصه صور هدايا اهداءات و من هالحجي
تالي لا تقعدين بروحج كلش خلج 24 ساعه مع اهلج رفيجاتج بنات خالتج المهم انج ما تقعدين بروحج عشان لا تفكرين فيه حلو؟

السموحه بس انا اشوف ان اللي يحب مو بهالسهوله يتخلى عن اللي يحبها صح والا لا ؟
اذا اهو يبيج حتى لو قلتيته مابيك راح يقول مو بكيفج راح احاول وارد اخطبج
وانتي دامج ميته عليه ليييييييييش تقولين له مافي امل ؟؟ اول مره اسمع عن حب جذي الصراحه؟؟؟
رفيجتي اللي تكلمه 7 مرات خطبها واهلها يشوتونه عند الباب ويبجي وكاهو تزوجها ماشاء الله عليهم الله يهنيهم

الحب ماكو شي اسمه مافي امل .... انتي جم عمرج؟ احسج صغيره؟
انتي تقولين له ماكو امل واهوا ما صدق وراح تزوج ؟
هذااا موووو حب ؟؟؟؟؟؟؟؟؟

المهم اللي صار صار والله يصبر قلبج ويعوضج باللي ينسيج اياه ولااااااااااااااااااااااا توقفين نصيبج كملي حياتج ماراح توقف عليه مثل ماهو باعج بيعيه وخليه يعيش مع مرته بنت الناس مالها ذنب غيري خطج عشان لا يدق ولا تدقين عليه حطي نفسج بمكانها.....

 

[لمى الهاجري]

عندنا وعندج خير اهلي رفضوا اتزوج شتسوين بعد

 

[أمووورة الكويت]

والله بتنسيين وعقب راح تعرفين حكمه ربج وخيره بما اختاره الله

 

[طيبتك فوق الوصف]

الله يصبرج ي رب وانتي وقفي اتصالات معاه ولاتتلاقين معاه والناس اللي تقولين يجيبون لج اخباره قللي من القعده معاهم عشان لا تتذكرينه
والسالفه سالفة وقت وبتنسينه بعدين بتضحكين تقولين والله كنت سخيفه بدمر حياتي عشانه
هو شاف حياته ولا يقص عليج بجم كلمه ترى يستعبط عليج ي قلبي ماكو حب هالايام الحب ايام عنتر و عبله بهالزمن
لا ماكو حب كل اللي يفكرون فيه نكون علاقات مع الجنس الثاني انتي الجأي الي ربج وربي كل هالمتاعب اللي تصير لنا بسبب بعدنا علي الله ولا تقولين اقرا واصلي ومدري شنو ي حياتي في شي انتي نسيتيه الا و هو صوت المرأه عوره شلون تكلمينه ما يجوز ي حياتي
ابتعدي عنه وهو دامه بيتزوج تري صار يتسله فيج لان هو داري انج ما راح تاخذينه ولا راح تصيرين زوجته في يوم من الايام استغفري ربج كل ما حسيتي بانج اشتقتيله او تبين تكلمينه اقعدي استغفري بطلي القران اقري راح تلقين نفسج ارتحتي وتري واجددد بنات بنات نسوا لانه لعب مو حب ي حياتي وانتي لا تقولين ما راح اتركه او ما اقدر افارقه الا تقدرين تنسين طوايفه خليج قويه ي قلبي ولا تردين علي اتصالاته او اذا تبين غيري رقمج الباب اللي يجي منه الريح سده واستريح وخلي املج بالله قوي وانتي تقدرين ي حياتي وان شاء الله بتنسينه وربي يرزقج بزوج ما في منه ينسيج طوايف حبيبيج الرياجيل ما يحبون الا زوجاتهم ولا الباقي لا يسحبه عليهم الله يهديج ويصبرج ي قلبي

واذا كلامي جرحج انا اسفه بس اعتبري كلامي مثل الابره تجرح بالبدايه بس تداوي الله يوفقج ي حياتي *

 

[ya al3rosa]

مادرى شقووول
اللضة يعينج ويصبرج

 

[إماراتية ملقوفة]

بس ليش اهلج رفضوا ؟

.


المهم خلاص الريال مالج الحين ،

وحرمته مالها ذنب تلاقينها تنطر تلبس الابيض مثل كل بنت .. فلا تتصلين فيه وتسوين جذي

انتي قلتيله ماشي امل وهو تصرف على هالاساس واتخذ موقف

وانتي بعد اتخذي موقف واذا الخاطب اللي تقدم لج ريال زين وافقي عليه وانسي الماضي يمكن مابينكم نصيب


كل شي فالبداية صعب وعقب ان شاء الله كل واحد يعيش حياته

لكن لاتكونين سبب في انهم ينفصلون

اذا لكم نصيب بتردون لبعض واذا لا فأكيد خيره من رب العالمين

والله يهون عليج ويعوضج

---

"لا تأسف على نجمة ضاعت منك ، فالسماء مليئة بالنجوم ، فإن لم تكن من نصيبك إحداهن فمن يدري ربما يكون من نصيبك القمر"

 

[عويتقة]

ااااااااااااااااه ذكرتيني بسالفة مرت من 4 سنيييين مثل قصتك تماااااااااااااام كأنك بتحكين عنيييي بس الفرق انو بيصير لي والله اقأ موضوعك وببتسم وشلون كنت بنتحر وشلون كنت بتمنى الموت فكل صلاة وشلون كان الالم فقلبي لدرجة الاغماء والدمعة الي ماتفارقني لا ليل ولا نهار بس لما قررت اني انساه خلااااااااااص تقربت من الله وبدل ما ابكي عليه ابكي في السجود لله واستغفر واااااااااااااااااااااايد طول ما انا افكر ابدل تفكيري بالاستغفار ومحيت من عندي كل مساجاتو وكل صورو وكل هداياه واي شي يذكرني فيه وهو تزوج وولد بنت وسماها بأسمي هههههه وكنت كل ما ابدأ اضعف اقوى اكتر لحد ما جا اليوم الي شفتو فيه هو وحرمتو وبنتو ولا تهزيييييييييييييت كأنو انسان عااااااااااااااادي ما حبيتو فيوم من الايام ولا حاولت انتحر مشانو حياتي انتي فبلاء واحمدي الله على انتي فيه ترى خييييييييييييييييير لك وراح تنسييييييه والله راه تنسييييييييه بس انتي اخدي بالاسباب ولا تكلميه ولا تتكلمين عنه ولا تخلين تفكيرك ياخدك لاماكن مضلمة وماتقديريت ترجعين منها والحمد لله على ما اعطى وله الحمد على ما اخد

 

[برنسيسة2007]

حبيبتي احنا على هالدنيا الله مانزلنا الا اختبار نفس اختبارات المدرسه ياننجح يانرسب لذلك ندرس ونسهر عشان ننجح
لكن اختبار الله لنا غير نزلنا نختبر نبعد عن الحرام ونغتم الحلال(عبادة الله-تعمير الارض)
والتوافيق بيد رب العالمين لازم نرضي الله عشان يوفقنا وعلاقتج مع هالرجل بالاساس محرمه يعني عليج ذنوب كفري ذنوبج وتوجهي لله وباذن الله بتنسينه مو لانج تبين تنسينه لأ/لانج راح تلقين حب اكبر من الحب اللي عشتيه

دايما الانسان يدعي بخير الدنيا والاخره:
اللهم اتنا في الدنيا حسنه والاخره حسنه وقنا عذاب النار
الله يوفقج ويسهل امرج

 

[بطوووطة$بيضة]

حبيبتي لو صج يحبج من قلب

جان نطر مو على طول تزوج

والله اعرف وحدة تمت مع واحد ١١ سنة يخطبةفيها وابوها مو راضي

لما مات الابو خذاها

حبيبتي اهوا مو نصيبج يمكن خيرة

الوقت بينسيج

ونصيحة لا ترفضين الخطاب

لاتضيعين نفسج

اهوا تزوج وبييب عيال وانتي ابتندبين حظج لي متى

الله يعوضج حبيبتي

الله يعلم اللي فينا بس نسكت ونتحمل الشكوى لله سبحانه

 

[لافه شعرها]

الله يرزقج بلي احسن منه

 

[لحظآتَ]

والله راح تنسين
اقسم بربي راح تنسين
شوفي مو تنسين عاد بالمره
بس لما تذكرينه ماراح تحسين بشيء
بتضحكين او تبتسمين لإنه كان ذكرى جميله بحياتج ,
لكن الدموع والبجي والانهيار مااراح يستمرون !!

فترة وتعدي !

حبيبتي هذا رجال
والرجال عاطفته غير عن المره
يبجي مره مرتين , يذكرج شهر شهرين ,, بعدين يلهى مع مرته وبيته وحياته
ووبينساج ببساطه وما كأنج كنتي !!

فكري انه باعج وتزوج وشراها وسلّمها اسمه !!
فكري انه تخلا عنج واكرهيه !
انسيه طلعيه من حياتج بالمره !!!!!

,


يابنات اصحوآ وربي مافيه شيء اسمه حب
حنا تحكمنا العاطفة بس لو نفكر عدل بنلقى ان ماكو حب كله جذب وافتراء

 

[حنووونه25]

تبين الصراحه انتي غلطانه ماحاولتي وابأهلج ولا خليتيه يخطبج مره ثانيه والحين تبينه عقب ماتزوج وحتى لو ما تزوج لي متى بتظلين اتكلمينه هم هذي مو عيشه انا اعرف وحده نفس حالتج بجت وتحسفت وكلت هوا واخر شي نست لان الله عطانا نعمة النسيان
حطي ابالج ان اهو تزوج والحين مع مرته واشوي اشوي بينساج واهو مستانس فليش انتي اتضيقين خلقج واتعذبين نفسج واهو فرحان ومبسوط مع المره اليديده يبجي عندج لان تكسرين خاطره واذا راح عند مرته بيضحك وبينساج حاولي اتهين عمرج واتكرهين نفسج فيه وشوفي من احد الي يتقدمولج زينين واتوكلي على الله واتذكري الخيره فيما اختاره الله ومع الوقت بتغرفين ان هالانسان ماكان يناسبج

 

[الاهله]

حبيبتي الله يمسح على قلبج ويقويج

قولي اللهم ااجرني بمصيبتي واخافني بخيرا منها

 

[فلنتينو]

الله يعينج

بس المشكله كله من اهلج اهماااللي رفضوو

 

[نجدية2011]

وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ)

وكل ماذكرتيه سبحي وهللي
سبحان الله وبحمده سبحان الله العظيم
وخلي قلبك متعلق بالله
وربي مابعد عنك شيء الا خيره لك
بس احنا ضعوف البشر الا الشيء ناخذه

 

[Entisar]

اختي المفروض ماتحبي إلابعد الزواج..منشان ماتتعبي وتعبي نفسك عالفاضي
الحب مشكله،والرجاجيل مايملى عينهم غير التراب مع احترامي لهم،لو يحبك كان استنى وحاول اكثر من مره..
بس بخبرك شي انسسسسسسسسيه وإللي تقدملج قبل يومين وافقي عليه،صدقيني راحي يعوضك عن كل شي وتفرحي ،، اهم شي صحتك
وافضل ماتحبي وتعملي علاقة حب يمكن يفشل ، الحب بعد الزواج افضل
واخر كلمه قلتلج اهم شي صحتك ،وانسيه وانبسطي وافرحي
يمكن يكون خيره لك..
اماا اهلك مابعرف عنهم ليش رفضو منشانه غريب مالغريب غير الشيطان بس يقهرووو ..خلاص انسيه ولاتحبي ولاتعملي حب .. بعد مايتقدملج فارس احلامك واهل ماوفقين وتملتجوو حبيه...

 

[Entisar]

انا جد حاسه فيكي وببكي خلاصصصصصصصص انسيه

 

[Entisar]

عندك حد استشاره نفسيه ،، تحل مشكلتك..

 

[فاقده حنان ابوه]

كل شي خيره حبيبتي انشالله ربي يرزقج بلي احسن منه ويسعدج

حاولي تنسينه والي توصلج اخباره قوليلها مابي اعرف عنه شي

وزوجته مالها ذنب حرام حالها حال اي بنت تتمني تلبس الثوب الابيض الله يسعدهم