تعالوا نتذكر اول مره انخطبتوا

[دلوعةمآمآ]

صباح /مساء الخيير عليكم جميعاً

مممممم اليوم جالسسه أفكر بموضوع للضحك والفرفشه ويكون بقسسم الحياه الزوجيه

بس بعيداً عن المششاكل والهموم بـ هالقسسم بالذاات !!

موضوعي ماافيه رسميه لأ ,يعني نسترجعوا ذكرياات العزوبيه هههههه

كل وحده تدخل سواء كانت متزوجه او مخطوبه وتححكي لنا

مثلاً متى اول مرره انخطبت بحياتها وهو الآن شرييك حياتها ؟

ومين اللي بلغها ان جالك عرييس ؟

ووقت مأتصلت امُه تخطبك كنتي ناايمه ؟ طالعه ؟ اي شيء

وكم كان عمرك وشنو كانت ردة فعلا بكت فرحت .,خافت و.......إلخ

وكم مرره انخطبت ولمى انخطبتي خبرتي أحد ؟



ومن هالقبييل يعني


مممممممممم ببدأ انا عشششان احممسكم

انا اول مره انخطبت بحياتي كنت بسادس ابتدائي صديق اخويَ اتذكر وقتها لمى اتصلت امُه كنت مزيته شعري وجسمي وبأخذ شوور

وقالت راح اجييكم بس ماقالت انها بتخطبني
وعلى طوول تظبطت وطلعت لها اهي وماما يسولفون وفجأه لمى دخلت سكتوا !!

وهي عيونها طاارت فيني قالت ويي صغييييره بنتك .

وسسلمت وطلعت وطبعاً مافهمت شسالفه هههههههه

بعد ماراحت خبرتني ماما وهيَ تضحك بس انصدمت وصرت ادعي عليها اهي وولدها <مدري لييش هههههه

وقتها من طفاقتي خبرت صديقاتي مأحد صدقني على بالهم اكذب هههه

عااد الخُطاب اللي جو بعد ماكبرت اكييد صررت استحي واتصدد عن اخواني من الحياء

يلا صبـــــــايا

نبي اكشششن

 

[دلوعةمآمآ]

ياسلام نزل الموضوووع :eh_s(9)::eh_s(9):

آب

آب

 

[زهرة اللوتيس]

اب اب​

 

[مفـآهـيم الخجـل]

ذكرتيني باايام مضحكهاول مره اذكر كنت جالسه على طيور الجنه خخخخخ مع انو كنت كبيره عمري ١٨ بس بريئه واكل وحالتي حاله مدري وش الطبخه الا شوي تناديني اختي الكبيره قالت تعالي ابيك بسالفه وامشي وراها وانا منخرعه ويوم وصلنا والحمدلله مابغينا لانها موديتني لمجلس الرجال عشان ماحولنا احد ههههه الا تقولي يلا البسي واتجهزي بيجون حريم وبسرعه استشورتلي شعري وتسحبني يمين يسار وانا زي الدايخه مدري شسالفه واختي الصغيره احرجتني توايق بوجهي تقول لايكون تبين تعرسين وشافوني وانا ماره وامه قامت تمسح ع راسي وتقرا علي خخخخ المهم بعدها هربت منخرعه ماابي اعرس بالنهايه رفضت


والخطبه الثانيه كانت بزواج ومن الخرعه نزلت علي الدوره الله يكرمكم ههههههههه
والخطبه الثالثه اللي هي نصيبي صارت اكشششن وسوالف بس خلاص قرقت كثير

 

[M!SS.LOBY]

أب



أب

 

[شــــــــــــــوقــــه]

انا مو متزوجة بس اول مرة انخطبت كان الكورس الي طاف قبل جم شهر

طالعه من جمعية كيفان كان عندي مدرس خصوصي بكافيه فوق

وانا امشي ركبت سيارتي اشوف وحده تصفط يمي و تطالعني جنا تبي تكلمني

نزلت الجام تسألني انتي مرتبطة تنحت اول شي بالي راح بعيد جان تعدلها اهيا قالت مخطوبة يعني او متزوجة :dddds:

قلتلها لا قالتلي قاعده ادور حق اخوي استحيت انا و قلتلها ما عليه ما افكر بالزواج الحين مو مستعده

و بس راحت

وانا عصبت شوي لان مو حاطه شي بويهي اقول حق امي يوم الي اكشخ محد يطل بويهي :krkrkr:

اما المكان الي خطبتني فيه عجيب

 

[امـ خــزامـى]

انا اول مره اتذكر انخطبت بزوااج وكان عمري 15 بس مو خطبه رسميه
لا بس سالت عني وقالولها لا توها صغيره

وبعدين كثثثثثثثثثثثثثثثثثثثثثثثثير انخطبت بس كنت ارفض لين صار عمري 20
وبعدها وافقت على واحد محترم ومثقف واهله بعد ومن عاائله راقيه
بس كان يشتغل بالشرقيه مو بالرياض
استخرت ووافقت
يوم شووفة اهله كنت مستتتتحيه وحالتي حاله بس عادي لاني متعوووده
كثير دخلت على حررريم بعدين ارفض قبل مااشوف الرجال لان امي تغصبني على شوفة الحريم
تبيني اقتنع وواوافق

وبيوم الشووفه طبعا ادري مستحيل برفع عيوني واشوف شكله
فقبل لا ادخل طليت من الشباااك وشفته زين ماااازين

ودخلت عليه وانا عيووني بالارض العصير مااقدمته له من الخوف والرجه اللي فيني
حطيته على الطاااوله ورحت خخخخخخخخ

وجلست شوي وقمت طلعت اول مااطلعت جلست اصييييح ماادري ليش
وتمت خطبتنا حوالي السنه وماتملكنا لان ننتظر نقله للرياض
وبعدين كنسلنا الخطبه لانهم تاخرواا وماندري عنه يمكن بعد ماايجيه نقل

وبعد هالخطبه الطويله قلت لاهلي ستووووب خلاص لاعاد تكلموني ناس يبونك لولدهم ولا هذا زين حسااافه
باااخذ بررريك

خخخخخخخخ بس امي مستتحيل يدخل من اذن ويطلع من الثانيه
بعد سالفة الخطبه يمكن مااامر ولا اسبوووعين
كنت طالعه انا وخواااتي للسوق
الا امي تتصل على اختي الكبيره قالت لها اليوم اتصلت وحده تخطب وقالت لها على السريع
وقالتلي مااعطيتها وجه ومااعلقت
مسويه موو هاامني خخخخخخخخخخ

بس طبعا امي عطتهم كلمه وقالتلهم حياكم ولا اهتمت لي
ونفس كل مره ماابي احرجها وكشخت وطلعت لهم
بس عااااااااااااااااااااادي مااهتميت ولا استحييييت يعني ماطقيت لهم خبر

واستخرت كالعااده وانا مو مقتنعه بالرجال ابببد
وسبحاان الله امووري مشت وتساااهيل
ودخلت عليه وارتحت له بس مازلت مو مقتنعه
وطلعت عاادي من عنده وانا مرتاااحه بس طبعا متفششششششششله
لان صارلي موووقف تفشلت

طبعا كالعاده قااازته قبل من المجلس وحفظت شكله وغير ان امي طلبت منهم صوررر عشان تغريني ههههههههههههههههههاي ياحبيلها

كانت عيوني بالارض وماشوف الا جزماااته
وحسيت اني طوولت وانا جااالسه مللللللليت بس خفت اقوم ويرجعوني عشان ماشافني زين
ونتظرت مااادريت الا ابوووي يقولي خلاااص
لقطت وجهي من الفشيله يعني كاانه يقولي طولتي عجبتك الجلسه خخخخخ

بس ياعمري ابوي كان يأشر لي ماايبي يفشلني بس انا مااشووف
بالاخير قال لازم اتكلم ولا على هالحال بينام الرجال عندنا
هههههههههههههههههههههههه

المهم هذا هو ابوووخزاامى


طووولت ادري بس احب ابكي على الاطلاللل

 

[جود2011]

ذكرتيني بالذي مضى اول مرة انخطبت كان في ثاني متوسط عن طريق مدرسة عجبتها وعطت رقمي حق صديقتها
وكلمت امي انها بتجي تخطب قالت لها البنت صغيرة قالت لابتجي وجات و شلون صارت صدفة كانت دارسة ويا امي بالثانوية
وتعرفها وجاية تخطب لاخوها بس امي حبيبتي قالت لا البنت صغيرة وانخطبت بعدها كثيييييير
بس ماصار نصيب بعدين انخطبت لولد عمي واتزوجت بعد ماعشنا قصة حب

 

[غلايو]

انا كنت اول ثنوي

خطبني ريلي
لكن ماكنت اعرف
لان ابوي رفضه لين اخلص ثنويه ف قاله البنت مو للزواج تبيها اصبر

و انا ماعرفت الا بعد السالفه باسبوع

كنا بنروح بيت يدتي
و فالطريج انا اسمع اغاني
الا اجوف امي تصارخ شلي هالغبر من اذونج
قالت منو من عايله الفلانيه تعرفينهم؟؟

قلت امممممم مادري بس اظن كنت وحده بالمدرسه من هالعايله

ف صدت صوب ابوي وقالت عيل اخته خطبتها له
قلت شنووو

قالت فلان الفلاني خطبج من اسبوع!!!! ههههه وبس

و للعلم حزتها كان يوم ملجت خالتي ف بيت يدتي وكلهم قالوا انتي بتعرسين اول وحده من البنات
وصج كلامهم هههه خذته الخطيب الاولي رغم ان خطبوني بعده وهو رجع خطبني بس الحمدالله ع كل حال

نصيبي مان معاه رغم ان ماكنت متوقعه من المشاكل الي صارت

 

[هدوووشه]

عاد انا كنت بأول ثانووي

كنت ارووح مشي انا وبنات الجيران للمدرسة كل صبح يمكن نص ساعة او ثلث ساعة
وكل يووم اشووف وااحد من الحارة اللي اعدي فيها لمدرستي اشووفه وواقف خخخخخ>> مادري انه كان يبي يخطبني
وكاان شهر ع نفس هاالحال !!
بعدها بأسبووعين ونا نايمه اسمع اخووي يكلم امي ويقوولها خطبها فلان بن فلان
انا انصدمت واستغربت !! عرفته انه هو بس ماصار بينا نصيب وهو تزوج وراح بحاله الله يووقفه

 

[حروف من ذهب*]

أنا محجوزة من صغري لولد عمي لا خطبه لاشوفه شرعيه تمت الملجه وأنا عمري 19
ويوم تمت الملجه قالهم أبوي إذ تبونها أخذوها من الحين:krkrkr:

 

[Pinky -cat]

امبيه لا عاد قوية لا تشوفين ولا شي مخطوبة له وخلاص وملجة علطول يما يما ما تخيل ،

بالنسبة لي ولدى خالتي من لمن كان عمري 17 يحن يبيني وحاجزني ومرت الايام وتقدملي 3 مرات وكل مرة ارفض وطاف
واهلي يحنون واخذيه وخالي وخالاتي ويدز علينا ناس ماكو ، ما الله كتب ومرت الايام عقبها بفترة جان يتقدم لي واحد

ودرا ولد خالتي عصب جان يخلي امه تدق تستعيل هههههههههه وهم طاف.

والحين ريلي العزيز يوم دقت امه فز قلبي مليون فزه وسويت روحي عادي وانا ويييييي طايرة من الفرحة ههههههه

ويوم ييت ما حطيت مكياج وايد خفت احط تقول جيكرة ، ولبست ملابس محتشمة لانها ملتزمه امه وتبي حجاب هههههههه

يوم يت صرت يا الابتسامة يا السنع لووول.

 

[فيلسوفة قلبي]

أنا أول أنخطبت كان عمري 18 سنة لأخو صديقتي شافني في زيارة لبيتهم..

بعد ما أمه كلمت أمي وأنهم راح يجون يخطبون وبعد 4 سنين يتم الزوآج

بحكم أنه ما زال طالب بكلية التربية وما نكلم بعض الأ بعد ما يجيبون المهر ..

وتمت الموآفقة بس اللي صار أنه أخته حقدت عليّ ما عادت تبيني لأخوها .. كانت كل يوم تقول أنها مو حلوة ما حد يبيها ..

و تقول أخوي معقد وعصبي حييييل ويضرب وأمي كانت تبي تخطب له وحدة ثانية

بس هو لأنه حطج في باله فـ/يبيج حتى أقنع أمي حتى تخطبج له ولأ أمي أصلا ما تبيج ..

طبعا كسرني هالشئ وطلبت أن يلتغى كل شئ وخبرت أختي تتصل في أمه أني ما أقدر أنطر 4سنين ,,

والحمدلله على كل حال ألتغى كل شئ وألحين مرت أكثر من 4سنين أخوها ما يفكر يتزوج لأنه للحين حاطني ف باله

وقبل سنة جاتني أخته تقول أخوي يبي يخطبج مرة ثانية قلت لها سوري أنا أنخطبت وملجتي بعد جم أسبوع ..



الله يسامحها ..

​

 

[أميرة-]

والله ماتذكر متى اول خطبه


بس وانا بثالثه ثانوي سافرت مع اهلي كنا رايحين علاج هناك قابلنا عايله كويتيه وماكانت معاهم لغة فارتبطوا فينا وكان ولدهم اكبر مني بسنه .. مره امه زارتنا بشقتنا وقالت ولدها يسأل عني بس رد اهلي توها صغيرة ويبونها عيال عمها &#55357;&#56842;

 

[عيوني شقااقيه..]

أنا أول مره انخطبت كان عمري 14 سنه خطبوني من خالتي بعرس كنت ناويه اروح له معاها بس ما رحت اخطبوني عبالهم اني كبيره و قالت لهم خالتي البنت صغيره و ثاني مره عمري 17 خطبوني ناس و يو يخطبون الحريم و يوم خطبه الرياييل زوجي و بعلي العزيز دش عليهم الدوانيه و حلف انه اللي ياي يخطبني ما ياخذني و بعد ما حصل له جم زفه محترمه من عمامي و خوالي حن عليه ابو الولد و قال ولدكم شكله عاشق و قال حجي بس محد رضى يقول لي تالي خذاه ابوه لما راحوا الرياييل و طقه طق بالعقال واهوا يضحك و يطالعني عاد لما خذيته قلت له ليش كنت تضحك لما طقك عمي قال لي ما ابي قلبج يعورج علي كان طق ابوي عادي و طبعا كان الكل يدري ان احنا نحب بعض العايله الكريمه كلها الا أنا واهوا مسووين غامضين و ما ندري عن بعض الحين ادعو له بالشفاء قاعد يتعالج عند شيخ ريلي انسحر من بنت خاله امه حسبي الله عليها الله لا يوفقها والله لما اتذكر ايامنا قبل يعورني قلبي ادعو له تكفوون مسويه له *** عشان ما رضى ياخذ بنتها حسبي الله عليها قاعده انطر هالاربعين يوم تخلص ولا يسمع اغاني الحين اهله ودوه مكه بلللييز ادعو له تكفووون جزاكم الله خير

 

[اطيااااف]

انا اول مرة انخطبت بثانية ثانوي من ولد عمي بس لأني توني صغيرة ولأسباب ثانية مأتمت الخطبة قالتلي أختي والكل يتكلم عن ها لموضوع بس لأني مؤ مستعدة ومو همي الزواج ما عطبت الموضوع اهمية واللحين متزوجة بس مؤ اول ماخطبني والحمد لله ربي يرزقني الذرية الصالحة ياااارب:eh_s(2):

 

[فيلسوفة قلبي]

عيووني شقاقية ,.. الله يعافي زوجج يارب

وتردون حبابيب نفس قبل ..

 

[basoOomah]

اممممممممممممم ذكرتينا باللذي مضى اول مرره انخطبت كان عمري 18 ونصص صراحه كنت ابيه بس مو لاني احبه بس عجبني اممممم كنت نايمه ودقت امه وقالت بنجيييكم ونقزت من الفررحه بعدين انتظرر ردناَ ويوم سولفت معه هووونت بس وربي ندمانه للحين لانه صج كان يحبني بس قسسسمه ونصيب وبعدين انخطبت كثير واخر شي تزوجت واحد من اقارب ابوي ،،،

 

[عـيّــآره]

انا كل ما تتزوج وحده من خواتي يخطبوني حق اخو زوجها او معارفهم وخواتي رافضين هالشي مو مقتنعين وانا بعد اشدعوه ​

مجابلتهم العمر كله بعد اجابلهم انا وريلي احس مللللللل ماتخيل اقوم الصبح اشوف

اختي بويهي احس فشيله وعيب
:krkrkr: ​

اول مره مممممم يمكن 16 مادري 17 كلهم يهال ومغازلجيه الفريج يوم ننزل من باص المدرسه يأذونه لاوالخطبه ​

تكون مني ​

شخصيا يسالني هااااااااا فلانه ترا مررردج لي مابخليج تاخذين واحد غيري واقول حق اخوي ويطلع له و يكفخه ويظربه ظرب ​

وهو بعد الهيس قوي كفخ اخوي ويجبورني اغيب اليوم الثاني يخافون علي وبعد اسبوع ينعاد الموضوع اخ منه هالصبي بغى ​

ينهي مستقبلي الدراسي بس والله ايام تضحك ​

 

[نـعـومـه]

اذكر يالي مسج من اختي تقولي خاطبينج ناس وانا اخترعت