اي و الله انا انصح بشده سالفة اعادة التدوير اولن توفير ثانيا متعه ثالثا شي فريد لانج انتي صنعتيه بيدج
البعذ ممكن يسأل شنو تقصد ام زنوب
انا اقصد اي شي يمر في بالج
بما اني مدرسة اقتصاد منزلي ( علوم اسره و مستهلك )
فانا اتوقع اني اي شي ممكن احتاجه
انا عن نفسي الملابس ما اقطهم اخشهم
الخامات الي مابيهم احطهم بهلكرتون
شغلات القرقيعان العلب السلال هسوالف ماقطهم اخشهم بهلكرتون
طوس بلاستك او صحون من محلات الحلويات اخشهم
فلين من اجهزه كهربائيه اخشه
اي شي عند بو 100 يعجبني اخذه لاني لو ابي بروح ادور عليه و لا راح القاه اخذه و اخشه بهلكرتون
حتى طاولات مكسره اخشهم
البعض يقول شنو هذا فقر و لا بخل
لالا مو بخل بس انا عندي موهبه احب اسوي شي بيدي احس برضا عن نفسي و استانس فيه
مثل الكيكه الي انتي تسوينها بتستانسين فيها اكثر من الكيكه الجاهزه
و هذي انا انصح فيها الابلات كلهم خصوصا و ان المعاش اوردي طاير علاوراق و الوسايل فليش ازيد مصاريفي
ممكن بدال ما اقط شغلات وايد اوفر على نفسي
و انا تعودت اني اسوي وسايل من هسوالف و بصراحه تطلع وياي شغلات حلوه و غريبه
احنه في علوم الاسره عندنه فصل حق الازياء استخدم فيه الخامات و الملابس الي عندي و خاشتهم اخصصهم بس حق هلفصل و ارد اخشهم و بعض المرات اقصص الخامات بطريقه حلوه و احطهم على لوحه فلين مرتبه و اطبع تحت كل خام اسمه و مميزاته همن حلو و مرتب و يوفر علي وقت كبير
حتى ملابس الالعاب الي بنتي ماتبيهم ماقطهم اخذهم
في فصل الغذاء و التغذيه نفس الشي استخدم الصحون و الشغلات الي عندي و اسوي منهم وسايل واااااااو و الله شي حلو و غريب
حتى العاب بنتي الي ماتبيهم ماقطهم و بعض المرات اصبغ الفلين و الزق عليه شغلات يصير جنه كيكه صج \
كله من هلكرتون
و كل اسبوع امر عليه و اشوف شنو يناسبني فيه حق الدرس الياي
اصلن الشاطره الي تسوي جذي همن تبدع و بنفس الوقت توفر
انا حابه اضيف لموضوع اختي منال شغلات تتعلق بترتيب
و انتي عارفه لمن شغلج يصير مرتب في البيت و في مكتبج راح ترتاحين فانا حابه اقترح عليكم وشوفوا هشي و جربوه
انا عن نفسي عندي مكتب خاص فيني في بيتي
اخترت ان يكون لونه ابيض بحيث يكون شرح و مايقمت مع الشغل خذيته من ايكيا زاويه
مثل الي موجود بصوره بس اكبر و من غير مكينة الخياطه ولونه ابيض
هههههههههه
وهني صوره ثانيه لقيتها بنت للمكتب
طبعن مثل ماشفتوا مافيه جرارات
لاكن انا خذيت وياه من ايكيا ارفف ارضيه و حطيتهم يمه وايد مفيده تلملم ملفاتج و الاوراق المهمه
و خذيتله ادراج من بنتا ارتفاعه بسيط بحيث تكون طقم وي المكتب لو حطيتيها تحته
و خذيتلي طقم حق المكتب من المكتبه مثل الي عرضتهم الاخت منال القلب في مكتبة العجيري بصراحه يلمون قش مو طبيعي
و خذيتلي بوكسات كرتون ابيض بايكيا تحطينهم بلارفف نفسهم حق الشغلات الي موحلو شكلها علرف يعني اوراق وايد مو مرتبه حلو انج تحطينهم داخل
و اهم شي و انصحكم فيه ضروري و الله حق كل ابله و كل وحده عندها اوراق وايد تسوي هشي و تاخذه
ايكيا في نفس فولدرات كرتون يكون لونهم ابيض و مسفطين تاخذينهم تضبطين الكرتون يصير نفس هذا بالضبط
هذي الفولدرات شكثر شالت اغراض و همن شكلها حلو و ممكن تحطين عليها طابع ذرب من بره و تكتبين عليه المضمون الي فيه
و تخلينه على الارفف
انا عن نفسي ازينهم بشرايط و ورود تفتح النفس على لون ديكور مكتبي و طوابع ملزقه و اي شي ابيه اطلعه بسرعه انا مكتبي ابيض بسود في بنفسجي فمسويه كل اربعه لون ورده سلفر و ورده بنفسجيه و ورده اوفوايت و الطوابع على لون الورده و اطبعهم بالكمبيوتر ارتب و يفتح النفس
فولدر مخليته حق الاوراق الملونه
فولدر حق البطاقات
فولدر حق الصور المختلفه الي طابعتهم من قبل لانه حرام اقطهم انا احتفظ فيهم لابد و اني احتاجهم في كذا درس
فولدر حق اوراق مزخرفه
فولدر حق اوراق عمل
فولدر حق مجلات
فولدر شفيفات
فولدر خلفيات
فولدر حق اوراق مهمه تخصني مثل صورة بطاقه مدنيه صورة جنسيه ذوله انا دايمن اصورهم و اخشهم بحيث لو احتاجهم مصورين جاهزين و مخشوشين هني
و هكذا
بصراحه شكلهم وااااااااايد حلو خاصه لو اتبعتي الطريقه الي قلتها لج
و الكتب مالولتي اصفهم بعد برف
في علبه بايكيا مقسمه مثل هذي و في منها الوان
هذي مقسمه 4 اقسام
قسم احط فيه الدبابيس مالت الدباسه
قسم احط فيه المشابك
قسم المغناطيس انا اشتري من بو 100 و ابطله و احطه هني و كل ماخلص تليت الكارتون الابيض و طلعت الماجله منه هههههه
و قسم دبابيس الي مثل ذوله انا استخدمهم بالمكتب لانه عندي لوحه خشبيه اثبت عليها اوراق و ملاحظات
و طبعن هلبوكس جدامي على طول
اهم شي بالمكتب نقطة الكهربه تكون مثبته بطوفه بحيث ماتسببلج عفسه بالمكتبه و عرقله
و انا اهم شي عندي ان يكون كل شي موصل و ثابت غير قابل للتحريك
مااحب اشيل البرينت اوديها الصاله لالا حتى لو اشتغلت باللاب بصاله اخلص اروح المكتب اطبع مادري ليش احب جذي هذا طبعي
المهم انا عندي نقطتين بطوفه يم بعض موصله فيهم موزع شامل البرينت و اللابتوب و الاضائه و واير شحن التلفون على طول موجودين و بما ان المكتب زاويه فانا مخصصه الزاويه لصغيره حق البرينت و اللاب و الزاويه الثانيه حق الشغل
واهم شي بالمكتب شغلتين دايمن ننساهم
معطر الجو
و عزكم الله الزباله لانه مثل ما انتي عارفه شغلج هناك بكون وايد قص و ترتيب فخلي الزباله تكون باتجاه مناسب بحيث التنظيف يكون اول باول و اسرع و ارتب
اهم شي تخصصينه و تاخذينه من ايكيا هي هذي البوكسات وفي منها احجام انا عندي الحجم العود اكبر حجم ماخذه منه 3
هذوله صافتهم تحت مكتب ثاني مخليته يم مكتبي بتسألون ليش
لانه هلبوكسات هي فيها شغل اعادة التدوير
و المكتب الثاني هو الي يصير عليه الشغل كله من صمغ و تلزيق يعني العمليه مالت اعادت التدوير كلها عليه حفاظا على مكتبي الاول الابيض و بصراحه متحسفه عليها خذيته غالي و مابي اخربه لانه صج عاجبني و لانه ابيض فصلت عليها زجاج عشان لاينخدش او يتغير لونه فلذلك هذا المكتب خذيته رخيص و كويس و من ايكيا بعد يكون عريض و مرتفع عن الارض عشان يعطيج مجال تشتغلين عليه وانتي واقفه من غير ماتجندسين و ممكن تحطين يمه كرسي مرتفع مثل كرسي البار عشان تشتغلين عليه و انتي مرتاحه
عمومن ذوله تلقونهم بايكيا يم المكاتب دايمن و كراسي المكاتب يصيرون قبالهم
تحت هذا المكتب اصف البوكسات و ارفف مربعه من ايكيا تصفين فيهم بوكسات مثل ذوله
تقريبن مثل هصوره
طبعن هذي تكون يمج و حاطه فيها الاغراض المطلوبه مثل مسدس الشمع و الشمع و اوراق لف و ورود و الخرابيط المطلوبه
و بجذي صدقيني بيترتب شغلج و بتلقين نفسج جك بم خلصتي كلشي و بترتيب و نظافه من غير حوسه و لويت راس ووين حطيت ذاك و وين وديت ذاك
اتمنى اسلوبي في ترتيب لويت المدرسات عجبكم و جربوه وراح تدعولي و لاتنسون و انتو قاعدين بمكتبكم خلاص القهوه
