تجمع مستجدات كليه الطب المساعد

[RS___RS]

مبروووووك القبول بنات و حياكم بكليتنا:68_asmilies-com: :68_asmilies-com:

و هذا موقع الكليه و فيه برنامج دراسة كل تخصص

http://www.hsc.edu.kw/allied/index.asp?page=programs



الكليه فيها 4 تخصصات ادارة معلومات صحية و علاج طبيعي و مختبرات طبية و اشعة
و بيفتحون تخصص يديد العلاج التأهيلي بس اعتقد السنة الياية..

الكليه عموما حلوه صج تعذب بس مع هذا احبها!! اول سنة المواد تكون بالعلوم و هني الصعوبة لان دكاترة العلوم لج عليهم و غير جذي اغلب مواد العلوم الامتحانات تتكود باسبوع واحد فما نلحق ندرس!!

موادنا سنة اولى فينيت(رياضيات) صراحة اول ما خذيت المادة حسيت انها تعجيزيه خصوصا ان اللي يدرسنا دكتور روماني بس الحمدلله خذيت دورات وصرت اتعمد على نفسي ولا الدكتور ماكو فايدة منه!! بسس نصيحة هالمادة شدوا حيييل على عمركم و اذا بتاخذونها اخذوا عند دكاترة كويتيين ترا اهم التوب و خصوصا ياسمين بن نخي....
هم ناخذ بيولوجي و ترا هذي المادة حدها سهلة بس لااااااازم اللاب اللي معاها تدرسون اول ما تردون البيت لان المصطلحات غريبه وفيه سلايدات يعني الشغل باللاب.. و اخذوها عند جاسم الربيعان او فاطمة عبدالسلام

كيميا المادة كلها شغلات ماخذينها بالثانوي بس مشكلة ان الدكتور يشرحلج على انج فاهمة و مار عليج هالشي بس احسنلكم تراجعون كتب الثنوي ترا تساعد.. و المادة اسئلتها اختياري و ماكو حفظ معادلات

لاب الكيميا يبطططط الجبد كنا نطلع من اللاب 5 ونص!!! و التجارب ملييقه و المعيدين مو مشكله عندهم يخلونج تعيدين التجربه كذا مرة لين تضبط!! بهالاب لازم تسوون ريبورت حق كل تجربة ولا تنقلون من احد ترا يجكونكم!!! و درسو عدل للمدتيرم...

لاب الفيزيا.... لازم تكتبون الريبورت باللاب جدام المعيد ولا تنقلون من احد لان ينقصون اذا ما كنسلو الريبورت لكم!! احنا كنا نكتب نص الريبورت النظري بالبيت والنص اللي فيه ارقام باللاب... و فيه كويزات قبل كل تجربه ..


الفيزيا.... المادة مو صعبة بس الدكاترة استغفر الله مدري شلون صايرين بالذات الهنود ما يشرحون عدل.. كنا معتمدين على الدورات و حل مسائل الجابتر... بس اقولكم احسن شي تضمنونه اهو الكويزات...


مادة مقدمة التخصصات... هذي حدها سخيييييييييفة مجرد تنتبهون بالمحاضرات و تقرون النوت عدل وبس

مواد الانجلش 3
انجلش181>>>>المادة كلها كويزات و فيه كتابة تعبير و ريدينغ و فيه بريزنتيشن
انجلش182>>>>سهلة المادة و نفس 181
انجلش 250>> تاخذونها سنة ثانية و حدها غثيثه تكتبون سيرش وكلها هوم وورك

و اذا مو ناجحين بالقدرات تاخذون انجلش 180

هذي مواد سنة اولى!!


بتكلم عن تخصصي اشعة تشخيصية

الاشعة يندرج تحتها تخصصين اشعة تشخيصية و طب نووي.. و ماتتخصصون بالطب النووي او التشخيصي الا سنة ثالثه....من ناحية الخطورة ان شاء الله مافيه شي لان اللي يشتغل صح ما يصير فيه شي و التخصص حده حلو لان متنوع طبعا انا اتكلم عن التشخيصي و الشغل يكون على كذا جهاز و فيه احتكاك بالمرضى... و دكاترة القسم حدهم عسسل و متفهمين الحمدلله... الدراسة بالتخصص تصير عملية بالمستشفى سنة ثالثة مع الدراسة بالنظري.. الله يعين الحين رايحة سنة ثالثة!!


شوفي حبيبتي انصحج انج تدرسين اول بأول و لا تنامين على عمرج ترا محد راح ينفعج الا نفسج... و ركزوا على دراستكم خل عنكم سوالف الانتخابات ما منها فايدة تلهيكم عن الدراسة و محد داري عنكم بالاخير!!!!

و بالاخييير الله يوفقكم ان شاء الله و يوفقني حددي متوهقة هاليومين!!

 

[قمر بدر]

الله يوفقج يارب ويسر لج أمورج
الصرااحه خفت من الإنجليزي بس مشكوره حبوبه عالمرور

 

[الزين للمطيريه]

اختي ار اس حبيبتي والله ماقصرتي كنت ادور ردج من زمان ..

بنات سألت وحده عن المساعد وماقصرت جاوبتني وهذا ردها نسخته .. ابي وجهات نضر اكثر من المستمرات عشان احدد موقفي لاني مرتاحه لهالكليه وداشه مزاجي بس ما اعرف عنها الا القليل وهذا الرد ::

شنومحاسنها مافيها كلها عيووووووووب


شوفي قلبي الكتب كلها انجليزي من الجلده للجلده والدكاتره مايتكلمون حرف عربي

هذا مو مشكله تقدرين تدشين دورات وتعلمين انجليزي

بس يختج المستقبل مـــــــــــااااااااااكو

شوفي انتي بدويه وانا بدويه خخخخخخخخخخخ

ودوامهم بالمستقبل صعب شفتــــــــــــاات وين الرجال اللي بيرضى ؟؟؟

وشوفي التخصصات موشي

يعني مسمات الوظيفي فني ؟؟ مع انه الدراسه اصعب من الطب بس الطب اسمه دكتور وانتي فني مودكتور

وكراف الدراسه

شوفي التخصصات

بي تي << تدليك ( علاج طبيعي ) هذا احسن شي بس هذا معدله عالي وصعب ودكاتره ماااصخين

وثاني شي اشعه وهذا خطر عالحااامل اذا حملتي موزين لج اشعه مويقصون عليج يقولون لج نعطيج لبس خااص للاشعه ماينفع ترا
وعندهم بعد تخصص مختبرات طبيه هذا اي مرض ينتشر تاخذين منه عينه وتحللينه وتشوفينه واي شي يعطونج اياه تحللينه جذي عرفتي وهذا خطر بعد لان في وحده كان تخصصها واللحين اهي بالساااااااااااريه لان المرض انتقل لها وهذي الامراض تنتقل لج عادي


واخر تخصص سجلات طبيه ... يعني كااااااااتبه تكونين رئيسه الكاتبات بالمستشفى ؟؟

كل هالدراسه واخرتي كاتبه وللعلم البنات الكاتبات اللي معاج تكون شهايدهم تجاري او دورات مومتذكره عدل

وبس اربع تخصصات وترا اول سنه كل موادج بالعلوم عدا الانجليزي بالطب المساعد بالجابريه المبنى الرئيسي


ماقصرت البنت فديتها يمكن ردها يفيد زميلاتي المستجدات ..؛؛ ودي القى ردود من المستمرات ويعطيكم العافيه

 

[الزين للمطيريه]

شلون على مسألة الشفتات والخفاره ؟؟؟؟؟؟؟؟؟؟؟؟؟؟!!!!! بغيت اسأل سارونه عن دوام اختها جذي ؟؟؟؟؟؟؟؟؟

وشسالفة اللبس الرسمي ؟؟؟

 

[قمر بدر]

هلا هلا هلا بالزين
شلونج
بس اللبس الرسمي شنو هذا؟؟

 

[رنوده 2007]

قوه بنات شلونكم وشخباركم
انا معاكم اقبلوني بكلية الطب المساعد ة حدي متوترة وماني عارفة شنو ابي بضبط
ياليت اتعرف عليكم يابنات ونكون قروب واحد انساعد بعض ونتعرف على بعض لاني ما اعرف احد بالكلية وياريت اعرف المواد الي اخذتوها وياريت نكزن محاضره مع بعض وانا خايفه يقولون الدراسه بالانجليزي وانا لغتي الانجليزية جيده مو هذاك الزود
وانا موادي تمهيدي انجليزي وكيمامع الاب ورياضيات وعلم اجتماع

 

[الزين للمطيريه]

حيااج ولله اتشرف فيج بس انا بالعلوم وبحول عندكم انشالله

لاكن كل محاضراتكم اول سنه عندنا يعني يمكن نكون بمحاضره وحده

موادي ::
كيمياء تمهيدي عند سعد مخصيد
وانقلش ستيفن
ووومهارات اتصال عند قباني
اتمنى تكونين معاي
وانشالله ندل بعض لاني قريت واجد عن هالكليه ومستمره في بحثي ..

موفقه اوخيتي

 

[رنوده 2007]

يعطيج العافية اختي بس لاسف ولا ماده معاي واتمنى اننا نتقابل وتعرف على بعض

وين طالبات كلية الطب المساعد تكفوون ردوا علي علشان احس براحة

 

[قمر بدر]

هلا حبيبتي أنا بالكليه إنتي كيميا عند منو أنا عند
د. ناديه شعيب ويمكن إنقليزي معاج بس باجي المواد مو نفسي

 

[رنوده 2007]

انا ما خذه عند د: نادية الشعيب انشاء الله انشوف بعض
وانتعرف على بعض انت ماخه لاب عند منو انا عند صالح الموسوي

 

[قمر بدر]

أنا عند د. يحيى عبد السلام

 

[رنوده 2007]

انا سمعت ان د.نادية الشعيب كلش مو زينة صح ولا لأ
الصراحة خوفوني منها

 

[RS___RS]

اختي ار اس حبيبتي والله ماقصرتي كنت ادور ردج من زمان ..

بنات سألت وحده عن المساعد وماقصرت جاوبتني وهذا ردها نسخته .. ابي وجهات نضر اكثر من المستمرات عشان احدد موقفي لاني مرتاحه لهالكليه وداشه مزاجي بس ما اعرف عنها الا القليل وهذا الرد ::

شنومحاسنها مافيها كلها عيووووووووب
صراحة اهي الغلطانة!!! شكلها قاطينها بالكلية عشان جذي ما تحبها و غير جذي المفروض الوحدة تستخير قبل كل شي انا الحمدلله استخرت و كاني مرتاحة بالكلية

شوفي قلبي الكتب كلها انجليزي من الجلده للجلده والدكاتره مايتكلمون حرف عربي
اغلب المواد اذا مو كلها يعطونا الدكاترة نوتات و اللغة انجليزية مبسطة و شكثر معانا بنات مو ذاك الزود بالانجليزي و ما شاء الله كاهم من الاوائل عالكلية

هذا مو مشكله تقدرين تدشين دورات وتعلمين انجليزي

بس يختج المستقبل مـــــــــــااااااااااكو

شوفي انتي بدويه وانا بدويه خخخخخخخخخخخ
شكثر بنات بدويات معانا و النعم فيهم
ودوامهم بالمستقبل صعب شفتــــــــــــاات وين الرجال اللي بيرضى ؟؟؟
خخخخخخخ قوليلها عيل خل تحول تربيه جود الريال يرضى!!
اذا عالشفتات كل مستشفى غير بس المعروف انها العصر
وشوفي التخصصات موشي
على اي اساس حكمت!! اهي للحين بالكلية ولا محولة!!!!!
يعني مسمات الوظيفي فني ؟؟ مع انه الدراسه اصعب من الطب بس الطب اسمه دكتور وانتي فني مودكتور
المسمى الاصلي اختصاصي.. الفني على ما اعتقد غيروه بس المهم المعاش يكون عالي لانه بكالريوس
وكراف الدراسه
اكيد لازم كراف عيل تبي الشهادة تييها و اهي بالبيت!!
شوفي التخصصات

بي تي << تدليك ( علاج طبيعي ) هذا احسن شي بس هذا معدله عالي وصعب ودكاتره ماااصخين
شنو تدليك!! العلاج الطبيعي تمرينات مو تدليك يعني اذا المريض مكسورة ريله يسوون له بعد فك الجبس تمرينات عشان يرد يمشي عدل..


وثاني شي اشعه وهذا خطر عالحااامل اذا حملتي موزين لج اشعه مويقصون عليج يقولون لج نعطيج لبس خااص للاشعه ماينفع ترا
الاشعة يا عمري في مليون جهاز يشتغلون عليه و في جهازين ماكو فيهم اشعة اللي اهم السونار و الـ MRI و هذا الجهاز اذا وحدة حملت يخلونها تشتغل عليه يعني ماكو خطر واذا اهي ما تبي تشتغل يودونها القسم الاداري مال الاشعة تشتغل ليما تولد او يحطونها بالقسم مال الافلام مالت الاشعة.. يعني في كذا خيار للحامل و غير جذي الاشعة المستخدمة حدها وااااطيه و للاحتياط حاطين لبس واقي و طوفة عازلة يعني الادارة حيييل مهتمة...

وعندهم بعد تخصص مختبرات طبيه هذا اي مرض ينتشر تاخذين منه عينه وتحللينه وتشوفينه واي شي يعطونج اياه تحللينه جذي عرفتي وهذا خطر بعد لان في وحده كان تخصصها واللحين اهي بالساااااااااااريه لان المرض انتقل لها وهذي الامراض تنتقل لج عادي

اللي يشتغل صح ما اييه شي!! و اذا عالتحليل اكيد يحللون كل شي حتى و انتي بكرامة الخروج يحللونه!!
و هم كل تخصص عندهم اجراءات السيفتي مالتهم...


واخر تخصص سجلات طبيه ... يعني كااااااااتبه!!! تكونين رئيسه الكاتبات بالمستشفى ؟؟

البنت هذي معقولة تدرس معانا بالكلية!!؟ شلون كاتبة و شهادتها بكالوريوس! و بعدين هالتخصص دراسته كلها كمبيوتر وانظمة وشغلات ادارية يعني اهم الاساس ماال المستشفى بالتنظيم حق الملفات وحالات المرضى و جم جرعة الادوية و الخ....

كل هالدراسه واخرتي كاتبه وللعلم البنات الكاتبات اللي معاج تكون شهايدهم تجاري او دورات مومتذكره عدل

وبس اربع تخصصات وترا اول سنه كل موادج بالعلوم عدا الانجليزي بالطب المساعد بالجابريه المبنى الرئيسي


ماقصرت البنت فديتها يمكن ردها يفيد زميلاتي المستجدات ..؛؛ ودي القى ردود من المستمرات ويعطيكم العافيه

و الله يوفقكم كلكم

 

[ReMaaas^MLS]

سلام بنات
انا احب افيدكم لاني انا وحده من متخرجين من هالكليه
ترا كليه صعبه شوي بس مو صعبه على الي يدرس ويجابلها وترا كل تخصص حلو وكل واحد وميوله وانتو شوفو شنو تحبون وشنو الي تفضلون دراسته مثلا الي يحب الفيزياء يدش اشعه والي يحب كيمياء يدش مختبرات والي يحب كمبيوتر يدش نظم معلومات
بس ترا دراسه اول سنتين تقريبا مشتركه وبسنه ثالثه يبلش الجد وكل واحد وتخصصه
وفي بنات يقولون احنا فنيين ترا غيرو المسمى وشنو يعني فنيين الحمد الله وظيفتنا ومعاشنا حلو وافتخر اساسا اني بالكليه طب المساعد لانه الدكتور بدونا ما يقدر يسوي شي جذي يسمونه طب المساعد.. لا تستهون بطلبة طب المساعد وكافي دراستنا مو سهله ودوامنا بعد مو سهل وفي كرف وااايد
اقول بنات شدو حيلكم وترا مستقبل هالكليه وااايد زين لانه تخصص نااااااااااااااااااااااااادر وما تتعبين بالوظيفه مستقبلا لانج مطلوبه
صدقوني اقل من شهرين تقدرين تشتغلين لا تنطرين واسطه ولا ديوان
الله يوفقكم بنات

 

[رنوده 2007]

يعطيج العافية اختي ومشكوره وما قصرتي

 

[رنوده 2007]

انا عندي سؤال انا ما خذه انجليزي تمهيدي بالجابرية ومو حاطين لا اسم الدكتور ولا المبنى
فالولي البنات انه بس اداومين تروحين اتشوفين اسمج عند اي دكتور
بس بالضبط وين اروح؟؟

 

[قمر بدر]

يعطيج العافيه ريماس
بس الكليه صعبه وااايد لأني خفت بعد يومياتج
وعلى فكره الماده الإختياؤيه بس قالولي الإتصال اللغوي >>>نسيت اسمها
قلت لأ ما أبيها>>>>>>كله منج

 

[رنوده 2007]

قمر انتي رحت للقاء الارشادي

 

[legally blonde]

نصيحه
انحااااااااااااااااااااشواااا بسررررررررررررررررررعه

انا متخرجة منها

صعبه ، اي صعبه بس مو علي لأني وايد شاطرة

كل شي بالانجليزي و هذي ميزة قوية انا شخصيا حبيتها حيل

احلى شي بالكلية الدراسة ، مختلفة عن باجي الكليات اللي بالجامعة جوها غيييييير اينن كأنج تدرسين بره الكويت


بس السالفة موهني، السالفة لما تشتغلين

تتوظفين على طوووول، خلال 3 ايام انتي مستلمة شغلج

بس الشغل له سلبيات وايد

أهمها خطورة الاشعاع للي بتخصص الاشعه و الطب النووي

و اللي تقول انه في MRI و ultrasound
حبيبتي أولا: اذا كنتي تخصص اشعة تشخيصية راح تعرفين انه طبيعة الشغل في اغلب المستشفيات انج تمسكين جهاز واحد فقط مثلا mammogram or CT or x-ray or MRI or US
المهم انج ما تضمنين تروحين سونار أو رنين

و طبعا الاشعاع خطر على الجسم و يبين خطره بعدين بالمستقبل

لما تحملين يخلونج بالرسبشن

بالنسبة للطب النووي يتعرضون لأشعاع اكبر من الاشعة التشخيصية لأنهم يتعاملون مع نوع مختلف من الاشعاع و اهوا جاما و ألفا و بيتا
بينما التشخيصية تتعامل مع اكس راي
مشكلة النووي انهم اذا حطوا واقي رصاص على المواد المشعة بأشعه جاما راح تتحول الى اشعه اكس يعني ماكو فايده متعرضه لاشعاع يعني متعرضه لاشعاع



تخصص سجلات طبية مادري سموه معلومات طبيه

فعلا مثل ماقالت الاخت ترا حالج حال الكاتبة فعلا حرام
إلا اذا بتكملين دراستج و تدرسين بعدين بالجامعه ، وقتها انصحج بهالتخصص لأنه الأسهل



تخصص علاج طبيعي
له مساوئه و مميزاته اللي تعتمد على المستشفى اللي تشتغلين فيه
عموما اهما عندهم اكتفاء بهالتخصص يبون شباب ما يبون بنات



تخصص مختبرات
يمكن من احسن التخصصات لأن شغلج بروحج ، انتي و العينة و الاجهزة


بجميع التخصصات
الراتب مغري
لكن الدوام فيه خفارات، لا تقولين مو مهم ، راح يكون مهم لما تصيرين ام و زوجة و لج حياة اجتماعية و وراج يهال تدرسينهم، أما اذا كان زوجج بعد دوامه خفارات يا سلاااااام
معنويا جميع خريجين الكلية مضطهدين نفسيا و يحسون بالظلم ليييييييييييييييش؟؟
لأن الكويت ماتعرف تتعامل مع تخصصات نادرة و مهمه

 

[قمر بدر]

رنوده إي رحت للقاء إنتي كنتي هناك
إختي ليقلي مشكوره عالتوضيح