السلام عليكم
هلا كيت كات ..
انا نفس الشي بعد في بجري اسم الله عليه راسه كان عود و ما نزل الحوض و عديت 40 اسبوع .. وتخيلي الدكتور ساكت ولا جنه في شي و يقولي ننطر بعد اسبوع .. و يوم موعدي الفير قبل لا اروح نزل على الماي و اروح اطير المواساة و قعدت اطلق من 4 الفجر الى 9 الصبح جان ايني دكتوري بكل برود يقول اخذي ابرة الظهر ( ليلحين ما ياب طاري العملية ) و انا اشوف نبضة بعد عمري قام يقل وصل 80 محد قالي شي بس انا خبري البيبي الطبيعي 140 و طالع ! و عقبها اييني يقولي عملية و انا ضايعة بالطوشه هيهيهيهي و يفتحون بطني و دكتور التخدير يقرق فوق راسي ( حتسميه اييه ... اززيك دلوئتي.. ) شكلة كان مخترع اكثر مني مسكين
و عن 28 اسبوع قصدت رويال حياة .. ما شاء الله دكاترة الاطفال شطار و تقريبا كان عندهم 8 بالعناية الفائقة منهم 3 توام تبارك الرحمن الدكتورة ولدت الام طبيعي الله يحفظهم
الحمدلله خسرتي بجرج وكسبتي كرت بلاتيني ( اكسبرس ) حق الجنه و فوقهم عوضج بحمودي الله يبارك فيه وبالي ياي ان شاء الله
بس الي بعرفة شلون يخلون المشيمة ساعة كاملة ؟ موخطر؟ شي يغث والله تسيب و ماكو ضمير بش الشرها على الادارة التعيسة و الوزارة الاتعس !!
يعني ما تنصحيني بالصباح؟.. لان الدكتورة تقول راح يقعدوني بقسم الولادة .. تخيلي 48 ساعة بهالقسم انا برويال حياة و يالله اتحمل السسترات يبطون الجبد ما اييبون لي الا الاخبار الي تكدر يحبون الحجي ! فما بالج ولادة الصبااح
المشكلة بالدوا ان مو متوفر .. آخر حبه لقيناها بدار الشفا و يالله رضو يبيعونها لنا و الصباح ما يطلعونه ممنوع و مابي احط الدكتورة بمشاكل و مسئولية هي في غنى عنها ..
