تجمع بنات auk الجامعة الامريكية في الكويت

[Mo7aSbChia]

حبيبتي ماتقصرييييين يحليلج وايد حبوبه  عؤبال مانصير زملااء soon عاد انا يمكن كبر امج لووووول

لوووووول ماسويينا شيي ولوو :*

انتشرف فيييج :$

 

[الماسة_21]

هللللللللللللو
اخييييييييييييييييييييييييرا خلصت امتحانات وافتكيت

مبروووووووووووووووك للجميع انتهاء هالكورس بالنسبة لي كورس ثقيل ووايد واجهت صعوبات فيه

 

[catwiti]

السلام عليييييكم


شلونكم شخباركم


عساكم بخيير

انا داشه بسألكم


شلون جامعتكم شنوو تقييمكم لهاا ؟؟؟

شلون الدراااسه فيها تواجهون صعوبات طبعا اكيد تواجهون صعوبات بس شنوو اهيي ؟؟؟

شي ثانيي انا سمعت انه اهمه يختارون لكم الواد بس انتي الي عليج تختارين فترتج صبح او عصر صح الي سسمعته؟؟


تشجعوني ادرس فيهاا وانا خريجة دبلوم محاسبه وبصراحة دراستنا تههههههبلل مافيها صعوبه ممع انه اكثر البنات يقولون صعبه بس انا لاني ادرس واشوفها تافه

وبس ياريت تعطوني اجابات تفيدني

 

[الماسة_21]

catwiti
هلا فيج حبيبتي بالنسبة للدراسة سهالات انشاءالله مافي شي صعب طالما انتي تجابلين وتدرسين
وطبعا مع اختيار افضل الدكاترة ماراح تحصلين اي صعوبات انشاءالله

 

[catwiti]

المااسه ماتعرفين او سامعه الدبلوم اذا بكملون جم يعادلونلهم موااد ؟ جامعة الخليج مايعادلون اكثر من 36 او 30 وقالولي 3 سنيين انا قاعده ادور ابي اقل من 3 سنيين لان يتني البجيه لاني توني تخرجت من التجاري وصارلي 3 سنين مابي اكثر من سنتين زياده

انزيين مارديتي علي ابي اعرف شلون طريقتكم يعني انا اسجل موادي ودكاترتي وكل الي ابي ولا اهم يسجلولي كل شي؟

 

[الماسة_21]

هلا catwti بقولج كل شي بالتفصيل
شوفي اول شي
انتي راح تيين الجامعة سواء الخليج او الامريكية بتقدمين اوراقج
اول شي مطلوب تسوين امتحان مستوى انجليزي وشوفي انتي اي ليفل راح تطلعين اذا عديتي الليفل ممكن تاخذين مادة اسمها 99 وماث بعدها بكورس تبلشين موادج
مدام انتي دبلوم اذا بعثة لازم تدفعين ليفل 1و2 بس
سعر الليفل الواحد 1750 تقدرين اكونون على اقساط
بعد الليفل او 99 تقدرين تبلشين بالمواد
بالنسبة انج تخلصين او لا فهذا يعتمد عليج وعلى الوحدات الي تقدرين تخلصينهم اكثر شي لازم 18 وحدة للكورس ومطلوب تخلصين 120 وانتي اعادلولج 30 او 36 هذا الحد مالهم بس ممكن اعادلولج اكثر مدام انتي تخصص محاسبة وبتكملين محاسبة انا اعرف وحدة عادلولها 50 وحدة لان المواد نفس الشي ماخذتهم بالتجاري انتي المطلوب تراجعين الجامعة وتييببين لهم شهادتج بالعربي والانجليزي وتسالينهم عن المعادلة روحي حق وحدة اسمها سوزان اهي المسؤوله عن المعادلة بتقولج كل شي وجم بعادلولج تلاقينها بقسم التسجيل
بالنسبة حق طريقتنا انتي الي تسجلين دكاترتج وموادج على الكبيوتر كيفج الوقت و المادة والدكتور الي تبينه

اتمنى كفيت ووفيت واي شي انا حاظرة

 

[7lwa s7ta]

هاي عندي سؤال

انا سجلت حق امتحان قدرات مال جامعة الكويت وامتحاني تاريخ 3-7

وناوية ادخل يا قست او الامريكية

هل لازم اقدم امتحان انجليزي عشان يشوفون مستواي ولا القدرات مال جامعة الكويت كافي؟؟

 

[catwiti]

المااسه مشكووووووووره على المعلومات بس بعرف الحين التمهيدي مو على البعثه؟ جامعة الخليج التمهيدي قالولي اول كرس عليهم اذا مانجحت فيه انا ادفع واخذ كورس ثاني؟ انتو شلون عندكم لازم ادفع من اول تمهيدي؟؟؟

 

[الماسة_21]

جامعة الخليج عندهم ليفل 1 و2 بس مع مواد ماث
احنا عندنا ليفل 1 و2 و3 بدون ماث
لو طلعتي ليفل 1 او 2 انتي تدفعين بس لو ليفل 3 لا هذا النظام حق الدبلوم وهالكلام من سنتين تقريبا
ما ادري اذا غيروه لازم تراجعين قسم المالية
ترى الامتحان سهل انشاءالله ما تحتاجين الليفل انتي بس شدي حيلج

 

[7lwa s7ta]

هاي عندي سؤال

انا سجلت حق امتحان قدرات مال جامعة الكويت وامتحاني تاريخ 3-7

وناوية ادخل يا قست او الامريكية

هل لازم اقدم امتحان انجليزي عشان يشوفون مستواي ولا القدرات مال جامعة الكويت كافي؟؟

امتحان قدرات انجلش ترا

 

[الماسة_21]

سووري والله ما رديت عليج من اول مرة كنت اسألج
لا اذا تبين تقدمين على جامعة الخليج او الامريكية لازم تقدمين عندهم بالجامعة او تييبين الايلز او التوفل والمعدل 550 علشان اطوفين التمهيدي
موفقة حبيبتي وسامحينا على التأخير

 

[7lwa s7ta]

لا عادي يا وخيتي

مشكوورة ما قصرتي

 

[catwiti]

مشكوووووره الماااسه على المساعده

 

[Mo7aSbChia]

مشكوره الماسه :*

انا مليت من الهولد ابي اشوف درجاتي

 

[الماسة_21]

والله على حسب السستم الدرجات راح تبين يوم الثلاثاء الله اصبرنا

 

[الماسة_21]

بنات خلونا نتكلم عن هالكورس شلون كان شنو الصعوبات الي واجهتوها
شنو الدكاترة الزينين والي ما نصحون فيهم
وهم بالمرة نتكلم عن الصيفي مدامه الاسبوع الياي ببلش شنو مسجلين

 

[واثقه بالله]

شلونكم اصحاب التجمع الحلو

توني مقدمه عل الجامعه وطالبين مني ال essay

بليز من خبرتكم قولولي شلون طريقه هل يدققون عليه ولا عادي هل لازم يكون الاسلوب بروفاشنال ومنو ممكن يساعدني بالهموضوع

انا مو زود بالكتابه وابي احد ممكن يساعدني
انتو شلون كتبوه ؟؟ وهل ياثر بالقبول بالجامعه بلييز فيدوني الله يعافيكم

 

[Mo7aSbChia]

بنات خلونا نتكلم عن هالكورس شلون كان شنو الصعوبات الي واجهتوها
شنو الدكاترة الزينين والي ما نصحون فيهم
وهم بالمرة نتكلم عن الصيفي مدامه الاسبوع الياي ببلش شنو مسجلين

حلو سؤالج انا بسوي اقتباس من منتدى ثاني احس الكلام مفيد و ودي انقله

عربي 220
خذيت هالمادة مع دكتور حامد الحميدي
المادة خفيفة وسهلة .. ما يبيلها دراسة
بس الدكتور لك عليه اشوي(من ناحية الدرجات وطريقة الامتحانات)
يعني انسى تييب فيها قريد
هذه طريقة الدكتور ان اشوي بخيل بالدرجات مع ان المادة سهلة
وطريقة الامتحانات كلها صح وغلط
بشكل عام انصح فيها بس لا تفكر انك تييب a

فيزيا 105-نعمت مسعود
انا خذيتها كـ مادة من مواد العلوم طبعا بدون لاب
المادة سهلة للي تخصصهم علمي
يبيلها اشوي مجابل
الدكتورة غثيثة بالمحاضرة يعني المحاضرة ثقيلة بس طيبة وكريمة بالدرجات
وانصح فيها حق الي يحب الفيزيا او ان تخصصه علمي


انجلش 101-انجليكا
المادة عبارة عن اسيات .. عند انجليكا مو مهم الحضور والغياب المهم التركيز ع اسيات
انا يبت بهالمادة b ونادر ما كنت احضر .. بس كنت احضر يوم الاسيات واقدم اسيي وامشي
المحاضرة اشوي غثيثة تهذر وايد وبدون فايدة
بس بشكل عام انصح فيها .. طيبة الدكتورة وتعدي المادة وانت يايب قريد بسهولة


رياضيات 103-زينب العمري
بالنسبة لي كـ تخصص ادارة اعمال مادة اجبارية لازم اخذها
المادة سهلة مو وايد صعبة بس انا تخصصي علمي يعني اغلب الي خذيناه مار علي بالثنوية
الدكتورة زوينة .. في ناس ما يمدحونها بس بالنسبة لي كانت جيدة
المدتيرمات سهلة والفاينل سهل .. وبشكل عام الدكتورة طيبة ومتساهلة مع الطلبة


عربيك كالجر205-ميرجوري
اسوء مادة مرت علي بالكورس
الدكتورة غثيثة ونذلة بمعنى الكلمة
المادة عبارة عن المجتمع العربي بس طريقة الدكتورة مع احترامي لها غبية
وطريقة الامتحانات اغبي
بشكل عام ما انصح فيها نهائيا وخروا عن هالدكتور


انترناشونال ستاديز101-غلامرضا وطندوست
المادة سياسية بحته وتُدرج تحت قسم السوشال ساينز
المادة سهلة بس لازم تكون انجليزيتك قوية يعني كله (حجي) وكله مصلطحات سياسية وبالانجليزي
ما انصح للي مو متمكن باللغة
بس الدكتور وايد طيب ومتساهل ووايد سهل تييب قريد فيها اذا تكون متمكن من اللغة


الانقلش 101 باتريك ماكماهن
الماده عباره عن نفس ما قلت كلها اسيات و في بريزنتيشن واحد (معنه ما كان له درجه بالسيليبس)
و الدكتور خوش واحد وايد طيب و على نياته حتى لو متأخر على تسليم ايسي او اوت لاين او واجب تقوله عادي اييبلك اياه باجر يقولك اييه عادي...
كلاسه ممل شوي... و ما شرح شي من الكتاب بس اول ما بدينا الكورس كان كل اسبوع يعطينا كوز عشان يخلينا نقرا الكتاب..
زينه بس حسافه اهوا كان اول كورس له و ما شفت له مواد اب سمر او فول شكله طلع


فيزيكس 105 نعمت مسعد
الدكتوره على عيني و راسي ليما اخر يوم واهيا تقولي صدقيني انا احس انج تقدرين اتييبين اعلى <<
بس المشكله كانت انه انا ضيعت الايام مع الكتاب و آخر شي اكتشفت انه اهيا نوعها كل امتحاناتها من النوتس
نصيحه اللي ياخذ عندها لا يفكر بالكتاب كلش الا نقل اسئله الواجب بس!
و حتى الفاينل معني ما درستله حسيته سهل مو ما ينفهم..
حلوه الماده بس حق اللي شوي متمكن بالانقلش (وفيها بروجكت عباره عن بحث بالبور بوينت و بريزنتيشن)

اراب 220 ريموند فارين
الماده عجيبه و حلوه و تونس و كنت اتعنالها بروحها و صج يضيق خلقي اذا غبت عنها
وناسه و ضحك مسكين عيز منا
بس حقد علي بالميدتيرم على بو انا اضحك بالكلاس فا يبي ينبهني
و نظام اسئلته موضوعي و مقالي
بصراحه انا وايد حبيت الماده بس تمنيت لو ما كان عليها درجات يعني بس حضور صج وناسه

ماث 103 محمد بوشهري
هالكلاس كان مو صج.. جد جد دكتور مافي مثله.. واهوا يشرح نص الكلاس سوالف
و وايد يراجع لنا الكلاس اللي قبل او مثلاً اذا عندنا كوز اليوم الي بعده لازم يكون في قبله مراجعه
اذا ما زادت غياباتك عن 3 ايام انت ضامن الـ c حتا لو صفر بكل شي
نظام الدرجات:
60% كويزات ( 16 ياخذ احسن 12 ) و كان في ايام عقب ما نخلص الكويز يقولنا خلو الاوراق عندكم الحين بوريكم الحل و كلكم فل مارك!!
40% فاينل
و طبعاً كله اوبن بوك اوبن نوتس و نفس الامثله بس يغير الارقام
بس هم للأسف شكله آخر كورس له بالجامعه و جان زين يردونه


محاسبة 205 عند فرانسيسكو برافو

ما ادري شقول عنه بس بالنسبة لي ما راح اخذ محاضرات مرة ثانية معاه. الاسباب: اولا يطلب منا ان نسجل بسايت لجامعة هارفارد و ندفع 53$ علشان نشتري قضايا محاسبية اهو حاطها هناك- و هي شغله مالها داعي, عيل شنو فايدة الs.drive مال الجامعة؟ ما عنده مدتيرم او فاينل كل شي يعتمد على تقيم اسبوعي لمشاركتك في السكشن و هاذي شغله ثانيه اللي تبط الجبد فيه اللي اهي ان مو اهو اللي يقييم انما مجموعة بنات يقيمون اجابات و تفاعل البنات على كيفهم- فشي طبيعي هالبنات يرفعون درجات رفيجاتهم و يخسفون بالباجي!!!!! غير ان طريقة شرحه تعتمد على ذاكرته و تجاربه ايام ماكان الرئيس التنفيذي لشركة كوكاكولا و لما صار مستشار للملك فهد, يقعد ثلث ساعة يتذكر ذيك الايام و يوقف على الاطلال بالساعات.
طلعت من المادة مثل ما دخلتها مو فاهمه منها اي شي.

انجليش 102 مع احلام الكي

ما شاء الله عليها انسانة قمة قمة قمة في الذوق و المعاملة انسانه و الله انها عسل عنجد ما اقدر اوفيها حقها طيبة و اخلاق و شرح و معامله توب. المادة ما حسيت فيها بصراحة اي تغير او اختلاف عن انجليش 101 بس طبعا شرط لازم ناخذها.

انجليش 300-تاريخ اللغة الانجليزية- مع غازي ناصر

حسبي الله و نعم الوكيل فيه

قبل لا اخذ المادة سمعت و قريت التحذيرات المتككره عن هالشئ, بس المادة اجبارية و كان لازم اخذها.
تخيلوا مادة اجبارية مستواها 300 و تتكلم عن ال linguistic يعني علم الأصوات ،طريقة بناء الجمل ، وعلم الدلالات . يدخل هالشئ السكشن و يقول كل ثنتين يختارون نص chapter و يشرحونه حق البنات من دون لايشرح اهو اي شي!!!!!!!!!!!!!! بالله هذا كلام؟ وشنو دوره اهو؟ يقعد باخر السكشن و يقيم شرح البنات, و ما يرضى ان اللي تشرح تقرى من الكتاب او الباوربوينت او من الاوراق – الاخ عباله محاضرة public speaking! اذا احنا مو فاهمين المادة ما يبينا نقرا من الكتاب شلون؟
اول بنت شكت شسوى فيها صور ورقه امتحانها ووزعها على السكشن و قعد يتمصخر عليها! بالله هذا انسان صاحي؟ وعقب ما زادت الشكاوي عليه قالوا خلاص راح نفتح المادة الكورس الياي – و اهي مادة المفروض انها تنزل كل كورسين- و فعلا سجلت المادة الحين مع رضوان و الله يستر منه بعد.

انجليش 212 مع احلام و ماكدوغل و كاثرين كليباس >>> ثلاثه في واحد

مادة اجبارية المادة تقسم على 3 مدرسين و كل برفسور يدرس لمدة 9 محاضرات و يشرح عن الادب الانجليزي في الدول اللي استعمرتها بريطانيا. و طلباتهم المعتاده اهي ان نكتب تقرير قصير عن اي قصتين او ثلاث من اللي يشرحونهم بالسكشن ,حلو الكلام؟ فبروفسور احلام شرحت لنا قصص من نيجيريا و الهند و ما شاء الله عليها مرة ثانية و ثالثة و رابعة كفت و وفت معانا عطتني A- ,
ماكدوغال شرح القصص الامريكية القصيرة و شرحه كان و لا اروع بس طلع لنا بطلب غريب وهو ان كل وحده تكتب له قصه من تاليفها- فراغه- سوينا اللي يبيه و الحمد لله عطاني A,
و اخيرا كاثرين كليباس على كثر ما الكل يمدح فيها و يرفعونها للسما بصراحة ما عجبتني – و للعلم اهي مرشدتي- شرحت لنا الادب الايرلندي( طريقية شرحها ذكرتني بأبلات العربي قبل لما كانوا يقولون لنا اشرحي موقف جرير في هجاءه على الفرزدق عندما صارت سالفه جايده ذاك الوقت. لا كنا عارفين منو هذيل و شنو يبون بالعربي و لا الحين بالانجليزي) الله يستر من تقيمها حاسه انها راح تخسف فيني.


عربي 220 عند ريموند والكورس كان سهل وحلووو ووناسه والحمدالله عدى على خير

بري كالكلس110 مع مطلق المطيري احمممم مادة حدث ولا حرج الاستاذ زوين كتعامل بس كشرح خرطييي ينقل الي في الكتاب على اللوح يعني شرح ولمن نروح له الساعات المكتبيه هم نفس الشي يفهم نفسه خخخ نظامه هوم ورك كل اسبوع ومن هالهوم ورك يعطي كويز يعني اذا حلك غلط بالهوم ورك الكويز هم راح عليك خخخ بصراحه احس انه غباء وحتى الميدتيرمز والفاينل من الكويز والهوم ورك طبعااا هالنظام ما ياز لي بس يمكن يمشي مع احد ثاني عن نفسييي ما راح اخذ عن هالدكتور مره ثانيه (وان شاءالله اكون معديتها لاني للحين مادري عن النتايج وعن تهبيبي في الفاينل خخخ )

خذيت مادة وب تكنلوجي 255 عند عبدالعزيز غلوم المادة حلوة وممتعه واهي عباره عن تصميم مواقع انترنت بس تكون ابليكيشن مثل تويتر وفيس بوك باستخدام لغات برمجه جافا وربعهاااا ,و والاستاذ زين وطيب ويساعد ووايد سمعت عنه انه موزين بس بصراحه انا شفته قمه ووايد حاول يساعدنا بس مشكلته ما يوصل المعلومة عدل يعني الشرح مو ذاك الزود----<طبعا محسوبتكم روست بالماده خخخ ظليت اناظل لي اخر رمق بس بالاخير حسيت اني خلاص مو قادره قبل اخر ايفال قلت له ابي F

نييي حق اخر طامة اهني صج صج صج مادري شقول بس الي اقدر اقوله مايكل ماكميري خخخخخ
101 مع مايكل كانت كارثه
الكل نصحني وقالي لا تاخذين عنده قلت لهم لا انا شفت شرحه في IEP وكنت افهم منه وكان زين مع انه كان يينا يشرح ويطلع مو استاذ اساسي
يوم خذيت عنده كاستاذ اساسي اححححححححم شوفو معاي حالي
1- اول اسبوع كنت مثل الي قاعده عليه خخخخخ يعني متنحه ومادري شيخربط حتى الاسايمنت مادري عن شنو قلت ميخالف تونااا
2- الحال استمر كما اهو عليه لي ثاني اسايمنت مادري عن شنو
3- معدلي في الماده ما ارتفع عن 61 لووووول يعني كنت بين F,-D
4- الاسيييز ملوته صعبه ماتدري شنو يبي , ييب كتاب ونظريه وطبقوها على بعض يعني خرابييييط
5- اخر اسبوعين تقريباا بديت افهم شنو يبي بدى يشرح عدل وكل الكلاس لاحظ انه بدى يوضح شنو يبي
بس للاسف سقطت في الماده سقوط ظريع مادري ذريع انتو اختارو الكلمة الصحيحه خخخخخ


راح ابلش بالماكرو المادة بصراحة غثيثة وطلعت منها مو فاهمة عن شنو المادة من الاساس
جارلز بصراحة ما اعرف يشرح لكن سهل ان يتضبط واساعد بعد اذا ترددتي عنده بالمكتب واعرفج اساعدج
باختصار حبوب وطيب بس مشكلته ما اعرف يشرح شي ما انه احاول اوصل المعلومةو احسن من Ali jamal اهم الي ادرسون هالمادة بس
انصح بجارلز والحمدالله نجحت وافتكيت من هالمادة

علي منصور روووعة بمعنى الكلمة عنده ثلاث متيرمات بس كله غش يعني حل الامتحانات قرووب
بس عيبه نساي وتصليحه لكم عليه حيل دقيق انصحكم فيه

رالف بوليام هم حبوب واساعد بس اهو جدي ما احب الي اغيب كل اسبوع لازم في كوز اهي مادة مثل statstic
يعني لو سقطتي بالمتيرم الاول وسقطتي بالثاني عادي ونجحتي بالفاينال انجحج ولو سقطتي احطلج Iecomplete المهم ما تسقطين الكورس الياي تيين وتمتحنين وانجحج بس كوني جدية وحسسيه انج مهتمة ومو مطنشته
انصح فيه حبوب واراعي

psycology مادة سهلة واستاذ ولا احلى James الي عنده لغة ما راح اواجه صعوبة المادة تعتمد على الفهم والحفظ الاستاذ زين اسألته كلها ملتبي جويز

Art حلوة بس الشغل وايد انا واجهت صعوبة بالوقت خاصة ان موادي كلها كوزز وهتيرمات



بتكلم عن بوشهري .... انا اخذت عنده الكورس الي طاف stat بصراحة الاستاذ زوين ومحد يسقط عنده لكن عيبه ان افرق بين الي بنت ابوها دكتور بجامعة الكويت والي بنت السفير و .......الخ هذا غير الفلوس الي ياخذها على اساس ان بصور نوت لنا !!!! نو كومنت
الشكاوي عليه وايد من الشباب علشان جذيه ماراح اكون موجود الكورس الياي وبصراحة اسلوبه مو ذاك الزود عليه اسلوب عجيب غريب وما اخلي احد ما يتكلم عنه عن ولده وعن مرته وعن بنته ورفيجه لدرجة ان اقول كلمات (وسخة من غير ما ينتبه ان قاعد ادرس بنات)
بصراحة انصح بفرناند للي بياخذ ماث 103 درجاته احلى ويعطيج نموذج للامتحان نفسه اييبه مع تغيير بالارقام




ENGL 101 مع كاثي:
كتبنا 4 essays و حسبتلنا 3 منهم.. بس الدكتوره اسلوبها حده خايس مع الطلبه ..
وتفاجئنا بموعد التسليم.. يعني تكون ساكته طول الاسبوع و فجأه تقول لنا ترى التسليم الكلاس الياي ( و ماتكون معطيتنا ورقة الاسايمنت )
وايد تقرق بالكلاس و تعيد نفففس الحجي كل مره..
ما انصح فيها كلش..

CSIS 101 مع ديما:
خذينا أشياء سهله مثل word- access - excel - power point
وبرنامج يديد للبرمجه اسمه alice .. يعلمج شلون تسوين قصه وتحركين شخصيات..
ديما عجيييبه .. استانس بكلاسها .. تعرف توصل المعلومه و اسلوبها وايد راقي ..
سلسه بسالفة التأخير و وااايد استفدت منها ..

PSYC 203 مع دنكا:
الماده حلوه بس يبيلها وايد حفظ و لازم تكون اللغه عندج اوكي ..
دنكا شرحها زين .. بس اللي ماعجبني فيها انها صارمه شوي بالتأخير والتلفونات .. و انها بعد تعتمد على برزنتيشن البنات في بعض الجابترز .. أنا صراحه ماكنت افهم شي من البنات و ارد البت أحاول أفهم روحي -_-
امتحاناتها كلها multiple choice بس الأسئله اللي تييبها تلخخخخخخخخخخبط..
يعني بالعربي .. ال A مو سهله عندها

PHYS 105 مع نعمة:
الماده حلوه و سهله .. خاصه حق اللي مو ذاك الزود بالمسائل .. عطتنا 50 extra credit لو حظرنا محاظره و 30 لو حلينا ورقه فيها صور ونقول شنو هالصور..
الدكتوره مسكينه وايد تساعد .. بس كلاسها شوي ممل ..
امتحاناتها عموما سهله و تعتمد عالهوموورك..



** والله يعطيهم العافيه **

 

[الماسة_21]

شلونكم اصحاب التجمع الحلو

توني مقدمه عل الجامعه وطالبين مني ال essay

بليز من خبرتكم قولولي شلون طريقه هل يدققون عليه ولا عادي هل لازم يكون الاسلوب بروفاشنال ومنو ممكن يساعدني بالهموضوع

انا مو زود بالكتابه وابي احد ممكن يساعدني
انتو شلون كتبوه ؟؟ وهل ياثر بالقبول بالجامعه بلييز فيدوني الله يعافيكم

الاسييه هذا يطلبونه حق الي يتقدمون بالجامعة اهو ما احدد قبولج لا القبول يعتمد على الامتحان والمعدل
بس هالاسييه ينحط بملفج الجامعي
اهو شغلة انجينيرال تتكلمين عن نفسج, مدام ينحط بملفج اعتقد لو تسوينه بطريقة بروفيشنال احسن
لووووووووول انا حطيت القوقل وترجمة شسوي بعد كنت على نياتي ما اعرف شي

 

[الماسة_21]

Mo7aSbChia
يعطيج العافية كفيتي ووفيتي
انتي بتاخذين صيفي؟ شنو مسجلة

ياريت كل واحد اقولنا شنو مسجل وشنو تخصصه يمكن نستفيد من بعض