تجمع امهات العالمية الامريكية

[omlolo]

ام لولو جنى وايد متاخر بشهر ثلاثه انا اتذكر العام اذا مانى غلطانه وانشالله البنات يذكرونى على اخر شهر واحد او على اول شهر 2

وبعدين اخر موعد تسجيل الطلبه والاخوان 31 -1 وبعدين يفتحون باب التسجيل .... وبعدين الاحسن اتروحين واتردين عليهم احسن من التلفون وروحي حق وحده بالتسجيل اسمها جيهان خوش وحده وانشالله تساعدج

مشكورة ياقلبي وايد
والله شكلي بدرعم عليهم اخر الاسبوع، انا اقول واايد شهر 3 بس قلت يمكن نظامهم جذيه

 

[omlolo]

شلونكم أمهات

ريمان الله يحلي أيامج سبحان الله البنات ياخذون القلب، تصدقين جني عرفتج لاني اشوف وحدة بهالمواصفات بس مو متينة ولا ضعيفة و كذا مرة تمسك لي الباب أحس اني كاسرة خاطرها احتمال تكونين انتي، بس اذا شفتينا تعالي خلينا نتعرف عليج، انا من يوم الاحد ببقق عيوني و ادورج

و عدل كلامج السنة اللي فاتت مريتهم أول شهر 2 و كانت المقابلة أظن نص فبراير، أم لولو روحي المدرسة أول شهر 2 أضمن


كاراميلا العفو حبيبتي ما سويت شي، و ان شاءالله ابلغج بكل يديد، اليوم وزعوا ورقة حق اللي يبي يستلم صور عياله اللي صوروهم بعد العيد بس للأسف الظرف بالسيارة ما نزلته علشان باجي التفاصيل، و معذورة خلصي شغلج و ان شاءالله تنضمين للمجموعة اذا وصلتي بالسلامة


بيلا هم رديت سألت بنتي من شوي و قالت لي دلال قعدت على ساد جير و مس مروة اللي قالت لها،، الحال من بعضه انا ما أدري عن اللي دار مداري الحمدلله و الشكر

مرو اليوم سألت أخوي قالي اذا السيارة من بهبهاني أو الغانم تقدرين تراسلين الشركة الاساسية في دبي و تشرحين الموضوع يمكن يفيدونج
و حياج الله بالكيجي علشان تكتمل المجموعة

ان شاء الله بمرهم اشوف شالسالفه

مشكورين حبايبي اشوه انكم قلتولي

 

[mr000]

سلام امهات اشلونكم! اليوم مريت المدرسه الصبح دفعت فلوس الصور هو صج في وقت لي شهر 2 بس خفت أنسى تالي!كراميلا شخبارج مع البرد يقولون وايد زايد البرد والثلج عندهم حتى مو قاعد يروحون المدارس ورحلات الطيران قاعد تتأجل وولدي يقول بردددددد مووووت الحراره -12 !

 

[Fouz]

السلام عليكم شلونكم أمهات

بيلا شخبارج، وعليه على دلال بس لا تحاتين يمكن سالفة الكرسي تخلي عنادها يقل لأن حسافة اذا البنت ذكية تنظلم و السبة الراس اليابس

أم لولو أحسن مريهم على بداية شهر 2 انا اذكر رحت بهالوقت

مرو شخبارج، فعلا وايد برد هناك اليوم مكلمين اخوي يقول برد مووت و منحكرين بالبيت

ريمان و كاراميلا شخباركم

 

[caramella]

السلام أمهات إشلونكم
واييييييييييييييييييييييييي إطلعت من جبدي النقله و لايمكن أفكر بالنقله مره ثانيه معنه بنفس العماره بس من دور لي دور بس والله تعب ما أدري من وين طلع هالقش كله ماكو فايده فينا كويتيين قشنا وايد
آنا أتمنى مره اسافر سفره و حنطتي تكون أقل من 30 كيلو عمرها ما صارت ما ادري ليش أحب القش وايد ما احب احتاج شي و ما القاه اقبالي عشان جذي ما يبقى شي ما آخذه
ورديت اكرف و أنظف الله كريم الله يطرح البركه في هالشقه
الله يسلمج فوز انا الله يسلمج فاعده بعمارة west end quay إتصير هالعماره بظهر الهيلتون اللي بجوروود مشروع مكون من 3 عماير و يطلون على نهر صناعي ووايد حلوين ستايلهم اوربي والمطبخ كاونتر بالصاله شي مرتب والله بس شكله الخليجيين اتفقوه مو كل الشقق نظيفه
وعلى طاري الصور خل اطرش امي تختار له الصور اضمن لأن هم لي برجع حوسه ما اعتقد يمديني امرعلى و على قولة مروو اخاف انسى
مروووووو البرد يسأل عنج
مووووووووووووووووووووووووووووت برد و سنو وحالتنا حاله والله نادر ما اطلع واليوم رحت تسكو (جمعيه) في عمارتنا و خذيت ولدي تجمد حده وطق علينا سنووو وشنو الهوا بويهنا و يكفخ السنو بويهنا وإهوا شوي يبجي من البرد
الله يسلمج إي غابوا يوم واحد و المطارات إكنسلون فيها الرحلات بس الحين اظن ردوا يشتغلون
إشهالديره اللي لي ياها السنو إعتفسوا جنه اول مره ينزل عليهم سنو تفس سالفة العام بالضبط حتى إهم بالتلفزيزن يتحلطمون على روحهم و ليش ماكو استعدادات نقس امريكا اللي ما يهمها لي طق السنو من كثر الإستعدادات
بعد ولدج منطقته ابرد لأن بالشمال
بيلا إشلونج يا حرام عورت قلبي بنتج إنشالله يخفون عليها وما يقعدونها بهالكرسي
أم لولو مريهم هاليومين لا تطولين اضمن لج

 

[bella bambina]

صباح الخير أمهات
هلا والله فوز وكراميلا ومشكورين على تعاطفكم بس هم تستاهل لازم تعرف ان الله حق
واي آنا ثلجت كراميلا من كلامج الله يعيينكم

 

[Fouz]

صباح الخير أمهات شخباركم

كاراميلا الله يعطيج العافية و سالفة القش هذي ما نيوز منها، اذكر سافرت مرة مع قروب قبل لا أتزوج كانوا يسموني عيوز القروب ، كل ما بغوا شي قالوا روحوا سئلوها و يكون موجود هههه طبع ما أقدر أغيره، والله لو ماكو شركات شحن جان ندفع وزن زايد أكثر من ما دفعنا حق المشترى
خليني أقولج شنو عطوهم أمس، أمس كان حرف القاف و يمه صورة قطار ملونينه و يكتبون الحرف تحته
دزوا ورقة حق القسط الثاني اذا ما دفعتيه و سلامتج ماكو شي يديد

هلا بيلا شخبارج، عاد انا ما احب البرد أبد و 24 ساعة بردانة، يقولون الحامل كله عندها حر بس انا هالشي ما شفته أبد لا بحمالي الاولي و لا هالمرة، يختج البرد يكسر الجسم و كله تبين تنامين ما حبه

 

[mr000]

سلام امهات اشلونكم! صج الله يعينج كراميلا عالنقله بروح البرد يكسر أقولج ولدي اللي مايعترف بالبرد ولي نهاية شهر 12 وهو مشغل التكييف بشقته ألحين يقولي مووووت برررد وكل ماأقوله يشتري شي يقولي مالي خلق آنا حدي أطلع من المؤتمر وكل شي مسكر بس اشتريلي أكل وأرد انخش بالفندق كان عنده نص يوم راحه بس شرى قصص حق بنته وبلوزه حق اخته مع انه قباله جون لويس اشكبره دازلي صورته ويقولي كل المحلات قبالي بس مالي خلق... مع ان بنت حماتي توها راده من مانشستر مستانسه وشاحنه 6 جناط!!كراميلا رفيج ولدي في surry يقوله شريت 4 دفايات ولما انقطعت الكهربا بقينا نموت من البرد.. خو بعد الهوم لس والعييايز يلقونهم ميتين مال البرد!!بيلا ميخالف لاتتضايقين علشان عاقبوها احنا نتهاون مع عيالنا تالي نقول ليش عنيدين ويمشونا على كيفهم بس هم ماعندهم جذي.. خليها تتعود تسمع الكلام بالمدرسه علشان حق غريد 1 تنتبه حق الدراسه وماتأذيج بكتابة الواجبات!!

 

[bella bambina]

فوز وينج مس سومالي اليوم مو موجودة سالت مس مروى تقول اي باجر راح نقول لكم ليش ما قدرت اسالها زيادة دلول ركظت حق صف بنت اختي ولحقتها فبعدين سالت مدرسة ثانية قالت سمعت ان اهلها بامريكا دقو عليها يبونها تيي بسرعه طبعا ما أصدق هالكلام :eh_s(14):

 

[Fouz]

بيلا من صجج!!!!!!!!!!!!!! مصخووووووها ترى و السالفة صارت مليقة، كل شوي مغيرين المدرسة و شنو ذنب اليهال، انا اليوم ما نزلت اييبها خالتي يابتها و ما دريت عن مس سومالي لان بنتي مطنقرة اكو صبي اسمه سعود ماخذ بالطوها و مخلي بالطوه و صايرة ما تتحاجى عاد كله والا بالطوها شيفكنا اليوم

بحاول اوديها باجر الصبح مع اني وايد ثقلانة بس بشوف السالفة، و مس بورسلي المفروض تجتمع فينا و توضح السالفة لان اعذارهم ما تقنع أبد

 

[mr000]

سلام امهات اشلونكم! اليوم ولدي يابولهم مدرس ماث يديد حسافه ماراح تدرسهم مسز اسينبيرج مالت العام مايندرى اشلون هالمدرس عسى يطلع زين... ودقت علي السكرتيره لأن أمس آنا مكلمتهم عن التيوترينج لأن التيوتر طلع من المدرسه سافر.. فشنو قالتلي أنه ماحصلوا مدرسه ألا من الساعه 3ونص لي 4ونص..يعني راح يقعد ساعه بس جذي بعد الهده تالي يروح التقويه... والله راح يكون دايخ وماله خلق بس شنسوي بعد قالتلي جربوا كم يوم علما أحاول اشوف له مدرس ثاني بس مو شرط يكون مال ماث قلتلها لاما أبي شالفايده ندفع فلوس وهو يتعب وأذية التوصيل على مدرس مو متخصص بالماده!الله يعدي هالسنه على خير وايد لخبطه!!

 

[mr000]

واااااااي بشق هدومي والله ماتسوى علينا هالدراسه كله من اعصابنا وصحتنا يحليل اهلنا قبل اللي مادروا عنا لي كبرنا... توه رد ولدي أقوله اشلون مدرس الماث اليديد يقولي يشرح بطريقه معقده يعني الشي السهل يشرحه بطريقه معقده يخليه صعب مافهمنا شي منه... ياحسرتي هذا اللي كان ناقصنا... بعد خل نصبر كم حصه ونشوف ... اذا جذي أكيد بنرضى بالتيوترينج حتى لو الساعه 9 بالليل بعد شنسوي!!

 

[bella bambina]

السلام أمهات
اي والله فوز اليوم الصبح ما وصلتها الصف اخوانها ودووها يقولون مس سومالي كانت موجودة الله العالم يمكن صج و يمكن تهاوشو معاها وهدت المدرسة نص الدوام مادري قاطين عزيزو بهالصف ولا ليش ينحاشون ؟ حتى الناني مالت دلول عصبت تقول بتخلص السنه ومادرسو شي لحد الحين اشلون يبونهم السنه اليايه يقرون ويكتبون ؟؟؟؟؟؟؟؟؟؟؟؟؟
الانجاز الوحيد اللي السنه سووه انهم زادو أسعارهم

 

[Fouz]

شلونكم أمهات

مرو الله يعينكم على سالفة المدرسين، احنا بعد قاعدين نعاني من هالسالفة البايخة

بيلا انا اليوم ما رحت صفها كلش أحس جسمي ثقيل و الله يعيني الايام الياية، خالتي بتسافر و بتطول مسكينة الحين شايلة عني حمل ثقيل
بس صج انقثيت، بذمتج اهما متى بدوا دراسة ؟؟؟؟ اخر 10 و الحين احنا بداية يناير و شيلي الاجازة يعني ما كملو شهرين على بعض و مدرستين مشوا يعني اذا مس مروة عرت عليهم و راحت شنو الحل بالله!!!!!!!!!!!!!! و انتي صاجة هالصف فيه علة استغفر الله، بس الغريب بالموضوع انها أمس دازة رسالة بخصوص الأكل و كاتبة انها مستانسة مع اليهال بس روحتها غريبة، ان شاءالله باجر يكون فيني شدة و اروح الصبح، اساسا اليهال حوالي 20 و مستحيل مدرسة وحدة تقدر تسيطر عليهم و تعطيهم المعلومات اللي تفيدهم
على طاري الرسوم اهما شعندهم غير الاوراق اللي فيها دفعوا و دفعوا، ما مدانا داومنا شهرين يبون الرسوم كاملة و يبون حجز كرسي السنة الياية،، انزين ووين المقابل؟؟؟ ودي اروح أتكلم مع مسئولتهم بورسلي بس ابي افهم مس سومالي رااحت خلاص والا الموضوع فيه شي، و شنو الضمان ان اللي ييبونها ما تروح، و عفية عليهم يهال كل اسبوعين لازم يتعودون على مدرسة يديدة
والله انقثيت استغفر الله

 

[mr000]

سلام امهات اشلونكم بصراحه آنا هالسنه على اعصابي والحاله كسيفه بالمدرسه مادري شالسالفه يعني آنا ماألومكم صج عيالكم يهال ودراستهم بسيطه بس هم مو شويه اللي دافعينه ومن حقكم تحصلون تعليم زين مقابل هالفلوس! واحنا بعد مصيبتنا أكبر يعني غريد8 وسنه اليايه ثانويه وكل مدرس يدرسهم شهر ويروح والدرجات مره تصعد ومره تنزل لا والله كلمالها وتنزل أكثر وتالي يروح الهاي سكول ولافاهم شي ومستواه ضعيف ونقعد نعابل فيه هناك... والله الظاهر هذي حوبة المدارس اللي ذميتها وتحجيت فيها...ودي أمسك أحد عياله بالمتوسط والثانوي بمدارس ثانيه مثل الدوليه أو البريطانيه بعرف اشلون الوضع عندهم؟بس علشان احتر زياده!!!والله مادري شقول من القهر... يالله هم نرجع ونقول أنها أحسن من غيرها..وهالأمور تصير بمدارس وايد!!

 

[ملكة بيتها]

شلونكم مامات عساكم بخير حبايبي ..بصراحه أنا نغيثت عشانكم أسوأ شي في التعليم تغيير مدرس الماده لأنه يلخبط أشياء وايد الله يعينكم حبايبي وبصراحه داشه أقولكم لو كل وحده تروح وتوصل لللإداره إنها مستاءه من هالوضع وتغيير المدرسين من غير تبليغكم ؟ عشان يعالجون الخلل ويعرفون إن الأهالي بدت تذمر من الوضع ....وربي يوفق عيالكم ييبون لكم مدرسين أفضل إن شاء الله .

 

[Fouz]

صباح الخير أمهات شخباركم
مرو و بيلا و ملكة والله حدي منقثة وودي اروح المدرسة بس من أمس و انا حدي تعبانة، مسكينة حتى بنتي ياها المقسوم الصبح و عصبت عليها بروحي تعبانة و اهي تحن على اشياء تافهة عاد انا ما احب اشوفها تبجي الحين مزاجي متعكر من هالمدرسة و على بنتي اللي زعلتها

الظهر اذا صرت احسن بروح، أو بقول حق خالتي تاخذ الكلمة الاخيرة من مس مروة و مالي الا اكتب كتاب حق المديرة مثل ما سويت أول السنة و ياريت الكل يكتب خل يوصلها أكثر من كتاب مثل ما قالت ملكة، يعني دافعين مبلغ مو هين و راحوا شهرين علشان السواين فلو و ما خصموا ولا فلس و هم المدرسين مو ثابتين والله بلوة و لوعة جبد، المشكلة مثل ما قلتي مرو ماكو مدرسة كاملة و هذي مشاكل تصير بكل مكان بس لازم ما نكون سلبيين و نقول اللي عندنا بالله ليش مدخلين عيالنا خاص يوم ان محد يبي يسمعنا جان رحنا حكومة و خاص
و بالنسبة لي ما أقدر اوديها مدرسة ثانية لان المدارس الزينة مكانها ما يوالمني يعني هذي اللي يم بيتنا و نوصل بطلعة الروح، فالمفروض يحسنون خدماتهم وايد أبرك، افففففففففف قرقت وايد صج مزاجي متعكر

 

[Fouz]

بيلا رحتي المدرسة اليوم؟؟ خالتي تقول المدرسة الثانية موجودة و تقول اجنبية بس مادري اذا مس سومالي والا لأ لان خالتي ما تعرف شكلها عدل، عطيني الاخبار اذا رحتي اليوم

 

[bella bambina]

صباح الخير أمهات
مروو وملكه وفوز شنسوي الله يعين عيالنا كل يوم أبلة غير والسنه بتخلص وما استفادو شي
فوز اليوم رحت كلمت مس ساره تقول حسبالنا بتقعد لينهاية السنه بس تفاجأت باتصال من أهلها وهذا شي طارئ وما بيدنا شي نسويه ومس مروى راح تصير المدرسة الأساسية وبنحاول ندور لها مساعدة قلت لها ما يصير احنا قاعدين ندفع هالمبالغ وآخر شي تدرسهم مساعدة ووصلنا نص الكورس وليلحين ماخذو الا 4 حروف تقول لا هذا صار لأن بدو متأخر وهذا كان من الوزارة وبعدين بيردون يعطونهم الحروف السنه اليايه ومس مروى زينه هزيت راسي ومشيت :0bee2e8d89:

 

[Fouz]

صباح الخير أمهات
مروو وملكه وفوز شنسوي الله يعين عيالنا كل يوم أبلة غير والسنه بتخلص وما استفادو شي
فوز اليوم رحت كلمت مس ساره تقول حسبالنا بتقعد لينهاية السنه بس تفاجأت باتصال من أهلها وهذا شي طارئ وما بيدنا شي نسويه ومس مروى راح تصير المدرسة الأساسية وبنحاول ندور لها مساعدة قلت لها ما يصير احنا قاعدين ندفع هالمبالغ وآخر شي تدرسهم مساعدة ووصلنا نص الكورس وليلحين ماخذو الا 4 حروف تقول لا هذا صار لأن بدو متأخر وهذا كان من الوزارة وبعدين بيردون يعطونهم الحروف السنه اليايه ومس مروى زينه هزيت راسي ومشيت :0bee2e8d89:

بصراحة شي يلوع الجبد، بقعد بعد شوي أكتب لي كتاب سنع حق المديرة، و المساعدة هذي من وين بييبونها!!! والله تنرفزت، خل يتعدل مزاجي علشان أعرف من وين أبدي و اودي الكتاب نفس ذيك المرة، ودي أعرف هالمشكلة بس في صفنا والا صفوف ثانية بالكي جي عندهم نفس المشكلة