تجمع أولياء أمور مدرسة التكامل(صباح السالم)للعام الدراسي2009-2010

[باونتى]

بنات شلونكم .. انا ان شاء الله بسافر بس لمن نرجع باذن الله راح تكون الاجازه طويله عشان جذى قاعده أفكر بسالفة النوادى واستبعدت التكامل عشان ما أبى يمل ويكره المدرسة .. وما ابى أدخله نادى يكون فى دراسة عشان لا يكره الدراسة عشان جذى قررت أدخل نادى رياضى يكون فى سباحه وكراتيه يفرغ كل طاقته مثل ما قالت رفرف .

 

[كويتيه ذربه]

انا قلت ان شاءالله اذا سافرت ورديت بدخلهم النادي العلمي نفس العام
بس بنتي تقول ابي التكامل بس بشوف لي وقتها وين اسجلها ابي مكان هيا واخوها مع بعض مالي خلق كل واحد بمكان كافي علينا طول السنه واحنا نوصل لو نشتغل خدمه توصيل طلبات وايد ارحم

 

[um 3li]

بنات شنو فت فور فن ؟؟؟؟؟؟؟؟؟؟؟؟؟


فيدوني ؟؟؟؟

 

[Miss_Tiger79]

رفرف
والله مادري ما سألتها
وانا قلت اذا بدرس قريد2 بخليه عندها
انتي سأليها ... يمكن تقولج شي يدي

واذا تبين باليه فيه تشامبينز مال اليهال نسيت اسمه
بدخل بنتي لان السنة الي طافت شفتهم يدربون البنات جمباز وباليه استانست فقلا هالسنة ان شاءالله

ام علي
فت فور فن
هذا نادي في ابو حليفه على حسب علمي لاني خواره بالمناطق البعيده
ووااااايد وناسه السنه الي طافت خليت اليهال فيه مدة بسيطه وطلعتهم بس هالسنة اهمه يحنون يبونه وينفع اكثر شي حق الصبيان

 

[manarah]

انا النادي العلمي مادري جنه شايلته من بالي لان عزوز فيه سنتين ورا بعض واظن هم الحين راح يكون فئه العلماء الصغار لان عمره 6 فيعني تقريبا اهو مخلص كل المواد اللي عندهم .. بس يمكن الصغار اشوفهم اذا بيدخلونه والا لا ..
انا والله ودي بالقاعده الحلبيه بس عاد انشالله اهو يرضى يروح لان بصراحه ودي ارتاح من العربي منهج ثانيه مو سهل ويكفي المعاناة اللي شفناها هالسنه مع العربي وراح اشوفله بعد سباحه وكره قدم بس مادري وين ليلحين .

 

[باونتى]

صباح الخير .. شلونكم .. باجر ان شاء الله رحلة الكى جى .. وراح يكون آخر يوم يداوم فيه ولدى .. سألت مس جاكى وقالت خلاص غيبيه واهو حده مستانس يقول باقى ون دى وسكول فنش :dddds:

 

[ام حسون وفطومه]

ويييييي حتى بنتي مستانسة ان باجر اخر يوم دراسة يحليلهم اليهال والله انا يمكن ادخل بنتي مس جامبيون او ليتل جيم خل تستانس لاحقه على الدراسه

ورفرف على حسب علمي ان ليتل جيم اللي بالجابرية عندهم باليه وحتى فندق ساس عندهم دورات باليه دقي ساليهم

متى الشهادات ما تدرووون؟؟؟

 

[manarah]

ام حسون النيوز لتر اللي يابها ولدي مكتوب فيها 16/6 ياخذون الريبورت بس مادري اذا الكي جي بعد نفس الموعد والا لأ ... بنات اللي تاخذ ياهلها من الكي جي بنهايه الدوام تسألنا عن الموضوع ويزاكم الله خير .

باونتي انا سألت مس جاكي قالتلي ان الاسبوع الياي بس مراجعه يعني بما معناه ماكو شي وغيبوا بس والله انا ولدي الكبير امطنقر اشلون اهي تعطل واهو لأ ومحتاره الحين اوديها اوالا اغيبها لان ادري كل يوم بيسويلي سالفه عالمدرسه

 

[باونتى]

صباح الخير أمهات .. أنا سألت مس جاكى عن الريبورت قالت راح ندق عليج فى اول شهر يونيو ..
مناره .. أنا أقول غيبيها أحس المدرسات ملوااا .. اليوم وديت أحمد والجو مغبر واهوا مو نايم من أمس والسبه الكحه قلت حق ابلته العربى قلت مابى أحمد يقعد بره صدره تعبان قالت شنسوى قلنا لمس جاكى بس ما ردت علينا عاد خذيته ووديته الصف ولا مس جاكى تعبانه ومالها خلق حدهااا جان أكلم مس آجنس قلت احمد فيه كحه وحساسيه بصدره مابى يقعد بره قالت اوكى خلييه يقعد بالصف ومس جاكى من كثر ما اهيا تعبانه ومالها خلق حتى ما ردت على العاده ما ترضى احد يقعد بالصف قلت بقلبى اشووه ان آخر يوم يا معوده بس احسهم ملواااا

 

[manarah]

ايه والله باونتي ادري اصلا الابلات ما صدقوا يخلصون والحضور الاسبوع الياي راح يقل وايد واكيد ايمعونهم بصف واحد وانا ودي اغيبها وترتاح بس الله يعيني على ولدي بدورله سبب يقنعه ... ومس جاكي تعبانه صارلها يومين غايبه واليوم داومت عشان الرحله .

 

[ام _خلودي]

قوه امهات شلونكم

انا بنتى عطوهاا الجدول الاسبوعى الاسبوع الياى

اكو دوام ؟؟؟ شكلى بخليهاا تروح يوم الاحد علشان عيد ميلاد رفيجه

وبعدين راح اغيبهاا

 

[نواره الحلوة]

بنات
اليوم وديت ولدي كي جي 1 والله في حضور اليهال وايد

 

[كويتيه ذربه]

اشلونكم امهات

رفرف شوفي على نهايه السنه بناتنا تعرفوا على بعض تقول اليوم انها لعبت مع بنتج بالبريك الاول والثاني

 

[رفرف]

ذربة اي والله قالتلي .. يالله ما عليه ملحوقة وراهم السنة الياية انشالله ..
ومستانسة كاشخة ابنتج تقولي انا خلاص مابي العب مع اليهال قريد 1 .. ماي بيست فريند بقريد 2 (مسرع ما صارت بيست فريند) خلاص كله بلعب معاها .. بتدبل جبد بنتج

 

[كويتيه ذربه]

رفرف
بنتج ياحليلها ماشاءالله تنحب اي بنتي تقول بعرفها على رفيجاتي
بس للاسف السنه اليايه اعتقد مايلتقون لان فرصه قريد 1 و2 بروح و3 و4 بروح

 

[ام _خلودي]

بنات شسالفه الريبورت

ياثر يعنى على الكى جى 2 ولالا ؟

 

[manarah]

بنات شسالفه الريبورت

ياثر يعنى على الكى جى 2 ولالا ؟

هذا اخر رريبورت لهم بس مادري متى بيوزعونه وما اعتقد يأثر على كي جي 2 لانهم اليهال اصلا منقبلين ومسجلينهم .

 

[ام _خلودي]

صباح الخير

شلونكم وشلون اليهال

بنات انا لحين ماسويت الفحص الطبي مال خلود تهقون عادى

ولا ممكن يكنسلون تسجيله؟؟

 

[manarah]

صباح الخير

شلونكم وشلون اليهال

بنات انا لحين ماسويت الفحص الطبي مال خلود تهقون عادى

ولا ممكن يكنسلون تسجيله؟؟

وانا بعد حالي من حالج بس لا ما يكنسلون تسجيله .. عموما انا قايله حدي الاسبوع الياي لان ابي اعطيهم قبل لا يعطلون

 

[عمار يا كويت]

مرحبا بنات شلونكم
انا بنتي بقريد ون ودي اسال انتو سجلتو عيالكم بصفوف معينة لقريد 2 .. منو احسن تيشر؟؟
متى يعطلون اولى؟؟