تجربتي المصورة مع آثار حب الشباب

[دراهــم]

السلام عليكم ورحمة الله وبركاته

::

اليوم بحط لكم الجزء الثاني من تجربتي مع آثار حب الشباب بـ ظهري تكملة لهـ الموضوع

http://www.q8yat.net/showthread.php?t=246057

::

معليش الصور بتكون من تصوير تلفوني النقال لأن كامرتي عند أخوي :krkrkr:


أول شي عندي شوية ملاحظات

( 1 )

أحب أوجه شكري لأختي مزيونه وشقرا يمكن أهي ما تعرفني بس وايد استفدت من مواضيعها

أهم شي أنج قبل لا تبلشين .. لازم تسوين حمام مغربي عدل مدل .. عشان ظهرج يتقبل أي مرهم أو كريم أو علاج

( 2 )

تجاربي مو شرط تنفع كل البنات .. لأن أنا بشرتي دهنية .. يمكن ما تنفع للي بشرتها جافة

يعني نوع بشرتي فجاة تطلع لي حبة بظهري راسها أبيض من غير لا أحك ولا دستور


( 3 )

بعض الشغلات اللي حطيتها سببت لي مضرة .. وطلعت هـ المضرة وقتية ولله الحمد .. يعني بعد مدة شفت نتايجها

وإن شاء الله راح أكتب لكم كل شي بالتفصيل وأي وحدة فيكم لا تتردد وتسأل


( 4 )

أنا بديت العناية بالآثار اللي بظهري تقريبا الحين 11 شهر .. يعني حول السنة .. والنتيجة ولله الحمد راحت الآثار بنسبة ( 40 % ) يعني اللي تبي النتيجة تبي تصبر على الاهتمام شوي




والحين ابي منكم شغلتين ما عليكم أمر

1/ لحد يرد لين أخلص موضوعي

2 / ودعوة حلوة منكم إن الله يرزقني الذرية الصالحة


ولي عودة _03BA:

 

[دراهــم]

رد: تجربتي المصورة مع آثار حب الآثار


بسم الله نبدأ

أول ما قررت أني ألتفت لظهري شوي ..

لقيت لي صالون ثقة .. وسويت عندهم حمام مغربي لمدة أسبوعين .. وكل أسبوع مرتين ..

يعني 4 مرات .. وكان في ظهري شوية حبوب

وخلال هـ الاسبوعين .. كنت قبل ماأنام .. أحط هـ الكريم اللي بالصورة



تبون تعرفون سعرة والله ما أدري .. بس تلاقونه بالصيدليات الخاصة .. وصيدليات الحكومة .. وأنا آخذه من صيدلية الحكومة .. ليش أني أعرف أحد فيها ..

في هـ الاسبوعين .. طلعت عندي حبوب .. ما خفت .. تدرون ليش ؟

لأن هـ الكريم .. استعملته على بشرة ويهي .. طلع لي منه جم حبة .. وبعدين راحت .. لأنه مثل ما قال الدكتور لي .. يطلع لج الحبوب اللي مدفونه داخل ..

شنو حسيت ؟

حسيت أن ملمس جلدي صار ناعم .. بس لي الحين السواد والآثار موجودة

::


ملاحظة مهمة

قبل ما أحط الكريم .. أمسح ظهري وأنظفه بكحول هم ماخذته من الصيدلية .. بشاش ..

والكحول هذا مخفف بنسبة 70% .. يعني ما تشمين ريحة كحول .. لأنه مخفف مثل هـ الصورة



ولي عودة

 

[دراهــم]

رد: تجربتي المصورة مع آثار حب الآثار

قريت عن ( البيبي فيس ) في النت



::

شريت الأرقام ( 1 ) و ( 2 ) و ( 3 )

سعره دينار واحد .. تلاقينه عند العطار

استخدمت رقم ( 1 ) كل يوم باليل لمدة ( 5 ) أيام

امسح بالكحول وأحطه .. أقعد الصبح .. اتسبح .. وأحط مرطب الحين بحط صورته

وبعدها

استخدمت رقم ( 2 ) كل يوم باليل لمدة ( 5 ) أيام

وبعدها

استخدمت رقم ( 3 ) كل يوم باليل لمدة ( 3 ) أيام


لأن جلدي انسلخ ........ يعني حتى أني أنام على ظهري ما أقدر

حسيت أني بموووووووووت من الألم

كل من شاف ظهري خواتي وأمي .. قالوا شمسوية بنفسج ؟؟!!!!! :krkrkr:

أحس أن لحم ظهري طلع .. تخيلوا ما أقدر أنسدح على ظهري

قطعته ( بعد شنو يختي :dddds: )

وصرت كل يوم احط هـ الكريم

لمدة شهر تقريبا

صار لون ظهري كلـــــــــه أسود .. اخترعت قلت يا دراهم هذي اللقافة وما تسوي :krkrkr:

وصرت كل يوم أحط المرطب

ليــــن في يوم .. قالت لي خدامتها ( أنتي ظهر صار واجد زين )

رحت للمنظرة .. ما صدقت .. شفت السواد اللي تارس ظهري كله اتقشر ..

وتغير ظهري من بعد هـ البيبي فيس بنسبة 60 %

بس بعد شنو بعد معاناة شهر وشوي وأنا على أعصابي .. بس أغسل وأحط من هـ المرطب

المرطب هذا هو



في منه شفاف .. مو هذا اللي أنا استخدمته

استخدمت اللي مثل الكريم الأبيض مثل هذا




ملاحظة : استخدام بيبي فيس صج أنه ياب نتيجة قوية .. بس أحذركم أنا تعبت واااااايد منه .. يشيل الجل ويحرقه .. وهذا للعلم

ولي عودة

 

[دراهــم]

رد: تجربتي المصورة مع آثار حب الآثار

رد جلدي الطبيعي

ومعاه نتيجة تفتح النفس

رحت سويت حمام مغربي ... عشان أبدا بتجربة ثانية :ada:

::

وشريت من الصيدلية هـ الكريمات لأنه نصحني فيها



اسعارهم

الأول الأزرق الطويل : 6 دنانير ونص

الثاني البنفسجي المربع : 5 دنانير و850

طريقة الاستعمال

كل يوم قبل ما تنامين تخلطينهم مع بعض وتدهنين فيهم ظهرج .. طبعا بعد ما تنظفين ظهرج بالكحول والشاش

وبعد ما خلصتهم طلعت النتيجة يا بنات

أن ظهري بدأ يطلع اللون الطبيعي

لكن آثار الحبوب .. بدال ما هي سودة .. صارت أفتح شوي ..

يعني الحمدلله ياب نتيجة وياي اعجبتني

خلصتهم تقريبا بـ شهر ..


ولي عودة

 

[دراهــم]

رد: تجربتي المصورة مع آثار حب الآثار

وبعد ما خلصت الكريمات اللي فوق

سويت حمام مغربي

واستخدمت

لوكسيد .. وفيد أون

الموجودين بالصورة



بالليل

أمسح ظهري وانظفه بالكحول حتى لو أني كنت توني متسبحه


وتالي أحط مرهم اللوكسيد

وهو مقشر .. موصيه عليه من مصر .. بالكويت مو موجود اللهم بس في حريم يبيعونه لكن ما أعرفهم

بالنهار

امسح ظهري بعد بالكحول وتالي أحط كريم الفيد أوت

وهذا يا طويلات العمر شريته من العطار بدينار ونص

المكان اللي شريته منه الفروانية .. يم مجمع النمران قببال البنك الوطني أكو عطار فيه مصري يبيعه

::

وتميت على هـ المنوال .. لين خلص الفيد أوت .. وكنت كل اسبوع أروح اسوي حمام مغربي بالضبط يوم الجمعة الصبح


ولي عودة

 

[دراهــم]

رد: تجربتي المصورة مع آثار حب الآثار



وقريت هني في المنتدى عن مرهم .. خذيت اسمه وسألت عنه ويابوه لي

هذا المرهم




بنقل لكم شنو مكتوب بالوصفة اللي وياه

كونتر اكتيوبكس
جيل لعلاج الندوب

::

التركيب
يحتوي 100 جم جيل على
خلاصة البصل
هيبارين الصوديوم
الأنتوين مصلبة خالية من الدهون ذوابة في الماء

الخواص
يؤدي كونتر اكتيوبكس مفعولا ملينا ملطفا لندوب الأنسجة المتصلبة والمتضخمة المؤلمة والمشوهة
كما تساعد قاعدى الجيل المصلبة الذوابة في الماء على نفاذ العناصر الفعالة بعمق إلى داخل البشرة وبذلك على تحقيق علاج موضعي قوي

دوعي الاستعمال
الندوب المتضخمة والجدر التي تعوق الحركة والندوب المشوهة عقب العمليات ، والبثور والحروق والحوادث

موانع الاستعمال
لا يجب استخدام كونتر اكتيوبكس للمرضى ذو الحساسية المفرطة ضد هيدروكسي بنزوات

::


المهم بعد ما سألت عنه

اكتشفت انه هـ المرهم حق اللي يسوون عمليات ويحطونه على جرح العملية حتى ما يسبب آثار

ملاحظة ريحته جدا جدا كريهة



استخدمته اسبوعين وما قدرت أتحمل ريحته فـ قطعته

اي نسيت أقولكم انكم بعد ما تحطونه ..وتلبسون ملابسكم .. وبعدها إذا طلعتي ملابسج تشوفين قشور طالع ولازق بالفانيلة .. يعني لبسي فانيلة قديمة

تعبت من النقل

 

[دراهــم]

رد: تجربتي المصورة مع آثار حب الآثار

اهتمامي اليومي وقت الشور

::

استخدم فرشاة بودي شوب




::


سنفرة المشمش




::

ملح الحليب ( يوكو سبا )




::

صابون للجسم مسويته وحطيت وصفته هني بالقسم ..

 

[دراهــم]

رد: تجربتي المصورة مع آثار حب الآثار

هذي الوصفة

خووووش حملة ..

انا بقولكم خلطتي اللي مسويتها من تأليفي خخخخخ

والله من كثر ما أقرأ .. قلت يا بنت اخذي اللي يناسبح .. وفعلا الحين صارلي شهر وشي عليها حسيت ان لوني رد طبيعي .. خصوصا ايدي


نبدا باسم الله

::

ماي ورد + مُرة ... ( انقعهم ليلة كاملة ) .. وبعدها أشخلها

اليوم اللي وراه

آخذ صابون الغار .. وصابونة بابايا .. بشرتهم عدل

ونقعتهم بماي ورد ( المنقع فيه المُرة ) ... ليلة كاملة ..

وبعدها طحنتهم لين صار الصابون نااااعم ..

حطيت فوقه

سفيد أب

ملح الحليب يوكو سبا

سنفرة المشمش


وحطيتهم بعلبة زجاج .. أنا حاطتها بعلبة جبن بوك الزجاج :dddds: كبيرة وواسعة ..

وخليتها على رف بالحمام عزكم الله

وكل يوم .. قبل ما أنام .. ازيت جسمي بزيت اللوز .. أنطر نص ساعة .. وأروح الحمام .. واتفرك لين أقول بـــــــس

والليفة اللي ما استغني عنها .. اللي يبيعونها في بودي شوب العصاية الطويلة .. عجيـــــبة يا بنات


ادعولي ... :krkrkr:

زيت اللوز المر



::

طريقتي للشور

ادن جسمي بزيت اللوز المر ..

انطر ربع ساعة

واحط ملح الحليب .. وافرك ظهري ..

وتالي أحط

السنفرة .. وافرك ظهري عدل

وتالي أحط الصابون اللي أنا مسويته

وافرك ظهري عدل

واوقف تحت الماي البارد .. وانشف جسمي عدل

وتالي أروح لداري .. وانظفه ظهري بعد بالكحول واحط الكريم اللي الدور ياي عليه :ggdw:

 

[دراهــم]

رد: تجربتي المصورة مع آثار حب الآثار

::


نسيت أقولكم .. جربت كريم ماجيك



شريته من عطار بالديرة بـ 5 دنانير

استخدمته لمدة اسبوع وخلص

النتيجة تبون الصج مالاحظت شي تغير ..

رغم أني شفت هني بنات شكثر مادحينه


::


واستخدمت كريم بعد شريته من الامارات

لكن للأسف مو محصلته عشان أصوره

غميضة لو قاطته لأني بدوره هني :krkrkr:

::

نتيجة التجارب هذي كلها


ان ظهري تعدل بنسبة

40 %

وإن شاء الله بستمر لين أقضي على الـ 40 % :ggdw:

::


والحين بعد البحث والاطلاع ..

قررت أني هـ الفترة أجرب خلطة جابر القحطاني اللي اقرى عنها شكثر بالمنتدى

خلطة د.جابر القحطاني

الكريمات موجوده في الصيدليه لأنها طبية...
1- الدوكين فورت للتبييض
2- المقشر ريتين اي
3- أفلون للتبييض

وراح ابدا إن شاء الله من يوم السبت .. بعد ما أضبط لي جدول زمني .. وأشترى الكريمات .. وأكتب النتايج لكم هني .. بعد شهر .. لأن شغلي يتم بالأشهر :dddds:



و...... بس

إن شاءالله يعجبكم الموضوع ..والأهم يفيدكم

 

[MassComm]

رد: تجربتي المصورة مع آثار حب الآثار

يعطييج العافية
وصج skinoren عجيب حق الحبوب وآثارها انا اذا طلعتلي حبوب بظهري او صدري احط منه اسبوع الا والحبوب مختفيه

 

[دراهــم]

رد: تجربتي المصورة مع آثار حب الآثار

MassComm الله يعافيج من كــــــــل شر

وحياج الله

 

[أمواج البحر]

رد: تجربتي المصورة مع آثار حب الآثار

الف الف شكر عالموضوع

تقريبا اغلب اللي قلتيهم استعملتهم و فعلا يابوا نتيجه

بيبي فيس ما نفع معاي لان من اول استعمال حرق بشرتي و قطعته

مشكلة بشرتي حسااااااسه لاقصى درجه

لكن تعلمت منج جم شغله يديده

وان شاء الله تصفى بشرتنا^_^

 

[دراهــم]

رد: تجربتي المصورة مع آثار حب الآثار

الف الف شكر عالموضوع

تقريبا اغلب اللي قلتيهم استعملتهم و فعلا يابوا نتيجه

بيبي فيس ما نفع معاي لان من اول استعمال حرق بشرتي و قطعته

مشكلة بشرتي حسااااااسه لاقصى درجه

لكن تعلمت منج جم شغله يديده

وان شاء الله تصفى بشرتنا^_^

هلا والله بمشرفتنا وآميـــــــــــــن الله يسمع منج :ggdw:

اي بيبي فيس انا قلت إذا نفع مع ظهري بستخدمه لويهي .. بس شنو حرقني .. شهر كاااامل حسيت اني أمشي من غير جلد _03BA:

عشان جذي اناانبه البنات ترى اهوا قوي وااايد على البشره


والعفـــــــــو وما قصرتي على الرد

 

[DeeR_MusK]

رد: تجربتي المصورة مع آثار حب الآثار

يعطيج العافيه...الكريم اللي كاتبه ريحته كريهه ترا وااااااااااايد فعال للاثار ودخلته لي دكتورتي مع الخلطه اللي وصفتها لي للتبييض و اذاله اثار حب الشباب...جاري التجريب لي خلصت اعلمكم بالنتيجه و انا واثقه عشان تدعون لي ...

 

[دراهــم]

رد: تجربتي المصورة مع آثار حب الآثار

يعطيج العافيه...الكريم اللي كاتبه ريحته كريهه ترا وااااااااااايد فعال للاثار ودخلته لي دكتورتي مع الخلطه اللي وصفتها لي للتبييض و اذاله اثار حب الشباب...جاري التجريب لي خلصت اعلمكم بالنتيجه و انا واثقه عشان تدعون لي ...

قصدج هذا

ريحته حدها لوعت جبدي ...........

اسبوعين احطه لين ما قدرت اتحمل .. من كلامج راح ارد له .. بس مو قادره :krkrkr:


وموفقـــــــــــــة بالعلاج اللي تستخدمينه

وإن شاء الله تشوفين النتايج اللي تسرج يا رب


وحياااج الله

 

[أمواج البحر]

رد: تجربتي المصورة مع آثار حب الآثار

اي صح تذكرت استعملت بعد مرهم بوريحه ههههههه صج ريحته تصرع

بس ما ادري ما حسيت انه ياب نتيجه معاي مع اني التزمت فيه

وكاهو امقعد عندي

انزين بالمره دام انج خبيره بالكريمات

شنو احسن كريم للهالات ... انا عندي هالات بس مو وايد

اغلب الاوقات تطلع لما اكون تعبانه ومنظرهم مو حلو

مع انهم ما يبينون وايد بس هم يضايقوني

ادري طولت عليج :/ بس ياليت اعرف حل لهم

ومشكوووره

 

[دراهــم]

رد: تجربتي المصورة مع آثار حب الآثار

هلا والله أمواج لا عادي أفا عليج

بالنسبة للهالات ما أدري والله ما عندي خبر فيها للأسف

بس أنا أذكر أختي كله عيونها تصير حمر .. وفيها هالات ..

فـ اهي تسوي كمادات جاي من غير سكر ( جاي لبتون :ggdw: ) وتحطه على عيونها عشان تروح الحمار اللي بعينها

مع الايام اكتشفت ان الهالات السود خفوا وااايد .. هذا اللي مر علي بالهالات ..

لكن كريمات ما اعرف

ويا ليت اللي تعرف تقولنا عشان الكل يستفيد

وحياج الله مرة ثانية

ونشوفكم على كويس :eh_s(6):

 

[MaHoNa]

رد: تجربتي المصورة مع آثار حب الآثار

يعطيج العافيه حبيبتي

 

[bent_m6eir]

رد: تجربتي المصورة مع آثار حب الآثار

مشكووووووووووووووووورهـ
والله يعطيج العافيه على نقل تجربتج
وعلى هالمجهود
:tek:

 

[kakooka]

رد: تجربتي المصورة مع آثار حب الآثار

الله يهداج ما ظل شي ما حطيتيه على ظهرج كل هالفلوس الي قطيتها جان رحتي عند عياده جلديه خاصه وبشهرين جان خلصتي وبعدين كثرة تفرك الجلد وايد مو زينه قالتي ياها دكتوره دلال التركيت حتى منعتني من الحمامات المغربيه لانها تعتبر من اوضخ الاماكن
والله كل هالحجي و40 % وما خف ظهرج للحين
الله يعينج على التعب