تاخرساعه واستلم ولدك من المخفر

[reehab]

آخر ابداعات وزيرتنا

التربية»: تسليم التلميذ للمخفر إذا تأخر في المدرسة ساعة!!
نشرة وزعتها وزارة التربية على مدارسها شددت على التزام التلاميذ الدوام المدرسي وعدم التأخير في نهاية الدوام اكثر من ساعة.. «وبعد الساعة يسلم التلميذ الى المخفر».:0bee2e8d89:
جريدة الوطن
انا لله وانا اليه راجعون

 

[reehab]

الظاهر الخبر وصل للكل

 

[Om-Bashaar]

الصراحه زين تسوي لان في اولياء امور وايد هاملين هالسالفه عندهم شنو المشكله اذا نطر الياهل وموشايفين البلاوي اللي قاعده تصير وكل مانبهتيهم قالوا تعوذي من بليس ولا توسوسين وتعقدين اليهال ويزاها الله خير على هالقرار ومشكوره اختي على اثارة هالموضوع

 

[reehab]

يبى والله حرام والله يافي ناس يتاخرون قصب عليهم
تكفون من الي يحب يخلي ولده ينقع بالشمس اكيد مافي احد
كان المفروض بدل هالقرار الي مافيه من السنع شي
تحط مشرفين يقعدون مع هالعيال لين يجون اهلهم طبعا يكون اختياري
مع زيادة معاشاتهم

 

[Om-Bashaar]

حبيبتي انا معاج انتي تقولين جذي بس في ناس ياقلبي مهملين ولا يتحملون مسؤولية ياهل يقولون لج نسينا والا راحت علينا نومه و الطامه الكبرى ان في ناس يتعاندون على حساب اليهال يعني يكون بينهم مشاكل وواحد يبي يحرق قلب الثاني بهالحاله شنو يسوون بهالاهل ؟

 

[reehab]

تدرين عاد نوعية اهل جذي هم الي تقطينهم بالمخفر
القرار هذا يمكن يوعي الاهل مع اني اشك على قولت امي الي ما يعلمه قلبه ما يعلمونه الناس
المهم ان القرار هذا راح يرعب الجهال يعني المسكين شنو ذنبه كل يوم بالمخفر
يبى جذي راح يكره المدرسه والدراسة واهله
والطامه الكبرى راح يكره نفسه لان راح يحس ان محد يبيه
ومشكوره على تفاعلج مع الموضوع
وان نطرتي علي اشوي اطلع قرارات نوريه ما فكرت فيها
بس ها..كلها على قفا الاهل عزالله لصير العن من نوريه فيهم

 

[$ صمت الشفايف $]

والله مو ماكلها الا الجاهل او الامر وتاليه

اول مقطوط عند باب المدرسه ومتاخرين عنه وناقع وكل واحد متكل ع الثاني الابو والام

وثانيا مقطوط بالمخفر آنا خابره المخفر للمجرمين يبونه يتعود ع المخافر

لا طبنا ولا غدا الشر

 

[*أم*خالد*]

سؤال ياللي موراضين على الموضوع

لي متى المناوبة تقعد تنطر الأهل ؟؟

الوزيرة ماقالت من اول مايطق الجرس قطو اليهال عند المخفر .. عطت مهله (ساعه كامله) عشان اولياء الامور يستلمون عيالهم

والمشرفين = هذيلي ابلات مناوبة مجبورين على القعده آخر الدوام واذا على الفلوس الزايده احنا ابلات العاصمة مانزلو لنا الاوفر تايم مالنا ولو بيدنا احنا نعطيهم هالأربع دنانير اللي متمننين فيها علينا بس نطلع مثل باجي البشر

يعني ساعه كاملة ماتكفي الاهل ياخذون عيالهم ؟ اذا صار شي خل تخلي الجده او الجد او العمه او الخاله تاخذ الطفل
ولا تبلش المناوبة معاها على سبة اربع دنانير والله اني اقطهم بالجمعيه بدون لا احس

 

[زلابيا]

قرارها يه في وقته الصراحه

ياما عانينا مع اولياء الامور .. والله لو اقولكم المواقف اللي تصير لنا والله تنصدمون ..

واذ دقيتي عليه قلتيله لو سمحت ولدك بروحه بالروضه صارله اكثر من ربع ساعه .. يقولج وبكل وقاحه شغلتج يا ابله ليش عيل قاعده تاخذين فلوس على المناوبه !!!!

ياااا سلاااااااااام ومن زين المناوبه . الود ودنا ما نتأخر .. يعني شنو ما ورانا بيت ومسؤوليات ؟؟ ولا بس انتوا اللي عندكم شغل !!

ساعه كامله تكفي ان يمر ياخذ ولده .. واذا عنده ظروف خل ياخذ ولده مبجر ولا لا يخليه يداوم بهاليوم !! او خل يطرش احد بداله ياخذ ولده

في اولياء امور يهبلون . مساكين تصيرلهم ظروف فجأه بهاليوم وتلقينهم يتأسفون ويتعذرون .. بس في اولياء امور لا والله ما ينفع معاهم الا جذيه

 

[م فطومه]

انا بعرف مافكرتوا بنفسية الياهل لما يروح المخفر؟؟؟؟؟؟؟؟؟؟؟



شالسالفة؟؟؟؟






وبعدين لو ان ولي الامر تاخر اكيد في عذر محد يخلي ضناه كل الوزارات والمدارس تطلع بنفس الوقت والطريج زحمة
كل واحد عندة ظروفة .. المفروض الناظرة اهي الي تقعد مع الياهل مسؤوليتها