بنات حدي مضااايقه والله من تصرفات خطيبي من رايكم افل الخطبه ؟!

[cat-girlq8]

السلام عليكم شخباركم ان شاء الله تمام

بنات والله حاولت اني انام بس ماقدرت لانه نفسيتي اليوم تحت الصفر ومو قادره انام من بعد كلام خطيبي
ادري انه في بعضكم قاري وعارف قصتي لاني اكثر من مره اكتب بس بختصر قصتي انا صار لي مخطوبه اكثر من سنه ونص
كان خطيبي وايد زين وممتاز ولحد اليوم انا امدحه بالعكس ريال قد كلمته ومحترم ومايعيبه شي بس بديت اتضايق من طريقة تعامله معاي
كل كلامه غيري من طبعج ومن تصرفاتج لانها ماتعجبني والكلام مابيه يتكرر وايد يعني اذا قلتي سالفتج لا تكررينها مره ثانيه لانج تضايقيني
اسألة التاكيد بطلي منها يعني شي عارفه جوابه لاتسالينياه
واذا تكلمتي معاي بالفون وانا ساكت لاتسكتين تحجي !! علي طاري هالشغله انتو صدف معاكم جذي ؟
شلون اتكلم واهو كله ساكت بس يقول اها واها ؟!!

بنات والله حدي مضايقه حاولت اني اغير من تصرفاتي وطبعي وماقدرت واليوم يقولي هم مره الثانيه بفكر اعطيج فرصه وبعدين انا ماقمت اثق بكلامج يعني كذا مره تقولين بتغيرر وتردين علي نفس المنوال واذا كلمتيني تنسين نفسج بالحجي

قالي افكر اذا بعطيج فرصه استمر وياج او لاء حتي احتمال الفرصه 1 بالميه !!!!
لانه مستحيل اقدر اتعايش مع تصرفاتج وحركاتج ياسلام مو انت قبل عارف تصرفاتي اول ماتعرفنا علي بعض وبعدها يوم تقدم لي قالي فيج اشياء ابيج تغيرينها بنات والله حاولت وماقدرت
شنو الحل برايكم ؟
بليزززز ساعدوني صج انه مو اول ريال ولا اخر ريال بس والله في اشياء حلوه مابي اخسره كافي اني اثق فيه وانه مو مال خرابيط
وقالي انتي شكلج ماراح اتغيرين او بالاساس ماتبين اتزوجين ريال اذا كنتي جذي عيل دوري لج علي واحد مو ريال ويتعود علي اطباعج


حدي مضايقه وماني عارفه شلون اتصرف وياه انا عمري 24 واهو 26

 

[@ام ضاري@]

رفع

 

[Patcholli]

حبيبتي انتو مالجين ولا بس كلام ؟؟

 

[غرام 20]

اي عادي انا مرات زوجي يسكت ويقول سولفي ابنام علي صوتج عاد انا اقرق لين ينام واصكره


بس مو من حقه يحرحج ويقول ماراح تتزوجين اذا هذي تصرفاتج
وبعدين شنو مخطوبه لج سنه شسالفه ????

 

[دندون ام عبود]

لو هالكلام موجه لي ماجلس معه ابد

طيب شسبب يقولك غيري طريقتك او كيف طريقتك معه بلكلام

 

[ليمونة وزيتونه]

مافهمت

 

[بوح الحنين]

شوفي حبيبتي خليك على طبيعتك وبعدين اذا موعاجبه ليه توه يتكلم وش يقول اعطيك افكر اعطيك فرصه لعبه انتي عنده وبعدها اذا هو يحبك ليش يجرحك ويحرجك بالكلام سوري حبيبتي بس انقهرت من كلامه يفكر بعد المفروض من زمان متزوجين ومخلصين مو سنه ونص وتوه يطلع العيوب خليك على طبيعتك

 

[L A T T E]

قريت مواضيعج

طبع ريلج اووفر بس بصراحة مو سبب علشان تفسخين الخطوبة.. اهوا واحد حسااااس ودقييق وطبعه غريب لكن شكله يتحمل المسؤولية.. انتي عطي نفسج مجال شوي واستخيري.. واذا صار شي وتأجلت الملجة بعد ارفضيه.. مع اني انصحج بانج ماترفضينه.. الزواج فيه مشاكل اكبر من جذي وتحمدي ربج ان ريلج اللي بقلبه على لسانه وشكله مايخش عنج افكاره ويقطها بويهج على طول، هالنوعية احسن مافيها انها ماتعشمج بكلام حب وبعد الزواج تصدمج.. وهم صعبة تخون لانه يقولج اللي بقلبه مو يسكت ويغازل او يتزوج من وراج.. ادري نصيحتي غريبة بس اذا تبين واحد صريح معاج ومايخونج اخذي خطيبج.. احنا الحريم نبي نسمع اللي يعجبنا بس لكن اهوا متمسك فيج وايد دليل انه خاطبج مجرد خطبة وناطرج ومستمر معاج بالعلاقة سنة ونص. ريلج جدي احترمي شخصيته و"سايريه" ومارده راح يطخ وبتنصدمين من التغيير اللي بيصير فيه بس اهم شي ماتعاندين.

 

[عذوٍق الوٍرٍد]

حتى لو فسختي الخطبة تضمنين يجيج رجال كااااااااامل ؟؟


كل رجال فيه عيب ..

موضوع خطيبج عادي لانه كل انسان فيه عيب وخطيبج هذا عيبه عنده قوانين جذي ..

بس الغريب بموضوعج ان صار لج مالجه سنة ونص .!!!!!!!!!


ليش شدعوة ؟؟؟؟؟؟؟؟؟؟


شنو السبب


ترى اكثر الي يفسخون خطباتهم بسبب طوووول فترة الخطبة
اهي الي تجيب المشااكل ترى

 

[أعشقه]

ع قولتك انتي كذا من اول ماتعرف عليك
اجل خليك ع مانتي عليه وركزي ع التصرفات الي هو يحبها وحاولي تسوينها عشان زوجك يحبك ويتعلق فيك اكثر
لا تقولين وش اسوي وشلون
اجلسي معه قولي له خل نتكلم بصراحه وخليك واثقه من نفسك وانتي تتكلمين معه
قولي له قولي وش التصرفات الي مو عاجبتك وتبي اغيرها ركزي عليها وحاولي تغيرينها مايبي لها شي ياقلبي
وترى الزواج فيه اشياء اعظم من كذا بس الزين الي يعرف شلون يعدل اموره ويتلاحقهاا
يعني لك معه فتره لا باس فيها سنه واشوي كفيله تعرفينه وهو يعرفك وتعرفين شلون تتعاملين معه
حاولي تكسبينه وتسوين الي هو يحبه
لا تتساهلين بالموضوع وتبينين له انك بايعته ..
حاولي تاخذين كلمات تاثر فيه اثناء الحوار تكون بصيقه المدح
والله يسهل عليك حاولي تدخلين وتقرين في المنتديات عن طرق التعامل مع الزواج
حاولي تثقفين نفسك اكثر وتكتسبين اشياء تفيدك في النهايه
وبالتوفيق

 

[Hello_kitty]

والله من كلامج .خطيبج ماخذ بنفسه مقلب وعايش الدور عليج..ومسوي روحه انه الناقد السنع بو الأطباع السنعه

وطايح فيج نقد ويهز ثقتج بعمرج ومستانس على ضعفج وانج مرتبكه وتحاولين تجارينه وكل مره يصدمج ويحطمج اكثر

اهم شي لاتعييدن سوال التأكيدات؟والله حسبت مخفر ومحقق يستجوب..عسى ماشر؟؟

انه ماني شايفه فيج طبع يعني لازم تغيرينه..عشان تعيدين السالفه او السؤال؟عادي كل البشر ممكن يعيدون السؤال او

السالفه..اهو المعقد اللي لازم يغير طبعه...وريال بيفتح بيت وحياة بيقعد يدقق وينتقد ويجرح ويهدد ويعطي فرص بعد!

حبيبتي لو اختي وتبيني انصحها اقولها تستخير وتتركه اللي اوله جذي ينعاف تاليه..واطباعه صعبه

الريال يهالفتره يكون طاير بخطيبته ويعشق حتى عيوبها ومايشوف عيوبها اصلا ومايتعامل مع خطيبته جذي الا المعقد

خلي شخصيتج قويه وثقتج بنفسج كبيره ولايهزج كلامه ونقديه عشان لايصدق عمره وايد

 

[نونه المنكوشه]

بصراحه خطيبج انسان معقد انا ماشفت فيج عيوب او انتى اللى قلتيه عن نفسج شى عادى مايستدعى انه يقول غيرى طبعج اهوه اللى المفروض يغير طبعه شنو تكلمى لاتسكتى واهوه ساكت مايتفاعل ولاتعيدين الحجى نعم @@ منو حضرته سورى بس بصراحه شخصيته اتنرفز وانا لومكانج قسمابالله اقوله انا مثل ماانا تبينى اهلا وسهلا ماتبى مع الف مليون سلامه انا مافينى عيوب علشان اغيرها انت اللى يبيلك تغير وتغير جذرى بعد شدعوه يبى الحياه تمشى اب قلم ومسطره صح مافى انسان كامل بس عاد مودعله جذى ع كل شى يدقق

 

[روان المطيري]

امبيييه انتوا للحين@@

انا اول اقولج حاولي معاه اما الحين خلييه يروح بحال سبيله
اصلاً هذا شكله مو راعي زواج بصيرلكم سنتين وانتوا للحين
ما زهقتي ما لاعت جبدج حبيبتي لا يروح عمرج ع المراكض وراه
الف واحد يتمناج

 

[ام الدرر]

خطيبج حبوبة
شايفج ميته عليه ومتمسكة فيه
وقاعد يتشرط ويعلق ويعطي اوامر وموانع
امنا بالله
شروطه بالسلوك والطلعات والاسلوب
بيصير زوجج ومن حقه يشوف الافضل لج وله
اما انه يذلج على سالفة الزواج
وانه بيعيد النظر
ونسبة النجاح 1%
وانت ماتبين تتزوجين
ومن هالكلام
هذا اللي مايرضي رب العالمين
حبوبة انت بنت ناس واهلج ربوج وكبروج عشان تروحين للي يستاهلج
خليج نفسه قويه ومعتزه بنفسج وماتقللين من قيمتها
انت حاولتي وقاعده تحاولين اكثر ترضينه بكل شي ووتحملين منه قرارات والفاظ وانتو بفترة الخطبة
(قصة اخوانه وامه والطراق )
وانا رديت عليج بموضوعج هذاك
بس للحين مو مبين بعينه
ولا متقبل تغييرج وتنازلاتج
جنه يبيج عبدة عنده وهو سي السيد
سؤال شنو الصفات اللي تقولين (خطيبي وايد زين وممتاز ولحد اليوم انا امدحه بالعكس ريال قد كلمته ومحترم ومايعيبه شي )
حياتي انا عمري مانصحت بالانفصال
بس صراحة عيدي النظر
مو شرط تطلبين الانفصال
لا عالاقل خليج جادة وقوي ثقتج بنفسج
ولا تصغرينها جدامه
واستخيييييييييري ​

 

[HUSH~]

بالمختصر . . يابعد قلبي انتي اذا تحسين انه من قبل لا تملجون وهالكثر مشاكــل . . ففليهآ احسسسسن

بس قبل لا تفلينها كوني مقتنعه الف بالميييييييية ..
ولو فكرتي انج تفلينهآ صارحيـه يعني قولي لي له انج قاعده تحاولين صج تغيرين من نفسج وهذا طبع والواحد مو بسرعه يتطبع وحتى لو تطبع مردّه يرجع لي طبعه او يمر عليه مواقف يطلع طبعه الصصصصصجي -.-

والله يقدم اللي فييييه الخيييير ;*

 

[>>مرووم<<]

دام انتي على بر ... ومو مرتاحه> فليها
اهم شي الراحه النفسيه ..لين متى وانتي بتصيرين متأزمه ><

و استخيري والله يكتب الي فيه الخير

 

[cat-girlq8]

رفع

=============

شكرا للرفع يا ام ضاري

 

[cat-girlq8]

حبيبتي انتو مالجين ولا بس كلام ؟؟

---------------------------

احنا خطبه رسميه وجم مره إتأجل ملجتي لاسباب ولا في الحسبان عمت ابوي توفت وبعدها يده توفي سبحان الله

 

[cat-girlq8]

اي عادي انا مرات زوجي يسكت ويقول سولفي ابنام علي صوتج عاد انا اقرق لين ينام واصكره


بس مو من حقه يحرحج ويقول ماراح تتزوجين اذا هذي تصرفاتج
وبعدين شنو مخطوبه لج سنه شسالفه ????

==================================

اي عادي يعني تسولفين ليما ينام مو مشكله بس انه يقولج سولفي لانه سكوتج يضايقني واهوا ساكت لا انا هني بنفجر بصراحه

اي انا صار لي سنه ونص مخطوبه بسبب ظروف وحالات وفاة الي حدثت في عائلتنا وعائلته مما اضطر ابوي وابوه تاجيل الملجه
وبعدين صج خيرره

 

[cat-girlq8]

لو هالكلام موجه لي ماجلس معه ابد

طيب شسبب يقولك غيري طريقتك او كيف طريقتك معه بلكلام

----------------------------------

معاج حق انا بلشت اطفش منه ذا دق وطنشه بسبب تصرفاته ووايد دقيق علي كل شي

يقولي الله يسلمج غيري طريقتج وتصرفاتج معاي لاني انا نوعيتي اتكلم علي طبيعتي واسولف بحسن نيه واهو يتضايق لاني ساعات اكون قايلتله سالفه ونسيت وعدت وقلتها مره ثانيه اهوا هني يتضايق
وبعدها يقولي انتي مو مهتمه فيني ماتحسسيني بالاهتمام