السلام عليكم 
اول شي انا مو متضايقة انج انتقدتي ردي بالعكس اتقبله بصدر رحب
واذا تبين نسبة مئوية عن هالظاهرة .. اوكي عطيني نسبة مئوية عن اللي يتنكرون تحت النقاب عشان محد يعرفهم !!!
" كلامج صحيح على فكرة ان في ناس يتخششون تحت النقاب لكن مسألة النسبة المؤية واحصائية شي عجيب تطلبينه !!"
لكن غلط انج لما تخلطين الامور وتربطين الحجاب بالصلاة والصيام مثلا
الحين خل اعطيج مثال واوضح اللبس اللي انتي فيه :-
أم عندها بنت كبيرة ما تصلي ولا تصوم ..
الام شتسوي ؟؟ تقدر تغصب بنتها على الصلاة
تطقها مثلا لين تموت ؟؟؟؟؟؟؟
يمكن تغصبها على الحجاب وتمنعها عن الطلعة اذا بتطلع من دونه
لكن شلون تغصبها على الصيام ؟ ما تقدر تغصبها لانها تقدر تنخش بأي غرفة وتاكل ..
شلون تغصبها على الصلاة ؟ يمكن تخليها غصب تصلي جدامها لكن في الحقيقة البنت ما توضت ومتعمدة وبالتالي صلاتها باطلة ..
وقبل كل شي الاعمال بالنيات اذا اهيا تصلي وتصوم وتلبس حجاب عشان خايفة من امها .. ماراح تاخذ ولا اجر لان هالشي لازم تسويه عشانالله مو عشان احد
شفتي الفرق عزيزتي ؟؟ فهمتي القصد ؟؟
الانسان لازم يحب العبادة ويقتنع فيها .. وبالهجوم اللي انتوا سويتوه عليها راح تكره الحجاب اكثر لان كل ممنوع مرغوب ..
يا ريت رديتوا عليها باسلوب لطيف .. المشكلة اغلبكم رديتوا عليها باسلوب جاف تكرهونها بالجفاف
لكن لما يصير البعض مؤيد لها يمكن تفكر شوي قبل لا تتخذ قرارها وتتراجع عنه ..
مشكلة لما نرد بعاطفة دون منطق ..
مشكورة يا قلبي على رحابة الصدر في تقبل النقد وهذ دليل على أخلاقج العالية
وبالنسبة لردي يبدو إنج ما فهمتي قصدي أو يمكن أنا ما وضحت وجهة نظري صح
وراح أرد أشرح ردي علشان تعرفين شنو أقصد بالضبط
وما عليه ردي طويل تحملي
لما أنتي تقولين نسبة كبيرة من المنقبت والمتحجبات يصيدونهم بشقق مشبوهة
طيب كم عدد المنقبات والمتحجبات بالكويت وجم عدد اللي ينصادون بشقق مشبوهة
خلينا نضرب مثل توضيحي يعني لو فرضنا عدد المنقبات والمتحجبات بالكويت 400,000 والفاسدات منهم نسبتهم خل نقول 2000 طيب ليش لغينا العدد لكبير من المنقبات والمتحجبات الصالحات بنات الحمايل المتربيات وسلطنا الضوء على العدد القليل من المتحجبات والمنقبات الفاسدات اللي ما يتجوز نسبة 5,% يعني نصف من المئة يعني مقابل كل 200 بنت صالحة تطلع وحدة فاسدة فشلون نضخم هالوحدة على مستوى 200 بنت
فهني الحسبة مو صح
ذكرتيني سالفة واحد مع أهله لما كان يبون يخطبون له كان يقول ما أبي أتزوج كويتية لأن كل الكويتات رايحين فيها ردت عليه أخته وقالت طيب يعني أمك وخواتك وبنات عمك وبنات خالك كويتيات>> يعني هم بعد رايحين فيها
وهم واحد قبل الغزو مسوي إحصائية يقول 90% من الكويتيات شربوا أو جربوا خمر
طيب هذي النسبة يعني تدخل العقل يعني لا كلامه صحيح ولا نسبته صح
ولو بضرب الأمثلة ما نخلص
أنزين نجي الحين لمثلي لما ضربت مثل الصلاة والصيام
أنا ما قصدت أن الأم تجبر البنت على الصلاة
أنا أقصد يعني لما نبرر ما نبي نصلي لأن المصلين فاسدين
و ما نبي نصوم لأن الصائمين كذابين ونصابين
يعني لو الحين مثلاً كل المسلمين فاسدين هل أترك الإسلام وأتجه مثلاً للنصرنيه لأن النصارى أخلاقهم أحسن من المسلمين
يعني المقياس الشرع هو ما جاء بالقرآن والسنة من أحكام مو فعل الناس ولا كلامهم
يعني لو ربي ما فرض الحجاب تتوقعين بنتحجب أكيد لا
الله سبحانه خلق الجنة والنار
وأحاط الجنة المكروهات
وأحاط النار الشهوات
يعني اللي يبي الجنة يصبر على المصاعب وبعض الأحكام مثل لصلاة فيها مشقة تقومين من عز نومج وبعز البرد تتوضين وتصلين والصوم في عز الحر تصبرين على العطش والجوع والحج بزحامه والملذات المحرمة وربي يعوضه بالجنة أفضل من اللي تركه من ملذات الدنيا بمليون مرة أو أكثر
وكلمة أخيرة يا قلبي لج ولكل أخواتي اللي للحين ما تحجبوا
لو فرضنا أنكم تحجبتوا بالدنيا وصار يوم القيامة وعرفتي أن الحجاب مو فرض هل تكونين خسرتي شيء ؟
طيب لو العكس وكنتي مو متحجبة وصار يوم القيامة وعرفتي أن الحجاب فرض من الله وأنج راح تتحاسبين على تفريطج بطاعة الله عندها شنو يكون شعورج شقية أو سعيدة ؟
وقيامة الإنسان تبدأ من موته
وفي الختام الحجاب هو لبس المسلمة فهل نتركه ونتبع لباس الكفار والمغضوب عليهم والضالين؟
