طريقة عمل العيش البلدي بدون فرن
المقادير
2 كوب*دقيق ابيض
1 كوب*دقيق قمح
3 ملاعق كبار*سكر
كيس*ونص خميرة فوريه
ملعقه كبيرة*بيكنج بودر
معلقتين كبار*زبادي (ممكن تستغني عنهم)
ماء دافئ للعجن
طريقة التحضير
هنحط في العجان الدقيق الابيض وعليه الدقيق القمح ونشغل علي سرعه متوسطة
وبعدين نضيف السكر والخميرة ونخلطهم مع الدقيق كويس ونضيف بعدها البيكنج بودر والملح والزبادي اذا متوفر ونخلطهم كويس
وبعدين نضيف الميه الدافيه شويه بشويه لحد ما تتكون عجينه بتلزق الي حد ما ضروري يا بنات ضروري انها تكون بتلزق شويه
اذا هنعجن فالعجان يبقي عشر دقايق حلوين اوي في العجان لو علي الايد حوالي نص ساعه عجن وبعد ما تتكون عندي العجينه نحطها فبوله مدهونه زيت ونسيبها تتخمر في مكان دافئ حوالي ساعه ونص
بعد ما العجينه تتخمر معانا نقسمها لكور صغيرة ونحط الكور دي في صينيه مرشوشه شويه دقيق قمح ونسيبها حوالي نص ساعه ترتاح
بعد ما سبناها نص ساعه ترتاح نبتدي نفردها باليد او النشابه مش هتفرق فالوقت ده نكون مجهزين حلة او طاسه تيفال علي نار البوتاجاز من فوق ونكون معليين الحرارة واول ما تسخن الطاسه او الحله نحط العيش اللي فردناه والنار تبقي عاليه زي ما هي
اول ما الرغيف يبتدي يعمل فقاقيع نقلبه عالناحيه التانيه
واول ما نلاقيه علي الناحيه التانيه عمل فقاقيع بردو نقلبه تاني
ونسيبه بقي يرتفع لوحده زي الصورة كده بالظبط
اول ما يرتفع كده معايه نقلبه ع الجنبين لحد ما ياخد اللون المطلوب زي الصورة اللي جايه
وده هيبقي شكله ونكمل كده بقيت الكور اللي عندنا لحد ما ننهي كل الكميه
ملحوظة مهمة: العجينه بنفرده علي شويه دقيق من فوق ومن تحت كمان النار لازم تكون عاليه عشان العيش ينفخ معاكي ونسيبه يتخمر براحته وبالهنا والشفا
