مضيعة
New member
- إنضم
- 18 أكتوبر 2008
- المشاركات
- 181
- مستوى التفاعل
- 0
- النقاط
- 0
- الإقامة
- الكويت
- الموقع الالكتروني
- www.thesecret.tv
السلام عليكم ..
إن شاء الله ينتهي وضعج الحالي الصعب على خير وترد المياه لمجاريها..
تحمليني باقرق وايد ويمكن ردّي راح يكون أطول رد.. بس إن شاء الله راح نقدر نطلع فيه بحل بإذن الله ..
ما في إنسان ما يخطئ...
والانسان لما يخطئ.. يكون في حالة غير طبيعية لأن الله سبحانه وتعالى فطرنا على الخير وأي شـــر يصدر منا يكون بسبب إبليس إللي يتحايل علينا (وهو تحدى ربه في ضياعنا).. ومهما نخطئ ونتمادى فاحنا بشر!! متى ما تبنا وردينا لفطرتنا تنمسح ذنوبنا وكأن شي ما صار...
والاسلام دين رحمة وحب ومغفرة............
مشكلتج عزيزتي - في نظري- حلها سهل ومضمون بنسبة كبيرة.. وأشوف فيها بوارق أمل كبيرة..
أتمنى تدققين معاي وراح أوضح لج قصدي وحدة وحدة...
خلي إيمانك بالله كبير.. ترى اهو سبحانه إللي قدَّر.. وهو إللي بإذنه يلطف.. ومثل ماهو يغفر.. بقدرته - قدرة الله - زوجج بيغفر بعد..
أسباب أحساسي بالأمل لج -إن شاء الله- هي:
أولاً: إيمان زوجج وقربه من الله.. كل إنسان قريب من الله تعالى يتحلى بأخلاق عالية وهو يعلم في قراره نفسه إذا غفرلج بالدنيا.. سيغفر له بالآخرة......(وأعارض بشدة رأي البعض بأنه الرجل الشرقي غيور وهالسوالف... ماأنكر.. لكن الرجل المؤمن بالنهاية حتى كرامته لله وليست لنفسه)
قال الله تعالى:((والكاظمين الغيظ والعافين عن الناس والله يحب المحسنين)) هذه هي صفاته.. لا شماته ولا عقاب ولا انتقام ولا ضغينه بالقلب... واللي يغلط عليه يكتم غيظه ويعفو ويسامح.........
وتكملة الآية شنو؟؟ ((والله يحب المحسنين)) يعني الله أمرنا بالاحسان لمن يسيء لنا.. الله وأكبر.. هذا هو الإيمان إللي يعكس لنا معاني الدين الحقيقية... إللي شوهها البعض للأسف وأعطى الغير فكرة غلط عن المسلمين بأنهم ارهابيين ونفّروا العالم منا.. ومن دينا وبسببهم تطاولوا على نبينا حبيبنا لأنهم عكسوا صورة غلط عن رسالته!
خليني أرد للموضوع الحماس أخذني بعيد...
المهم .. حسب كلامج فإني ألمح في زوجج هذي الأخلاق فتفائلي...
النقطة الثانية: إنه عنده قدرة على الصبر.. وشواهد قصتج وضحت بأنه صبر على أخطاء سابقة مثل معاملتج القاسية لأهله أوصبره على أخوج إللي يستفزه.... الخ.. باختصار: فيه صفة التحمل والصبر وهذا شي لصالحج..
ثالثاً: طيب وله سوابق تثبت حنيته.. يحبج وشاريج من البداية وتحدى الظروف علشان يرتبط فيج.. وبنى هالاسرة على الحب والتضحية علشان يشوفها تكبر.. فمن الصعب عليه إنه ينهيها بقرار الانفصال.. والدليل إنه ما تسرّع فيه.. وأعتقد إنه لايزال يراجع نفسه فيه.. وبقدرتج تساعدينه على اتخاذ قرار لصالحج وصالح اسرتكم.. ودام يحبج صدقيني قلبه بيحن ويصفى لكم.. وهالشي سهل جداً إذا عطيتيه الثقة والأمان وإن شاء الله انتي قدها..
رابعاً: يهمه موضوع السمعة الطيبة والدليل إنه بيستر عليج علشان يحافظ على سمعتج وبالنهاية هي سمعته بعد وسمعة عياله مستقبلاً.. واعتقد هالشي له تأثيره عليه لأنه يفكر 1000 مرة قبل أن يخطي أي خطوة يمكن تأثر سلباً على السمعة أو تخلي الناس تشوفكم لا سمح الله بعين الشك والريبة وإن الناس بطبيعة الحال بتفسر الانفصال بتفاسير اهو ما يرضاها على نفسه أو عليكم..
خامساً: إحساسج الصادق بالتوبة النصوح.. لاحظي إنج كتبتي القصة بكل تفاصيلها بالنت أمام العالم كله.. ممكن أي شخص يقراها من قريب أو بعيد راح يعرف انتي منو.. هذا دليل اندفاع صادق للاعتراف بالخطأ وهذا معنى آخر للتوبة.. بالرغم من إن الشكوى تكون لله أحسن من تكون للعباد إللي ما لهم حول ولا قوة.. لكن هم الانسان يبقى مخلوق اجتماعي ضعيف ويلقى في مشاركة الغير العزاء لآلامه.. المهم التوبه هذي راح تحسسج برضا رب العالمين عليج وبالتالي برضا عن النفس.. ولما تنظرين لنفسج بعين الرضا راح تتعاملين معاها بإيجابية.. والإيجابية مع النفس جداً مهمة لأنها راح تغير حياتج وتفتح لج أبواب كبيرة من الخير.. وتنحل كل مشاكلج لأن الله ما يخيب رجاء العبد فيه....
سادساً: الحج....... هذا بس تقدرين تعتبرينه أكبر الآمال.. وفيه الحل الأكيد لمشكلتج: عند أول نظرة للكعبة...... الدعاء مستجاب... عندج خبر؟!.... وبعد.. عندج يوم الوقوف بعرفة.. في رواية تقول فيما معناه إن إللي يوقف بعرفة ويدعي دعاء ويشك في قبول الله له... فإنه كأنه ما حج!!!
طبعاً مو بالمعنى الحرفي ما حج.. بس الرواية فيها معنى مجازي وتعبير بلاغي (أبلات العربي وينهم خل يشدون حيلهم بالشرح معاي) يقصد منها التأكيد على قبول واستجابة الدعاء بعرفة.... الحج هذا راح يصلح أشياء كثيرة... حتى زوجج راح تهدا نفسه وراح يحس بالأمان وبتنبني الثقة من يديد وينسى كل اللي فات... صدقيني كلمة " حج " كلمة تهز الكافر وتحط مليون علامة استفهام بعيون الديانات الثانية.. والغرابة من أن المسلمين باختلاف أجناسهم وطبقاتهم ومذاهبهم يتوحدون جدام الله تعالى ويتناسون خلافاتهم (وشرهم وإرهابهم) ويتآلفون لتأدية المناسك...... وعليك بالحكم.. إذا الله حط بهالكلمة سر يخوّف الكون!!.. شلون ما يخشع ويخضع لها قلب زوجج؟.. وهو إنسان مؤمن وخيـِّر وله مواقف مشرفة جداً معاكم..
وبالنهاية كل قضاء وقدر يكتب على الإنسان ترى الله قسم له فيه بالخير.. والله وحده يعرف وين يحط حكمته..
أظن إن الحكمة -والله أعلم- في إن غلطتج هذي.. فيها الصالح لج وله ولعيالكم إن شاء الله..
خل أقول لج ليش....
يقول المثل.. "رب ضارة نافعة" ....
لو انتي ما غلطتي هالغلطة الكبيرة.. كنتي راح تستمرين في غفلة عن حبه وعطاءه وتفانيه.. وتستمرين في معاملته بجحود.. أو بلامبالاه علشان لا أكون قاسية.. لكن لأن الله يحبه ويبي يريحه في حياته.. صار إللي صار علشان يكون درس وعبرة...
والله سبحانه يقول: ((وعسى أن تكرهوا شيئاً وهو خير لكم))
الحين... والحمد لله على كل حال.. حسيتي فيه وتولّد الاحساس اللي المفروض يكون من زمان بالحب الحقيقي والمشاعر الطيبة اللي يستحقها زوجج...
فعلاً حكمة الله في تسيير الأمور ما نشوفها إلا إذا تمعننا..
على فكرة ترى آنا مو متدينة..بس ختمت القرآن كم مرة.. وأحبه وأؤمن بكل حرف فيه.. وعندي اطلاع معقول بالدين الاسلامي ومذاهبه كلها تقريباً.. وفوقه شوية قراءات بسيطة على باقي الديانات.. (بسبب الفضول والمقارنة بين الأديان)
وعلى فكرة ثانية: (وللجميع) ترى مو من حق أي شخص مهما كبر إيمانه أو قل.. إن يلومنا على أخطاءنا أو يحاسبنا عليها لأن الله فوقنا وهو الحسيب الرقيب الوحيد.. وبعدين منو منا ما يذنب سواء ذنب صغير أو كبير جان الله ما حط جنة ونار!!!!.. (كافي النميمة والحش اللي ما أصدق إن في مرة بريئة منه!!) وإللي بيتكرم بشي ويأمر بمعروف وينهي عن منكر فمن الممكن يوجه وينصح بكلمة طيبة... إذا الرسول عليه ألف الصلاة والسلام ما كان يحاسب الناس وحتى الكفار منهم واليهود كان يعاملهم معاملة طيبة ويرغبهم بالدين بحسن خلقه.. فإحنا منو علشان نتشمت بأخطاء احنا مو معصومين عنها أو نحاسب الناس قبل يوم الحساب؟ (((البنت عندهابوادر توبة ليش تحبطونها وتاخذون ذنبها.. هذا الاسلام في رأيكم؟؟؟؟؟؟)))
وعلى فكرة ثالثة... قلتي في رسالة سابقة تحسين انج انانية علشان بالنهاية تبينه لج وما تبينه يتزوج وحدة غير.. أقول لج هذا شعور طبيعي وإنساني ولا فيه أنانية لأن الإنسان مفطور على تمني الراحة والأفضلية.. ومن حقه طبعاً لأنه المخلوق السامي اللي ألله فضله على المخلوقات وسجدتله الملائكة واللي الله خلق الجنة علشان يمتعه فيها يوم القيامة... وأكررها.. مو أنانية.. والله يلوم اللي يلومج... وحتى أي شخص لو كان بمكانج يطمح بالمسامحة وإنه ما يخسر الحياة الحلوة اللي تليق بإنسانيته..
وعلى فكرة رابعة.... ريلج معدنه ذهب خالص والله يهنيج فيه.. بس.. آنا ما أشوف إنه عملة نادره أو رجل خارق للطبيعة.. بالعكس رياييلنا كلهم فيهم الخير والبركة... وكلهم "أطفال" كبار..:wqedqw: بس البعض منا.. شوي.. شوي.. شوي.. شويووووووووووووووووونة............ ما يعرفلهم
أدري ألفت كتاب..:ch12: بس ما عليه توني يديدة بالمنتدي ومنطلقة بقوة من الوناسة ! :dddds:
راح أدعي لج بالتوفيق ومتفائلة لج وايد... و إن شاء الله إذا انحلت مشكلتج.. إدعي لي وياج يتحقق إللي في بالي.. ترى الله يستجيب دعوة المسلم لأخوه أكثر من دعوته لنفسه...
ختاماً.....
أكبر جرح بالكون .. يهون... ويلتئم ويبرى والأيام كفيلة برخاء سدائل بالنسيان.....
وما الانسان إلاّ اشتقاق من الأنس و النسيان ....
قلبي معاج...
