صبحكم الله بالخير والبركه
صيام مقبول بإذن الله ...
والله مادري شلون أبدي بالمشكله أهي مو مشكلتي أنا إهو شي يسوونه الناس من حولي وأنا اتضايق والله واتحسر على حال المسلمين اليوم وخصوصا الشباب ...
أنا عندي رفيجاتي الله يهديهم تاركين الصلاه خير شر ..
وفي بنات يأخرونها وفي بنات يصلون فرض وفرض ..
وعندي رفيجه الله يهداها انصحها ولا أكو فايده فيها ..
كله باجر باجر ..
قلت لها إنتي ضامنه عمرج لي باجر ؟؟
ضامنه انج ما تموتين ؟؟
تقولي لا أن شاء الله ما يصير لي شي !!!
وأسأل الثانيه حبيبتي ليش ما تصلين ؟؟
تقولي مادري !!
قلتلها شنو مادري ؟؟؟
باجر لي قابلتي ربج وسألج عن صلاتج بتقولين له مادري ؟؟
ووحده كانت تقرا الأبراج قلتلها حرام صلاتج ما تنحسب 40 يوم !!
تدروون شقالت لي ؟؟؟
(شــــدعـــوووه أنـــا أصــــلــي) !!!!
صراحه عورني قلبي عليها وعلى تفكيرها ..
والله شي يفشل بنت طول وعرض مو قادره تجابل سيادتها 5 دقايق !!
الحين طول اليوم مجابله بي بي أم وواتساب وتويتر وانستقرام دقيقتين متكيسله تصلينهم !! والله صج ما تفتشلين من نفسج ؟؟
وغيره وإيد من المواقف
والمصيبه أن الأغلب مو مهتمين !!!!
يا جماعه هذي صلاه هذي عمود الدين إذا أنصلحت أنصلحت بأجي الأعمال !
والحين إحنا بشهر الخير والرحمه والمغفره وهم ما تصلون !!!
تقعدون اتجابلون المسلسلات 24 ساعه ودقيقتين حق ربكم اللي خلقكم وانعم عليكم نعم لا تعد ولا تحصى مالكم خلق تصلون وتشكرونه !!
صراحه شي مخزي ...
شي يعور القلب ...
لي تكلمت يقولون لي شفيج صايره داعيه !!
صراحه عقليه بعض الناس مادري شلون صايره
يستهزؤون بالمؤمن واللي ينصح ويعظمون الفنان والمطرب والمغني !!
أنا مو داعيه .. بس ربي أمرنا بالنهي عن المنكر والأمر بالمعروف وكوني انسانه مسلمه فمن حق ديني علي أني انصح إخواني وخواتي بالإسلام
صراحه وصل حالنا لي الأرض .. لمن تشوفون شباب آلامه ومستقبلها جذي تفكيرهم وأسلوب حياتهم صراحه تخاف من اللي ياينه بالمستقبل ...
ترا والله الصلاه ما تأخذ من وقتكم شي ...
لا تحطين أبالج أن بصلي عشان أريح ضميري وارتاح .. لا !! قولي أبي اصلي لأني أحب خالقي وصانعي الله سبحانه وتعالى ..
الحين لي حبيتي شخص وتعلقتي فيه مو تحبين تكلمينه وتركضين حق التلفون إذا دق عليج ؟؟؟
فما بالج رب العالمين الخالق الرازق الرحمن لي سمعتي الآذان يقولج حي على الصلاه حي على الفلاح ؟؟
ما ودج تقابلين ربج بنفس مطمئنه ؟؟
ما تبين تشوفين وجهه سبحانه وتعالى ؟؟
ما فكرتي باجر لي انحطيتي بقبرج بروحج بالظلمه شنو بتسوين؟؟
منو بيكون معاج ؟؟
أمج ؟؟
أبوج ؟؟
أخوج ؟؟
أختج ؟؟
صديقتج ؟؟
زوجج ؟؟
منوووووو ؟؟؟؟؟
محد معاج غير عملج الصالح ...
لا تغرج الدنيا والتكنلوجيا والتطور والخ والخ ...
ترا برمشه عين أطيحين ميته ...
لا تقولين توني صغيره ...
والله العظيم تقريبا هالسنه 3 أشخاص أعرفهم ماتوا بحادث سياره وأهم طالعين من البيت وأهم توهم بأول شبابهم !! الله يرحمهم ويرحمنا برحمته ...
لا تغرج صحتج ..
لا يغرج مالج ..
لا يغرونج أولادج ..
ما تسمعين أسماء الوفيات بالأخبار ؟؟
هل تتوقعين أن هالاشخاص كانوا يدرون متى يموتون ؟؟
أكيد لا ...
وأنتي نفس الشي حبيبتي ...
في بنات أكبر همهم شلون أصير بيضه شلون أصير جميله شلون أضعف شلون امتن شلون أرضي زوجي ....
بنات الله يخليكم خلوا تفكيركم أعمق من جذي
لا تقولين أنا أعيش الحياه مره وحده !!
لا يا قلبي الانسان يعيش أكثر من مره
حياته في بطن امه
حياته الدنيا واهي أهم مرحله ويتحدد مصيره
حياه البرزخ
وحياه البعث والحساب
والحياه الخامسه أهي الحياه الآخره ومصير الانسان يا جنه يا نار
والله أنا خايفه على إخواني وخواتي في الله ...
معاصي معاصي معاصي .....
مواعد شباب وبنات وسوالف حبيب وحبيبه ...
حف حواجب ...
حش وغيبه ونميمه ...
أكل ربا ...
التكبر ...
الغش ...
التاتوو ...
وصلات الشعر ...
الجذب والنفاق ...
المجاهره بالمعصيه ...
سماع الأغاني ...
الفل ميكاب ...
ووايد معاصي تصير جدامي والله يضيق خلقي ..
لا تقولون صايره عليكم داعيه جني ما اسوي غلط ومعاصي ..
أنا ما أقول أني ما جذبت أو ما جاهرت أو ما وصلت شعر أو ماحفيت أو ما حشيت .. كل هذا سويته ...
بس والله ظميري يانبني وأرجع أتوب وإحاول قد ما أقدر أني ما أعصي ربي ... واحمد ربي وأشكره على هالنعمه
والله يا جماعه في ناس من كثر ما أهم مهمومين من تشوف ويوهم تقول انهم خلاص ياسين من الحياه ولمن أسألهم تصلون ؟؟ يقولون والله ساعات ...
الحين تبون ترتاحون بحياتكم وربكم ورب الحياه هذي كلها ما تعبدونه ولا تشكرونه ؟؟ شلون تدعون ربكم أن يسهل عليكم وييسر أموركم وأنتوا ما عطيتوا دينكم حقوقه !! شلون تدعون ربكم باللي تبونه وتسوون اللي يغضبه ؟؟ يعني لو وحده سوت فيج بلاوي ومصايب لو سألتج بيوم وطلبتج هل ممكن تلبين لها طلبها ؟؟؟ أكيد لا ؟؟؟ فهمتوا قصدي ؟
فما بالكم برب العالمين .. ترا بدقيقه قادر إنه يمحينه ويبدلنا بقوم أحسن منه بس ربي رحيــــــــــم ويمهلكم ...
حبيباتي خلوا صلاتكم أهم شي بحياتكم والله بتشوفون حياتكم سعيده وبترتاحون راحه نفسيه عجيبه
ما شفتوا برنامج الشيخ فهد الكندري على الوطن ؟؟
شوفوا يهال صغار حافظين القرآن الكريم وأهم ما يتكلمون عربي !!
تدرون شنو يعني ياهل ما تعدى 10 سنين يحفظ كتاب أكثر من 400 صفحه بلغه مو لغته !! واحنا حتى القرايه مالنا خلق !!
وغير واحد مصري فيه توحد ووحافظ القرآن مشالله
وغير الفقراء اللي قاعدين يحفظون القرآن ...
تدرون ليش ؟؟
من حبهم حق الدين وحق الله سبحانه ..
واحنا ربي منعم علينا بالصحه والعافيه ونستكثر الصلاه !!!
أنا طبعا مو قصدي عن الكل ! أنا قاعده أتكلم عن المهملين بصلاتهم وعبادتهم وهالنماذج متكررين وإيد حوالي ...
ومن طرف ثاني في ناس الله يهديهم ما يعرفون ينصحون !
تلاقونهم يهجمون عالواحد وينصحون بأسلوب همجي !!
فبالتالي تلأقون الطرف المتلقي يرفض الفكره ويعاند زياده !!
ترا النصيحه لها آداب ..
وحببوهم بالصلاه والعباده مو تقولون لهم ترا تروحون النار ترا تتعذبون وترا وترا ...
أنا ترا ما أحب أتدخل بالناس بس الدين النصيحه وأحب إخواني وخواتي في الله وأنا أقرأ عن عذاب القبر والموت ويوم القيامه والنار ووالله أخاااف علييكم لا تتهاونون بهالشي ترا والله معصيه عظيمه وبيي يوم ما ينفع فيه الندم لا تغركم هالدنيا الفانيه والله حدي متضايقه رفيجاتي أحبهم وأبي أشوفهم بالجنه أن شاء الله والله اتضايق على اللي يسوونه ...
أنا مو يايه انكد عليكم وأخوفكم وأنا ما أقول جابلوا سيادتكم وأقروا قرآن وإنسوا الدنيا
لااا بالعكس طلعوا روحوا استانسوووا وضحكوا واستعبطوا بس الصلاه الصلاه الصلاه لاااا تتركونها ... ماتدرون بأي ساعه تموتون ...
أتمنى موضوعي ما ينقل للقسم الإسلامي
والله ماني عارفه شسوي حق رفيجاتي
وربي يهدي الجميع أن شاء الله واللي تبي تضيف شي حياها الله
وياريت اللي تعرف ناس مهملين بصلاتهم انها تنبهم وتوعيهم وتنصحهم ولا تقولين فشله أو استحي ما تدرين يمكن بكلامج يتأثرون وتنصلح صلاتهم وينصلح حالهم ولج الأجر أن شاء الله
ومشكورين حبايبي ..
