Ξღ سمعتي قصة خطبة او زواج غريبة؟؟ تعالي ღΞ

[أم علاوي حبيبي]

يعطيج الف عافيه اختي ام فيصل

 

[**حلوة ودلوعة**]

وهذي قصة قريتها...ونقلتها لكم >>>>للعضة والعبرة


كان فيها رجال من عايله ومنصبه مرموق ووسيم وجامعي يعني فيه مواصفات تتمناها اي فتاه وكان متزوج من فتاه اقل منه في كل شيء مش مكمله تعليمها واقل منه في الجمال ويمكن اهتمامها بلبسها قليل بس ست بيت وطييييبه ومن الصفات اللي يحبها الرجل
المهم اخو الرجال دا كان متزوج من واحده جميله وجامعيه وكشخه وتشتغل مدرسه وكانت كل يوم في الصباح تمر عيالها على سلفتها عشان تهتم فيهم وهي راجعه من دوامها تاخد عيالها وكمان غداهم يعني كانت سلفتها دي تطبخلهم
وفي يوم قالت زوجة الاخ التاني اللي هي مثقفه لزوجها انا لا اعرف ليه اخوك صابر على زوجته يعني هو احسن منها في كل شيء وممكن ياخد الاحلى منها وانا عندي له عروسه صديقتي في المدرسه وجميله وتناسبه والمهم فضلت تزن على زوجها و زوجها بدوره فضل يزن على اخوه و اخوه رافض نهائي ويقوله انه يحب زوجته وهي ماقصرت معاه في شيء لكن مع الالحاح الرجل وافق على خطبة الفتاه وكلموا اهل البنت بالفعل وحددوا الشوفه الشرعيه وكل دا و زوجته المسكينه معندهاش علم وقبل لا يروح الرجل مع اخوه للشوفه الشرعيه اخبر زوجته وفضلت زوجته تبكيييييي من القهر وتسأله عن الاسباب وتسأله اذا قصرت معاه في شيء وهو ساكت يعني معندوش جاوب المهم طلع مع اخوه وخلاها وفي الطريق وهما رايحين لاهل البنت قال لاخوه انا رافض الزواجه خليني ارجع لزوجتي انا مش قادر انسى دموعها وهي ماقصرتش معايا طول عمرها حاول اخوه يقنعه دون فايده قاله احنا كلمنا اهل البنت وكدا تفشلنا ولكن الرجل اصر فما كان من اخوه الا ان هو راح وشاف البنت وعجبته وملك عليها وجابها ضره لزوجته الجميله , يعني شوفوا الزوجه دي كانت تسعى لخراب بيت سلفتها عشان عيون صديقتها لكن الصديقه ما ترددتش في خراب بيتها

سبحان الله

تستاهل اللي جاها واكثر

ومشكورة يا قلبي

 

[**حلوة ودلوعة**]

أول سالفه يا طويلة العمر اهي سالفه رفيجة أمي , كانت دايما أمي تسولف لنا هالسالفه

الله يسلمج هذي الانسانه خطبها واحد بس اهلها رفضوه والظاهر ان المسكين كان متيم و ساكت :eh_s(22):

بس المهم انها تزوجت غيره و يابت بنت و و لد و لكن ما الله كتب انها تكمل مع ريها وانفصلت

عقب ما انفصلت تقدم لها نفس الانسان اللي كان خاطبها قبل بس هالمرة اخوها وافق و زوجها اياه

و على قولة ريلها " انا تزوجت عايله مو مره " :ioljnmlk:

لانه تزوجها و ربى ولدها و بنتها و خذا الخدامه معاهم بعد

هههه يحليله خوش ريال :dddds:

عاد يوم حملت حلف ان يسمي الياهل اذا كانت بنت نفس اسم مرته و اذا كان ولد نفس اسم اخوها اللي وافق على زواجهم

و فعلا يابت بنت و سماها على اسم مرته من كثر حبه لها >>>> هالبنت توها تزوجت

بس الغريبه ان يوم مرته اسألته شنو اللي جذبك فيني
7
7
7
7
7
7
7
7
7
قال لها ريولج :krkrkr:

لان ريولها كانت وايد كبيره مقاسها 41

بس اللي يضحك اكثر ان انا ما عمري شفت هالمرة بس امي تشوفها بالمناسبات

يعني هالسالفه صارلها 26 سنه بس قبل كم شهر كان عندنا مناسبة و كانت يايه تبارك و أول شي طاحت عيني عليه ريولها :krkrkr: ​

خوش سالفة
:krkrkr::krkrkr::krkrkr::krkrkr:

 

[**حلوة ودلوعة**]

مره وحده كله تكشخ و اهيا رايحه الثانويه و حالتها حاله و تسوي الشعر يعني اسكت ولا احد يطل اب ويها .. المهم مره احترق شعرها فراحت المدرسه كشتها كشه مع ان شعرها ناعم .. و الهاليوم شافها اخو رفيجتها واقفه مع اخته بالهده و قال ابيها..مني مناك و اهيا ماسكه عمرها >>مزيون
.. بس خلصت امتحاناتها و خطبها >> الضاهر انعجب اب كشتها .. و تزوجو و عاشو حياة عاديه >>مابي اجذب و اقوووووول سعيييييييده

المهم البطله بهالقصه يا طويلات العمر انا>> ام كشه محروقه

:dddds::dddds::dddds:

هههههههههههههههههههههههههههههههههههههههههههههههههههههههههههههههههههه
ماني قادرة اسكت
مت من الضحك على تعليقج

الله يهنيج ويسعدج

 

[**حلوة ودلوعة**]

مشكورة ام فصول

ويعطيج الف عافية

بليز بنات كملوا

 

[الراسيـ؟ـه]

قصص حلوه

سبحان الله نصيبك يصيبك :>

 

[لؤلؤية]

حياكم الله يا بنااااااااات
وان شاء الله ابحث لكم عن قصص جديدة

 

[Toffeeya]

وينج ام فيصل من زمان عنج
ولهنا عليج و على قصصج الحلوة

ناطرينج على احر من الجمررررررررر

 

[الله معايا]

بنات هذه قصة خطبتي انا


مره كنت طالعه مع رفيجتي ومن الصبح وكل مره نضيع الطريج في دخله مرينا مع انها وايد قريبة منا بس سبحان الله المهم اخر شي اقولها خلاص نروح شرق وخلاص يعني صج نصيب سبحان الله بعدين واحنا نتمشى مر واحد تحرش فيني ما لفيت كلش بعدين الي معاه مر جنبي وهم تحرش فيني والثاني بعد ما حقرته راح يكلم رفيجتي فقلت الي يتحرش فيني روح للثانيه انا وخر عني لاني ادري انه رفيجتي راح تزفه هي ملسونه شوي

المهم والا الاول يقولي شنو انا مو ريال مو عاجبج ما تشوفيني اكلمها عشان تقوليله روحلها
قلت لا مو ريال ودخلت المحل
المهم كلم رفيجتي وقالها ضروري ابيج ولا يقولها ابي اخطب رفيجتج الي اهي انا بعدين صار يحن ووايد اصادفة بالشارع وبط جبذي وين ما اروح القاه بويهي ويي يتكلم وحقران لين اخر مره قالتلي رفيجتي خلاص قوليله انج مخطوبة ولما كلمته من التليفون ولا اهو حسباله اني موفقة بس على طول قالي عندي رفيجي يبي يسالج سؤال لانه صادف رفيجه معاي بنفس الجامعة بس كلمت رفيجه قتله نعم قالي بس ابيج تساعديني في اوراقي قتله اوكي بس بشرط توخر هذا عني بعدين لما شافني مات علي
وقالي انه يومها رد رفيجة يمدح في جمالي وولد عمة مقهور اشلون بنت تزفةويقول بس كنت بشوف شكلج

هذا لانه الشباب يحبون الي تزفهم والله
ترا انا خالتي زافة زوجها قبل الزواج بعد وهم تزوجها
هههههههههههههههههههه
وهذا ريلي الحين يعني تحرش فيني رفيجة وولد عمه بعدين وخرهم عني وحبني وتزوجنا
سبحان الله
ما شاء الله

 

[لؤلؤية]

وين قصصكم يا بناااااااااااات

؟؟؟؟؟؟؟؟

 

[Artya 【ツ】●]

ما عندي شي أقوله

للرفـــــــــــع

 

[& حكاية حب موعود &]

وين البنات الحلوات
كملو قصص

 

[BaTTy]

خل اقولكم قصة وحده بس عاد ركزوا لووول
شوفو هذي وحده بتزوج ولدها و قعد تدورله و كله ما يصير نصيب
المهم قالت حق كذا وحده من ييرانها و معارفها انه شوفولي حق ولدي
عاد امي كلمت امها تصير لنا اهيا و قالت لها حياهم
و بنفس الوقت وحده ثانية كلمت ام البنت و قالت لها انه في ناس بيخطبونها
و وحده قالت حق ام الولد انه اعرف وحده و جذي خوش بنية جان تقولها ام الولد نطري خنشوف لانه في وحده بنروح نخطبها اذا ما صار نصيب نشوف الي عندج
و يوم خطبوها طلع الولد كان له علاقه بالبنت و كانت تحبه بس انه تزاعلوا مادري على شنو و انفصلوا و خلاص كل واحد راح بطريج بس يوم ياا خاطبها و اهوا ما يدري مادري الظاهر حنت قلوبهم ما قالوا لا و تزوجوا :>
الغريب بالموضوع انه كل هالحريم الي بيدرونله مره كلللللللللللللهم راحولها اهيااااا
يعني يوم ام بالبنت قالت انه في ناس بيخطبونها كان اهوا نفسه الي تكلمها عنه المره
لووول سبحان الله صج نصيب
يعني يمكن لو ما وافقت جان يالها من طرف وحده ثانية
اهم شي فهمتوا انتو ادري لويه
و اهما الحين الحمدالله متزوجين و عندهم عيال

 

[سرقت النوم]

آنا عندي قصه ...

في مره واحد و رفيجه ...

يراقبون وحده من البيت للجامعه و من الجامعه للبيت ..
لأن الواحد اللي مع رفيجه يبي يخطبها .. و إهم من نفس القبيله ..

البنت ملكة جمال ...

و قعدو 3 أشهر يلاحقونها من مكان لمكان ... بالجامعه

في يوم من الأيام لاحظ الواحد إن في ريال يتحرش بالبنت ...

يلحقها بالكليه و يحاول يكلمها .. و إهي ما عطته ويه مو ليه ...

المهم ..
اللي كان بيخطبها ما تحرك و لا سوا شي للي يضايقها ..

اللي تحرك رفيجه ( و إهو رفيجه من عمر من أيام الإبتدائي و من نفس القبيله)
راح و تهاوش مع الريال اللي يتحرش بالبنيه ...
قاله ليش تكلم إختي ... خاف اللي يتحرش فيها و إنحاش ...
البنت راحت ... أول ما شافت الهوشه...
و اللي بيتقدم لها تقدم ... و رفضوه ..
و قعد سنتين يتقدم لها .. و أهلها يرفضون مع إن ما يعيبه أي شي ...
و البنت ولا تدري بالسالفه ...
و عقب ما يأس الي يبيها .. قاله رفيجه آنا يا فلان بتقدم لها ...
و فعلا تقدم لها عن طريق أهله و خواته .. و على فكره كان مطلق ... سبق له الزواج ..
و سبحان الله الأهل وافقو بدون تردد مع إن خطاب هالبنت وااااايد ...
و إهي محترمه و الكل يتمناها ...
و عقب الزواج ..

قالها تذكريني ...
قالت لأ ..
قالها آنا الي تهاوشت مع واحد بالكليه كان يضايقج و قلتله ليش تحرش بإختي ... و ترا ىنا و فلان اللي خطبج كذا مره ربع من عمر و كنت أراقبج معاه بس بدون لا أفكر بالزواج لأني تعقدت بعد تجربتي الاولى..
قالت إيه ... تذكرتك ... بس ما ثبت ويهك لأني ما اعرف أحط عيني بعين الرياييل و إنحشت بسرعه ..
بس دعيت الله ان الله يرزقني بواحد شهم مثلك ... يفزع لأي بنت و يقول إنها إخته ...

و سبحان الله ... كان يراقبها مع رفيجه ... خذاها إهو ...

و إهي دعت له بالتوفيق و إن الله يرزقها مثله ..
والله ما خيب أملها و رزقها فيه ...

 

[سرقت النوم]

زلابيا .... دعيتلج بهالليله المباركه الله يجمعج بنصيبج ...

 

[وجه القمر]

يعطيج الف الف الف عافيــــــــــــــــــــــــــــــه ياام فيصل على قصصج الي اكثر من رائعه

 

[** شيخة **]

وااو الموضوع رووعه بصرااحه

اناا مو متزوجه ادعوولي الله يرزقني بالزوج الصالح ..

بقولكم جم قصه ..

اول قصه بوحده نعرفهاا واهي قالتهاا

وحده تصيرلهم خذت صوورتهاا كان واحد بيخطبهاا وشاافهاا وقال لاا هذي صغيره وجذي

وعقب الاصبي رااح وتزوج وصار عنده اعيال وصارت مشااكل وطلق مرته

والبنت الصغيره تزوجت سنه يمكن وتطلقت بس ماصار عندهاا اعيال وتمت 10 سنين تقريباا ترفض كل اللي يخطبوونهاا

وكانت تحب واحد واهلهاا يرفضون المهم اهلهاا وافقوو على هالشخص وقامت تجهز للملجه

جاان تحلم حلم انه تفسيره مالهاا نصيب مع حبيبهاا وبنفس اليووم خطبهاا اللي خطبهاا يوم كاانت صغيره وتزوج وطلق

ووافقت عليه والحين متزوجه صاارلهاا 4 سنين وعندهاا اعيال منه ..

سبحاان الله نصيبهاا عقب اكثر من 10 سنين رد وخذااهاا ..

يووم قالت لناا السالفه حسيت جسمي كله كش صج سالفتهاا غريبه الله يهنيهاا ..

وفي سالفه ثاانيه قالوولهاا لي

كانت في وحده اهي الله يستر عليهاا عندهاا سوالف

وشاافت وااحد وحبته وتمت تلااحقه واهوو ماادب وطلعت كل شي عنه

لين مره انطرته يووم طلع من بيتهم بسياارته ورااحت ودعمته

وقعدت تبجي وتسووي سوالف وصاارت بينهم قصه حب وتزوجوو ..

الله يهنيهم

 

[قهوة برية]

خووووش قصص ام فيصل

عاد احب سوالف الأكشنات قبل الزواج


يارب ارزقنا وبنات المسلمين

 

[bint_looda]

احب هالموضوع صج استانس عليه ... يالله نبي بعد بعد :ggdw: :ggdw:

 

[جوك احلى جو]

يعطيج العافية ام فيصل على هالقصص ...



خل اقول لكم قصتي
عاد انا قصتي قصة و ليلحين ما خلصت
و الله يستر من نهايتها !!

الله يسلمكم انا و رفيجتي توظفنا بنفس اليوم بنفس الفرع
و كان فرعنا اغلبيته بنات الا اثنين شباب كويتييين و الباجي لبنانيين
المهم
رفيجتي طيحت الميانة ويا العموم
انا امي قبل لا ادش البنك قالت لي ايااااني واياااااج تتغشمرين ويا شباب البنك ترى مو ويه تغشمر !!
المهم كلمة امي معلقتها باذوني
كل ما طلعوا موظفين فرعنا طلعة غدا كلهم ويا بعض انا الوحيدة الي ما اروح
و كل ما تيمعوا عقب الدوام و راحو ستاربكس انا الوحيدة الي ما اروح
مع انه رفيجتي تحن علي تحن علي بس ماكو امي ما ترضى
و هم اذا شفنا احد من شباب البنك برا ولا جني اعرفهم ولا جني اشتغل معاهم !!
المهم
يالنا موظف يديد
هالموظف رفيج واحد من الاثنين الي معانا
لما خلص الدوام العموم رااااحووا ستاربكس الا انا
عاد اهوا سال رفيجه الي معانا من زمان جان يقول اي هاذي كله ما تطلع معانا ولا شي
المهم ولا يسئله عني و هذاك يمدح فيني و سال رفيجتي عني و مدحت فيني
و اهوا كان يبيني بس انا اشتغل بارت تايم و ليلحين ما تخرجت و باجيلي سنة و اتخرج
عاد قال لهم لا اييبون لي سيرة لانه ناوي اييني عقب ما اتخرج
بس رفيحتي زل لسانها
و انا سحبت منها حجي
المهم
انا قلت حق امي
جان تقولي شووووفي هذا لو يبيج جان يااج الحين
هذا بيلعب
و عقب قال حق رفيجتي تجيييس نبضي لانه ناوي اييني الحين و غير رايه
المهم انا على كلام امي قلت لها اوكي
و امي قالت لا لازم تتخرجين بالاول !!
المهم
امه دقت
و امي رضت اييون مادري شلون مع انها كانت رافضة !!
و قبل لا تيي امه بشوي امي قالت لي لا تستانسين ما راح يصيرر شي !!
المهم اول ما طلعت امه من عندنا جان امي تقووولي انا موافقة !!
(اليوم الي يت فيه امه توفى بابا سعد الله يرحمه !! اعلنوا الخبر و اهيا قاعدة عندنا !! )

و لما امه يت بتدق على امي تقول لها متى الولد بيي ولا يدته تدش المستشفى !!
نطرنا اسبوع بعدين قالوا حق امي انه الولد بييني باليوم الفلاني !!
المهم الولد يه وقت امتحانات الفاينل !! وييع بين اصعب امتحانين ياااي الاخ مادري ليش !!

المهم عقب امه دقت و قالت انه يبيني و نفس الشي امي قالت لهم اني راضية و سالنا عن الولد !!

عقب اسبوعين امي دقت قالت اوكي و امه قالت لما يرد اخوه من السفر الرياييل بيون
رد اخوه من السفر
امس دقت امه و قالت حق امي يوم الاثنين بيون !!
عاد الله يسلمكم
اليوم ابوي حبيبي دخلوه المستشفى !! ( حياتي ابوي الله يشافيك انشالله )
و طبعا السالفة تاجلت و ما راح ايون الا لما يرد ابوي انشالله بالسلامة من المستشفى !!


لووووووووووووول
و القصة ما زالت مستمرة احم احم
عاد بالدوام يقولي صج انه الطبيعة ضدنا بس ماخذج ماخذج !!
:tomato2:

و ماكو ناطرين نهاية المسلسل المكسيكي !! ​

ياساتر تاجيلاتكم كلها موت ومستشفيات بس ان شاءالله خير !!!!!!!!!!!!!!!