رد: كل الحوامل اليوم يشاركون شنو اهم الشغلات إلي تجهزينها حق البيبي والمستشفى خل نست
انا بقول لكم على طريقة تجهيزي بولدي اخذتها عن وحده قالت لي صدقيني بتريحج
اهي اول شي انج تبدين بالاشياء الغاليه والثقيله
سرير النفاس حق البيبي اللي يكون صغير ويمج
سرير البيبي الثاني اللي راح ينام عليه لي رديتي بعد النفاس اللي يصير فيه حواجز ويظل مع البيبي لي السنتين
الكفر مال المستشفى وكفر النفاس او اذا ما تبين تسوين استقبال كفرين حلوين حق النفاس عمليين اسعارهم مناسبه لو يتوسخ واحد الا الثاني موجود وما تحطين اي شي لان ممكن باي وقت اييونج ضيوف جنطة المسشفى حق هدومج وهدوم البيبي
هذي البدايه اول جوله من التجهيز
الجوله الثانيه
هدوم البيبي من (فنايل داخليه - تبانات - قبعات - دس ايد - دلاغات اذا التبان مو كامل مع الريل - مهادات قطن - لفات البيبي - فوط اللي يكونون مع القبعه - جيس البيبي اخذي جم واحد - فرشه للبيبي حق التبديل يكون يها مثل النايلون من تحت عشان لو يبول وانتو بكرامه - فوط صغيره كبر كف الايد تحطينها على جتفتج اذا شلتي البيبي بتريعينه اول لي نام انا احطها تحت راسه عشان لا يوسخ الفرشه اللي تحته - صدريات اخذي كشخه واخذي عملي قطن واللي على فوطه احسن شي يمتص - جنطة البيبي الصغيره حق الطبيب - وجنطه بيبي العاديه حق الطلعات والزورات احبها تكون نايلون عشان ما تتوسخ - حوض مال سباحة البيبي - صندوق اغراض البيبي - واهم شي بهالفتره تشترين صابون غسيل ملابس البيبي الخاص عشان تغسلين ملابس البيبي اول باول من تشترينهم)
الجوله الثالثه
اهي حق الام ( قمصان النوم - البجامات - الروب - ملابس داخليه ستيانات قطن طبعا اكبر من مقاسج لان بالنفاس يصير فيه حليب ويكبر واخذي اللي يتبطل للرضاعه جم واحد - السراويل اخذ اللي يغطي البطن كله لي فوق السره ويكون قطن اخذهم من مارك اند سبنسر وهم اخذ سراويل نص لي الفخذ قطن - دلاغات قطن - فوط للشعر والجسم وروب السباحه)
دويات النفاس ( حلبه - زعتر - دارسين - لهوم - مره - حسو - الحبه السوده - ينسون - سكر نبات - حبة حلوه)حطيهم كتخزين بالفريز عشان ما يختربون امي سوت لي جذي
اشياء للعنايه بالبشره والشعر والجسم انصح بالفيتامينات ما تنقطع اول شي عشان الشعر ما يطيح وايد والبشره تجدد وطبعا كل وحده وبشرتها تعرف لها تشتري الماركه اللي تريحها وما تقطع عنهم اما حق الجسم زيت اللوز وزيت الزيتون وسنفره والصابون المغربي مع ليفته - ولوشن مبيض)
الجوله القبل الاخيره
غلاية المميات - المميات اخذي بيجون 2 سانتي 3 حبات و4 سانتي 4 حبات - حلمات مقاس سمول بيجون البيضه الشفافه لا تاخذين الصفره بسرعه تخترب وتتلزق - الفرش لغسل المميات الكبيره للميه والصغيره للحلمات - مصاصه انصح في ماركة bibi المفلطحه - اكو جنطه فيها مشط وبروش ومقص ومقراضه- او اشتريهم كل قطعه بروحهم على حسب المتوفر - بودره - لوشن - شامبو - صابون انا احب استعمل ماركة سيباميد صحية وطبيه للبشره الحساسه او مذركير وايد زينه - حفاضات اصغر حجم - قطن اعواد الاذن - قطن عادي - مناديل مرطبه انصح ملوت مذركير او جونسون اللي عليها باللون الاخضر ريحته حلوه - مناديل الكحول لتعقيم سرة البيبي وعشان تنشف بسرعه واطيح - كريم الحفاظ لونه رمادي موجود بمذركير وسنتر بوينت والصيدليات هذا احسن نوع جربته- فازلين جونسون - بيبي اويل تحطين بجسم الياهل كله قبل السباحه عشان فيه طبقة من القشره اطيح من جسمه وشعره والبيبي اويل تساعده انه يروح بسرعه وعن تجربه - تقسيم الحليب علبه فيها 3 طبقات اول باول عبيهم عشان يسهل لج انج تسوين الحليب - مطاره صغيره على طول فيها ماي حار عشان المميه وجهزي دايما المميات يكون فيهم نص ماي مغلي من قبل ويبرد على حرارة جو الغرفة عشان بس بين تسوين المميه تزيدين عليها الماي الحار وتحطين الحليب البودره وتكون حرارتها زينه ما تنطرينها تبرد - كوتكس الكبار حقج ليدي سوفت زين واحط تحتها اي نوع المضغوط بو اجنحه عشان ما ادمر ملابسي - اي صج نسيت اسفنجه حق سباحة جسم البيبي - كريم حلمة الصدر - شفاطة انصح بالكهربائية وفيه بالشحن وفيه العاديه بالضغط- القطن الخاص حق صدر الام عشان لا ينزل الحليب عالملابس ويتلفج)
الجوله الاخيره
اغراض الاستقبال : تختارين المحل اللي تبينه وتتفقين معاه عالككاو وكميته وتغليفه
حلو الضيوف
الورد
المطارات
طقم الاستكانات والفنايين والقلاصات
تغليف الشكر
البالونات اذا تبين
مواعين الحلو اذا تبين شي موحد مو كل ماعون شكل
وبس سلامتكم والله يقومنا جميعا بالسلامه ويفرحنا بشوفة عيالنا كاملين وسالمين وبصحه وعافيه
وان شاء الله ما اكون ناسيه شي