4/ المحادثة : speaking
راح إتكون العصر أو خلال فترة أقصاها أسبوع من الاختبار ( بنهاية الرايتنغ يوزعون عليكم مواعيد امتحان السبيكنغ) ، القسم هذا سيتم تسجيله بمسجل صغير (اللي اختبرنتي سجلته بموبايلها !!)
يتخوف الكثير من الطلبة من قسم المحادثة ، لكن أطمنكم إنه الموضوع جدا سهل و ستفاجأون بقدرتكم على المحاورة و التحدث بطلاقة.
مدة هذا القسم ربع ساعة مقسمة كالتالي :
* القسم الأول : مقدمة ( من 4 إلى 5 دقائق ) : سؤال و جواب : عرفنا عن اسمك ، من أي دولة ، تاريخ ميلادك ، تدرس أم تعمل ، ليش مقدم على الايلتس ، منطقتك ، هواياتك ، روتينك اليومي ...
و هكذا >>> اهتم بالاجوبة لأنك قاعد تعطي إنطباع عن مقدرتك على الحديث.
* القسم الثاني : مطلوب منك تتحدث لمدة دقيقتين عن موضوع معين >>> راح يعطيك توبك و تحتها 3 أسئلة و يعطيك دقيقة إتفكر ، تقدر تاخذ نوت ، بعدين يقول لك إبدأ بالكلام ، تكلم بدون توقف و غط التوبك و الأسئلة الثلاثة لا تطلع بره الموضوع ، خلصت كلامك و الوقت ما خلص راوغ بالكلام يمين و يسار لما يوقفك .
ممكن اللي يمتحنك يعطيك 3 كروت و يقول لك اختار منهم ، و يمكن هو يختار لك التوبك على طول>>> هذا القسم عليه درجات أكبر.
* القسم الثالث : مناقشة بينك و بين الممتحن عن التوبك اللي سولفت عنها ، و عن مواضيع أخرى ، يعني 3 ، 4 أسئلة عن كل موضوع ، ( من 4 إلى 5 دقائق ).
و أكلمكم من واقع تجربتي ، ما كنت أقدر أتكلم ، مو معودة نفسي ، مع التدريب و بأقل من أسبوع ، ما شاء الله تحدثت بطلاقة، أقول لكم إشلون :
(1) موقع واحد لا غير ، دخلوه و طبعوا الأسئلة اللي فيه ، و على فكرة أسئلة الايلتس مكررة ، و هي نفسها بالضبط اللي راح إتيي لكم بالامتحان ، لا ادورون بسايت ثاني ، هذا و بس
http://www.aippg.net/forum/viewtopic.php?t=64722
هي بالأساس من هذا السايت
http://www.aippg.com/ielts/
- ملاحظة مهمة : لا تحفظون الأجوبة ، فهموها و جاوبوا من عندكم ، بعضها ما تنطبق على دولتنا الكويت ، و طريقة يعض الاجوبة رسمية جدا ، لا تتبعونها مثل
Allow me to explain myself by shortly mentioning the following points: Firstly
Secondly,
الموضوع مو جذيه جدا بسيط ، جاوب جنك تسولف مع صديقك
(2) أخذت lesson private بالجامعة الأمريكية بالكويت ، عن طريق مركز خدمة المجتمع ( على فكرة يعطون دورات كاملة ، و يعطون دروس خصوصية ، تقدرون تاخذون درس خصوصي بأي جزء من الايلتس !!) هذا رقمهم 22248398 ،، سعر الساعة 20 دينار ، آنا خذيت ساعتين ، على يومين ، أول يوم تدريب ، ثاني يوم سوت لي مجموعة امتحانات ،، اللي درستني كانت Mrs.Natalie بالأساس هي ادرس ( جيمات ) و زوجها Mr.Steveيعطي ( ايلتس )،، بس حيل ساعدتني ،، إتينن طيبة و تدريسها ممتع للغاية.
ليش خذيت هالكلاسين؟ بتدرب عدل و أعيش جو الامتحان ، ما أبي أرتبك من الشخص الأجنبي اللي راح يمتحني ، و ما إتخيلون هالدرسين شكثر فرقوا معاي !
- الامتحان يبيك تسولف كثر ما تقدر ، فجاوب كل سؤال بجملتين أو ثلاث ، إذا جاوبت باختصار ما راح تنقص درجتك ، لكن راح تضطر اللي يقابلك إنه يسإلك أكثر و أكثر فيمكن يسإلك عن شي ما إتعرفه خير شر .
- إنت و حظك عللي يمتحنك ، بعضهم يساعدك بنظراته و يهز راسه جنه يقول لك سولف أكثر خصوصا بموضوع التوبك عشان تغطي الدقيقتين ، و بعضهم لا ، بس لما تسولف عن التوبك بأسوأ الأحوال لا يقل كلامك عن دقيقة و نص.
- مطلوب منك آراء و ليس حقائق ، مثلا هل تعتقد إنه الممثلين يستحقون الملايين على الأفلام اللي يصورونها بينما العلماء ما يحصلون كثرهم ( جاوبت إي لأن شركات الإنتاج تكسب ملايين من التسويق و الإعلانات التجارية ، عن طريق هالممثلين ) >>> أبسط و أسرع إجابة.
- أكثر شي ينقص درجاتك هي...قول ( آه أأأه ) ما عرفت إتجاوب إسكت ثواني أو قول حق اللي يمتحنك well , I have not think about this before but I could tell you that….
و بعدين الأجانب ما يقولون آه آه يقولون اممم Em Emmm
- لا تحفظ الأجوبة و تروح إتسمعها ، اللي يمتحنك مو مغفل ، و إذا حس إنك إتسمع على طول بيغير السؤال و هني إتوهق إذا إنت حافظ و بس!!
- لا إتكلم على وتيرة وحدة ، خل نبرة صوتك واضحة ، إذا قصرت صوتك تعطي إنطباع إنك مو واثق من نفسك ، لا إتكلم بسرعة حيل لأنك راح تعطي إنطباع إنك معصب و اللي جدامك ما راح يفهمك.
- مو مطلوبة منك اللهجة البريطانية ( الأكسنت ) إذا تعرف خير و بركة ما تعرف مو مشكلة ، بس مطلوب منك طريق اللفظ الصح pronunciation
- طالع اللي عين اللي يمتحنك eye contact مهم و ستحاسب عليه .
- اهتم بلبسك و مظهرك الخارجي ، خل لبسك مرتب و بسيط ، و لا إتبالغ أبدا باللبس!
- ابتسم و خلك رلاكس ، عط انطباع إنك مستتمتع بالمقابلة لا تبين إنك متضايق أبدا من الامتحان !
- استخدم التنس الصح ،، آنا قلت لمسز ناتالي ودي أسولف بس أحاتي الجرامر ، قالت لي ما تنقصين عالجرامر الغلط إلا إذا أخل بالمعنى >>> مو إطنشون بالقواعد بس سولفوا و غلطة بسيطة مو مشكلة !
- إذا ما فهمت السؤال إسأل اللي يمتحنك يعيده أو يشرحه لك بصيغة ثانية .
- ممكن إتألف أجوبة من عندك أو إتقمص شخصية واحد ثاني بحيث إنه جوابك يكون حلو>>> شغل المخيلة!!
- لا تقول بالعربي كلمة ( يعني ...) تكلم إنجلش و بس ،، و لا تقول كل شوي as I said before…
معايير التصحيح كالتالي :
1/ هل نظرت اللي يمتحنك ؟
2/هل تكلمت من دقيقة إلى دقيقتين عن التوبك ؟
3/ هل ما طلعت عن التوبك؟
4/ هل غطيت كل النقاط اللي بالكرت عن التوبك ؟
5/ هل تكلمت بوضوح؟
6/ هل تكلمتsteady يعني ما قلت آآآه آآه ؟
7/ هل نوعت نبرة صوتك و ضغطت عل الكلمات المهمة ؟
8/ استخدمت مفردات مناسبة للتوبك ؟
إنزين الحين عندنا أسئلة الامتحان بس ما عندنا إجابات معينة >>> مشكلة صادفتني !
اللي بالنت أغلبها لطلبة الصين و الهند ، ما تنطبق على الكويت
مثال : هل للألوان دلالة معينة بدولتكم ؟>>> أمانة شجاوب ؟؟ على قولة إختي أحمر ما يغرس
عموما هذا السايت حلو اخذوا منه أفكار
http://www.everyculture.com/Ja-Ma/Kuwait.html
أسئلة أخرى :* شنو أهمية النشيد الوطني؟
جواب حلو to share the proud and love of my country
* شنو طقوس الزواج بالكويت؟
راجع هالسايت
http://www.slideshare.net/dottuta/kuwaiti-wedding
و هكذا ....
امتحاني كان كالتالي :
دشيت ، سلمت و بمد جواز سفري ، شفت المرة لاهية و ما طلبته ، قلت ما راح أمده إلا لما تطلبه >>> عن اللقافة .
بلشت ما عطتني دقيقة أسترخي ، عرفتني بإسمها ، سألتني عن إسمي ، من أي دولة ، طالبة أم تشتغلين ، قلت لها أشتغل بالمكان x بالقسم x ، طالعتني تبتسم و تهز راسها يعني كملي ، ما أعرف أشرح طبيعة عملي كإدارية فقلت لها maybe I will surprise you , I have nothing to do at work , I just have breakfast ,read the newspaper ,chat with my friends ,surf on the internet and I am really not happy with my job because I am not surving my country.
و بالفعل هالفترة ما عندنا شغل إنسويه ( إذا إنت طالب راح يسإلونك عن تخصصك و ليش اخترته و شنو يتصير ...)
قالت لي هل تدربتي على هالوظيفة ؟ طبعا لا.
عطتني التوبك و قالت لي عندج دقيقة إتفكرين و دقيقتين إتسولفين و لا تقلقين إذا وقفتج ، واضح ؟ قلت لها أي
طالعت التوبك ( موقف شخص ساعدج ، منو الشخص ، شنو الموقف ، إشلون ساعدج ، و شنو تعني لج مساعدته )
السؤال هذا مار علي مع مسز ناتالي بس كان قولي لي موقف ساعدتي أحد ...( قلت لها ساعدت صديقتي بأني نصحتها .... سالفة حلوة بس ما تنقال بالنت لأنها تخصها )
بالامتحان تقمصت شخصية صديقتي و قلت إنه آنا صاحبة المشكلة و صديقتي نصحتني ب ....
سالفة حلوة و عشت الجو و تكلمت و لله الحمد بطلاقة و غطيت التوبك و الوقت.
سألنتي منو يساعدج دايما ؟ قلت أهلي و صديقاتي و...
هل أفضل شي للمراهقين يساعدونهم أهلهم أم آصدقاءهم ؟ يعتمد على الأهل هل يفهمون احتياجات المراهق و ...
شنو مشاكل المراهق... قلت علاقتهم بأصدقاءهم و ثقتهم بنفسهم و...
هل تحبين القراءة
شنو تقرين ، وين تفضلين تقرين و شكثر وقت
هل تسوقين سيارة ، ليش لازم نسوق بعناية !! متى تفضلين عيالج بالمستقبل يسوقون سيارة بأي سن و ليش؟
اشلون إنساعد كبار السن ؟ شنو أهم شي نساعدهم فيه ( قلت لها نسمعهم يبون واحد يسمعهم حنى لو يتكلمون وايد أو يعيدون نفس القصة و هي تضحك) هل منطقتج تقدم خدمات لكبار السن ؟( قلت لها أي ، بنت لهم غرفة صغيرة يجتمعون فيها و يسولفون و يشربون شاي نسميها دوانية المنطقة ، حطت لهم مواقف خاصة عند المستوصف و وفرت لهم كراسي متحركة )
ابتسمت و قالت لي هذا نهاية الامتحان شكرا
شكرتها و طلعت
بعد 13 يوم من الامتحان الكتابي ( استماع ، قراءة ، كتابة ) بالضبط طلعت نتيجة الامتحان على هالسايت
http://www.ielts-results.britishcouncil.org/
و السبيكنغ اللي في البداية كلش كنت خايفة منه ، ما شاء الله أعلى درجة
في الختام : أنصحكم بالتوكل على رب العالمين ، و الدعاء سلاح المؤمن ، و أنصحكم بالابتعاد عن الذنوب و المعاصي لأنها تذهب العلم !!
كتبت لكم هالموضوع امتثالا لقول الرسول صلى الله عليه و سلم ( لا يؤمن أحدكم حتى يحب لأخيه ما يحب لنفسه) و لأن المسلم مطالب بنقل العلم الذي تعلمه.
عجبكم الموضوع ؟ ما أبي منكم إلا الدعاء ، ادعوا لي الله يوفقني دنيا و آخرة و أنقبل بالماستر و أتخرج بامتياز، قولوا آمين ، و اللي بينقل الموضوع عليه بالعافية بس ينقل معاه الدعاء.
"
http://www.kuniv.in/vb/showthread.php?t=15532 " << المصدر
سلااامتكم.... الله يوفقكم انشالله :>