العودة   منتديات كويتيات النسائية > منتديات كويتيات السياحية > الدول الأجنبية

الدول الأجنبية قسم يشمل : الدول الاوربيه - امريكا - جنوب افريقيا

إضافة رد
 
LinkBack أدوات الموضوع إبحث في الموضوع انواع عرض الموضوع
قديم 03-11-2018, 09:16:12 PM   #1
كــويــتــيــة جــديــدة
 
تاريخ التسجيل: Oct 2017
المشاركات: 1
افتراضي احذروا من المؤسسة اليمنية الخليجية لتأجير شقق في مدينة آخن (حرامية شقق)


توني رادة أنا وريلي من مدينة آخن في سفرة علاج وصار لنا هناك سالفة تبط الجبد صراحة قلت خني أشاركم فيها عشان تعم الفائدة! السالفة وما فيها بحكم إن هذي أول سفرة لنا فقبل لا نحجز للرحلة قلنا خن نبحث في النت عن شقق قريبة من السنتر ومن المطاعم العربية وو... وبحثنا في جوجل ولسوء الحظ طحنا في إعلان لواحد اسمه نصر الاهدل في موقع يملكه اسمه المؤسسة اليمنية الخليجية لتأجير شقق في مدينة آخن ، المهم كلمه ريلي عشان يتفاهم وياه على السعر ودز له صور الشقق اللي عنده واخترنا وحدة واتفقنا وياه على السعر 75 يورو وإن الدفع بيكون يومي
سافرنا وأول ما وصلنا دقينا عليه جان يدز لنا العنوان وحزة وصولنا في الليل وشفنا الشقة ويازت لنا وكل شي تمام
المهم قال لنا الدفع أسبوعين مقدم ! قلنا له يامعود متفقين وياك إن الدفع يومي فقال الآن موسم فيتغير نظام الدفع عندنا إلى بعد نهاية الموسم وقام يعطينا من هالكلام اللي مآخوذ خيره قلنا بندفع مقدم أسبوع واحد بس فوافق ودفعنا وأخذنا منه ايصال واستلمنا المفتاح وأول ما دشينا الشقة جان يدق على ريلي يعرض خدمات ويسأله إذا تحتاجون تستأجرون سيارة أو محتاجين مترجم يرافقكم للمستشفى وفيه وحدة أعرفها ثقة فقلنا مو مشكلة دز لنا رقمها
طبعا المترجمة هذي اسمها رويده المرشد دقينا عليها من باجر وقامت تمدح نفسها وتقول إنها صار لها 20 سنة مترجمة في مدينة آخن في المستشفى الجامعي ويتعاملون معها خليجيين وايد وو... لكن للأسف بعد ما تعاملنا وياها اكتشفنا إنها وحدة جذابة وحقيرة مع المرضى بكل معنى الكلمة (بقول لكم سالفتنا وياها في الأخير)

نرد لموضوع الشقة المهم ريحنا ذيج الليلة وقمنا الصبح وتريقنا وقلنا خن نطلع للسوبرماركت اللي يمنا ناخذ بعض الاغراض واحنا طالعين ونشوف مكتب في مدخل العمارة فيه 3 شباب عرب واقفين يدخنون وعيونهم مبققة يطالعون فينا وجاء في بالنا إنهم موظفين في العمارة وما دققنا وايد في الموضوع




لكن الغريب كل ما طلعنا من الشقة أو ردينا من برى إلا وناط في ويوهنا واحد من ذيلي الشباب يتسكعون سواء في الممرات الي بين الشقق أو عند مدخل العمارة مو هني المشكلة لكن طريقة نظراتهم وقحة ومستفزة وحسينا بعدم ارتياح في المكان وحسينا جنا مراقبين في الروحة والردة
المهم في اليوم الثالث صار اللي ماكنا متخيلين انه بيصير
للأسف انباقت شقتنا طبعا ريلي من النوع الحريص وايد ما نطلع إلا وهو قافل باب الشقة قفلتين ردينا لشقتنا المغرب أول ما حط ريلي المفتاح وحركة لقى القفل مبطل جان يطالع فيني بخوف وعلطول قالي الشقة فيه أحد داخلها عقبنا أنا متأكد إني مقفلها، المهم بطلنا الباب ودشينا الصالة ويدينا على قلوبنا وهني كانت الصدمة اللابتوب اللي كان على الطاولة مو موجود ):
أخذنا جولة على السريع في الشقة نتفقد باقي أغراضنا واضح إن اللي باق الشقة نفذ عمليته على السريع (مع إن مافيه شي أصلا غير اللابتوب له قيمة ممكن ينباق مافيه غير شوية ملابس وجواتي الله يعزكم)
علطول ريلي دق على صاحب الشقة نصر وقال له شقتنا انباقت رد عليه شلون مايصير شققنا آمنة ولا قد صارت عندنا قال له ريلي فيه حد معه مفتاح سبير ودش الشقة بعدنا مع ان احنا مقفلينها قال مستحيل أكيد انكم نسيتو الباب بدون قفل ودخل أحد الزباين للشقة وقام يتجادل معه وقال له ريلي احنا دايما نشوف 3 شاب رايحين رادين في الممرات وجنهم يراقبونا ممكن واحد منهم اهوا اللي باق الشقة قال لا لا مستحيل ذيلي موظفين يشتغلون عندي! قال له طيب اوكي فيه كاميرات مراقبة صح؟ قال ايوه فيه كاميرات في مدخل العمارة وفي اللفت فقط أما عند مداخل الشقق مافيه لكن بنرجع للكاميرات وبنشوف اذا فيه احد غريب دش العمارة! وقال برجع أدق عليك المهم ساعة ونص إلا ويرجع يدق على ريلي وبكل برود يقول رجعنا للكاميرات ما فيه أي أحد غريب دش العمارة غير الزباين اللي مستأجرين بس
طبعا ريلي مات من القهر وفكرنا ندق على المخفر المشكلة إنه مريض ومايبي عوار الراس فقررنا نشتري راحتنا ونطلع من الشقة ونعتبر اللي صار درس
المهم ريلي دق على نصر وقال له بطلع من الشقة ممكن ترد لي باقي فلوسي فجاء الرد الصاعق لا معليش ما اقدر
طيب لييييش؟! قال انا قلت لك من أول ان الفترة هذي موسم رد عليه ريلي بانفعال بلا موسم بلاخرابيط ما ابي أكمل وياك غصب اهو؟ قال له لا معليش ما اقدر
قال له الحين سارقين شقتي وتبون تسرقوني مرة ثانية شهالوقاحة! قال له احترم نفسك احنا مانسرق زباينا شقتك انسرقت بسبب اهمالك أنت تركتها مفتوحة وتحط اللوم علينا! قال له لا الشقة مقفلة واللي دش معه مفاتيح وما احد معه مفاتيح للشقة إلا انت وموظفينك
قال له ما تبي تصدق هذي مشكلتك قال له لا ما ابي اصدق ياحرامي وسد الخط بويهه
وللأسف اضطرينا نقزر الثلاث أيام ونص الباقية في هالشقة التعيسة
وفي آخر يوم لنا قعدنا من بدري نلم أغراضنا نبي نطلع إلا ونسمع طق الباب فتحنا لينه واحد من موظفينه يسألنا انتم بتطلعون اليوم؟
قلنا له أكيد بنطلع عيل شنو شايف انت يالسين نلم أغراضنا!
قال بس معليش نصر يقول فيه 70 يورو حق تنظيف الشقة لسه مادفعتوها!
قام زفه ريلي وقال له شوف الشقة نظيفة وأنظف من أول بعد يلا روح وراك ماراح ندفع شي ورجع يسحب ريوله
شوي الا يدق علينا الحرامي اللي اسمه نصر الأهدل وسفهه ريلي عطاه رفض مكالمة المهم طلعنا من الشقة وصلنا باب العمارة ونقابل نفس الموظف في ويوهنا قلنا له مفتاحكم بتلقاه على باب الشقة قال أوكي وترى نصر يقول حق التنظيف مو مشكلة راح ندفعه هالمرة من جيبنا! وريلي معصب حده وسفهه مارد عليه وطلعنا من عندهم الله لا يباركها من ساعة اللي دشينا فيها هالعمارة التعيسة.
لكن سبحان الله ربي عوضنا بشقة استأجرناها من موقع ألماني دلتنا عليه وحدة ألمانية تشتغل بالمستشفى يزاها الله خير عطتنا مواقع وايد وعلمتنا مصطلحات ألمانية تساعدنا في البحث في جوجل
زي Wohnung معناها شقة
معناها غرفةZimmer
Nacht يعني ليلة
Monat شهري
مفروشة Mobliert

تخيلو لقينا شقة مفروشة مكونة من غرفة وصالة ومطبخ صغير يوميتها ب 35 يورو بس يابلااااش والدفع الشهري يطلع أرخص وااااايد 28 يورو تقريبا!

ولقينا غرف استوديو يوميتها 25 يورو و 22 يورو وبالشهري تطلع يوميتها ب 16 و 17 يورو




أم ندوش غير متواجدة حالياً   رد مع اقتباس
إضافة رد

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن حسب دولة الكويت : 07:02:12 PM.