|| شلـون عرفتـي إنـج حـامل و أي حـزة .. خلنـا نسـولف ونفرفـرش شـوي تعـالو كروشـات ||

استغفر الله الذي لا اله الا هو واتوب اليه

سلمكم الله انا بحمالي الاول قبل وقت الدوره باسبوعين
كنت احس بدوخه بسيطه واحس اني بعالم ثاني
مااحس اني قاعده مع اهل زوجي عاد قلتله تعبانه
ابي المستوصف وداني قالت الدكتوره انتي حامل
قلت لا قالت متى اخر دوره ولما قلتلها قالت لسه
تو الناس يعني كانت مستبعده اني حامل عاد عطتني
ورقه تحليل علشان الفيتامينات او علشان الحمل
المهم اني ماسويت التحليل واكتبتلي على حديد
وحبه فيتامين ورديت كليت بس مره بعدين ماادري
ليش مااكلتهم الاحماتي قالت شقالت لج الدكتوره
قلت اكتبتلي فيتامين وحديد قالت لا تاكلينهم يمكن حامل
قعدت اضحك قلت لا مستحيل تو الناس بيوم الدوره
كنت معزومه على عرس وكنت احس بالام الدوره ورحت ورقصت
وحماتي نفسها قالت لاترقصين يمكن فيج شي وانا اضحك
اقولها اصلا لابسه حمايه بتنزل علي بالعرس
عاد تاخرت ٤ ايام ولما رديت لبيتي خذيت تحليل حمل
ولاقلت لزوجي لما قعدت الصبح حللت الا خطين وقعدت زوجي
قلت ابي اسوي تحليل حمل يمكن انا حامل او ان التحليل غلط
ابي اروح اتاكد قام سيده وداني لماجات السستر قالت مبروك حامل
عاد هو فرحته ماتنوصف بس مسوي نفسه ثقيل قدامي كان لي
٦ شهورمتزوجه ،،،،،،،،،

بحمالي الثاني حملت بسرعه بعد ٣ شهور من الاول
مع ان البكر كان عمليه بس زوجي رافض اني اخذ مانع
الشهر اللي قبل لااحمل فيه جاتني الدوره ١٠ ايام
اواكثر طولت علي فالشهر اللي بعده ماجاتني الدوره
وقلت عادي لان الدوره اللي قبلها طولت علي يمكن
تتاخر علي هذي وحماتي كانت نفاس وكنت اشرب خلطه معاها
ابيها تنزل وكنت اركض وهي كانت تهاوشني قالت يمكن حامل
قلت لا احس بالامها وكنت اكل بطاط كتكو كوكتيل واشرب عصير
المهم البطاط ٣ ايام وانا اكل بنفس الكيس بو ميه فلس ولارضى يخلص
لما اكله احس بلوعه وكنت اقنع نفسي اني موحامل بس باليوم الثالث
شكيت وقلت لزوجي يجيب تحليل حمل حللت وطلعت حامل،،،،،،



وبحمالي الحين تاخرت الدوره حللت منزلي طلع خط واضح وخط خفيييف
رحت للمختبر طلعت حامل

ادري طولت عليكم خخخخخخ

عسا ربي يثبت للحوامل حملهم
ويرزق كل محرومه بالذريه الصالحه

احلئ لحظظظظظظظه بحياتك كل بنت ويارب لاتحرم محرومه من هاللحظه ..


انا قبل موعد دورتي بيومين تجتني حراره وبلاعيم بس تعبت حييييل مو نفس كل مره..ولما تأخرت دورتي يوم واحد قال زوجي روحي حللي قلت لاااا ماااابي انا متأكده هالشهر مافيني شي وقام يحن علي اروح احلل وانا اعاند ماابي لاني كنت خايفه اطلع مو حامل وانا متشفقه ع الحمال بعد ماتأخرت دورتي اسبوع يمكن انا شكيت بس مابغيت اعشم نفسي سويت تحليل منزلي طلع خط خفيييييييف حييييل وريته بنت خالتي قالت حاااامل قلت لااااا مو مبين ورحت شريت تحليل ثاني وسويته ثاني يوم طلع اوضح من امس..كنت عند اهلي رحت قلت لامي بروح الحين احلل ورحت قعدت ع اعصابي بالمستشفئ ولما مرت ساعه رحت اشوف نتيجه التحليل قال البشاره منج ولا من امج قلت قوووووووووووووول ولله<<لووووووووول ردت فعلي لا اراديه ويحلف الدكتور وهم احلفه مره ثانيه وثالثه خخخخخخخ
ودقيت ع زوجي بنفس الحزه مارد لان كان نايم وهو كان يدري اني بروح احلل وقلت راح اقوله ماكو حمل <<بشوف رده فعله ..بس صراحه ماصبرت وانا بالمستشفئ بشرت الكل بس خليت امي تبشر خالتي<<لاني استحيت مادري ليش خخخخ
وزوجي اخر واحد دراااا خخخخخ..




قلت قصه حياتي بس ولله هاللحظه ماانسئ ادق تفاصيلها..

وه خنقتني العبرة ع شعوركم
الله يحفظهم لكم

انا الله يسلمكم
حملت بعد ٧ شهور
من عرسي
الدورة تاخرت علي ١٣ يوم كنت مابيها تنزل ومابي الحمل لوووول هع
وهي ثاني شهرعرسي تاخرت علي٨ ايام فاقلت بصبر يمكن نفس ذاك الشهر
وبعد ١٣ يوم كنا طالعين انا وزوجي واخته
ومرينا عند صيدلية قلت له انا قايلة لك من قبل جب لي شغلة ماقالت ابي تحليل جنب اخته
وجابها ونمت وبنفس الليلة صحيت وسويته وطلع خطين واضحين
بس انا عكسكم مافرحت بالبدايه انصدمت وحزنت شوي اقول توني صغيرة عالحمال
بس بعدين فرححتت حييل هع ورحت بعد ٥ ايام حللت دم وبديت مراجعات
وهذي بنوتتي ملت علي حياتي



الله يحفظها هي وزجي لي







استغفر الله ربي واتوب اليه

الله يتمم على كل حامل و يرزق كل محرومه يا رب


بحمالي الاول كنا متيمعين انا و بنات خالي و بنت خالي

و ما شاء الله ثلاثتهم كانوا حمل اثنين بالشهر الرابع و وحده بالشهر الخامس

و كل شوي وحده تشتهي شي و انا مدلعتهم على استس انهم حمل

شوي جان بنت خالي تقولي متى موعد دورتج عشان اعلمج طريقه للحمل

جان اقولها متأخره علي ١٠ ايام جااان تطبع عيونهم كل وحده فيهم قالت انا تتاخر يوم اروح احلل

يلاا يلاا بسرعه نروح نشتريلج تحليل حمل

قلت لاا شكووو و انا بداخلي مابي اتعشم اني حامل المهم رحنا شرينا و ثلاثتهم ناطريني عند باب الحماممم هههههههه

طولت عليهم جان اقولهم خط واحد موو حامل و وااايد تحبطت

جان تقولي بنت خالي ابي اشوفه شافتها جااان تصرخ و الله و الله في خط ثاني خفيف يمه قلبي من الوناسه

كانت الساعه ١١:٣٠ و ما فيني صبر انطر احلل دم لي باجر

بيت بنت خالتي بمشرف قالولي مستشفسى طيبه المختبر ٢٤ ساعه و قريب

اتصلت على ريلي قتله انا تعبانه يتلي الدوره و الي أبره مستشفى طيبه << يور الحريم هههههه

و عليه تحبط لان كان حاس اني حامل

رحنا طيبه و بالاستقبال قتله اسال وين المختبر و وعليه ما استوعب

بالاصنصير خربتها و قلتله كنا بروحنا واايد استانس

و الحمدلله الله تمم فرحتي يو قالولي مبرووك رياي زين ما حضن الريال هههههه

سبحان الله يومها كنت رايحه بيت حمولتي و طول الدرب كنتي ادعي يا رب تبشرني بحملي اليوم رحت شريت التحليل و قلت خلاص بستخدمه باجر الصبح
و ما شاء الله الله استجاب دعائي ربي لك الحمد و كاهي بنيتي تناشبني على موبايلي و انا اكتب لكم


و بحملي هذا كنت تعبانه جسمي يعورني و ما اقدر انام و رحت مستشفى السلام الطوارئ لان بليل
قالولي لازم تحليل حمل و انا كنت امنع و يوم وقفت الشهر الاول ما حملت
و هذا ثاني شهر و ما بي اتعشم و اتحبط و كنت كلش مو متوقعه و الحمدلله بشروني و الله من فرحتنا احس الارض مو شايلتنا

ربي لك الحمد يا رب اشوف البيبي بصحته و عافيته و يسهل على كل حامل
و يا رب يرزق كل محرومه الله عند حسن ظن عبده

اب ،

الله يتمم ويسهل عليكم حوامـل ..

إدعولي بالحمل .. عشان أكتب لكم قصتي

الله يرزق كل محرومه يارب بالحمل السليم الثابت يااارب
انا كنت مسويه تلقيح والدكتوره قالت لي بعد اسبوعين تنزل الدوره واذا مانزلت حمل او يومين كنت متفائله بعدها حسين ان صدري بدا يشد علي ويثقل قلت هذي اعراض دورتي اكيد ماصار حمل وشلت من بالي اني حامل حتى كنت اقول حق زوجي لمن تنزل علي الدوره بروح المستوصف يعطوني ابره وبعد اسبوع من التلقيح شفت خط صغير وضعيف لونه بني على بيج قلت بيه انا وايد تنزل مني افرازات ما ادري شسالفتها ومااهتميت وعلى الاسبوع الثاني من التلقيح كنت احس بعرج يطق من رحمي ليه كليتي وعبالي مال التبويض وليله الي لازم احلل ريلي وداني مطعم طلبنا صمدي وطول الليل واحنا مو نايمين عدل تسمم ريلي كان عوار بطن فيه بس انا كنت لوعه اهو قام الصبح وصار معاه اسهال مكرم السامع والقارئ بس انا حاشني ترجيع ولوعه وكان يوم يمعت اهلي ماذقت ولاشي من الاكل كانت لوعه عدله عاد اتفقنا انا وريلي ان اسوي تحليل منزلي اذا مافي حمل اروح المستوصف عشان يعطوني علاج واذا في حمل اقولهم عشان الحامل ماتاخذ اي دوا وفعلا سويت التحليل وحتى وانا اسويه كنت متوقعه اشوف خط واحد بس الحمدالله رب العالمين شفت خطين واضحين وما ارتحنا الا لمن حللنا دم يومها كنت عبانه فماحسيت بشي بس اللحين لمن اتذكر احسها احلى لحظه الله يرزق كل محرومه ياااارب وتكتب قصتها مثل ما انا كتبت قصتي

ي رب الله يسهل عليكم ويخلي عيالكم لكم
كل ماقريت قصة أحس عيوني تملي دموع حيل ودي ب يآهل
دعوآتكم ...

انا تركت حبوب الحمل وماصار حمل لست شهور

و كنت ادعي ربي ان من اكمل السنه احمل لان ريلي عشقه اليهال وكل الي عرسو بعدنا احملو

وانا كنت اخفف عنه اقوله بعدني صغيره وجذي


المهم

كان يوم زواجنا بيصادف 7-11 و انا الدوره موعدها يكون 29-30 من الشهر

تأخرت الدوره و ريلي حاسب متى المفروض تنزل
راح و خذالي كلير بلو


و المفروض يطلع سالب ولا موجب

وانا طلع لي هالعلامه | لاهي + ولا هي -

و بعدها بيوم كررت التحليل المنزلي ونفس الشي قلت له قوم روح اي صيدليه مناوبه وهات لي الي ب 15 درهم (دينار ونص)
و ماياني رقاد

ريلي رقد وكان باقي ع اذان الفير نص ساعه قلت خلني اروح اسوي
من سويت طلع خطين
تميت مصدوووومه بس فرحانه على خايفه
و طلعت من الحمام وخليت التست عالمغسله
لكن قلت خلني افاجئه رحت الحمام خذت النتيجه و رجعت عالفراش تميت افكر قلت خليني افاجئه بحركه
ويلست اتجلب عالفراش ليما حس فيني. و قالي شفيج قلت ماشي بس بطني يعورني
هو شك اني متضايجه وخاف
ومارقد وانا ماقدرت اجهز شي

اذن وتوضى وراح المسيد
انا بسرررررعه طلعت الشموع وحطيتهم فالحوش و حطيت مندوس صغير فيه التست وكتبت بورقه ان شاءلله اقل من 9شهور بيكون ولدك ولا بنتك ف حضنك
احبك وايد

وسرت اصلي

من رجع وانا اراقبه من الدريشه طاااار من الوناسه قالي يالسباله حسبالي سويتي التست وطلع مب حامل لانج متضايقه قلت يمكن تصيحين
ومن الفرحه طلعنا نتريق برع ههههه

شعور حلو

الله يرزق كل محرومه

اي ونسيت اقولكم قبل لا اعرف اني حامل كنا مأجرين نقازيه ف بيت دتي وكلنا لعبناها ع اساس تنزل الدوره لان كان موعدها بعد كم يوم
وغير اني اسوي جمباز مع ول اخوي هههه وغير اني ركبت عالخيل مسافه ساعه ونص

بس سبحان الله يوم ربي كاتب السلامه للياهل لو شوماسويتي مابيصير له شي



الله يرزق كل وحده تتمنى ياهل
ويعطيها ياهل يسعدها و يبرها يارب

دورتي مانزلت بس احس بأعراضها طبعا مانطرتها لما تأخر واحلل لا حللت بنفس اليوم الي مانزلت فيه دقيت على زوجي وجابلي تحليل منزلي وحللت وطلع خطين من الفرحه ابشر زوج وارجف وتالي رحنا المستشفى وسويت تحليل دم وبشرني الدكتور بالحمل حزتها كان الفجر زوجي حبيبي طار من الفرحه وحزتها مانطرت على طول دقيت على امي واختي وبشرتهم وبعد قلبي اختي الصغيره اول ماشافتني باست بطني واحضنتني وبجت ي فديتها
والله يسهل علينا يارب
ويرزق كل محرومه اللهم امين يارب العالمين ..

خل اقولكم قصتي انا عيل صارلي سنة ونص انطر الحمل
كل ماتنزل الدورة يضيق خلقي وابجي وكانت منتظمة
فجاة تاخرت 10 ايام ووامي تقولي انتي حامل كنت مابي احلل وبنطرها تعت حيل من اعراضها احسها بتنزل
وصج نزلت وبجيت وضاق خلقي حييييل كنت متامله وقعدت ادعي وادعي
والشهر الي عقبه تاخرت ونفس الاعراض الي احسها تاخرتً 15 يوم وناطرتها تنزل وحاششني عوار باسناني فضيييع
قمت ابجيً رحت طبيب الاسنان قالي الدكتور انتي حامل انا استغربت اول مره يسالوني قلت له مادري شاكه عاد شكله عطاني البنج الخفيف
وعطاني مضاد حيوي خفت اخذه دقيت علي ريلي ايبلي تحليل حمل قبل لا اخذه وسويته وطلعت حامل طلع الخط واااضح وبسرعه
مادري شصار فيني وبعدين حللت دم وقالي مبروك حامل ياربيي. لاتحرم احد من هاللحظة يارب صج شعوور يخووف ووحلو بنفس الوقت
والله يتمم علي انشالله واولد بالسلامة

انا عكسكم
ماابي الحمل ومن الملكه متفقه مع زوجي ان سنتين باخذ مانع

المهم بعد سنتين وشهرين تركت المانع وكان زواج اختي باقي له شهرين
لهيت بتجهيزها وبنفسي
وقبل زواجها باسبوع كنت غاسله دوره
وبعد زواجها بااقل من 20 يوم حسيت ان الدوره متاخره ومغصني قلبي قلت اكيد حامل
لحدهاللحظه ماكنت مقتنعه بالحمل ومتخوفه
قلت لزوجي يشتري لي تحليل منزلي
وجابه لي وكنت متنرفزه من نفسي ومن زوجي وبس نتهاااااااااااااااوش
وبنص الهوشه قلت بروح اسوي تحليل وان شاءالله مااكون حامل عشان افتك منك <<معصببببببببببببه خخخخ

واروح اسوي واخليه 5 دقايق وارجع اكمل الهوشه <<الاخلاق زفتتتتتتت ومو طايقه نفسي

ورحت اشوف النتيجه واروح ادخل الغرفه واجلس اصييح دخل زوجي مرتاااااااااااااااع
وش فيك قلت حامل
هو ضحك وفرح بس يوم شافني ااصيح وحالتي حاله جلس يهديني <<خربت فرحته المسكين

الحمدالله بعد بيوم رحت سويت تحليل دم وتقولي حامل وانروح على طول لخالتي ابشرها

ويارب لك الحمد ارتحت وهدت نفسيتي واستوعبت اني حامل
وفرحت <<<بدرررري هههههههه


الله يكتب لكل من تمنى الحمل عاجل غير اجل بحزة هالفجر

انا كان يايني عوار ظهر لمدة 6 ايام عوااار ماقدر انام واحيانا ابجي ..

رفيجتي كانت عندي قالتلي امشي نروح نسوي تحليل هرموني قتلها شكو تو الناس ع الدوره بقا اسبوعين .. قالت اذا مو حامل نشوف شسالفة ظهرج واقتنعت .. دقينا ع المستشفا اسألتهم عن الهرموني قالها لو حمل يوم واحد يبين ..

المهم رحنا وانا حاسه اني حامل و مو حامل بس كنت ادعي ربي وايد وكله استغفر بنية الحمل .. واذكر ليلتها مطر قوي قوي وبس ادعي

رحنا المستشفى وسويت التحليل قال تعالوا بعد ساعه .. طافت الساعه ورحنا قتلها نزلي انتي بس اذا مو حامل صعدي على طول من غير ما تتكلمين ومري الصيدلية اشتري بروفين ..

انزلت وشوي والا تيي وتقول امشي الصيدلية .. خذيت الورقة ببطلها والا تقولي انتي حامل .. انا مادري شصار فيني قمت ابجي وبس اقول الحمدالله وخفت على استانست جان اقولها جذابه امشي عند الدكتورة ..

نزلت دشيت والا تقولي النسبه و بأي اسبوع واكتبتلي فوليك اسد ودافستون وقالت تعالي بعد اسبوعين نسوي سونار .. جان ارد ابجي .. الحمدالله يااااارب .. وبقى على موعدي 4 ايام ومو مصدقه اني حامل للحين وخايفه عليه وايد .. ادعولي الله يثبت جنيني ويرزقني ابنوته يارب :** طبعا للحين عوار الظهر وزيادة عوار نفس الدورة بين فترة وفتره وللحين ما بلشت نساتي عدل عدل بس النوووووم


الله استجاب دعواتي صج بنات لا تيأسون بأي شي تبونه ادعوا واستغفروا بنية الشي و بإذن الله بيصير يارب .. من تجاربي مع هالموضوع والله سبحان الله ..

سلام عليكم شّےـلونٌےـجَےـ انا اول مره اشارك عندي الدورة يتني تاريخ 2016/1/18
طول الدورة28 يوم
لمدة خمس ايام صارلي ثلث ايام مانزلت شنو الحل بليز لاتطنشون

و عليكم السلام حبيبتي نونو الدلع

نطري ليه 10 أيام روحي حللي المنزل ي او ل دم


او اذا حابه بوحي سوي تحليل هرمون يبين عدل