السمنة وسنينها من 126 لحد المثالي بإذن الله ... تابعوني

كيفكم كلكم وحشتوني
سامحوني لانقطاعي عنكم كل الفترة دي
والله كنا اعز أصحاب بظهر الغيب
ياريت ترجعوا تاني
انا جيت وبإذن الله مكملة
شكرا لكل اللي سألت عني ... بحبكم كلكم

يا خسارة :bbbiu:
زي ما بتقول الأغاني القديمة : عمر اللي فات ما هيرجع تاني
ياريتني ما تركت الدايت وقتها ، ياريتني ما تركت الجروب ولا تركت الناس الطيبين
ياريتني ما تخنت وكان ياريتني ما كبرت ،،، لكن هيهات

وسبحانه من يغير ولا يتغير

ودي نصيحة لكل واحد أو واحدة يقرا كلامي : إوعوا لنفسكم ولأيامكم
وأدخلوا في الصراع من أجل أحلامكم بعناد وإصرار ولا تتركوا الايام تسرقكم والأماني تضحك عليكم وتغركم مثلي

كل ده علشان كبرت 4 سنوات عن ايام ما بدأت الصفحة دي ؟؟!!!
ايوة صحيح
بس اربع سنوات حاسمة نقلوني من 42 إلى 46 عام :eh_s(4):

يعني أقرب للخمسين مني للثلاثين
ومع ذلك مازلت سمينة وما زلت أحاول وما زلت لم أكتب قصة نجاحي بعد
وكدت أتخلى عن الحلم وأأقول لنفسي خلاص سلمي بالأمر الواقع : إنتي لم تزدادي مع الريجيم إلا سمنة وبتحاولي من 20 سنة ما نجحتي غير في التخن ، فضيها سيرة بقى وشوفي حلم تاني ... يومها حزنت جدا ، حسيت كأني مت وبيدفنوني وصرخت لا أنا لسا عايشة وهاحاول وهاخس وهاحقق حلمي واكتب قصة قهري للدهون ، لسا فيه ايام حلوة ممكن اعيشها رشيقة

خليكي معايا يا نفسي خليك يا حلمي أنا هاكمل ... يا ساتر يارب
وفاة الحلم زيها زي وفاة البشر بتحرق القلب :eh_s(2):

أنا باكلمكم عن أخر أسبوعين وممكن تعملوا كوبي وبيست (نسخ ولصق ) هتعروفوا بالضبط ايه اللي حصل على مدار الاربع سنين دول وكمان اللي حصل على مدار 20 سنة

ريجيم واستعدادات وتضارب أو انهيار وفشل (تعددت الأسباب والفشل واحد) عدم مسامحة نفسي على الفشل ثم انهيار وأكل وأكل وأكل وبعد ما أفوق ألاقيني تخنت ... هدنة لالتقاط الأنفاس وبعد كده حماس وريجيم وووو وهلم جرا وهلم جرا

وأنا كل ما في الأمر كنت عاوزة أعمل ريجيمي الخاص
وأوصل للمعادلة اللي اخس معاها بسهولة ويسر واحافظ على رشاقتي بدون جهد نفسي أو بدني

والحقيقة ما عرفتش لحد الأن ايه هي المعادلة دي برغم إني متأكدة إنها سهلة وموجودة قريب أوي أوي مني
مش جنبي لا والله لو دورت كويس هالاقيها جوايا
وما زلت أحاول واحاول ولن أبرح المحاولة حتى يرزقني الله بالرشاقة أو أموت وأنا باحاول

لو حد من بتوع تحليل المضمون قرأ رسالتي هيعرف قد ايه انا محبطة وحزينة ، لأني جبت سيرة الموت والنهاية والمشاعر السلبية كثير وهو ده فعلا احساس ، انا غرقانة بس باحاول وحاسة إني غالبا هاغرق بس مش قادرة استسلم ، دي بقى اللي بيسموها : الروح حلوة - حب البقاء - غريزة الحياة

مع الاسف إن الأصحاب انفضوا وما فيش حد يشاركني أمالي وألامي ... بس بإذن الله يكونوا على خير ويكونوا حققوا حلمهم وانا بأمر الله مستمرة وعلى الدرب لحد ما يرجعوا يلاقوني بأمر الله رشيقة وكاتبة قصة حقيقة لبطلة قهرت عوامل النشأة والتربية الغذائية والنفسية الخاطئة، وما نتج عن ذلك من ضعف إرادة وضعف ثقة بالنفس وشعور سلبي طاغي على امور حياتي الحالية والمستقبلة
بطلة قهرت سيطرة الزوج واستبداده وظروف حياتها الملخبطة واللي نتج عنها انها تحارب الدهون لوحدها : عمليات لا ودكاترة للمتابعة لا ولو دورت جواه كأنه مش عاوزني أخس بالعكس عاوزني اتخن ، أو على الأقل حاسة كدة عاوزني أتخن علشان ... بلاش ادخلكم في مشاكلي العائلية ودعونا نركز على الرشاقة

والأن يا صديقاتي وحبيباتي نفسي انجح ونفسي استمتع بخسارة وزني الزائد زي ما كنت باستمتع بالأكل
نفسي استمتع بالجوع وأحب الحركة والرياضة وألزم التقدم والنجاح ... للأمام سر

عاوزة اطبق كل ريجيم دفعت فيه فلوس علشان ربنا هيحاسبني عليهم (بعضهم زوجي وافق إني اشترك معاهم وبعضهم روحت بدون إذنه) وعاوزة أطبق كل اللي اتعلمته من الفشل علشان أنجح

البداية اليوم ، والبداية بقرار
قررت أنا صاحبة أمل أن ابدأ اليوم اول ريجيم دفعت فيه فلوس في حياتي وطبقته وقتها ونحفت 7 كجم في 3 اسابيع
وقررت بجد يعني لا تراجع ولا استسلام زي ما بانزل من البيت كده علشان اروح الشغل أو اروح مشوار مهم باعمل ايه لو ما لاقيت تاكسي باخد ميكروباص ولو الشارع ده زحمة بامشي لشارع تاني ولو الدنيا بتمطر باحط الجرنال على راسي وأكمل

حلو الحماس ده ... الحمد لله

وزني الان 133 ومن المنتظر أن انحف في خلال الثلاث اسابيع خمسة - 7كيلو مثلا علشان فارق السن (20 عام) وفارق القدرة على الحركة والنشاط ... الخ الخ يبقى بأمر الله في نهاية المدة يوم 10 نوفمبر بأمر الله وزني يبقى 125-127 كجم ، على فكرة أنا كان وزني وصل 140 وساعتها قلت كفاية بقى استسلام وهبل ، عاوزة اكشف عند طبيب نفسي أعرف ليه انا أتجه دوما لإيذاء نفسي وتكسير مقاديفها بدل ما اتضامن معاها واحقق لها اهدافها(بس زوجي رافض الدكتور النفسي).
نجحت بمحاولاتي الفردية في الوصول إلى 130 كجم وبعدها جسمي العنيد رفض ينزل ودي من اسباب فشل ريجيمات كثير والله
زدت تاني لحد 135 وحاولت تاني ووصلت 128 وزدت تاني وأخر محاولاتي الناجحة كانت في رمضان الماضي وصلت 123 وواحدة واحدة وشوية احباطات وومحاولات فاشلة وتخبط وصلت زي ما انتوا شايفين 133

عاوزة اعترف إني كنت مكسوفة ارجع الصفحة دي وأنا أزيد من الوزن اللي كنت عليه وكنت باأأجل عودتي لحد ما أنجح علشان اكتب للمحاولين والمحاولات الباحثين عن الرشاقة طريقة الوصول ، لكن لقيت ما فيش فايدة ، والحمد لله رجعت ومش هيحصل بإذن الله غير كل خير.

الريجيم ده زي تمهيد للأكل المتوازن وميزته الحقيقة إنه مش عاوز ترتيبات ولا طلبات

رقم 1- تنظيم مواعيد الأكل : فطار الساعة 7 الغدا الساعة 2 لعشا الساعة 6 المغرب والنوم الساعة 8 وفي النص 2 سناك
رقم 2- كل أنواع الطعام متاحة والفواكه والذي منه ما عدا الدهون والحلويات وفيما عدا هذا الأكل باعتدال وتحديد كمية النشويات في كل وجبة : رغيف عيش سن أو نصف رغيف بلدي أو 4 ملاعق ارز أو مكرونة في حدود 300 سعر
يعني أكل أكل البيت مع تحديد كمية النشويات ولا للدهون والحلويات وأهلا بالحركة ففيها كل البركة
رقم 3- اعتماد العادات الصحية بمعنى عصير ليمون على المأكولات والمشروبات ، كوب شا أخضر أو تفاحة على الريق ، أو كوب ماء دافي مع ملعقة عسل أبيض ، في السناك فاكهة أو كوب زبادي أو مشروب حارق للدهون زي قهوة بالقرفة والجنزبيل ... يا جمالوو

موعد الميزان القادم بعد 3 اسابيع
دعواتكم يا أهل الخير

صبح الصباح فتاح يا عليم
صحيت قبل الفجر بشوية وباشرب حاليا كوب شاي أخضر مركز الساعة 5
على فكرة فيه دوا أمريكي اسمه سليمينغ الأحمر وغالي ثمنه تقريباً 300 جنية ، غوعوا تشتروه ولا له أي ستين لازمة
بالعكس أخذته وأن 129 وقبل ما أخلص العلبة وصلت 133

العبرة في الريجيم والرياضة أما الأدوية لا وألف لا ، أو يمكن عامل مساعد مع الدايت بالنسبة للبعض أما بالنسبة لي : مش هاشتري أدوية تخسيس تاني

رجعت من جديد
وعجبتني فكرة إني اليوم اتحررت من السجن - الشر برة وبعيد - الحقيقة إبني هو صاحب الفكرة ، قال لي : ياماما ما تندميش على الايام اللي مرت وانتي تخينة وماعرفتيش تستمتعي بيها وما تفكريش في التجارب الفاشلة لكن فكري انك زي اللي خرج من السجن وبيبتدي حياته من الاول وجديد

وعنها وخدت الفكرة وعقدت مقارنة ما بين البدانة وبين السجن وما بيني وبين السجين لقيتني فعلا كنت مسجونة في شوية احباطات ومسجونة في الم ووجع وندم وسجينة مجموعة عادات واختيارات في الاكل مش بتاعتي ، ويمكن زي كل سجين كنت باكل علشان انسى السجن وقرفه ورتابته وملله وهمومه

بس ده كله مش مهم الحمد لله أنا اتحررت اليوم ، انهيت فترة العقوبة ، 20 سنة اكل شاق ومجهد ووزن متعب شايلاه على كتفي وماشيه بيه لحد ما هد حيلي

الحمد لله على الحرية

من اليوم مش هاكل زي المساجين : انواع معينة وكميات كبيرة أحسن ما حد تاني ياكلهم ، مش هاحتفل زي ما اهالينا علمونا - الله يسامحهم كانت لهم ظروفهم - ومش هازعل بنفس طريقة زمان ، هاحب نفسي كل يوم اكثر من اللي فات وواثقة فيها انها بفضل الله تقدر تعمل كل اللي هي عاوزاها علشانها هي مش علشان اي حد - لا زوجي ولا أهله ولا الناس - نفسي بس لأنها تستحق اني اكرمها ، ربنا يسامحني غلطت في حقها كثير وضغطت عليها وفقدت الثقة فيها ودفعت ثمن ده كله ايام وسنين مسجونة في جسمي التخين

وهافكر نفسي بالاحساس ده كل يوم علشان ما انساش ابدا اني اتحررت وخلاص قضيت فترة العقوبة ورجعت لنفسي تاني وعرفت قيمتها وهاحاول اعوضها عن كل اللي فات من غير ندم كأني اتولدت من الاول وجديد ... وليه لا ؟!

فيه ناس بتتولد من جديد لما بتدخل الجامعة وفيه ناس بتتولد من جديد لما بتتزوج وفيه ناس بتتولد من جديد لما بتخرج من السجن وبالتشبيه أنا منهم ، الله المستعان.

هاكتب يومياتي من جديد ، سواء في صفحة تانية أو في كشكول في البيت مش عارفة لكن أكيد هارجع هنا من حين لأخر لاني مش باحب النهايات المفتوحة وبإذن الله الصفحة دي زي ما شهدت بداياتي لازم أكتب فيها نهاية قصة سعيدة مع الارادة والرشاقة ونظام التخسيس الصحي الناجح.

على فكرة انا لقيت هنا احسن من الفيس وخصوصا في كتابة أفكاري ومكنون نفسي ، لأن الفيس باحس انه فضايح على الملاْ وفيه احتمال كبير إن زوجي أو زمايلي يقرؤا كلامي ويعرفوا أسلوبي حتى لو دخلت باسم مستعار إنما هنا المسائل مستخبية شوية.

مش عاوزة اتعامل مع حد يعرفني شخصيا لأن كلهم بلا استثناء صنعوا جزء من فشلي ما عدا أولادي حبايبي ، هم دول اللي طلعت بيهم من السجن : نفسي الجديدة وولادي وعملي ودراستي وقبل كل شي ديني ، ولله الفضل والمنة.

تابعوني من حين لأخر هادخل أطمئن عليكم وأطمنكم وأكتب سطر جديد في رحلتي.

الان وزني 140 كجم وعمري 47 عام

ونظامي : الحرية في الاكل والرياضة
أكل اللي انا عاوزاه وقت ما احب - مع الوضع في الاعتبار اني حرة يعني هاختار من غير قيود ومن غير ضغوط هاكل بس لاني جوعانة مش لاني محرومة ولا لأني ضعيفة ومكسورة وخايفة وقلقانة - يعني الاكل الصحي المفيد اللي يغذي جسمي ويقويه مش اللي يهد حيله وينفخه ويهزمه

هامش والعب رياضة - كنت قابلت دكتورة من فترة وقالت لي الرجلين دول نعمة من ربنا لازم نستمتع بيهم على قد ما نقدر ، لازم نمشي طالما ربنا انعم علينا بنعمة المشي ، فيه ناس كثير محرومة من النعمة دي بسبب المرض أو غيره ليه ما نستمتعش بنعمة حلوة زي المشي قبل ما كفانا الله الشر في يوم من الايام نتحرم منها-.

أترككم في رعاية الله وأمنه وألقاكم على خير بإذنه ومشيئته.