Avatar
خبز أو كيك البابكا
  • 13
  • Loading
  • 0
  • الأربعاء, 13 مارس, 2019 - 1 , صباحًا
  • التقييم:
الطريقة و المقادير

العجينة اللي نستخدمها هي عبارة عن عجينة بريوش ..وللبابكا إذا بحثتوا باسمها أكثر من شكل ومنهم اللي تكون لينة نوعا ما ومخلوط معها زبيب وبرش البرتقال وتوضع في قالب المفتوح بالوسط وتخبز وتزين بالايسنق وبعد ماتقطعينها بتكون قطعة وحده مثل الكيكة ..وفيه طرق ثانية منها نفردها وندهنها بالزبدة ونرشها بالقرفة وبودرة الكاكاو وقطع الشوكولاتة وتلف مثل السويسرول وتوضع بالصينية المفتوحة الوسط وتخبز وتزين بالايسنق..وفيه طرق كثير مختلفة اذا دخلتوا الاسم بالانجليزي بقوقل بتكتشفونها👍🏼 #babka

سويتها لكن حشوتها جربت حشوة شيف مصري حشاها بالشوكولاته والحلاوة الطحينية 😍 وحبيت أجربها وكانت لذيذة الحشوة بس أحبها أكثر من دون الطحينية..😀
..
الطريقة للعجينة:
قبل مانبدأ:نحتاج نطلع ثلاث أرباع إصبع زبدة ونقطعه لأجزاء ونخليه بحرارة المطبخ عشان يلين..
.
١- اخلطي كوب ونصف دقيق مع ملعقة ونصف صغيرة خميرة ورشة ملح..
٢-بوعاء العجن اخفقي ٢صفار بيض+١بيضة مع نصف كوب حليب كامل الدسم و١ملعقة صغيرة فانيليا ٢ملعقة طعام سكر اخلطيهم تمام👌🏼
٣-أضيفي خليط الدقيق على خليط البيض والحليب واستمري بالعجن..
٤- جيبي نصف كوب دقيق والزبدة اللي طلعناها وأضيفيهم بالتدريج وبالتناوب على العجينة والعجانة تشتغل..
٥-بتتكون عجينة لينة تتلزق شوي وهذا المطلوب..
٦-طلعيها من العجانة على سطح مرشوش بالدقيق واعجنيها بيدك كأنك تفردينها بيدك على السطح وتجمعينها مره ثانية..سويها مرتين ثلاث بعدين اجمعيها و حطيها في وعاء وغطيها واتركيها تختمر ٤٥دقيقة تقريبا. ……
بعد التخمير:
١-افرديها على سطح مرشوش بالدقيق بشكل مستطيل بحيث تناسب صينية الفرن سواء المفتوحة مع الوسط أو اذا تحبون تستخدمون صينية قالب التوست..
٢-وزعي الحشوة اللي تحبين وحشوتي كانت: الحلاوة الطحينية مع كاكاو بودرة وقطع شوكولاته غامقة خلطتها بمحضرة الطعام ووزعتها فوق العجينة وتلفينها مثل السويسرول وتنقلينها لقالب الكيك المفتوح الوسط المدهون مسبقا وتواسينها فيه وخاصة الطرفين تلمينهم على بعض.
٣-غطي القالب واتركيها بالقالب يتضاعف حجمها مره ثانية تقريبا نص ساعة..
٤-اخبزيها على حرارة ٣٥٠فهرنهايت (١٨٠سيلزيوس) تحتاج تقريبا نصف ساعة بالفرن.
٥-اقلبيها واتركيها تبرد وزينيها بالايسنق أو مرشوشة بسكر بودرة حسب رغبتك
وبالعافية