طلال: لانكم بتروحون بهالرحله بعد فقلت لازم اشوفه اتناسبه الميزانيه والا ما تناسبه .. يعني علشان يعمل حسابه..
شيخه منصدمه من " هالخبريه": اهاا ..
طلال: تبين تسمعين اغنيه؟
شيخه: مادري كيفك : )
طلال يحط رابط اغنية راشد الماجد "مستغربه" !
شيخه: ثانكس ..
طلال: اذا خلصت قوليلي علشان احطلج اللي وراها ..
شيخه: ماشي : )
شيخه: شلون نوره وحصه؟ من زمان عنهم؟
طلال: والله تمام .. للحين على خبالهم ..
شيخه: لول .. حرام عليك .. والله ايهبلون ..
طلال: من ناحية "ايهبلون" .. صاجه والله .. "ايهبلون"
شيخه: هيهيهي .. لا قصدي حبوبين حيل ..
طلال: مغشوشه فيهم .. ما تنلامين .. بس اذا عرفتيهم عدل بتغيرين رايج اكيد!
شيخه: اشدعوه! : )
طلال: : )
طلال: ها خلصت الاغنيه ..
شيخه: اي : )
طلال يحط رابط اغنية – صدقيني / عبدالله الرويشد ..
حاول طلال يكسر حاجز الرسمية بينهم .. وقام يسأل شيخه أسأله عن طفولتها وحياتها بالكويت .. عن هوايتها .. ورايها بامور معينه بالحياة.. وكانت اهي اتجاوبه .. وتسأله نفس الأسئله .. وكل كلمه كانت تقولها .. كانت تبهره اكثر .. وتكبرها بعيونه اكثر واكثر .. حس انها غير .. وتفكيرها ناضج ويجاري تفكيره .. ما حس بالسطحيه اللي في البنات اللي كلمهم من قبل بالانترنت او اللي كانوا بولايته القديمه .. كانت مختلفه حيل .. واستغرب ثقافتها واطلاعها على امور سياسيه وتاريخيه .. اهو نفسه ماكان يعرفها !
طلال: شلون تعرفين كل هالاشياء؟
شيخه: عادي .. من الكتب .. المجلات .. الجرايد .. التلفزيون .. يعني : )
طلال: اول مره اسولف مع ابنيه اتكلمني عن السادات .. وجمال عبدالناصر .. ولويس الثالث عشر!! بس تبين الصج .. وايد استفدت منج : )
شيخه: : )
طلال: انزين أسألج سؤال؟
شيخه: أسأل ..
طلال: شرايج بالزواج الحين؟ وايهو اللي تحسينه كان افضل وانجح .. الزواج الحين والا الزواج قبل؟!
شيخه: امممممم .. شوف هذا موضوع عويص .. وانا مو الشخص اللي عارف او المطلع او اللي له خبره بهالامور .. بس راح اقولج وجهة نظري الشخصيه .. ومو ضروري تكون صح .. عادي؟
طلال: اي عادي .. انا ابي رايج انتي : )
شيخه: اوكي ..
شيخه: ما نقدر نحكم ان الزواج قبل انجح من الزواج الحين او العكس .. كل زمن له ظروفه .. وله على قولتهم ملابساته ..
شيخه: اول الرجل اهو اللي يصرف على البيت .. اهو مصدر رزق الاسره .. اهو اللي يتعب ويشقى .. وكانوا اول ما يهتمون .. المره حلوه .. والا مو حلوه .. المهم راعية بيت .. تربي عيالها .. وتقوم باموره وامور بيته .. ماكان في تخاطب فكري بين الريال ومرته .. بس مجرد سوالف عاديه وروتين حياة ماشي .. العيال .. الدكان .. الجيران ... الخ من هالامور ..
شيخه: والمره لو تنظلم من الريال كانت تسكت واتحمل لانه مصدر رزقها .. ومالها مكان ثاني غير بيتها .. وكانت اتفضل اتعيش مذلوله في بيتها واتمشي "القافله" .. على انها تصير مطلقه وتروح بيت اهلها .. فكان الزواج ناجح..
طلال: حلو .. والزواج الحين .. شلون اتشوفينه ؟
شيخه: الزواج الحين .. مشكلته "العيشه المريحه" !! الحين المره والريال يشتغلون واثنينهم يصرفون .. المره قبل كانت تعتمد على الريال بعيشتها مثل ما قلت الحين غير .. شايله نفسها ومو محتاجه احد يصرف عليها .. فاغلب المشاكل اللي نشوفها بالزواج الحين .. اسبابها ماديه.. بعض الرياييل يبون من المره انها تحط ايدها بيده وتعينه على هالدنيا علشان يرتقون بحياتهم ويحسنون وضعهم المادي والمعيشي ويعيشون مرتاحين .. وبعضهم لا يبي المره تصرف على نفسها وعليه! وقيس انت المشاكل اللي بتصير من ورا هالشي .. وفي رياييل الله منعم عليهم وما يبون من المره الا انها اداريهم وتدير بالها على بيتها وعيالها ..
شيخه: الحريم وضعهم غير .. المره الحين تاخذ الريال وماتعرف شنو "مايته" مثل ما يقولون .. فتلاقيها حذره من ناحية الماده اشوي في البدايه واذا شافته ريال يستاهل .. ابدت استعدادها انها تعينه ماديا علشان يعيشون عيشه كريمه .. وفي بنات العكس "الانا" عندهم رقم واحد .. وما تكتفي بس بمعاشها لا تبي اتكوش على معاش الريال بعد واطالبه بلبس وهدايا وسفر و...الخ .. واعتقد هالاسباب اهي اللي خلتنا انشوف ان الزواج قبل انجح من الزواج الحين .. وبس .. شكلك قصيت علي وخليتني اقرق وايد : (
طلال: لول.. لا والله بالعكس .. استانست وايد من طريقة تفكيرج ..
وكان طلال يبتسم .. اعجبه منطقها .. ولما ذكر شكلها استغرب ان كل هذا يطلع من هالبنوته النتفه اللي شافها : )
حطلها طلال رابط اغنية رويشد/ باتبع قلبي ..
شيخه: ميرسي .. : )
شيخه: اقول جنك قصيت علي .. خليتني اهذر وانت ما قلتلي شي عن السفره اللي تخطط لها؟ تدري .. ما قالولي اهلي بنروح وياكم؟ اخاف هونوا؟
بعد ذيج الليله اللي اسهروا فيها طلال وشيخه على الانترنت .. تكررت سهراتهم وسوالفهم هذي لمده اسبوعين قبل سفرتهم..
قررت العايلتين يروحون فلوريدا .. وخلال هالاسبوعين اكثرت بينهم الزيارات والطلعات .. وكانت شيخه تتعلق بطلال كل يوم اكثر من اللي قبله .. بس كانت اتحاول كثر ما تقدر انها ما تكشف نفسها!
وكان طلال طــــــــــــــايـــــــــــر فيها .. كل مره يكلمها في الماسنجر او يشوفها .. كان يحس بقلبه يخفق اسرع من المعدل الطبيعي! .. خذوا على بعض حيل .. وسوالفهم صارت اقل رسميه واكثر ميانه وغشمره .. اكتشف طلال ان شيخه "نكته" بس عرفها على حقيقتها .. وكانت اتموته من الضحك لدرجة ان عيونه في بعض الاحيان تدمع! حس ان بينهم اشياء وايد مشتركه .. وانها فاهمته اكثر من نفسه .. وعارفه اللي يفكر فيه قبل لا يطبعه على الشاشه وهالشي سبب له ازمه! شلون اقدرت هالانسانه تعرف اهو اشقاعد يفكر فيه .. او شراح يقول من غير ما تشوفه!
كانت شيخه تتعلق بطلال يوم عن يوم .. بس كانت كثر ما تقدر تحاول تقنع نفسها بان اللي بينهم مستحيـــــــــل .. والنهايه بتكون مو من صالحها! كل ما اقنعت نفسها انها تحط حواجز بينها وبينه وتتحكم بمشاعرها .. كانت تتعلق فيه اكثر.. وتحبه اكثر واكثر!
الغريب بالشغله انهم ماعمرهم تكلموا مع بعض وجها لوجه كلش! يعني ما تتعدى الكلمات بينهم حدود السلام! ومره قالها طلال ان السبب وجود "ريه وسكينه" ( خواته) دايما معاهم وهم وجود المافيا !
سافرت العايلتين فلوريدا باول شهر 8 .. وكانت سفره خياليه بالنسبه لشيخه وطلال.. كانت هذي المره الاولى اللي تزور فيها شيخه اورلاندو ونفس الشي بالنسبه لطلال ..
عاشوا ايام ساحره بعالم ديزني .. وشدتهم روح المغامره في اليونيفيرسال .. واعجبتهم العروض في السي وورلد .. كل شي كان خيالي لشيخه وطلال ..
ما ينسى طلال نظرة الفرح والانبهار على وجه شيخه واهي اتشوف العروض والشخصيات.. شاف في عيونها فرحه وبراءة طفله! .. وابتسامتها كلها عذوبه ودلال ..
طلال لنفسه: الله يعين قلبي على شقااااااااه!
طالعت شيخه لعبة "شريك" اللي بايدينها .. وذكرت طلال!
كانوا في اليونيفيرسال .. صوب الاكشاك اللي فيها العاب "القدرات" ( الالعاب اللي اذا فزتوا فيها تكسبون هديه ويكون فيها اكثر من مشارك) ... الكل اتجه صوب لعبه .. فهد وعبدالعزيز راحوا صوب لعبة سباق الدراجات .. نوره راحت صوب لعبة كره السله .. حصه وشيخه وطلال صوب لعبة الرمايه ..
شيخه ما حبت تلعب هالالعاب .. وقفت اطالعهم يلعبون وتصورهم .. فاز طلال باللعبه وكسب لعبة شخصية "شريك" وسيده التفت على شيخه وعطاها اللعبه! ابتسامته ذوبت قلبها .. وحست ان حرارتها صارت 1000 وان ويها صار طماطه!
راحوا ميامي .. والمناطق اللي حواليها .. وادخلوا مطاعم وايد .. بعضها اول مره تدخله بحياتها .. امها وام طلال استانسوا وايد بالسوق .. واهي والبنات بعد .. كانوا يتفرقون اول ما يدخلون الاوت لت .. الرياييل يقعدون بقهوه .. فهد وعزيز يتسوقون ابروحهم .. امها وام طلال بروح .. واهي والبنات وطلال بروح!
استغربت حيل لما عرفت ان طلال مو من النوع اللي ينفر من السوق ويحب يتمشى فيه .. كان يحب ياخذ راي خواته بالشغلات اللي يشتريها لنفسه .. وانصدمت يوم سالها عن رايها بتي شيرت من بولو! تلفتت والا اشوه لا نوره ولا حصه يمها! استحت حيل .. للحين ترتبك اذا كلمها مباشره.. حست ان الماسنجر افضل لانه ما يبين توترها ولون ويها!
مرت عطلتهم بفلوريدا بسرعه .. وارجعوا بعدها لديارهم .. كان باجي على رجعة اهلهم 3 ايام.. وحست شيخه بحزن لفراقهم .. وحزن اكبر لانها ماراح اتشوف طلال!
أخاف تكون فاهمني و بس ودك تتعبني عشاني قول ريحني أحبك يلا
افهمها
المرسل: طلال
ادمعت عين شيخه واهي تقرا كلمات الاغنيه .. مو مصدقه للحين ان اللي قاعد يصير شي واقع بحياتها! سواء كان حلم .. وهم .. سراب.. او حقيقه.. حبت شيخه انها اتعيش كل لحظه من هاللحظات الغاليه وتحتفظ فيها بذاكرتها!
رفض بو مشعل ان شيخه توصلهم المطار .. ماحب انها ترجع بروحها خصوصا بليل لان رحلتهم متأخره ..
ام مشعل تبجي: ديريبالج على نفسج حبيبتي .. وشدي حيلج ترى كلها جم شهر واتكونين بينا..
شيخه تبجي: انشاءالله .
سلمت شيخه على عزيزان اللي كان مكسور خاطره على اخته لانهم بيهدونها بروحها .. وسلمت على امها وابوها ووصلتهم تحت للتاكسي .. وشافتهم واهم يحركون ويروحون..
حست ان روحها بغت تطلع! الدموع اغسلت ويها بس في نفس الوقت ريحتها..! ردت ادخلت شقتها وسكرت الباب وراها .. الله يعينها على وحدتها وغربتها..
** ** **
كان طلال رايح مع اهله المطار .. كانت اعصابه حدها متوتره ومتنرفز .. مو بس لان اهله بيردون ويخلونه .. لانه اهو تعود على الغربه من فتره وعدا هالمرحله .. بس كان متوتر لانه بيشوف شيخه مع اهلها .. ويدري انها راح تبجي لما تودعهم وماحب يشوف ادموعها واهو عارف انه ما بقدر يمسحهم!
التقوا العايلتين عند الكاونتر .. وسلموا على بعض..
ام طلال: عيل وين شيخه؟
ام مشعل: مارضى ابوها اتوصلنا .. تدرين الدرب ساعه تقريبا وماكان يبيها ترجع بليل بروحها!
ارتاح طلال من تصرف ابو شيخه وبنفس الوقت حس باحباااااااااااط! اليوم كان متعشم انه يشوفها لاخر مره ..
ام طلال: اي والله زين سويتوا ..
تمت اجراءات الجيك ان بسرعه .. ووصل طلال اهله واهل شيخه لين نقطه التفتيش اللي تودي للبوابات .. سلم عليهم .. ولما سلم على بو مشعل .. سحب خالد ايد طلال وشده لناحيته وهمس له باذنه ..
بو مشعل: طلال يابوك انت مثل ولدنا .. ما يحتاج اوصيك على شيخه .. تراها مثل اختك وما عندها احد اهني .. اسال عنها من فتره لي الثانيه .. و
طلال: ما يحتاج اتقولي .. شيخه في عيوني ولا تحاتيها .. ( ويقول بقلبه: ترى بس نفس اختي!! خير انشالله)