مشكوووورة على هالمعلومات الحلوة و بميزان حسناتج انشالله بس بغيت اسالج
انا فيني آثار حبوب و فيني شويه نفر بعد
يصلحلي اسوي هالتقشير؟
وايد سمعت يقولون تقشير الفواكه مو زين للبشرة البيضه ممكن ما يعطي نتيجة و ان عطا مؤقت و يرد مثل قبل 
و هم يسبب شيخوخة مبكرة للبشرة
هل هالكلام صحيح؟
الله يسعدك حبيبتي انتي وكل البنات اللي رفعوا الموضوع خصوصا صاحبة الموضوع
قبل ما ارد على سؤالك بقولك على شي مهم ..
وراح اطول في الكلام عشان انا من النوع اللي يحب يسهب في الشرح وتوصيل المعلومة متكاملة فاستحمليني شوية
التقشير بالاحماض يشبه التقشير العادي بس اعمق شوية ونتيجته احلى
بعض المقشرات الموجودة في الصيدليات وحتى بعض الماسكات الجاهزة والكريمات تحتوي على نسبة من حمض الالفاهايدروكسي بس بنسبة قليلة تناسب استخدام الشخص العادي
تقشير البشرة باستمرار بواسطة المقشرات العادية اللي بنستعملها في البيت يفيد البشرة كثير
زي مثلا تقشيرها بواسطة السُكر كأبسط مادة طبيعية موجودة في كل بيت مع غسول ناعم مرتين في الاسبوع او حتى المقشرات الجاهزة
هذي العملية تشيل الجلد الميت + تنظف المسام + تسمح للبشرة تتنفس أفضل + تمنع تأكسد الدهون اللي تفرزها البشرة مع الغبار والتلوث اللي مالنا مفر منه
واللي بسببه تظهر الحبوب والرؤوس السوداء
بالاضافة الى انها بتساعد كثير على الاستفادة من اي كريم مرطب او مغذي نستعمله او اي ماسكات نطبقها على البشرة بنسبة اعلى بمراحل
بعض الماسكات تحطي عليها عصير ليمون وبرتقال وممكن اناناس .. هي نفس الاحماض بس بتاخذيها بطريقة طبيعية ..
بتحسي وانتي حاطتها على بشرتك بوخز بسيط نفس الوضع اثناء التقشير بالاحماض عند الاخصائية بتحسي بنفس الوخز
التنظيف بهذي الطريقة بشكل دائم يخفف من مشكلة الحبوب ويجدد البشرة ويساعدها تبني نفسها من جديد وتتخلص من البقع واثار الحبوب بشكل اسرع
طبعا هذا اجراء لازم تهتمي فيه سواء قررتي تجربي تقشير الاحماض او لا
اما بالنسبة لسؤالك عن فعالية العلاج للبشرة البيضاء او غيرها
لون البشرة ماله علاقة بالتقشير
يفرق صحيح في موضوع الليزر واستخداماته لكل لون بشرة
لان لكل لون بشرة درجة حساسية تختلف عن الثانية بالتالي تتطلب علاج الليزر بطريقة تختلف بين بشرة وبشرة
واكيد الليزر كيف ماكان الهدف منه المفروض انه مايتنفذ الا في عيادة تحت اشراف طبيب
يعني انتبهوا يابنات من علاجات الليزر في الصالونات
الليزر سواء كان لعلاجات البشرة او ازالة الشعر لازم لاززززم يكون تحت اشراف طبيب جلدية
اخصائية التجميل قد ماكانت ممتازة ماتمسك شي اسمه ليزر اذا ماكان متابعها طبيب
هذي احفظوها غيب وصموها صممممم
حتى بعض انواع التقشير العميق جدا اللي يسوي سلخ لبشرة الوجه تبين محروقة لمدة عشرة ايام برضه مايتنفذ الا في عيادات جلدية لان يتبعه برنامج علاجي مايوصفه الا طبيب
اما التقشير باحماض الالفاهايدروكسي اللي تسويه اخصائية التجميل المدربة عليه مايعتبر تقشير عميق ولا يسلخ البشرة ويبينها محروقة بالمرة
واذا صار كذا معناته اللي تشتغلها ارتكبت غلطة كبيرة تتحاسب عليها
عموماً الاخصائية مسموح لها تسوي تقشير للبشرة بنسبة 60% الى 70% فقط وتدريجياااا مو من اول مرة ..
اكثر من كذا شغل الطبيب مو شغل اخصائية التجميل
يعني عادي ممكن تسويه اللي بشرتها بيضاء او سمراء او حنطية
لانه اساساً زي ماذكرت سابقاً هو آمن لانه مستخلص من مواد طبيعية بس بتركيز عالي يتطلب خبرة ومهارة يسبقها تدريب وقت كافي من الاخاصائية اللي بتسويه
عشان تفهمي ليه انا قاعدة اركز على مسألة التدريب اللي يرتكز عليها تساؤلك و خوفك واللي بيكون سبب مهم لحصول مشاكل مع هذا العلاج اذا اتنفذ على يد وحدة مو شاطرة
بعطيكي فكرة مبسطة عنه
هو مكون من مادة التقشير المركزة وهذي المادة لها عدة مستويات ومادة ثانية توقف مفعول التقشير
الاخصائية تحدد الوقت المناسب اللي مفروض ان المادة المقشرة تبقى فيها على البشرة قبل ما تحط المادة الثانية عشان توقف مفعول التقشير
كذلك من المهمات اللي المفروض انها تفهمها وتتقنها هي انها تقدر تقدّر سماكة البشرة .. رقيقة او سميكة تتحمل او ماتتحمل .. ومتى تنتقل من مستوى لمستوى في المواد اثناء الجلسات
هنا المشكلة اللي ينخاف منها ..
ان اللي تنفذه ماتكون مدربة تمام وماعندها خبرة تعرف سماكة البشرة و متى توقف مفعول المادة ومتى تنتقل للمستوى اللي بعده في الجلسات التالية
يعني بدون مبالغة لازم تكون جنبها ساعة منبه تتابعها بالدقيقة والثانية وتنتبه على الوقت تمااام وهي تشتغل
ممكن تسوي حركة غبية عشان تعجّل بالنتيجة وتحط من اول مرة المادة المقشرة اللي تركيزها اعلى واللي مفروض انها ماتوصلها الا تدريجياً بعد جلستين او ثلاثة
تسوي كذا عشان من اول مرة تظهر النتيجة وتحس الزبونة بالفرق وتتحمس وترجع مرة ثانية
وفعلا بتظهر نتيجة رائعة من اول جلسة ... بس بتصير البشرة جدا حساسة لفترة من الوقت وهذا غلط ..
انا عن نفسي اعتبرها فترة تعيسة لانها حتى من كريم الترطيب اللي متعودة عليه او مكياجها ممكن تتفاجأ بردة فعل غريبة جديدة عليها في بشرتها !!!
تطلع لها حبوب صغيرة وحكة واحمرار يتحول لبقع غامقة مع ابسط اختلاف في درجة حرارة الجو او تعرضها لاشعة الشمس عشان كذا قلت لكم ماينفع في الصيف
تقوم الاخت اللي ماهي فاهمة شغلها ترمي غلطتها على ان بشرة الزبونة طبيعتها حساسة
او انها بتستعمل كريمات ومستحضرات مكياج ملوثة ولازم تغيرها
والحقيقة ان المشكلة بدات في بشرتها نفسها اللي زادت حساسيتها اكثر من قبل بسبب التطبيق الغلط
او تتصور ان العلاج كله على بعضه ماناسبها
بينما في الحقيقة هذا العلاج مناسب لكل انواع البشرة بكل درجات لونها حتى اللي طبيعتها اصلا حساسة والغلطة كانت غلطة الاخصائية نفسها !!
فالمفروض ان العلاج يتنفذ بشكل تدريجي وتحرصي كثييييير على انك تروحي لوحدة عندها خبرة كافية وسمعتها كويسة وعندها امانة تقولك لو تحتاجيه والا لا ..
ممكن عمرك صغير و بشرتك محتاجة علاج طبي للحبوب والبقع وشوية عناية اكثر من حاجتك للعلاج التجميلي
اما موضوع انه يعطي نتيجة مؤقتة
لازم تعرفي ان كل العلاجات التجميلية من هذا النوع تعتبر عناية مستواها اعلى من العناية في البيت لازم تتنفذ على يد محترفة
يعني لازم تستمري عليها زيها زي عنايتك ببشرتك في البيت
لكن الاختلاف ان عنايتك في البيت بمواد متاحة لك كمستخدمة عادية تنفذيها براحتك ومن غير ضرر اسبوعيا
اما العلاجات التجميلية من هذا النوع احترافية اكثر ولها مواعيد خلال السنة لو اخذتيها بشكل سليم وعند وحدة فاهمة ومدربة تدريب تمام
عمرها ماتضرك بل على العكس بتفيدك كثير وبتشوفي نتيجتها الاكثر من رائعة على المدى البعيد
مثلا تنظيف البشرة بالبخار
فيه تنظيف تسويه في البيت بسيط ومناسب بس نتيجته محدودة
وفيه تنظيف عميق بمواد معينة ماتنباع الا للمحترفين ومساج يشد ويرفع ويحرك عضلات خاملة في الوجه وبخار مضاف عليه مواد وزيوت خاصة
وبعده يتمرر على بشرتك اشعة هاي فريكوينسي تهدي الاحمرار والتهيج في البشرة بعد الضغط على الحبوب وتنظيفها
و احيانا يستعملوا الغالفانيك اللي يعتمد على تدوير الكهرباء في جسمك اذا عندك نسبة دهون عالية
تطبق كريمات معينة ومحلول ملحي و تخليكي تمسكي قطعة معدن ملفوفة في منشفة مبلولة في يدك و تمرر بكرة بمستوى بسيط من الكهرباء على بشرتك
تعمل على تحويل الدهون لرغوة تطلع من المسام عشان تتنظف تماما
وهذي الطريقة نادرا يعملوها الا تحت اشراف طبي او اخصائية مدربة عند طبيب جلدية لان فيها مجازفة وخطورة لو اتنفذت غلط ..
اكيد بين التنظيف العادي والتنظيف بهذي الطرق فرق واضح في النتيجة
دوشتك بالشرح بس والله حابة اعطيكي الفرق بين التنظيف العادي والاحترافي كمثال
التقشير بالاحماض نفس الشي لازم يتكرر كل سنة او كل سنتين اذا حبيتي
واذا ماكررتيه عادي ماعندك مشكلة ماراح تحسي ان بشرتك تحولت لاسوء من قبل العلاج
ممكن ترجع لطبيعتها بس بعد فترة تمتد لسنة وممكن اكثر
اذا رجعتي سويتي التقشير بترجع بشرتك حلوة و ناعمة وبتسيطري على الخطوط الدقيقة اللي بتظهر مع الوقت بحكم العمر
وزي ماقلت لكم من قبل الخطوط الدقيقة ممكن تظهر في بشرة بنت العشرين
بسبب حرارة الجو والتعرض للشمس والتلوث
وقلة العناية بالاكل وترطيب الجسم من الداخل بشرب المويه بكميات كافية
وعدم الاهتمام بالتنظيف اليومي والاسبوعي
واستعمال مستحضرات مكياج وكريمات سيئة الصنع
وماتكون هذي الخطوط ملحوظة في هذا السن وفجأة في سن الثلاثين تظهر بشكل مفجع يجيب الاكتئاب
تقوم الوحدة تتخبط وتجري على عيادات التجميل تسوي الشد والنفخ والتخبيص في محاولة يائسة لتدارك اللي راح
بينما كانت تقدر تسيطر على هذا كله من وهي في عمر صغير و توصل لسن الثلاثين والاربعين والخمسين وبشرتها روعة بالعناية من بدري
التقشير بالاحماض اقدر اقول انه ممكن يساعد على استعادة نضارة البشرة حتى للكبار في السن بنسبة مرضية الى حد ما
الخلاصة ان العلاج امن جداً بس اهم شي يكون على يد اخصائية عندها خبرة كافية او حتى في عيادة طبيب الجلدية
لذلك انصحك عشان تقصري على نفسك الطريق وتمشي في السليم روحي لطبيب جلدية اول شي و خليه يشوف حالتك وقولي له على موضوع التقشير وشوفي ايش يقولك
ولو ممكن الطبيب نفسه يسوي لك العلاج يكون احسن ..
اعتذر عن الاطالة اتمنى يكون ردي قدم لك الفائدة
دعواتك ياعسولة ربي يسعدك
