نـــــــــــصيحة خــــــــــــاصة من القلب حق كل بــنــــــــــــات التجمع الغــــــالي
بنات حبايبي المسافرات واللي ليلحين ماسافروا انا من متابعتي لاخباركم الصراحة في وايد شغلات ونستني وحمستني الحمدلله والصراحة
أستانس لما اشوف رد حلو واخبار تشوق و...تبعثون في نفسي الامل والفرحة...ونفس الوقت يضيق خلقي لما اشوف اخبار تضيق الخلق
وهذا شي وارد وممكن يصير وبالعكس ممكن مرات في شغلات تتسلط عليج بالسفرة ممكن يكون اسم الله علينا وعليكم مرض لا سمح الله
أو عوار معين مثل اختي العزيزة عروسة وعوار ضروسها أو أم البنين وعيالها وروونه وطيحة بنتها...يعني كل واحد معرض حق هالشي
ممكن يكون شطانة ياهال تطلعج من طورج وتخليج تفقدين أعصابج مثل ماذكرت حبيبتي روونه لما قالت السفرة الياية بروحي وانها كل شوي
تهددهم انها بترجعهم الكويت وماكو فايدة (انا حاسة بالوضع) وممكن يكون نجرة مع الريل على امور معينة بالسفر وطناقر وزعل ...
وممكن تطلع لج شغلات تنغص عليج سفرتج مثل غلط بالحجوزات ، ضياع جنطة ، تنصدمين من الطيران أو مستوى الفندق انه مو اللي
ببالج...يعني اي شي يصير وكل شي وارد
انا أدري ان السفرة لابد ان الواحد يتعرض فيها حق بعض المواقف بس هو يعتمد على الشخص نفسه يعني انا اعرف ناس طول السفرة
وهمه هواش ونجرة (الزوج والزوجة) وحتى بالسوق والاماكن العامة تبجي وتنقهر وتحتر و...واعرف ناس طول السفرة وهمه ما
سالفتهم بس يهاوشون بعيالهم ويصارخون عليهم لا تروحون هني ولا تتحركون وتعال و...ياويلك والياهل يعاند وبجي وصياح وتخيلوا
الموقف معاي واعرف ناس بس يروحون طووول السفرة وهمه بس عافسين الويه ويتحلطمون ومايعجبهم شي لا طيران لا أكل لا فندق
لا شي...واعرف واعرف واعرف...والله انا هالكلام اقوله لكم من تجربه النماذج اللي ذكرتها ولابد كل وحدة وانا شخصيا تصير فيني
ولابد كل وحدة تلقى نفسها تعرضت حق عالاقل موقف واحد من هالمواقف وانا شخصيا اقولهم ليش مسافرين ومخسرين قعدوا ببيوتكم احسن
واوفر لأنهم ما حققوا الهدف من السفرة انا ماراح اقولكم ان السفر له سبع فوايد و...لا بس انا وانتي واختي وخالتي ورفيجتج و...نبي نروح
نستانس، نفرح، نغير جو ، نكسر روتين ، نشوف شي يديد، ونعيش تجربة حلوة...صح؟؟؟
شلون يتحقق كل هذا هالشي يعتمد عليكم انتوا أو علينا احنا ولنا دور كبير بان احنا نقدر نخلي السفرة ناجحة وسعيدة وموفقة أو تجربة فاشلة
وتعيسة... راح تقولون شلون؟؟
لابد انكم تحطون في بالكم الهدف من السفرة الوناسة وبونس عيالي مثلا لازم أحقق هالشي يعني انا رايحة أونسهم مو رايحة اهاوشهم ولا
أزفهم ولا أصارخ عليهم ليش موديتهم انا ادري ان مرات غصب عليج تفقدين بس لازم عالاقل بس بالسفر نكون ناس ثانين على فكرة ترى
انا مو ملاك لالالا اتعرض حق اللي تتعرضون له ياربي احنا بشر بس بنقل لكم تجاربي عقب جم سفرة عرفت هالشي يعني لازم الوحدة
أو الواحد يكون فلكسبل بالسفر يكون مرن وباله وسيع حتى لو يتعرض حق شي يضايقه يطوف انا شخصيا قمت افكر بتفكير اللي هو:
انا جم مرة بسافر بالسنة ويمكن ما تحصل لي سفرة وليش مخسرة وأيمع و..ترى كلها جم يوم وراجعه لازم أطوف وأستغلهم بوناستي
وترى باجر اتحسف على كل لحظة قضيتها بزعل ولا نجرة ولا هواش ولا تعكير مزاج..أفكر من هالناحية عقبها قمت لما اتعرض حق موقف
أمسك أعصابي ولا أطوف ولا جنه صار شي واذا سمعت كلمة تغثني أرفع الجام جني مو سامعه وشوي شوي تعلمت على هالشي يعني
اني اكون بالسفر شي ثاني أتمنى انكم فهمتوني اللي بوصله لكم باختصار:
السفرة كلها جم يوم وتكون مجرد ذكريات تتذكرونها بيدكم تخلونها ذكريات جميلة وبيدكم تجعلونها ذكريات كئيبة
استغلوا كل لحظة بسفرتكم بالمتعة والوناسه والفايدة
تعرضتوا حق موقف مني مناك خلكم فلكسيبل عادي وات إيفر يعني؟؟
صار ما صار طــــــاف من قلب والجام مرفوع والراس مرفوع..
الطيران ضيج وقلقصة والكراسي مو مريحة ميخالف كلها جم ساعة ونوصل ونرتاح ما بقى شي تقزر
الفندق مو فخم بالمستوى اللي تخيلته ومونفس الصور اللي شفتها لما حجزت...ميخالف أهم شي انه نظيف ومكان الواحد يقدر ينام فيه
ويؤدي الغرض.
المرض له علاج ان شاء الله مع الدوا ماكو الا العافية
الياهال تشيطنوا عادي مو لازم اربطهم بحبال وسلاسل خلهم يروحون ويردون شوي طول ما انا متابعتهم وحواليهم همه بخير
الياهل يبي شغلة شالمانع اني اوفرها له..يستعسر يحنننن على غير معنى دعلة وجوده مثل عدمه ما اشوفه ولا اسمعه يبيلها طولة بال
وتحمل بالداية صعبة بس مع الوقت..
الزوج عصب وزعل وطلعت طناقرة أتفاهم معاه ببرود اعصاب لما يطخ ونوصل حق حل مرضي
نصيحة الرياييل عادة ما يحبون السوق الا اذا كان لهم نصيب فيه ممكن واذا ملوا يقدرون يستريحون بكافيه على ما احنا نسوي مسح جيلوجي لووول
خلصت فلوسج وما شبعتي سوق ممكن تطرين و تحصلين فلوس لوووووووول لالالا أتغشمر معاكم مو لهدرجة لحد يسويها (الا اذا كان السوق يسوى)
أتمنى اكون وصلت الصورة والمعلومة اللي بوصلها ومابي منكم غير الدعاء
الله يتمم علينا وعليكم سفراتنا ويسهل امورنا ويحفظنا من كل شر ومكروه يارب
اتمنى اسمع اخبار حلوة
