المساعد الشخصي الرقمي

مشاهدة النسخة كاملة : الدرس الثالث عشر : المرقووووق


دندره
28-04-2005, 09:40:42 PM
السلام عليكم يابنياتي .. شلونكم وشخباركم عساكم بخير وعافيه وعسى ريايلكم منثولين من طباخكم ومن خطط امكم العود دندره .. اي ماعلينا اليوم ياويوه الخير بنطبخ مرقوق .. والمرقوق شوي يبيله مقاقه ويبيله تبطلون عيونكم ومخوخكم هل مقفله معاي ..يالله نبدي

بسم الله بدينا وعلى النبي صلينا .. نحتاج حق المرقوق سلمكم الله .. طحين اسمر وابيض مع ان بالاول ماعندنا طحين ابيض ولا نعرفه .. اي نكمل .. والطحين الاسمر يكون اكثر من الابيض بمرتين يعني اذا بنحط قلاصين ا4 قلاصات اسمر نحط مقابلهم 2 ابيض .. ونبي بعد ربع قلاص زيت عشان تمسك العجينه وماي .. الحين نخلط الطحين مع بعض وفوقهم الزيت وشوية ماي عشان تتماسك وتخلط لما تصير عييينه .. نخليها نص ساعه عشان تصك .. وبهل فتره نروح نسوي المرقه مالت المرقوق .. ترى اهي نفس مرقة اللحم بس فيها تغير شوي يحطون في المرقوقه بيديان وفلفل اخضر بارد وغيره من الخضار وهذا طبعا على هواكم وعلى حسب ذوقكم ... وماراح اشرح طريقة اللحم لاني شرحتها .. المهم نحمس اللحم مع البصل والطماط والثوم والبهارات ونحط فوقها ماي ونخليها تقلب لمدة ساعه وبعدين نملحها وبهل فتره نرجع حق العيييينه ونسويها اكور صغار مدلقمين ونرقهم نخليهم يصيرون بليتااات ادري ماتفهمون هل كلمه يعني شرايح او صفايح او مادري شنو بعد .. ولما نخلص من رق العيييينه نشوف المرقه ونحط فيها الخضار والخرابيط كلها كوسه بيديان جزر فلفل في ناس اللهم ياكافي يحطون زهره وفي ناس يحطون ملفوف وفي ناس مادري شيحطون .. ماقول الا مالت حتى مالت .. ماعلينا واحنا نرق العييينه اللي نخلص منها نشوحها بالجدر ونسوي الثانيه ونحاول نشوحها في مكان ثاني يعني نوخرها عن رفيجتها وهلم جره .. بعدين لما نخلص نقصر على النار ونحط حديده تحت الجدر .. ولا تنسون تخلون الماي اللي باجدر قبل لاتحطون العيييينه يغطي الخلطه يعني يغطي اللحم والخضار اللي حطيتوها بشوي واذا قصر الماي زيدوا يعني تحت نظركم ..وعقبها يبيلها ربع ساعه مو اكثر وعليكم بالعافيه ..

الحين عرفتوا طريقة المرقوق .. عاد بقولكم طريقه اسهل واحسن .. ماعليكم من خرابيط وهذرة العيايز .. ترى المرقوق تعب على الفاضي روحوا الجمعيه واشتروا الخبز العربي قصدي اللبناني مال المطاحن وقطعوا صغار وحطوه على المرقه شوشوفا شلون يصير احلى من المرقوق ونفسه بالضبط .. واذا تبون بعد حطوا خبز ايراني وهذا يسمونه محروق صبعه .. ليس مسمينه هل اسم مادري !! طبعا مافي سبب

عموما هذي الطرق الثلاث عندكم وانتو وهواكم .. واللي امها تتفلسف وتقول دندره تخربط عليكم هذا ايميلي وانا اعرف شلون افطرها بعز صيامها


نصايح امكم العوده

اذا رقيتي العيييينه حطي شوي منها على عيونج يقولون انها تشيل السواد اللي تحت العين .. مادري عاد صج ولا جذب انتوا جربوا ومنتوا خسرانين وخبروني بالنتيجه

وشعارنا؟؟

كونوا معنا في حملتنا ضد الرجال ومحاربتهم من خلال كروشهم .. والهوايه حمايه

مع تحيات امكم العوده دندره

^^دموع الكويت^^
29-04-2005, 02:58:16 AM
تسلم ايدج يا امنا العوده ومشكورة وايد عاد المرقوق طبقي المفضل مع القبوط

جارة القمر
29-04-2005, 03:26:45 AM
دندره



هلا يا قلبي

شخبارج


ومشكوره

والله يعطيج العافيه

وتسلم الأيادي

:)

^^بنت الكويت^^
29-04-2005, 05:50:26 AM
تسلم ايدج امنا العووووووووده

دندره
29-04-2005, 01:12:57 PM
هلا حبايبي شلونكم ..دموع يعله منزل العافيه قولي امين .. جارة القمر ياقمر انا بخير ويسرج الحال انتي شلونج؟؟ عساج بخير وعافيه ... بنتي بنت الكويت يسلم عمرج يارب عاد هذي الاكله تصلحلج خصوصا هاليومين ..
ام هيا .. اول شي بوسيلي هيونه وثاني شي.. حبيبتي هذا اسلوب العيايز اللي تعلمنا منهم كل تعلومهم تجعم وزف عاد انا قلت بزفكم شوي عشان تطبخون وماتعتمدون على الخدم الفاهيين اللي عندكم .. اي وطبقي وعطيني خبر واي شي تبين انا موجوده وبالشوفه وعليج بالعافيه يارب

امكم العوده
دندره

نسايم ليل
30-04-2005, 02:01:24 PM
صراحه طريقة المرقوق المختصره عجيبه

تسلم ايدك يا طباختنا الماهره

دندره
01-05-2005, 12:31:03 AM
يسلم عمركم حبايبي .. تقومين بالسلامه ام هيون وربي يسهل عليج وينولج اللي تبينه قولي اميييين ..
نسايم الليل عليج بالعافيه حبيبتي بس اهم شي تجربين وتخبريني

فروحة توحة
01-05-2005, 12:40:29 AM
ماشالله عليج تسلم ايدج يا دندرة

امنا العودة واللي يسلمج ابي منج دعوة خالصة لي ان الله يريح اقليبي
ادعيلي الله يخليج

دعوة العيايز سبحان الله تصيب

دندره
01-05-2005, 01:22:57 AM
يعلج العافيه فرووحه سويتيني عيووز مره وحده .. لا عيوني انا توني بشبابي ولو يحصلي جان طلعت وغازلت بعد ..

روحي ربي ينولج مرادج ويحفظج من كل عين ويعمي عين عدوج ويحبب ريلج فيج ويريح قليبج باذن واحد احد .. يارب يتعدل حالج للزين ويطفش عنج الشين ووتتسكر اذن كل من تحش فيج بالطين .. روحي يابنت فلانه عسى الناس عليج ولهانه وعسى ربي يبعد عنج حانه ومانه ويطحن عين عدوج بمسحانه .... قولي اميييييييييييييين

فروحة توحة
01-05-2005, 01:26:40 AM
آآآآآآآآآآآآآآآآآآآآمين

ادري اني اكبر منج بس يازين كلامج وحجيج ودي بس اسولف معاج

اكيد مربيتج يدتك صح ولا شو

دندره
01-05-2005, 01:57:16 AM
ياحلاتج انتي .. اكبر مني ... مافتكر يمكن انا اكبر منج بوايد بس بالقلب اصغر منج .. تدرين ليش؟ لاني اقط الهموم وراي ودايم اقول اللي مايعدني راس مال ما اعده فايده .. حاولي تاخذين اي امر بمرح وبضحك حتى لو كانت مصيبه حليها بشكل مرح وصدقيني كل شي راح يهون عليج

فروحة توحة
01-05-2005, 02:01:26 AM
ما اقدر يا دندرة

الله كريم

دندره
01-05-2005, 02:05:30 AM
تقدرين ياعمري تقدرين .. بس اول شي قوي قلبج ولاتغضبين ربج وسوي كل الواجبات اللي ربي واجبها عليج والباجي قطيه بالبحر .. ترى العين الحمره تفيد والطناش يرفع المعاش ..

sky
01-06-2005, 01:17:17 PM
والله خوش شعار عن الرياييل بصراحه عجبنى وان شاء الله بتبعه

حنـــــان
16-12-2006, 12:21:15 AM
http://www.moq3.com/pics/up_06/h_29_11_06/eb110c4202.gif

noora_333
15-05-2007, 12:59:17 AM
(( اذا رقيتي العيييينه حطي شوي منها على عيونج يقولون انها تشيل السواد اللي تحت العين .. مادري عاد صج ولا جذب انتوا جربوا ومنتوا خسرانين وخبروني بالنتيجه ))

هههههههههههههههههه
اخر صرعه للجمال والله عليكم سوالف الواحد من يقراها يمووووووت من الضحك اطبخ والبخ على هالويه لوووووووووووووول

ضحـاوي
15-05-2007, 12:17:55 PM
تسلم ايدج :)

atooma
05-07-2007, 03:33:42 AM
تسلم ايدج

C.A.N.D.Y
06-07-2007, 11:48:02 AM
تسلــــــــم ايـــــــدج