المساعد الشخصي الرقمي

مشاهدة النسخة كاملة : رحلتي لأسواق الجهراء وناسه في وناسه


ودي***أفرح
01-07-2008, 07:01:40 AM
السلام عليكم

شلونكم خواتي شخباركم .... اليوم حابه أكتب لكم عن تجربه جديده مريت فيها وبصراحه استانست

فيها حييييييييييييييل وخصوصا إني كنت محتاجه لها بعد أشهر طويله من الدوام المدرسي وبعد

التصحيح اللي يهد الحيل .....

المهم إني متعوده بعد نهايه العام الدراسي احتفل بهالمناسبه السعيده أنا وعيالي وزوجي

فأول يوم إجازه نروح مطعم ويكون باختيارهم ونقضي اليوم كله بره.

وبالنسبه لي أحب أسوي New look يعني أقص شعري وأصبغه اشتري هدايا لزوجي وعيالي.

بس هالسنه كانت مختلفه تماما وما راح أطول عليكم وأقولكم القصه بالتفصيل...

ومثل ما قلت لكم في البدايه عن التصحيح وهمه فأول شئ خلصنا تصحيح مراحل النقل العاشر

والحادي عشر ومدرستنا كبيره يعني أعداد الطالبات ...... وبعدين دخلنا على تصحيح الثانويه العامه

ما إني ما رحت إلا فترتين بس صراحه شئ لا يطاق تعب وازعاج ... وما عطلنا إلا يوم الاربعاء اللي

طاف وكان يوم الهنا ...... وحسيت إني محتاجه إلى فتره راحه ويومها كانت سفره زوجي لمصر

علشان أمور الدراسه وكان زوج بنت خالتي بيروح معاه ...


وهنيه طرت علي فكره:ggdw: جهنميه فطلبت من زوجي إني أروح أزور بنت خالتي وأنام عندها وبعد


معاناه ومحاولات لاقناعه أنا وعيالي وافق والحمدلله .... وعلى طول شلت قشي وعيالي


وطيران على الجهراء لان بنت خالتي سكنت بيتها الجديد في مدينة سعد العبدالله وكانت دايم تحن علي


إني أزورها بس ما كان عندي وقت ولما حانت الفرصه سويتها مفاجأة وقلتها على الخبر السعيد


وهى كانت دايما تسولف لي عن أسواق الجهراء وصالوناتها فقلت لنفسي هذه أحسن فرصه


وبدينا المشوار أو الرحله فأول يوم كان يوم الاربعاء بعد صلاة المغرب رحنا سوق اسمه (مجمع القصر)


وكان فيه مذركير وبودي شوب ومحلات اكسسورات والشايع فأخذت ملابس لعيالي من مذركير


وبخور من الشايع ....وكان فيه سوق شعبي اسمه الشاهبندر الامارات عجبتني الكفرات اللي عندهم


وأخذت منهم كفرين واحد بيج فبني والثاني بنفسجي ...


بعدين طلنا ورحنا سوق شعبي ثاني وعجبني عندهم شغله حلوه اللي هي كتابه الاسم اللي


تبينه ويحط عليهم الليتات اللي على شكل قلوب فطلبت منه يسويلي وحده باسمي واسم

زوجي ويحط بينهم قلب حب وبصراحه كانت روعه وعجبت زوجي حييل وهذه صوره لجزء منها


http://www.l22l.com/l22l-up-3/df9b93650d.jpg (http://www.l22l.com)

واشتريت بعد من محل ابو ميه أشكال قلوب وهذه نثرتها في الغرفه كلها ولصقت منها على الطوفه


وكان شكلها رهيب ....

http://www.l22l.com/l22l-up-3/2258c8d1c7.jpg (http://www.l22l.com)

بعدين قررنا إنا نرجع البيت لأن الوقت تأخر ..... ومرينا مطعم ماكدونالدز وأخذنا عشا حق عيالنا.


صراحه ثاني يوم كان حافل جدااا ..طلعنا الصبح الساعه عشر وأول سوق دخلناه كان مجمع

جديد اسمه أوتاد فيه شغلات حلوه أخذت من نعومي قميص نوم دانتيل أحمر فظيع ...

ومن عند حناين للملافع أخذت ملفع فيه شوارفسكي بسيط .... ومن محل اشتريت عدسات


نفس اللون اللي بالصوره ماركه fresh look

http://www.l22l.com/l22l-up-3/e94075c433.jpg (http://www.l22l.com)

وبعدين رحنا لصالون راقي جداا اسمه كيو كير وصاحبه المحل أقبال الاحمد ...المهم أول شئ

سويت جلسه نضاره للبشره وصار وجهي يلمع ....

وهناك شفت وحده تصبغ شعرها وصراحه احتريت فقررت إني أصبغ شعري وقمت أقلب المجلات

يمكن ألقى لون يعجبني فلقيت لون وقصه نفس اللي ابيهم وهو مقارب تقريبا للصوره اللي بتشوفونهاا

http://www.l22l.com/l22l-up-3/03fe54125f.jpg (http://www.l22l.com)


وبصراحه ما ضبطت اللون والقصه نفس اللي ابيه بالضبط ولكن كان حلو واللي تحسفت عليه شعري

لأنه كان طويل وتنتف بالقص....

المهم طلعنا من الصالون على الساعه 7:30 . وكان قريب عنده الركز الفرنسي للعطور

فاشتريت عطر فرساتشي لزوجي وأنصح أي وحده تشتريه لزوجها لان عطره حلوووووووو


http://www.l22l.com/l22l-up-3/e6d9515782.jpg (http://www.l22l.com)


واشتريتلي عطر زين وهذا عطري المفضل

http://www.l22l.com/l22l-up-3/12cbd246d9.jpg (http://www.l22l.com)


أكيد مليتوا وراح تقولون احنا شكو فيها شنو شرت .... بصراحه أنا حبيت أنقل لكم شنو صار معاي

لما رحت أسواق الجهراء.


اليوم الثالث طلعنا المغرب مرينا الخيمه مول وأخذت منهم بيجامات للبيت وكم ماعون للمطبخ


ورحت محل فيه جناط تقليد ماركات درجه أولى وأخذت جنطه بولغري اللون السلفر..


وبعدين رحنا سوق اسمه المنار وأول محل دخلته كان أمل الكويت اخذت منهم بخور المعاريس.


ومرينا بعدين كم سوق وتعرفون الحريم ما تشبع من السوق ....

في اليوم الرابع سلمنا على ربعنا اللي تحملونا 3 أيام ورجعنا بيتنا سالمين غانمين

ننطر أبو العيال يرجع بالسلامه والحمدلله السفره ما طولت ورد أمس العصر.....


أتمنى إنكم ما زهقتوا من سوالفي ......أنتظر رددودكم لا تبخلون علي ....

ذهب
01-07-2008, 07:13:29 AM
انا سمعت وايد عن اسواق الجهراء لكن عمري مارحت اصل انا ما أدل الجهراء يقولون معروفين بالكفرات الحلوة بس تدرين عليج بالعافية الله يهنيج بما شريتي

fona
01-07-2008, 07:14:56 AM
يعطيج العافيه حبوبه على التقرير الحلوووو

بس حبيبتي ممكن اعرف من وين اقدر احصل الليتات اللي على اسامي بس يكون قريب من المناطق الداخلية لانه ابعيدة على الجهرا حيل وسامحيني اذا طولت عليج:)

Shestylet
01-07-2008, 07:17:55 AM
مشكوة حبيبتي

][ استكانة جاي ][
01-07-2008, 07:22:22 AM
وناسة


:)



حلو انج تسوين نيولوك بعد هـ الضغط من الدوام

عـشـــ كويت ــقـــي
01-07-2008, 07:39:48 AM
هلا وغلا ..
كنتي مسيره عندنا لمدة ثلاث ايام واحنا ماقمنا بالواجب ..
اسفين والله ماادرين عنج ..
وحيااااااااااج الله بالجهرا .. والمنطقه منطقتج .. وتتدرين ذكرتي اشياء موجوده عندنا وانا ماادري عنه .. ترا انا مااحب السوق واايد .. وعلى فكرة زوارتج الثانيه لنا روحي لزهور الريف تبطل عندنا اختي امس رايحه وشاريه جم شغله من هناك وعجبني اكثر من بودي شوب .. وبالنسبه لااسمي اللي فيهم ليت .. وين؟؟ خل اروح احوس عندهم شوي ..

@ دهن العود @
01-07-2008, 07:46:01 AM
ماشاءالله تبارك الله

الله يهنيج يااااااااااااااارب

أميره بأخلاقها
01-07-2008, 07:54:21 AM
ويييييي زعلت تجين الجهراا وما تمرين علينا
اذا جيتي مراا ثاانيه لازم تزوورينا ........... اوكيـــــــــــــــــــــ ـه
وياا حساافه طاافج ماارحتي سليل حلوو كل شي تبينيه موجود فيه
منتجع ومحلات ملابس وعطوراات وبيجاامات وكرمكم الله نعاال وجواتي وهم فيه طفل المستقبل ومطااعم
وحديقه براا والله خووش مكاان يعجبج اذا رحتي لأختج مرا ثاانيه زوريه ترااه خوووش مكــاان

الغاليه نونو
01-07-2008, 07:55:48 AM
عليج بمليووووووون عآفيه وآلله شوقتيني آروح آلجهرآ مشتهيه آتمشآ فيهآ وبآلاسوآق آلشعبيه يقوون آنهآ خووووش آسوآق مومثل آلديره يبيله روحه للجهرآ دآم آلمعآش علابوآآآآآآآآآآآب":)

أم حمود2
01-07-2008, 08:19:45 AM
عليج بالعافية وحمد الله على سلامة زوجج وما شاء الله عليج ذوقج حلو ويستاهل بو الشباب وخووش رحلة وحلوة سالفة الاباجورات ومشكورة

قهوة برية
01-07-2008, 08:21:19 AM
ماشالله

بالعكس استمتعت بتقريرج الأكثر من رائع

ومبروك ع نيولوك وعليج بالعافية


وعشقي كويت

فديتج وين القى زهور الريف بأي مجمع ...؟!!!

وجدان الكويت
01-07-2008, 08:27:41 AM
عليج بألف عاافية الاغراض اللي شريتيها

بس بسألج عن الليتات للي على اسامي من وين ماخذتها اي صوب بالجهرا؟؟؟

كيوتيه
01-07-2008, 08:28:13 AM
مشكوووره حبيبتي

*مارلين_مونرو*
01-07-2008, 10:20:29 AM
عليج بالعافيه حبيبتي والله يبيلنا روووحه

ودي***أفرح
01-07-2008, 11:11:00 AM
مشكورييين خواتي على الكلام الحلووووووووووو .... وبالنسبه لبنات الجهراا صراحه ذوق وإن شاءالله مره ثانيه بسير عليكم....

أختي عشقي الكويت ذكرتيني بزهور الريف لاني كنت ناويه ادخله ونسيت إن شاءالله الزواره الثانيه.

وبالنسبه للاضاءه اخذتها من سوق على ما اعتقد اسمه الوزير....

ومشكوريين مره ثانيه على المرور

حناينq8
01-07-2008, 11:13:36 AM
يحلولج ويا حلو سوالفج


عاد تدرين ان عمري ما دشيت الجهرا ولا ادلها :(


عليج بالف عافيه

عالي مستواها
01-07-2008, 11:15:33 AM
حلو .. خذيتينا بجولة للجهرا :)

ماعمري جيت سوقتها مع انه دوامي بالجهرا

عمومــًا مشكورة .. التقرير يهبل

.
01-07-2008, 11:22:07 AM
عليج بالعافيه يارب..

شوقتني اسوي جوله..


وعشقي كويت

وين القى زهور الريف بأي مجمع ...؟!!!

كل الحب
01-07-2008, 11:41:45 AM
ما شاء اللة عليج

لى 3سنوات ساكنة بسعد العبداللة

ما فريت هالسوقه كلها وانت ب3ايام رحتى سوقة مارحتها

يسلموو على الموضوع

Om JooD
01-07-2008, 12:04:41 PM
ماشاء الله

بس يغيت اسأل؟؟

وين زهور الريف اي صوب؟؟

انا من سكان الجهره واول مرة ادري

سنا الفضه
01-07-2008, 12:07:45 PM
ماشاء الله تقرير ممتع وجمييييييييل

عليج بالعافيه ياقلبي

ويزاج الله خير

حقانيه
01-07-2008, 12:43:45 PM
ما شاء الله شوقتينا على اسواق الجهراء . الروحه يبيلها يوم كامل كفايه الطريج .

فزهةّ خٌفوق
01-07-2008, 12:49:12 PM
مشكوووره على التقرير الآكثر من رائع...

ما عمري رحت للجهراء

وان شاء الله الروح لها ...

رفرف
01-07-2008, 12:49:42 PM
عليج بالعافية ويا حلوها ديرتنا بكل مناطقها حلوة :)

flowe_99999
01-07-2008, 01:27:49 PM
عليج بالعافيه شوقتيني اروح الجهرا

OM-FAtMa
01-07-2008, 01:57:32 PM
واااااااااااااااااااااااا ااااااااو مشاء الله عليج فعلا ما قصرتى
انا بنت الجهرا بطن وظهر بس ما ادرى وين هالمحلات
الله يعافيج العناوين لو سمحتى بالنسبه حق زهوووور ما ادرى شنو والوزير اى صوب

مطيريه ماركه
01-07-2008, 06:28:24 PM
وناسة يبيله الجهر من زمان عنها

ناعمه العود
01-07-2008, 06:44:59 PM
اي الجهرا وايد حلوة انا من سكانها بس حطي بالج مره ثانيه تقهوين عندنا ياويلج :) هع هع
مايصير تنورين بالجهرا وماتشريفينا

نداوي
01-07-2008, 09:37:51 PM
بعيده وايد الجهرا بس يبيلها استكشاف مشكوره

Liv Tyler
01-07-2008, 09:39:40 PM
أسواق الحهرة موت حلوة ورخيصة
مشكووووورة على السالفة الممتعة

أميره بأخلاقها
02-07-2008, 02:31:38 AM
اييييييه واللله فطووم انتي نفسي انا صارلي ساكنه الجهراا يمكن 5 سنين
بس ما ععمري سمعت عن هالزهووور ياريت لو تقوليلي عن مكانها

عـشـــ كويت ــقـــي
02-07-2008, 06:10:07 AM
هلا والله ..
اسفه بنات لاني مارديت عليكم على محل زهور الريف ..
لاني اختي تعرفون صيف وكانت سهرانه ونايمه ..
وكان بس عرفت ييت اقوولكم ..
بس مااوصيكم .. لاتنسونا هههههه
المحل بمجمع منار ..

القبله
02-07-2008, 02:04:57 PM
هلا و غلا نورت الجهراء

مشكوووووره عالموضوع الحلو

شندوخه
02-07-2008, 02:10:21 PM
ياهلا ومرحبا تو مانورت الجهرا يووم طبيتيها

كيك و عسل
02-07-2008, 02:35:35 PM
ليش ما رحتي لمنتجع سليل الجهراء حيل حلوووو

على العموم حياج الرحمن يالغاليه وزدتي نورنا نور >>>جهراويه :)

AnaMASHYA
02-07-2008, 03:23:53 PM
عليج بالعافية وحمد الله على سلامة زوجج ويللا جنها سفرة تغيير وتسوق

كلي تفاؤل
02-07-2008, 04:05:35 PM
السلام عليكم ...

حياج الله بين اهلج وناااسج...المرة الجاية اعزمي بو الشباب بالمنتجع العالمي المفتوح بالسليل اسمه منتجع ملينيوم ...الليله 39 دينار والكورنر سويت ب100 والسويت 200...نظييف وراقي..

والبنات اللى اسألوا عن كتابة الاسم بالليتات فهي بسوق الوزير مكانه عند مجمع واره على 5 على ما اذكر ...


وزهور الريف توه فاتح بمجمع المنار ...واي سؤال انا حاضره ...

Om-FahooDy
02-07-2008, 04:30:48 PM
الللله ونااااسه
جان زين كنت معاكم :)

عليكم بالف عافيه

جنون العشق
02-07-2008, 04:36:54 PM
الجهرا ويه :ggdw:


ماعمري دشيتها ولا اعرف ولا احد فيها بس نمرها مرور الكرام واحنا رايحين شاليهنا بالصبيه



الله يعطيك العافيه شني حطيتها براسي وبروح



نقلتت اسامي الاسواق وان شاء الله لي زياره


مشكوره حبيبتي :tek:

روحـ روحه
02-07-2008, 11:04:11 PM
عليج بالعافيه :)

سارا ديور
03-07-2008, 03:10:31 AM
يحبي لها الجهرا


مسقط رأسي


مره رحت لأسبانيا جان يقول لي ريلي اشرايج فيها

جان اقول له وييييييييييييييييع

والله عندي الجهرا احلى منها

عموما انا جهراويه ابا عن جد

ظهر وبطن

وياهلا ويامرحبا باللي يلفانا ياهلابه

Om Haya
03-07-2008, 03:27:52 AM
ياحلو الجهره واللي سكنها...والله وطلعنا اهل :)
حياكم الله بالجهره ونورتوها وحتى اللي ما جوا الجهره اللي يحييهم بعد
بس عجبتني فكرة الليتات بروح اسويها انشاء الله طلع عندنا فناتك وماندري عنها :)

ودي***أفرح
03-07-2008, 04:45:53 AM
هلا وغلا في بنات الجهراء وبنات المنتدى كلهم ......

مو غريبه عليكم يالجهراويات كرم وطيبه يا حلوكم ويا حلو منطقتكم ... تصدقون يا بنات إني استانست فيها

حيييييييل على الاقل تغيير جو.......

ونصيحه للبنات مروا الجهراء وشوفوا أسواقها والله حلوه وفيهاااا كل شئ تبونه.

وإن شاءالله لي زياره ثانيه للجهرا وبشوف الاماكن اللي ما زرتها مثل السليل ....


وشكرررررااا على مروركم

* تيكت ايزي *
03-07-2008, 01:54:46 PM
حيااااااااااااااااكم الله حبيباتي

كل شي تبووونه بالجهرا

و الله ما كثر فيها السوقه و الصوالين و المطاعم

كويتية وأفتخر
03-07-2008, 01:55:24 PM
شرفتينا بالجهرا يالغاليه ولو انا ما درينا بزيارتج جان قمنا بالواجب

الجهرا حلوووووووة موووووووت فديت الجهرا ومن سكن فيها.

يالله عقب هالمشاركه بشوف بنات المنتدى بالجهرا وبتنور الجهرا بوجودكم.

تقبلي مروري،،،،،،

karamella
03-07-2008, 02:27:32 PM
شوقتيني بس الدرب طويل
ان شاء الله الاقي احد يوديني
مشكووره على الموضوع الحلو

حبة ألماس
03-07-2008, 02:33:27 PM
ههههههههههههههههههههههههه

يحلوج عليييييج بالف وستميه عافيه شرواتج

وعسا الله يخليلج عيالج وابوهم

بس ما قلتيلنا عن الاسعار اشلون مثل الديره واللا احسن

اشواق2008
03-07-2008, 02:46:43 PM
عليج بالعافيه

مـزيـااان
03-07-2008, 02:58:54 PM
...يسلمووا على الموضوع الرائع لانة عن الجهراء...

...وبالمناسبة بنات انا اهلى بالجهرا يعنى مسقط راسى وبيتى بام الهيمان يعنى قازة الدائرى السابع قز صار الطريق عندى عادى شسوى غصب عنى وخبرتى باسواق الجهرا كبييييييرة

واللى تروح الجهرا ما تحسف لانها حييييييييل ونيسة

http://www6.0zz0.com/2008/07/03/22/915143195.gif (http://www.0zz0.com)

..ويا هلا ومسهلا فيكم....

وناني
03-07-2008, 03:48:58 PM
لسلام عليكم

كل الي قلتيه عن الاسواق في الجهرا شافينهم الا الاسامي الي بالليتات شي جديد ومشكوره وما تقصرين والله استفدنا

نبضي جابر
03-07-2008, 10:51:13 PM
وناااسه والله ودي أروح سوق الجهرا
بس مره رحت له ومادلينا شغلات جذي
بس مجمع إسمه الخيمه وأوتاد والسليل ياليت بنات الجهرا يكتبون لنا عن الأماكن الحلوه بالجهرا
واللي عندهم شغلات حلوه وغريبه :p_03ba: ...

يعطيج العافيه إختي ع التقرير الحلو

الاخلاص
05-07-2008, 06:01:28 PM
حياكم الله بنات اي وحده تي مرشدة لمدينة الجهرا حاضرين هههههااااي

ريماا
06-07-2008, 12:48:35 AM
واااى ذكرتينى برحلتى لاختى هم بالمنطقة الجديدة جنوب الجهرا
مرة كل اسبوعين نروح لها جربت صالون كيوكير صج ارقى صالون اختى تعرفنى لووووو شنو مااروح صوالين اى كلام فمدحتلى هالصالون ذرب
فى عندهم سوق مبطل يمكن السليل او اممم ماادرى اتوقع اسمة جذى يمدحونة انا مارحتلة الاهم انة فى محلات ذربة
مشكوووووورة على نقل تجربتج

غنيمة حرم سليمان ابوالريش
06-07-2008, 01:20:48 AM
خبرى بالجهراء ابوى ودانى وانا صغيره رحنا القصر الاحمر حتى شفت وحده حاطه حنه بالحديقه ورايحه تلعب :)

y7lok_7loho
06-07-2008, 03:28:07 AM
الجهرااااا سيتى كبيرة ماشاء الله وتضيع ما اعرف شى فيهاااا بس ان شاء الله بسالج اذا بغيت شى

@@نينارتشي@@
08-07-2008, 12:43:42 PM
عليج بالعافيه وتهنين فيهم انشالله

كوكتيل التوت
09-07-2008, 12:41:36 AM
يعطيج العااااااااااااااافيه

& لمة وداااع &
09-07-2008, 01:00:24 AM
افـــــــــــــاااااااااا ا ياا ذا العلم ..

تجيييييين الجهراء ومااتقوللين لناا عشان نقووم بالوااجب...







احم احم ..


الجهرااااااااااااااااااء ترحب بكم...


حياااااكم يابنااااااااااااااااااااا اااات...

الكشخة
09-07-2008, 04:00:43 PM
ونااااسه ودي اروح

cat_q8
09-07-2008, 05:06:40 PM
واو شوقتيني انا من تزوجت ماقمت اروح سوق الجهرا
شوقتيني زوارتي اليايه حق اهلي بقضيها في ربوع اسواق الجهرا

داريني
09-07-2008, 09:31:15 PM
عليج بالعافيه
انا رحت لها مره وحده قبل جم سنة ورحت مجمه خيمة مول
عندهم محل حلويات نسيت اسمه يبيع مني كيك عجييييييييييييييييييييييي ييييب ولذيييييييييذ
كانت وحده معاي بالكليه كله اتييب منه ودلتني عليه عندهم بس فرع الجهرا والفروانية

أميرة الحزن:)
10-07-2008, 04:12:07 AM
عاد يمدحونها
انا مره رحت بس مالقيت المحلات اللي ابيها لان ماشاءالله الاسوقه واايد

لبي قلبك يالغلااا
10-07-2008, 04:24:16 AM
عليج بالعافيه والله يسعدج

استغفرك يارب
10-07-2008, 06:13:10 AM
عليج بالعافية

قلب راشد
10-07-2008, 06:31:07 AM
علييج بالعافيه :)

قلبي ابيض
10-07-2008, 07:25:34 AM
عليييييييج بالعافية ياقلبي ........................................ ويبيله

طويلة البال
10-07-2008, 07:26:45 AM
نورتينااا

وعليج بالعافيه

$نسيم الصباح$
10-07-2008, 07:35:19 AM
ماشاء الله

بس يغيت اسأل؟؟

وين زهور الريف اي صوب؟؟

انا من سكان الجهره واول مرة ادري

حبيبتي زهور الريف تلاقينه بمجمع المنار مول , وسوق الوزير إلي فيه اللمبات تلاقونه بمجمع واره

αlωαяdн
11-07-2008, 04:28:37 AM
مشكوووورة عالموضوع

وعليج بالعافية ماشريتي :)

روح البنفسج
11-07-2008, 10:17:05 AM
عليج بالعافية

نور الكويت$$
11-07-2008, 10:25:59 AM
يعطيج العافيه حبوبه على التقرير الحلوووو

بس حبيبتي ممكن اعرف من وين اقدر احصل الليتات اللي على اسامي بس يكون قريب من المناطق الداخلية لانه ابعيدة على الجهرا حيل وسامحيني اذا طولت عليج:)

بسووق الوزير بمجمع واره..

فديت الجهراء منطقتنا..الحين كل شي فيها ومجمعتنا كشخه :)

OM-FAtMa
11-07-2008, 10:55:42 AM
رحت يا بنات حق هذال المحل الى قلتى عنه زهووور الريف والصراحه ما شريت منه شى وايد غالى وما عرفت شنو اخذ بالضبط

جـنان
11-07-2008, 12:46:08 PM
يعطيج العافية على هالتقرير :) حلوووو ويونس كثري منه لووول

سجايا العنود
11-07-2008, 02:09:34 PM
مشكووووره اختي الحبيبه

cadbury
09-07-2009, 09:49:08 AM
ونااااااااااااااااااااااا ااااااسه
يبيييييييييييييييييله روحه

ما عليكم امر اهل الجهرا ممكن اسامي المجمعات و الاسواق

فديتكم يا اهل السنع

<<لمار>>
09-07-2009, 12:04:34 PM
عليج بالعافية

بنت بابا جابر
09-07-2009, 12:08:58 PM
يسلموووووووو

قـــمـــرهم
10-07-2009, 01:22:38 AM
الحمدلله ع سلاامة ابو العيااال

وبالعكس موضوووعج يوونس..


وتتهنين باغرااضج وصبغتج وقصتج يااارب..

والله يخليلج عياالج وزوجج ولااا يفرقكم..

!اتـجاهـي جـ N ــوب!
10-07-2009, 11:13:29 PM
الاسواق الجديده..

المنار مول >>> فيه اجمل وامل الكويت وزهور الريف وانور والطاهر والمنصور ومحلات اكسسوارات توب شيك ونوران وبعد جم واحد.. السوق فيه محلات لنجري وايد ومحلات العطور العربيه.. وفي فوق العاب وسوق الجوهره الشعبي

العالميه مول>> ورا المنار مول وفيه محلات لانجري وكفرات وفيه محلات هدوم البيت شحليله وربعه وفوق فيه مطاعم (دعوات ..فريج بن عاقول ) وكابينات طبعا:dddds:

سليل الجهرا..

فيه منتجع وشاليهات والعاب صاله داخل والعاب منتزه برا وفيه حديقه ومطاعم (مطعم لبناني رهيييييييييب ومطعم السبعينات مؤكولات كويتيه..ومطاعم وجبات سرريعه كنتاكي هعارديز ماكدونالدز وباستا منيا وجم واحد بعد ايه وسينابون و السوق داخل فيه سنتر بوينت وداماس وستبس واون تايم ومحلات شكثر محلات بس هاذا اللي يحظرني..

اوتاد..

فيه فوق محلاااات عبي تهبل الفيصليه وحناين ويبيله وبعد جم واحد بس هذيلا اللي طروا علي.. وفيه مكياجي وميلانو واستبس والشايع كليرز واون تايم ايه ونعومي الاصلي مال السعوديه الوحيد اللي هو عندنا ولاسنزا وووو محلات اكسسوارات امممم بعد واجد محلات بس هذيلا اذكرهم

بعد فيه سوق اسمه صحاري بيخلص بعد جم شهر ترقبووووووا :dddds:

الاسواق الشعبيه..

يوه شقول وشخلي.

خان خليلي. شاهبندر الامارات .الوافي. الموعه.. الجوهره.. بيت اولادونا.. الحاميد.. الوزير .. الحرمين.. طيبه.. سوق زمزم.. الباشا.. المعلم.. اممممم ما دري انا نسيت شي.. بنات الجهرا ضيفووه..

محلات متفرقه..

الركن الفرنسي مقابل اوتاد تلاقونه بمجمع ما ادري شسمه..

النصر الرياضي تلاقونه بالقيصريه..
القيصريه .. سوق شعبي قديم فيه محلات خام حق حريم كبار وفي حريم مبسطين يبيعون براقع والله بنات تعالو شوفو التراث بس .. :tek:.. وفيه بعد عطار مبارمك اللي اشهر من النار عالعلم.. اللي يقلب الوحده من سحت الى لميس.>>> شتحس فيه :tomato2:

الخيمه مول..

يتضمن سوبر ماركت مركز سلطان وفوقه بيت اولادنا وفيه كشكات هنود ملوت المكياج تلاقونهم بكثره وفيه بيضون وسوقه شعبيه ومحلات واااجد ..

اف تعبت وانا اكتب..


بريح..:eh_s(1):




ريحت وخلصت.:tek:

نكمل:dddds:



الجوثن .. يقع فوق بجمعية الجهرا الرئيسيه وترا جمعية الجهرا كبييييييره وحلووووووووه كل شي تبونه فيها حتى لبن العصفور فيها واحد وبطل ثاني مجانا >>>> تعرف تصروخ:krkrkr:

وفيها بوسيني وجونيورز وبعد شغلات بس هاذا اللي اذكره

المطاعم ..

قيصر .
مغل محل.
الفايز تلاقونه يم النصر الرياضي بالقيصيريه
.. فريج بن عاقول.
دعوات
اممممم

ايه.. المملكه هاذا مطعم جديد متخصص بالاكل السعودي والحظرمي يعني سوالف مندي مثلوثه باختصار اكلهم حده لذيييييييذ وفيه كباين..

بس هاذا اللي اذكره .. حبايبي خواتي بنات الجهرا اذا نسيت شي .. اسحدوووووووه بعد..


وبس

انشالله .. تستفيدون ويكون شرحي واافي >>>> حصه فيزيا الله وكيلج:dddds:



المهم .. ارد واقووووووووول

حياااااااااااكم الله ونورتينا يالغاليه. ومره ثانيه اقلطي عندي..:68_asmilies-com:

والجهرااااااااااااااااااا اء ترحب بكم

>>>>>>>>> زين ليش شاده حيلج:krkrkr:

أم مقداد 24
11-07-2009, 04:35:39 AM
وناااااااااااااسه ياليت حاطه الصور خل نشوفها

ملكة النور
11-07-2009, 04:51:27 AM
يعطيج الف الف عافية والله يهنيج يا رب
وللي سألوا عن زهور الريف المحل موجود في مجمع المنار بالجهراء
واللي يسألون عن الاسامي اللي يسوونها على شكل قلوب تضيء تلقونها بسوق شعبي بالجهراء اسمه الوزير

نونو ام كشة
11-07-2009, 04:56:10 AM
حياج الله حبيبتي بالجهرا انتي وبنات المنتدى..
واول مره ادري عن سالفة الليتات ؟؟

جلاديلياس
11-07-2009, 05:52:42 AM
والله يبيله روحه اختي بس ابعيده الحهراء وماأدلها

تسلمين حبيبتي ماقصرتي

قطوة@@
11-07-2009, 09:16:53 AM
يعطيج العافية

meme_alq8
11-07-2009, 03:21:37 PM
حياج الله اختي
بلعكس الجهرا مو بعييده انا عن نفسي من الديره لين الجهرا عشر دقايق واذا ع الراحه نص ساعه

وبس خط سريع وبعدين ع طول الجهراا
جد جد الي ماراح الجهراا ماشااف شي بلكويت
فدييييت الجهراا
وفي مجمع يديد بيبطل اسمه صحاري اتوقع بيصير تووب

خاشووقه
11-07-2009, 05:17:56 PM
يعطيج العافيه

Queena_85
12-07-2009, 12:04:02 AM
مو طاالعه الصور :(

كوارين
12-07-2009, 05:31:59 AM
عليج بالعافية

أشكي عليك الحال
12-07-2009, 06:23:07 AM
عليييج بالعافييه الللي خذيته

والجهراا حلووه بس بعييده شوي

cadbury
12-07-2009, 10:19:39 AM
الاسواق الجديده..

المنار مول >>> فيه اجمل وامل الكويت وزهور الريف وانور والطاهر والمنصور ومحلات اكسسوارات توب شيك ونوران وبعد جم واحد.. السوق فيه محلات لنجري وايد ومحلات العطور العربيه.. وفي فوق العاب وسوق الجوهره الشعبي

العالميه مول>> ورا المنار مول وفيه محلات لانجري وكفرات وفيه محلات هدوم البيت شحليله وربعه وفوق فيه مطاعم (دعوات ..فريج بن عاقول ) وكابينات طبعا:dddds:

سليل الجهرا..

فيه منتجع وشاليهات والعاب صاله داخل والعاب منتزه برا وفيه حديقه ومطاعم (مطعم لبناني رهيييييييييب ومطعم السبعينات مؤكولات كويتيه..ومطاعم وجبات سرريعه كنتاكي هعارديز ماكدونالدز وباستا منيا وجم واحد بعد ايه وسينابون و السوق داخل فيه سنتر بوينت وداماس وستبس واون تايم ومحلات شكثر محلات بس هاذا اللي يحظرني..

اوتاد..

فيه فوق محلاااات عبي تهبل الفيصليه وحناين ويبيله وبعد جم واحد بس هذيلا اللي طروا علي.. وفيه مكياجي وميلانو واستبس والشايع كليرز واون تايم ايه ونعومي الاصلي مال السعوديه الوحيد اللي هو عندنا ولاسنزا وووو محلات اكسسوارات امممم بعد واجد محلات بس هذيلا اذكرهم

بعد فيه سوق اسمه صحاري بيخلص بعد جم شهر ترقبووووووا :dddds:

الاسواق الشعبيه..

يوه شقول وشخلي.

خان خليلي. شاهبندر الامارات .الوافي. الموعه.. الجوهره.. بيت اولادونا.. الحاميد.. الوزير .. الحرمين.. طيبه.. سوق زمزم.. الباشا.. المعلم.. اممممم ما دري انا نسيت شي.. بنات الجهرا ضيفووه..

محلات متفرقه..

الركن الفرنسي مقابل اوتاد تلاقونه بمجمع ما ادري شسمه..

النصر الرياضي تلاقونه بالقيصريه..
القيصريه .. سوق شعبي قديم فيه محلات خام حق حريم كبار وفي حريم مبسطين يبيعون براقع والله بنات تعالو شوفو التراث بس .. :tek:.. وفيه بعد عطار مبارمك اللي اشهر من النار عالعلم.. اللي يقلب الوحده من سحت الى لميس.>>> شتحس فيه :tomato2:

الخيمه مول..

يتضمن سوبر ماركت مركز سلطان وفوقه بيت اولادنا وفيه كشكات هنود ملوت المكياج تلاقونهم بكثره وفيه بيضون وسوقه شعبيه ومحلات واااجد ..

اف تعبت وانا اكتب..


بريح..:eh_s(1):




ريحت وخلصت.:tek:

نكمل:dddds:



الجوثن .. يقع فوق بجمعية الجهرا الرئيسيه وترا جمعية الجهرا كبييييييره وحلووووووووه كل شي تبونه فيها حتى لبن العصفور فيها واحد وبطل ثاني مجانا >>>> تعرف تصروخ:krkrkr:

وفيها بوسيني وجونيورز وبعد شغلات بس هاذا اللي اذكره

المطاعم ..

قيصر .
مغل محل.
الفايز تلاقونه يم النصر الرياضي بالقيصيريه
.. فريج بن عاقول.
دعوات
اممممم

ايه.. المملكه هاذا مطعم جديد متخصص بالاكل السعودي والحظرمي يعني سوالف مندي مثلوثه باختصار اكلهم حده لذيييييييذ وفيه كباين..

بس هاذا اللي اذكره .. حبايبي خواتي بنات الجهرا اذا نسيت شي .. اسحدوووووووه بعد..


وبس

انشالله .. تستفيدون ويكون شرحي واافي >>>> حصه فيزيا الله وكيلج:dddds:



المهم .. ارد واقووووووووول

حياااااااااااكم الله ونورتينا يالغاليه. ومره ثانيه اقلطي عندي..:68_asmilies-com:

والجهرااااااااااااااااااا اء ترحب بكم

>>>>>>>>> زين ليش شاده حيلج:krkrkr:


بعد قلبي ما قصرتي كفيتي و وفيتي لا خلا ولاعدم
انشاءالله انزوركم عن قريب

كنوشة
12-07-2009, 10:27:20 AM
ودي اروح الجهرا بس ماادل من وين اروحوانا ساكنة العاصمة

أم ضارى
12-07-2009, 08:19:12 PM
انا صراحه ماشفت سوق الجهراء بس وايد اتيينى طلبيات حق اهناك صراحه ماهقيت الجهرا جذيه هاديه

حبيتها من اووووووووول نظره

يسلمو حبيبتى على الموضوع

futooosh
12-07-2009, 08:27:35 PM
عليج بالف عافيه
بس ما ادل ووايد بعيد زوجي ما يخليني
واصلا اخاف اضيع
خخخخخخخخخخخخخ

grumpy22
12-07-2009, 08:37:18 PM
مااعمري رحت الجهراا ولا ادلهاا اصلاا
حلوو ان الواحد يسوي نيولوك ويطلع يغير جو عقب حكره المدارس
عليج بالعافيه والحمدلله ع سلامه ابو العيال

meme_alq8
13-07-2009, 04:29:52 PM
!! استغرب شلون تقولون الجهرا بعيده !!
بس 10 دقايق ولا نص ساعه ومن تدخلون الجهرا الفتات تدليكم!!

زهرااا
13-07-2009, 04:40:52 PM
يعطيج العافيه على التقرير

g6awi
13-07-2009, 05:02:38 PM
طلبتج فديتج ابي صوورة الليتات اللي على اسم وومن وين شاريتهم بلييييييز ظرووري

المتفائله دائماً
16-07-2009, 03:42:00 PM
يا حلوكم يا الجهراويات

المتفائله دائماً
16-07-2009, 03:43:59 PM
للرفع

^ازين البنات^
16-07-2009, 05:07:48 PM
حلووو اخذتينآآآ بجووولهـ للجهراا

حلــم حيــاتي اطب الجهــراا <<طااآآع الحلم خخخ..اتذكر بنأأت الجاآآآمعهـ يمدحووون صوآآآلينهم

ناعم العود305
16-07-2009, 05:36:48 PM
مشكوووره علي التقرير

مشاوير
16-07-2009, 06:08:41 PM
فديت الجهراا

رغد84
16-07-2009, 08:22:26 PM
اتمنى اروح للجهرا
بس بعييييده

بس صج اهلها واااااايد طيبين

انصاريه قمره
16-07-2009, 11:33:46 PM
حبيبتي ماكو صور حسااافه :(

ودي***أفرح
16-07-2009, 11:50:47 PM
حبايبي أنتم والله ........نورتوا الموضوع .......مع إنه من العام وحسافه الصور اختفت

والله يا بنات أسواق الجهراء تستاهل العنوة كافي إن كل شي فيها وأسعارهم حلوووووووة حيييييييل ....

والبنات اللي سألوا عن الليتات موجودين بسوق الوزير وأعتقد سعرهم 4دنانير لأني سويت بس اسم زوجي لأن ممكن يسوي اسمج واسم زوجج على شكل قلوب ......

وتقبلوا تحياتي .......مع حبي وتقديري

بقايا همس
17-07-2009, 04:08:56 AM
حيااااااج الله بالجهراء وان شاء الله نقوم معاج بالواجب وترى على فكره كل شي موجود بالجهراااااااااااء....