يوم الغزو كان عمر 5 سنوات واتذكر قبله بكم يوم ابوي جايب الموافقة اني ادخل المدرسة (استثناء) و اتذكر فرحت واستانست
بعدها بكمن يوم اتذكر الدنيا انقلبتوكلن زبن ببيته ما طلع وقامت الدنيا ماقعدت كلن يتصل ويسب صدام
ويدتي الله يرحمها اسمعت ان العراقيين يتنصتون عالمكالمات فالكويت وخافت مسكينة وان سمعت حد يتكلم قومت الدنيا عليه وسمعت ان المستشفيات فالكويتت العراقيين باقو اجهزتها وكل من تعبت خافت تروح مستشفى حمد
واتذكر قالو صدام بيضرب الخليج بالكيماوي وجاب ابوي اكياس زبالة وجرايد زيادة ولزقات عريضة ولزقنا البيت بها كل دريسة لزقنا عليها كيس زبالة وفوقه جريدة وكل باب ماله لزمة ويطلع على برى البيت نفس الشي لزقنا عليه
وكل غرفة كان فيها طشت (كلك) ماي وخلق
واتذكر يوم الشيخ الوالد خليفة بن حمد الله يعطيه الصحة وطولة العمر وزع العيش والسكر والحليب والدهن على البيوت القطرية تحسبا لاي طاريء
ووزعو الرشاشات على الرجاجيل والحريم عطوهم مسدسات (فرود) اتذكر امي عندها 2 وابوي واخواني كل واحد فيهم عنده واحد والزهب بعد (للحين عندهم) وقالو لهم لفوها وخشوها لو صار اي شي لاقدر الله خلكم جاهزين بها
و اتذكر يوم قالو بنضيف اهل الكويت عندنا و كانو العرب يشيلون من ماجلة بيوتهم ويوزعون على كل سيارة كويتية ويعطونهم
واتذكرسالفة واحد شرى خبز ب1000 ريال وحطه بالفريزر و وززع على قصراه وجيرانه
ويوم البنات درسو معانا بالمدرسة اتذكر حفظنا نشيدهم الوطني وكنا مستغربين ليش مريولهم غير عن مريولنا وليش لين نص الساق واحنا طويل
كانت صحبتنا حلوة معاهم
واتذكر يوم حرقو الابار ووصلنا الدخان الاسود بس كان مرتفع وايد فالسما ومب اسود
والبحر يوم تلوث بالنفط
وكنت اخاف من سوالف التعذيب واخاف يجونا ياخذونا العراقيين
الموضوع رووووعه أنا قطريه من مواليد بعد الغزو بس دائمون أبوي يسولف عن الغز ويقول أنا كانو في عائله كويته ساكنه في مجلسنى اعتقد هل شي سوئ توتر حق كل الخليج ولي ليقول لا تتذكرون أومادري شنوو هاي وحده مافيها إحساس أنا يوم أشوف ساهر أليلي أصيح وياهم لنا شي مب هين الله يحفظ قطر والكويت وخليج قولو امين
كان عمري سنتين بس اهلي سولفولي عن كل البلاوي الي صارت الي اتذكره اني كنت اخاف من صدام بس يقولولي صدام اقعد ابجي والله الواحج شيقول وشيخلي عن الي مسوينه انا ما يحروني الا الي يقولون العراقيين مجبورين وكله من صدام زين اهوا مات و اهمه للحين يقولون الكويت لنا و طمعانين فيها
اني كنت من العمر 12سنة صغيرة لاافقه شيئا سوى انني اتذكر ان اهلي كانوا في حالة صدمة من عمل ابو الكمل صدام وخوفا من الله سبحانةوتعالى من ظلم صدام لاهل الكويت فلم يكفيه ظلم العراقيين سنين طوال وحتى يومنا هذا فمن ظلم صدام الى ظلم بعض العرب الذين لايزالون يصفون ابوالكمل بالشهيد البطل ،ع العموم اتذكر ان كثير من البضاعة الكويتيه دخلت الكويت لكن اهلي لم يدخلونه للبيت لان المرجعية الدينيه اصدرت فتوى بحرمة ابتياع او شراءاي شي كويتي لكونه مغصوبا الاانني وبنات خالاتي واخواني اشترينا بعض النساتل نسالكم ان تبرونا الذمة والله كنا صغار لانفقه شيئا.....اللهم يحفظ بلدكم الكويت وبلدنا العراق.
انا من قطر يوم الغزو كان عمري عشر سنوات. اذكر كان ابويفي الجيش و من الاول يوم طلع من البيت و كان اخر جندي يطلع من الخليج. اذكر ان في الصالة امي حطت طاولة الاكل و غطتها البطانيات و قالت لنا لو صار شي انخشوا هناك. و كنت في مدرسة الفلاح الابتدائية كانوا معانا ست بنات من الكويت في الصف وحدة من البنات اسمها بدور كانت رفجتي و زعلت يوم راحت.
انا انولدتبعد بعد الغزو.
ههههههه
لا والله اذكر لحظه بلحظه. كان ليلة الخميس وباجر عرس رفيجة اختى الكبيره. والكل يسنع بالبدله الي بتلبسه. وشلون بنسوي شعرنا ومتى بنروح للعرس يعني مراهقات. وهذا تفكيرهم وسهرت انا وخواتى نسولف عن كل شي. حتى الصور طلعناهم وكانا نودعهم نضحك علي اشكالنا
كانت ليلة هااااديه سكون
والي اذكره عدل ان اختي الياصغر منىقالت تهقين الغراق يدخلون علينا وانا والله لشدة اعجابي بالطاغيه. بذلك الوقت قلتلها لا مستحيل. ونمنا بامان
لكن قعدنا او فزعنا من النوم ا الساعه اتوقع ٥ الفجر علي صوت طائرتان وكا ن صوتهم عاااااااالي. يعني كانت قومه علي خرعه طلعنابره غرفتنا ولقيت اخوى الى يكبرني بسنه وقال لا ماكو شي بس مناورات لكن اختي شغلت الراديو وكانت الصدمه. واغاني وطنيه. الى الان ماصدقت انالطاغيه يغزو الكويت وجذبت كل. شيئ اشوفه واسمعه وحطيتالمحطه علي العراق. وكان مذيعهم قبحه الله وين ماكان لابس غتره وعقال وشكله مثييير لضحك وقال انامعك يا كويتالاحرار وانا معكم ايهاالابطال فرحت وقلت الحمد الله العراق. معانا مو ضدنا لكن اكمل الذيع وبين كل شي وكذبهم ان فيه ثوار رايحين للعراق عشان يساعدهم لقلب الحكم وبدوايكذبون على انفسهم
وعندما تاكدنا من الخبر هنا انتقلت الى رحمة الله تعالي بالنسبه لى. الوحده العربيه واختفي الدم العربي ودفنت الهويه العربيه والميت لا يعود
تحياالكويت وكل من ساعدنا والباقي الو مزبلة التاريخ