سالفتج بالغزو ! شنو كنتي تسوين ؟ وشنو سويتي لما سمعتي الخبر ؟؟ تعالوا

ازهااار قال:

انا من السعودية
صج انها ايام رعب
مع ان احنا بالسعوديه كيف عاد اهل الكويت

بس صراحة اللي سمعته
ان يوم صارت حرب العراق مع ايران اكويتين ساعدوا صدام وتبرعوا له بفلوسهم وذهبهم
مادري ليش يعينون هالظالم على الايرانين المساكين

أنقر للتوسيع...

فـلـ 50 ـس قال:

قبل الغزو كان بفريجنا بيت صغير ساكنينه عائلة فلسطينية وكانوا على قد حالهم و اهل الفريج ما يقصرون معاهم يساعدونهم ويصرفون عليهم ​

لما صار الغزو محد علم العراقيين على العسكريين اللي بالفريج غير هالعائلة الفلسطينية !!​

وأول بيت فتنوا عليه بيتنا لان عمامي مقاومة كلهم بالجيش والشرطة ..​

فدخلوا العراقيين بيتنا و ما كان فيه إلا "جدي جدتي و عماتي و امي وانا بالمهد " هددوا جدي يعلمهم وين عياله و جدي قال ماعندي إلا اللي تشوفونهم بالبيت ... ​

فجأة دخلوا العائلة الفلسطينية و قالوا لجدي وين ولدك فلان وفلان نعرف انهم بالمقاومة
وجدي ساكت ما تكلم ​

كانوا العراقيين بياخذون جدي يأسرونه بس لما شافوه رجال كبير خلوه بس تدرون شسووّا قبل لا يطلعون ؟​

صبوا على جدي القاز و حرقوه ​

حسبي الله عليهم بس ربي كتب له العمر ​

جدتي تقول ما كان فيه مستشفيات و العلاج مو بالمستوى بس قدرنا نوفر مرهم يبرد عليه ​

تقول كانت تخلي جدي بالحوش عشان يتهوى و يخفف الألم عنه ​

وتقول عيني ما تغفل عنه ثانية تخاف حتى من الذبانه لو وقفت على جلده يتسسم على طول لان مافي جلد اساسا​

أنقر للتوسيع...

marimor قال:

خوووش موضوووع

انا مالحقت عالغزو بس واااايد اهلي يسولفون لي عن هالايام

يقققول ابوي وقت الغزو كان نايم ويت قعدنه يدتي قالتله قوووم قووم صداموه دش الكويت

ابووي راح طل من الدريشه وشاف السما كلها هلكوبترات وعليها علم العرراق حدده انصدم

وعمتي كانت حامل وولدت قبل التحرير بشهريين ويابت توم واهيا ماكانت تدري انها حامل باثنين انصدت وقت الولاده

لووووووول تقول المستشفى كان خرابه من العراقيين ووصخ وقطاوه يحوسون داخل المستشفى وييع

حتى لمن طلعت ويا ريلها شافهم جندي عراقي ماسكسن اثنين جان يقولهم العراقي " انطونا واحد " خخخخخخخخخخخخخخخخخخخ

الثور عباله حلاو نوزع عيالنا

وطبعا خووالي خذووهم اسرى وعاااشوا بعذاب ومعاناة وردوا من الحدود لي الكويت مشي !!!

و غيرها من السواللف شكثثثثثثثثثر :d


و الحمدالله اهلنا كللللللللللللللهم صامدييين محد طلع برا الديره :eh_s(15):

..........

والله يحفظ ديرتنا وشعبنا من شر الحاقدين والحاسدين ويخلي لنا ابونا صباح ياااااارب

ويعل صداموووه مايرتااااااح بقبره ولا يتهنى دقيقه جهنننننننم اهوا وربعه ومحبينه انشالله :eh_s(14):

أنقر للتوسيع...

^^yasmina^^ قال:

خووش موضووع انا كان عمري 4 سنيين بس في شغلا اذكرهااا
بنات تتذكرون الغبااار الغريب والعجيب الي صار العام مرة وحدة انقلب الجوو والغبار كان مو طبيعي كان شهر 3 جنه العام الغبار كنا نشووفه من الدريشه واهوه ياي صوبنا يتقرب منا وكان ياي من الشمال تتذكرووون ؟!
هذا ولا شييي ولا شييي لما صدامووو حرق الابار الدنيا سووودة اذكر كنت اسال ابوي الحين الصبح ولا بليل الدنيا بدون مبالغه سوودة الشمس ماتبين حتي لما مطرت الدنيا المطر لووونه اسووود ووايد حذرونا ان ما نطلع بهالجووو حتي بدووون مبالغه جيري البيت بكل البيوت صار فيها خطوووط سودة من المطر الاسود احنا غيرنا جير البيت سنه 1999 وطول هالمدة من 90 لي 99 الخطوط السودة ما راحت وطبعا كل البيوت صار فيها هالحاله

انتو بنات ما مرت عليكم بيوت قديمة جيري القديم خطوط سوودةعليها من فعل المطر الاسود ما شفتوها ؟!


ا

المهم المطر والجو من الشغلات الي ليلحين اذكرها لان كنت بطلع بالحوش امي ما تخليني بس اطل من الدريشه
اذكررر كانو خواتي وامي وابوي والكل يلزقون الدرايش بلزاق وكانو يسندون كبتات البيت عالدرايش طبعا ما كنت ادري شسالفه بعدين استوعبت بعد ما كبرت ان يمكن يخافون الجامات تنكسر :+ وبعد التحرير شفت وايد بيوت مسوين نفس الشي

كانت الاتصالات صعبه لاني اذكر ابوي يدق علي اعمامي وما دايما يلقط الخط ومرة عمي دق علينا واشوف الكل مستانس لان تطمنو علبعض مادري شسالفه كنا وايد نسمع اصوات قنابل طيارات وانفجارات وصوت رشاشات وكنت اشوف ابوي واهلي علطول ماسكين القران علطووول اذكر ابوي عطاني كتيب اصغير قران قالي اقري وادعي وانا مادري شسالفه ماعرف اقرى عمري 4 سنين مادري ليش عطاني بعدين فهمت انهم كانو في حاله نفسية يرثى لها اذكر علم الكويت ابوي خشه بفتحة السنترال اذذكر بعد يوم تحررت الكويت وسمعنا اخبار حلوووة ابوي قالي اذا سمعتي صوت انخشي بالكبت ههههه وانا بقلبي مستانسه ماراح اسمع لان تحررت الكويت والله العظيم هالشغله ليلحين اذكرها مستانسه بداخلي يوم تحررت الكويت يعني كنا اصغار بس كنا نبيهين اكتبلكم الكلام وعيني دمعت احلي ايام بس كانت شينه يوم اسمع القصص شيعي والسني والبدوي والحضري كانو بيد وحدة ما يفرقون بين بعض ... اذكر ايام التحرير التي شيرتات السوده والبيضه الي عليهم علم الكويت وامريكا والبروشات مكتوب فري كويت الحين افكر متى مداهم يسوونه؟! هههههه يووم التحريرررر كان زحمه الكل برررره الكل الكويتيين كلهم اطلعووو بالشارع رحنا اول بيت زرناه بيت جيرانا لان ولدهم انأسررر بس رد بعدين . رحنا المطلاع لان اهناك كل العراقيين الي كانو بيطلعون او بينحاشون الطيايير الامريكيه فجرت فيهم كانت فررحة عارمة فرحة التحرير ....

قرقت عليكم وااايد بس هم راح اكمل هههه
عشان الي ما كانو مولودين بالغزو او ما عاشو فترة الغزو يعيشونها

الي بقوله شغلات ماذكرها بعد ما كبرت سمعتها من خواتي وابوي وامي واعمامي وعماتي


ابوي يقول يوم صار 2-8 الصبح الخميس قعدت رحت الخباز بشتري خبز ابوي حزتها كان ناظر مدرسة فكانو معطلين يقول كنت اشوفهلكتوبرات وطيايير واصوات شسالفة طبعا بنات الي ما انولدو بالغزو بعطيكم معلومة يوم الاربعا قبل الغزو بساعات صدامو ومادري واحد من وزرائه مع الشيخ سعد وواحدومع حسني مبارك او ملك فهد ماذكر بس اذكر ان اجتمعووو ان خلاص ماكو شي بين الكويت والعراق والعراق تعترف بالكويت كدولةوههذا حطووه باخبار الساعه 9 بليل يوم الاربعا فالناس انصدمووو هذا توه مجتمع مع الشيخ سعد ان توه صاير اجتماع ومتفقين وهذا من ورانا راح يجهز جيشه عشان يحتل الكويت فالكويتيين كلهم انصدمو وابوي كان مستغررب مو مستوعب لما رد وقال لامي شفت طيارات واصوات غريبه شسالفه دقت عمتي بهاللحظة وقالت لابوي صدامو غزانا بجيشه ابوي استغرب قال امس قبل لا انام حطيت الاخبار ماكو شي واجتماع بينا وبينهم ان كل شي خلاص اشلون شغل ابوي التلفزيون وشاف بعينه وانصدم هذي كلمة انشهرت بالكويت " ننام كويتيين ونصحى عراقيين" حتي
تتذكرون بيوت اول الي يكون بالسقف ديكور وبين الطوفه والسقف فوق زخرفه ذهبية طبعا حاليا يعتبر اولد فاشن اي الله يسلمكم الجنوود العراقين دشو بيت عمي بيت حكومة من بيوت القرين يوم شافو هالديكوو تعجبوو هذا قصر قصر شهالقصررررررر ......

طبعا صداموووو خرب كل شي كل شي الفنادق المستشفيات المدارس صارت مراكز تعذيبهم الجمعيات باقو كل شي منها كل شي هالي مو شايفين خير الكريم حسبالهم رووب كل شي باقو دخلو وزارة الاعلام وباقو كل الاشرطة الي فيها والمسلسلات والمسرحيات وكل الارشيف الي موجوود واحرقو كل شيييي حتي اليهال الي توهم والدين ما اسلمووو من الغجرررر
انا بقولكم قصة وحدة قابلتها بالسفر كويتيه قالتلي قصة حياتها بالغزو اولدتولدها بالسابع ماذكررر اي مستشفى العسكري او الفروانيهولانه اصغيرررر حطوووه بالحاضنه حاله حال باجي اليهال اتقوووول هذي ولدته وحطيته بالمستشفي وكنت كل يوم ازوره كان محتاج عنايه والدكتور يقولي وجوده بالمستشفى احسن ... تقول بعد جم يوووم قلبي نغززززني قمت على ريولي وقلت حق ريلي قوم خلنروح ناخذه مابيه يقعد بالمستشفي ويقول لا يا بنت الحلال مكانه اامن اهناك تقول الكل كلمني بس انا راسي يابس الاااااا بروح واخذ واتقول اهناك الدكتور عارضها بالبدايه وبالحنه خذذته تقوووول بعد ساعااااات من بعد ما خذيته يالنا خبر كالاتي " العراقييين دشوووو المستشفى هذاااا وشالووو كل الاجهززززززززه الي عاليهال وقطو اليهال كلهممم عالارررررض وباقوووو الحاضنات وكل الاجهزه طبعا النتيجة شنووو اكيييد كل اليهال ماتوووو حسبي الله عليهم ونعم الوكيل
سامحوني قرقت وايد عليكم عندي وايد شغلات ودي اقولهاااا بس اذا تبون قولولي

أنقر للتوسيع...

مـآلي شبيه~ قال:

امبيه اخنقتني العبرة من سوالفكم أنا من مواليد بعد الغزو بس جد حسيت جني عايشته
من سوالف أمي عن الغزو تقول كانت رايحة الجامعة مايدرون شالسالفة كانت في باص مع بنات منطقتها
تقول وأحنا بالطريج شفنا زحمة جان ينزل كويتي من سيارته ويقول حق البنات اللي بالباص اخذو فوق تحت وردو بيوتكم
العراقيين قاعد يأخذون اي احد بالشارع ويحطونهم في باصات و يودونهم العراق كرهائن و أسرى صار صراخ وبجي بالباص
تقول أمي زود ماكنت خايفة على نفسي خايفة على خوالج 3بالحرس الوطني و على يدي المريض
لما رجعت أمي يدتي لممتها وقعدت تبجي تقول مابي عيالي يروحون من ايدي بسبت هالجلب قصدها صدام الله لا يرحمه
بعدها بأسبوع راحو الرياض عند خوال يدي و قعدو خوالي بالكويت اللي بالمقاومة واللي بالحرس الوطني
حرام يدتي كانت كل يوم تبجي على عيالها تبهم كانو 5 اللي بالكويت و الحمد الله 4 سالمين وواحد راح شهيد عند ربه


الله يحفظ ديرتنا و يحميها من كل مكروه ياااارب ..~

أنقر للتوسيع...

Japanese قال:

انا قطريه وكان عمري سنتين يعني ماآدري عن اي شي صار ​

ودي افهم ليش فتح الجروح وإعاده الشي اللي راح! مب فاهمه هالسالفه صراحه ​

وايد دول من قبل الكويت مرت بهالشي وليحين تعاني منه وماآجوف انهم يطرون هالشي كثر الكويتيين اللي انغزو لمده ماتزيد عن سنه ​

مثال بنات فلسطينيات لمن اسولف وياهم ماآجوفهم زعلانين ع حد افقدوه ولا شي جذي كله يقولون لي بس شهداء عند الله​

ونفس الشي السورييين ،، اخبر البروفسر مالي بآميركا كان سوري وواحد من اهله توفى كان متقبل الوضع بشكل وايد غريب ​

ويوم سآلته قالي لآنه شهيد وان شاء الله مثواه الجنه ​

وحده عراقيه بعد انذبحو وايد من اهلها ومع هذا حسيتها مب وايد متآثره او بالآصح ماتتكلم بآسى كبير عن هالموضوع ​

ودول وايد بعد من فتره مرت عليها هالسالفه من قتل واشيا جذي ماآجوفهم بعد يسوون اللي الكويتيين يسوونه من اعاده تذكر فتره ​

مب حلوه بالتاريح والخ ​

مثال قريب بعد مثل سوريا الليبيين اللي اعرفهم ماقد تكلمو معاي وهم زعلانين ع اللي يصير ف بلادهم :1 ​

مب كل الكويتيات اللي عرفتهم بعد ​

يعطيكم العافيه وان شاء الله كل شخص مات بذيج الفتره شهيد عند رب العالمين و الله لايعيد هالشي لا عليكم ولا يرويه اي شخص بهالدنيا ​

أنقر للتوسيع...

محبه الهآشمي قال:

الي ايده بالماي مو مثل الي ايده بالنار ..

الاخت الي فوقي انا اماراتيه ومع الكويت قلبا وقالبا ..
ولهم حق يذكرون كل لحظه بالغزو
لانها كانت لحظة غدر من طاغيه !!!!!!!!!!!!!!!!!!!!!!!!!!!!!!!!!!!!!!!!!!!!

الله لا يعودها من ايام ..

ولهم حق يفتحون الدفاتر الجديمه !

ما تقدرين تقارنين الكويت بأي دولة ثانيه مع احترامي لج ..
لان الكويت انغدر فيها ... ومن الجار العربي المسلم !!!!



كلامها نرفزني الصراحه اسمحولي

أنقر للتوسيع...

VET-Nour قال:

شكو السالفه غلط
قبل الغزو باسبوع صدام كرّم الشيخ جآبر ,, و بعدها باسبوع غزاها فجأه و الشيخ جابر الله يرحمه كان مو راضي يطلع من الكويت كلشش ويحاولون فيه حتا ما طلع من الكويت الا العصر راح السعوديه ,
و الغزو صار فجر الخميس علا كلام امي , < جدي وجدتي و خالاتي و خوالي يعني كلهم طلعو من الكويت بعد شهرين < يحبون الكويت

يقولكم العراقيين كلو نيفيآ عبآلهم قيمر هههههههاي

مره بماليزيا كان السواق الي مأجرينه عراقي هههههههه
مسكين جننته اقط نغزات و اهو ساكت جان آخر شيء قالي ولج سكتيي خلاص اني افهم الحجي الي تقولينه خبلتيني منو قالج اني جندي بالغزو ههههههههههههههههااي
واليوم الي وراه قاعدين بالسياره ولا اخوي اصغير يقول طاع الجلب الخكري شيسوي كاااااااك < ربع ابوي كله يقولون عن جلب الزينه خكري ههههههههههههههه امبييييه الصبي تنح وانصدم هههههههههههههههههههه شكله يضحك جنه صاكينه كف ,, << صدام مسميهم خكريين ومادحهم وجي هههههههههههههههههههههههههههههههههههههههههههههههههههههههه

أنقر للتوسيع...

om al ghaleen قال:

الموضوع وايد مأثر فيني وقريت كل السوالف
الصراحه ماقصروا اهل الخليج كلهم ع الراس

واللي تقول اذيتنا بالغزو وليش فلسطين و و الخ
ماسوا مثلكم

لانه كانت الكويت عروس الخليج
بلد العز والكرامه
الكويتي ينولد ومعاشه يمشي له
مايرضى بالمهانه
سنه شيعه بدو حضر كانوا ايد وحده

بتكلم عن الغزو كنت وقتها بالروضه
بس افهم شنو صاير الخوف والرعب
واهالينا كانوا يتكلمون من غير خوف
يعني وقتها الصغير والكبير عايش نفس الموقف "

برد ع الاسئله والسموحه اذا كثرت سوالف بس فيه بنات حابين يعرفون كل شي عن الغزو واولهم عيالي حاليا

شنو كنتي اتسوين بوقت الغزو ؟؟
قعدت من النوم واسمع امي تكلم خالتي الكبيره وقاعده تقولها انه صدام دش بداباباته ( حتى سألت امي شنو دبابه )
وبعد ماسكرت التلفون رحنا بيت خالتي في بيان ق 12 لانه احنا بقطعه 2 قبالنا قصر بيان وكان كله عراقيين وصوت المدافع ماوقفت
تمينا قاعدين عندهم 3 ايام بعدها رحنا بيت كانوا اصحابه مسافرين وصوا ابوي نقعد فيه لانه فيه سرداب
( عيال الكندري) والنعم فيهم


لما دريتي شسويتي ؟؟
طبعا كنا نرجف من الخوف الاصوات كانت مرعبه دبابات واصوات الرشاش والهيليكوبتر احسه بيطح في بيتنا حتى كنت ماادخل كله قاعده برا بالحوش ع الدري وابجي



الاشياء اللي لايمكن انساها لمن رحنا _بيت القرين
_الغمامه السوده اللي صارت بوضع النهار وكانت الدنيا ظلمه
_ كنا 12 عايله بسرداب واحد
_ امي كانت ترضع اختي ونشف صدرها
_ توفى يدي من صوت الانفجار والاسبوع اللي بعده توفى يدي الثاني
_ شفت بعيني الثنتين شلون يسحبون ولد خالتي ولما رجع لنا كان جسمه كله حروق كانوا يطفون الزقاره بجسمه واظافره مشلعه وماكان يسمع بعد مارجع سمعه كان خفيف كانوا يطقون راسه بالطوفه ويحطون الرشاش بحلجه ويهددونه ( تعذيب نفسي )
_ اتذكر نطلع مع ابوي مع خواتي وندخل البيوت ونسحب الاوارق المهمه وكانت فوضى ومكسره
_ لما نطلع بالسياره اتم حاطه ايدي على راسي لانه متوقع اي قنبله او فخ ممكن تدوسه السياره
_ تهديد الكيماوي هذا بس كان شي مروع ومفزع ابوي كان يتوضا ويتشهد قبل لاينام


كل هالاشياءات ممكن تكون ولاشي بالنسبه للي شافو الكبار

أنقر للتوسيع...

nanoosa قال:

انا انولدت عقب التحرير بسنة

امي و ابوي سولفولي

الوالدة كانت نايمة و فجأة عمتها تقعدها و تقعد خالاتي تقول قومو العراق غزونا

و يقولون ان اول الايام كانو الكويتيين مو مستوعبين و كانو يردون على الجنود و يرفعون صوتهم حسبالهم ما يسوون شي

امي مرة كانت قاعدة بالبيت و دقت وحدة على تلفون البيت تسأل امي اذا اهي كويتية ولا لأ لأنها تبي امي تروح معاهم المقاومة كانو يدقون على اكثر من بيت .. امي قالت لها اشوف اقول حق ريلي اذا يخليني ولا لأ جان تعطيها العنوان بس امي ما راحت ابوي ما خلاها

و بتاريخ 8-8-1990 سوو اول مضاهرة حسبالهم الجنود بيخافون

بعد عمري قعدو يصرخون و شايلين اعلام الكويت و صور بابا جابر و بابا سعد الله يرحمهم و يسبون صدام و ان الشعب ما يبونه بالديرة

و فجأة هاللي ما عندهم رحمة ولا ضمير رموهم و طاحو على ما اعتقد 3 او 4 شهيدات كويتيات

امي لي الحين تقول لو انا سمعت كلامهم و رحت معاهم جان انا مستشهدة الحين

امي و ابوي و ام ابوي و ابو ابوي (يداني) و عماتي و عمامي كلهم قعدو بالكويت ما طلعو

و خالاتي و خوالي و يدتي و يدي راحو السعودية

يدتي (ام امي) تقول يوم كانو بالسعودية مسوين غدا امي تحبه تقول انسدت نفسي تذكرتها (حسبالها امي ماتت)

و ابوي قالي ان بغو العراقيين يفجرون سيارته و اهو فيها نسيت شنو لقو عنده و عصبو جان يدوس و رمو سيارته بس الحمدلله الله عداه الشر

و ابوي يشتغل بالمطافي .. مرة الجنود حرقو بيت عايلة لأنهم لقو صور و اعلام الكويت فيه قامو و حرقوه

يوم وصل ابوي و ربعه علشان يطفون البيت الجنود وقفوهم قالو لهم صبر تونا حارقين البيت بعد شوي طفوه (شوفو الحقارة!!)

و عقب 7 شهور منثبرين هالكواولة بديرتنا .. كانت الدنيا سودة بعز الظهر لأن حرقو الابار يا عل يحترق راسهم

و يوم تحررت الكويت امي و ابوي راحو السعودية علشان امي تشوف اهلها اللي صارلها 7 اشهر ما شافتهم

شافوها ويهها غامج من الدخان اللي بالكويت حتى لما تتسبح يكون الماي وصخ!!!

انا احمد ربي اني ما كنت موجودة وقت الغزو .. اذا انا الحين و متأثرة و كلله قاعدة اتبجبج .. هالدور لاحقة عليه؟! عز الله تعقدت

و اللي يترحمون على صدام يعلكم ما تربحون و يصير فيكم اكثر من اللي صار فينا

عسى الله يحفظ ديرتنا الكويت من النفوس الحاقدة قولو آمين

أنقر للتوسيع...

ازهااار قال:

انا من السعودية
صج انها ايام رعب
مع ان احنا بالسعوديه كيف عاد اهل الكويت

بس صراحة اللي سمعته
ان يوم صارت حرب العراق مع ايران اكويتين ساعدوا صدام وتبرعوا له بفلوسهم وذهبهم
مادري ليش يعينون هالظالم على الايرانين المساكين

أنقر للتوسيع...