(السلام عليكم ورحمة الله وبركاته)
*الحمدلله الذي اطعمني هذا الطعام ورزقنيه من غير حول مني ولا قوة *
اشلونكم حبيباات قلبي
ياعسى ايامكم خير وفرح ومسره ان شاء الله
هالحمسه كانت عشانا امس مع خبز لبناني حاااار
ناطعه ولذيذه
تقدرين تاكلينها مع الخبز..سواء غدا او عشا
ولا مع العيش المشخول
ولا تحشين فيها صمون او توست اوخبز..وتسوينها ساندويتشات لذييذه.
وعلى فكره اذا حطيتي هالحمسه بالثلاجه واكلتيها من باجر..راح تلقين طعمها احلى ..
وعلى فكره اذا حطيتي هالحمسه بالثلاجه واكلتيها من باجر..راح تلقين طعمها احلى ..
وتقدرين تاكلينها بارده او تسخنينها..
نبتدي باسم الله
اول خطوه..نقطع الباذنجان للحجم الي نبيه..انا قصيته للحجم الي بالصوره..وخليت معاه القشر..احبه جذي..وتقدرين تقصينه بدون قشره..لحجم اصغر..براحتج..
ننقعه بماي حاطين فيه حوالي ملعقة ونص اكل ملح لمدة ربع ساعه علشان مايشرب دهن بالقلاي..وعقب تجففينه بورق عن ماي النقع
بمقلاة نحط الدهن..مو شرط كميه كبيره..المهم ان يلامس كل الباذنجان بالمقلاه..ونقلى الباذنجان
واذا شفنا الباذنجان تغير لونه للاشقر المحمر وذبل ..نطلعه على جنب
بجدر نحط حوالي اربع ملاعق اكل زيت..ونضيف بصلتين مقصصين
ونحمس ليما يذبل البصل ويتشوقر
عقب نضيف كمية زينه من الثوم والزنجبيل ونحمس على نار هاديه لا يحترق الثوم
نضيف طماطه كبيره مقصصه على حمسة البصل والثوم والزنجبيل
ونحاول نهرس الطماط بالقفشه (الملعقه ) واحنا نحمس
وضفت ورق الغار..ما ادري اذا الاسم صحيح..المهم هو الورق الهندي الاخضر الي يعطي الريحه الحلوة والطعم المميز بالاكل.
ونضيف نص ملعقة اكل كزبره مطحونه وربع ملعقة اكل كمون ناعم وملعقة اكل بهارات مشكله ونص ملعقة اكل فلفل اسود وربع ملعقة اكل كركم ناعم ..ونحمس نخلي البهارات تمتزج بالخليط..وطبعا على نار متوسطه
نضيف ملعقتين اكل معجون طماط وملعقة اكل كاتشاب ومكعب ماجي ورشة شكر ( سكر ) وملح حسب الذوق ...ونحمس شوي
ونزيد قلاص ماي على الحمسه..ونخليها تتسبك على نار هاديه لمدة خمس دقايق
عقب نضيف نص ملعقة اكل من دبس الرمان...
ونحرك شوي ونضيف قطع الباذنجان الي قلينها ..ونوزعها بالجدر..ونحرك بخفه بملعقه نخلي الباذنجان يتشرب الصوص الي بالجدر
ونوطي على النار حيل.. ونغطي الجدر..ونخلي الحمسه تتسبك لمدة عشر دقايق على نار هاديه.
وعقب تذوقين احلى حمسة باذنجان
تفضلوا...هني وعافيه على قلوبكم...
واقبلوا تحيااتي..
بنتكم
حلوة ومملوحة الكويت
التعديل الأخير:
