اليوم يا عيالي و احفادي يايه انصحكم و افيدكم من خبرتي الطويله بالحياة
النصايح اليوم حقكم يا شبـــــــــاب
لكم يا يمــه يا الشباب ياللي توكم متزوجين و ماتعرفون شي
هذي النصايح يا عيالي من خبــره طويله عريضه
اذا سويتوها يا عيال صدقوني بتعيشوون مثل ماعشنا قبل بسلام و محبه
و بتقل حالات هالطلاق اللي انشووفها هالايام و العياذ بالله :
اذا دشيت البيت يا يمه دور حرمتك اول شي مو سيده على الرموت كنترول و الجريده .
اسألها يا امي شنو سوت بدوامها شلون كان يومها مو تعفس الويه جنك شام ريحة نقرور ناسينه بره الفريزر
لي حجت مرتك اسمعها و التفت عليها واهيا تتحجى مو عينك على التلفزيون و اللي يرقصون على روتانا كليب
قولها حجي حلو قولها يا نور عيني يا الغاليه يا الحبيبه مثل حجي اول يا زينه و يا حلاته مو بس شاطر اتنازر عليها و اتنافخ جنك مكيف متروس غبار
قولها كلمه طيبه اذا سوت لك شي يا امي ترا الكلمه الطيبه صدقه مشكوره - يعطيج العافيه - يزاج الله خير اذا كنت ملتحي مثلا
ولها صايره اشحلاتج اليوم ,شالزين ,شالحلات ميخالف حتى لو اهيا سحت ميخالف جاملها هذي ام عيالك شدعوه عاد انت وائل كفوري
لي اطبخت لك امدح اكلها مو بس اتلط الاكل و اتمش ايدك بالطوفه هذا اذا اطبخت هالايام الخدم يطبخون,
عاد انت قولها يعطيج العافيه اللي علمتي الخدامه هالاكلات الحلوه .الخدامه اشعرفها هالسوالف الا من مرتك ؟ فتح مخك شويه
.
تذكــر عيد ميلادها عيد زواجكم اشتر لها هديه عشان اتفرح قلبها مسكينه تذكر اشكثر غثيتها من خذيتها من بيت ابوها
لي بغيت تطلع قولها يا ام فلان ترا بروح المكان الفلاني تبين شي تامرني شي ,صج انك بتجذب ماراح اتقول المكان الصجي اللي بتروح له بس يالله اسمك قلت لها
لي طلعت معاها امسك رووحك و عن التخزز مايبقا وحده الا و حفظت شنو لابسه داش مسابقه ؟ اشكره واهيا وياك؟؟ مو انت معاها و من وراها اتطالع عاد احترمها شويه
فقيره لازم اتطلع الطلعه من جبدها ؟
لي شفتها متظايقه يا امي و صاكه فيها الدنيا مو اتزيدها و اتقول (هذا انتي كله ماده البوز) اسالها اشفيج شنو اللي مظيق خلقج عسا ماشر و من هالحجي الطيب
لي تاخرت بره دق عليها قولها ترا انا بتاخر مو طناش حس ان وراك ادميه تنطرك
اذا قالت لك ابي شي و انت ما تقدر اشرح لها ليش ماتقدر مو تعفس الويه و بس
.
مثل ما تخدم ربعك و تركض لهم و اتدق الصدر اخدم مرتك اهيا اقرب لك من عوير و زوير
.
تقرب منها و حسسها انك يمها و معاها بالدنيا مو اهيا بالصمان و انت بعمان
.
صدقوني يا عيالي اذا سويتوا جذيــه بتقل المشاكل بينكم و راح ترتاحون و اتقل نسبة الطلاق بالكويت اللي زادت و العياذ بالله .. و لا اتقوولون
انا حاطه على الرياييل و ماخذه عنهم فكره غلط لا يا امي ترا الحريم والريايل فيهم الزين و فيهم الشين وترا انا مو ناسيه الحريم عندي نصايح للحــريم نطروها قريب انشالله
يدتكم سباجــه
اي هين الرياييل يسوون جذيه ؟؟؟؟؟
منقوووووووووووووووووووووووول 
31-03-2006, 09:17:00 AM
اشتراك سيدة أعمال
موضوع منتديات 
العرض العادي
